Dagiti Maudi nga Aldaw—Ania ti Mapasamak Kalpasanna?
AGKINTAYEG ti dadduma a tattao no panunotenda ti maipapan “kadagiti maudi nga aldaw.” (2 Timoteo 3:1) Bin-ig a tiempo ti rigat ti mailadawanda iti panunotda. Ngem apay nga iti naglabas a pampanawen, nagadu ti nangur-uray iti dayta a tiempo? Ngamin, ti iyaay dagiti maudi nga aldaw ipasimudaagna met nga asidegen a dumteng dagiti nasayaat a kasasaad.
Kas pagarigan, kombinsido idi ni Sir Isaac Newton a ti tiempo ti panungpalan ket agresulta iti baro a panawen ti sangalubongan a talna ken kinarang-ay iti sidong ti Sangaribu a Tawen a Panagturay ti Pagarian ti Dios. Kinunana nga iti dayta a tiempo, matungpalton ti naipadto iti Mikias 4:3, agraman ti Isaias 2:4: “Kasapulanto a pitpitenda dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng. Saandanto a mangitag-ay iti kampilan, nasion maibusor iti nasion, saandanto met a sursuruenen ti pannakigubat.”
Idi nasao ni Jesus ti tiempo ti panungpalan, indagadagna kadagiti pasurotna nga agbalinda a positibo. Kalpasan ti panangdakamatna iti panagraira ti rigat, danag, ken buteng bayat ti dakkel a rigat, kinunana: “Bayat a mangrugi a mapasamak dagitoy a banag, tumakderkayo a sililinteg ket itangadyo dagiti uloyo, agsipud ta ti pannakaispalyo umas-asidegen.” (Lucas 21:28) Pannakaispal manipud iti ania?
Dagiti Kari ti Dios
Ti gubat, panagdadangadang iti pagilian, krimen, kinaranggas, ken bisin ti sumagmamano kadagiti mangparparigat ita iti sangatauan ken makagapu a minilion a tattao ti mabutbuteng. Adda kadi aniaman kadagita a mangap-apektar kenka? No kasta, imutektekam dagitoy a kari ti Dios:
“Iti apagbiit laengen a kanito, ket daydiay nadangkes awanton . . . Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:10, 11.
“Ti ilik agnaedto iti natalna a disso a pagyanan ken kadagiti pagtaengan ti naan-anay a panagtalek ken kadagiti di masingsinga a lugar a paginanaan.”—Isaias 32:18.
“[Ni Jehova] pagsardengenna dagiti gubat agingga iti ungto ti daga. Rungrungduenna ti bai ket putedputedenna ti pika; dagiti kareson ipuorna iti apuy.”—Salmo 46:9.
“Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.”—Mikias 4:4.
“Maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”—Salmo 72:16.
“No maipapan iti daydiay umim-imdeng kaniak, agtaengto iti kinatalged ket saanto a masinga manipud alinggaget ti didigra.”—Proverbio 1:33.
Uray no addatayo iti lugar a medio nasayaat ti kasasaad ti biag, awan siasinoman kadatayo ti makaliklik iti sakit ken ipapatay. Awanto metten dagita iti baro a lubong ti Dios. No kasta, mabalintay a padaanan ti pannakakitatay manen kadagiti pimmusay nga ay-ayatentayo iti biag. Utobem dagiti sumaganad:
“Awanto ti agtataeng nga agkuna: ‘Masakitak.’”—Isaias 33:24.
“[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:4.
“Kas ti maudi a kabusor, ni patay mapukawto.”—1 Corinto 15:26.
“Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuarda.”—Juan 5:28, 29.
Nagsayaat ti pananggupgop amin ni apostol Pablo kadagita idi insuratna: “Adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.” (2 Pedro 3:13) Tapno agari ti kinalinteg iti intero a daga, masapul a mapukaw ti asinoman a mangdadael iti dayta a kasasaad. Masapul a mapukaw met dagiti nasion ita, a makinggapuanan iti nakaad-adu a riribuk ken panangpapatay babaen iti inaagum a panagreggetda agpaay iti pagimbaganda. Amin a turay ditoy daga ket sukatanto ti Pagarian ti Dios nga iturayan ni Kristo. Mainaig iti dayta a turay, naipanamnama kadatayo: “Ti kinaruay ti naprinsipean a panagturay ken ti kappia awanto ti ngudona, iti trono ni David ken iti pagarianna tapno ipasdek a sititibker dayta ken tapno taginayonen dayta babaen ti kinahustisia ken babaen ti kinalinteg, manipud itan ken agingga iti tiempo a di nakedngan. Ti mismo a regta ni Jehova ti buybuyot aramidennanto daytoy.”—Isaias 9:7.
Mabalinmo a tagiragsaken dagitoy a namnama, yantangay ipatalged kadatayo ti Biblia: “Ti pagayatan [ti Dios] ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Dimo itantantan. Gun-odemon ti pannakaammo a biag nga agnanayon ti katupagna. (Juan 17:3) Rugiam daytan babaen ti pannakiumanmo kadagiti nangipablaak iti daytoy a magasin ket kiddawem ti libre a panangyadalda kenka iti Biblia.
[Dagiti Ladawan iti panid 8, 9]
Mabalinmo a namnamaen ti agbiag nga agnanayon nga addaan talna ken perpekto a salun-at iti asidegen a Paraiso ditoy daga