Agimtuod Dagiti Agtutubo . . .

Kasano a Maparmekko Daytoy nga Aramid?

“Rinugiak ti panangay-ayamko iti mabagbagik idi agtawenak iti walo. Idi agangay, naadalko no ania ti panangmatmat ti Dios iti daytoy nga aramid. Karimonko ti bagik tunggal maaramidko daytoy. ‘Kasano koma a maipategnak ti Dios?’ iyimtuodko iti bagik. Mariknak nga awan namnamak a makastrek iti baro a lubong ti Dios.”—Luiz.a

KAS ken Luiz, nalabit a nayugalimon ti masturbasion. Ammom a maay-ayo kenka ni Jehova no liklikam dayta a pagannayasan ken watwatem ti panagteppel, maysa a bunga ti nasantuan nga espiritu ti Dios. (Galacia 5:22, 23; 2 Pedro 1:5, 6) Ngem no dadduma, maaramidmo latta dayta. Kalpasan ti tunggal panangaramidmo iti dayta, mariknam nga awanen ti namnamam a makapagbalbaliw, a dimo kabaelan nga annuroten dagiti nalinteg a pagalagadan ti Dios.

Kasta ti mismo a narikna ti agtutubo a ni Pedro. “Tunggal aramidek dayta, karimonko ti bagik,” kunana. “Iti panagriknak, diak pulos maikaro ti inaramidko. Marigatanak nga agkararag. Kastoy ti rugi dagiti kararagko: ‘Jehova, diak ammo no ipangagmo daytoy a kararag, ngem . . .’” Kasta met ti narikna ni André. “Minatmatak ti bagik a managinsisingpet,” kunana. “Nagrigat la ketdi a sanguen ti agmalem. Marigatanak a tumabuno kadagiti Nakristianuan a gimong wenno makiraman iti ministerio.”

No ti mariknam ket umasping iti narikna da Luiz, Pedro, wenno André, dika koma maawanan iti namnama. Saanka nga agmaymaysa, ken adda namnamam a makapagbalbaliw! Adu nga agtutubo―ken natataengan―ti nakidangadang iti masturbasion ket naparmekda dayta. Maaramidmo met dayta.b

Panangtaming iti Masidsidir a Konsiensia

Kas nadakamat itay, masansan a masidir ti konsiensia dagidiay naigamer iti masturbasion. Awan duadua a matignayka a mangiwaksi iti dayta nga aramid no makariknaka iti ‘liday iti nadiosan a pamay-an.’ (2 Corinto 7:11) Ngem mabalin met a makadangran no nalabes ti pannakasidir ti konsiensia. Mabalin a nakaro ti pannakaupaymo nga uray la kayatmon ti sumuko.―Proverbio 24:10.

Gapuna, ikagumaam a matmatan a sititimbeng dayta a banag. Ti masturbasion ket maysa a kita ti kinarugit. Pagbalinennaka nga ‘adipen kadagiti nadumaduma a tarigagay ken ragragsak,’ ken patanorenna kenka dagiti di umiso a panangmatmat. (Tito 3:3) Nupay kasta, ti panangay-ayammo iti mabagbagim ket saan a maibilang a nakaro a seksual nga imoralidad, kas iti pannakiabig. (Efeso 4:19) Gapuna, no parikutmo ti masturbasion, dimo koma panunoten a nakaaramidka iti saanen a mapakawan a basol. Ti napateg ket pakidangadangam dayta a pagannayasan ken dika pulos sumuksuko!

No dadduma, makapaupay no naulitmo dayta. No mapasamak dayta, laglagipem ti kuna ti Proverbio 24:16: “Daydiay nalinteg mabalin a matuang iti uray mamimpito a daras, ket sigurado a tumakderto; ngem dagidiay nadangkes maitibkoldanto babaen iti didigra.” Ti temporario a panagkapuy dina kayat a sawen a dakeskan a tao. Isu a dika sumuksuko. Imbes ketdi, panunotem no ania ti puon ken gapu a naaramidmo manen dayta, ket ikagumaamon a liklikan nga uliten.

Imbes nga itultuloymo a babalawen ta bagim gapu iti parikutmo, utobem a naimbag ti ayat ken asi ti Dios. Ni salmista a David, a nakaaramid met iti basol, kinunana: “Kas iti maysa nga ama mangipakita iti asi iti annakna, ni Jehova nangipakita iti asi kadagidiay agbuteng kenkuana. Ta pagaammona unay ti pannakapormatayo, a laglagipenna a tapoktayo.” (Salmo 103:13, 14) Wen, ikabilangan ni Jehova ti kinaimperpektotayo ken ‘sisasagana a mangpakawan’ no makabasoltayo. (Salmo 86:5) Iti sabali a bangir, kayatna nga ikagumaantayo ti agbalbaliw.

Ania dagiti praktikal nga addang a mabalinmo nga aramiden tapno maparmekmo dayta nga aramid ket maliklikam nga uliten?

Ti Pateg ti Panangipudno

Nupay nawaya itan a mapagsasaritaan ti topiko a sekso kadagiti adu a pagilian, alusiisen latta ti adu a tattao a pagsaritaan ti maipapan iti sekso iti serioso, nadayaw a wagas. Mabalin a mabainka a mangisarita iti dayta uray iti mapagpiaram a tao. Maysa a Kristiano a nakidangadang iti masturbasion iti adu a tawen ti nagkomento: “Inturturedko la koman nga impudno dayta idi agtutuboak pay! Adu a tawen a pinarigatnak ti maburburibor a konsiensiak, ken dinangranna ti relasionko kadagiti dadduma, ken kangrunaan iti amin, ken ni Jehova.”

Siasino ti rumbeng nga asitgam? Ti kasayaatan ket daydiay nataengan iti naespirituan, nangnangruna ti nagannakmo. Mabalinmo nga ibaga: “Mabalin kadi a kasaritakayo maipapan iti parikutko a mangburburibor unay kaniak?”

Inkeddeng ni Mário nga ibaga ken ni tatangna, a pudno a mannakipagrikna ken mannakaawat. Inaminna pay ketdi ken ni Mário nga uray isu a mismo, nakidangadang met iti kasta nga aramid idi isu ket ubing pay. “Nakapabileg unay kaniak ti sinseridad ken kinaprangka ni tatangko,” kuna ni Mário. “Napanunotko a no naparmekna dayta, kabaelak met ngarud. Natukay ti riknak iti kababalin nga impakita ni tatangko nga uray la naganug-ogak.”

Inturtured ni André ti nakisarita iti maysa a Kristiano a panglakayen, ket maragsakan ta inaramidna ti kasta.c “Nakalua ti panglakayen bayat nga im-imdengannak,” kuna ni André. “Idi nalpasko ti nagsao, impanamnamana kaniak ti panagayat ni Jehova. Imbagana a gagangay laeng ti parikutko. Inkarina a komustaennanto ti panagrang-ayko ken mangtedto pay kadagiti kanayonan nga impormasion manipud kadagiti pagbasaan a naibatay iti Biblia. Iti pannakisaritak kenkuana, inkeddengko nga itultuloy ti pannakidangadangko―uray pay no mailaw-ankonto manen ti makaaramid iti kasta.”

Kas kada Mário ken André, adda dagiti sidadaan a tulong tapno maparmekmo ti nayugalim a panangay-ayam iti mabagbagim. Surotenyo ti balakad a naibalabala iti kahon nga “Agtignayka!” Wen, mangnamnamaka a kabaelam a parmeken dayta!

Adu pay nga artikulo manipud kadagiti serye ti “Agimtuod Dagiti Agtutubo . . .” ti masarakan iti Web site a www.watchtower.org/ype

[Footnotes]

PAGPAMPANUNOTAN

◼ Apay a napateg a laglagipen a “sisasagana a mamakawan” ni Jehova?—Salmo 86:5.

◼ Ania dagiti aramidem tapno maparmekmo ti masturbasion?

◼ Apay a dika koma mabain nga agpatulong?

◼ Ania ti kasayaatan nga aramidem tapno mapagtalinaedmo ti isipmo kadagiti bambanag a nasin-aw?

[Kahon/Ladawan iti panid 19]

Ti Pannakaulit Dina Kaipapanan a Napaayka!

Naglaka la ketdi a panunoten: ‘Napaayak, isu a sumukoakon.’ Iwaksim dayta a panangmatmat. Dimo panunoten a napaayka gapu laeng iti naminsan wenno sumagmamano pay ketdi a daras a naulitmo manen dayta.

Usigem daytoy nga ilustrasion: No umulika iti agdan ket naigaliska iti maysa wenno dua a tukad, ibagam kadi, ‘Agsubliak laengen iti kadsaaran ket mangrugiak manen’? Siempre, saan! Apay ngarud koma nga iyaplikarmo ti kasta a panagrasrason no iti pannakidangadangmo kadagiti dakes a nakairuamam?

Masansan a makonsiensiaka no maulitmo dayta. Mabalin pay ketdi a nakaro ti pannakakonsiensiam nga uray la ipapanmo a nagdakes, nakapuy, ken saanka a maikari iti nasayaat a pannakatrato. Dimo ipalubos a lapunosennaka ti kasta a nalabes a pannakasidir ti konsiensiam. Pakapuyenna ngamin ti pakinakemmo a mangparmek iti parikutmo. Sa laglagipem daytoy: Ti katan-okan a tao a nagbiag ditoy daga, ni Jesu-Kristo, immay tapno subbotenna dagiti managbasol, saan a dagiti perpekto a tattao. Isu nga awan kadatayo ti saan nga agbasol iti daytoy a panawen.—Manipud iti Agriingkayo! nga Abril 8, 1991, panid 15.

[Kahon/Ladawan iti panid 20]

Agtignayka!

◼ Ikagumaam a panunoten ti sabali a bambanag.—Filipos 4:8.

◼ Liklikam a buyaen dagiti bambanag a mangriing kadagiti di umiso a derrep.—Salmo 119:37.

◼ Ikararagmo ti “pannakabalin a nalablabes ngem ti gagangay.”—2 Corinto 4:7.

◼ Agbalinka nga okupado kadagiti Nakristianuan nga aktibidad.—1 Corinto 15:58.

[Kahon/Ladawan iti panid 20]

Kanayonan a Tulong

Para iti kanayonan nga impormasion no kasano a maparmek ti masturbasion, kitaem ti kapitulo 25 ken 26 ti libro a Dagiti Saludsod nga Iyimtuod ti Agtutubo . . . Dagiti Sungbat nga Epektibo, nga impablaak dagiti Saksi ni Jehova.