Dagiti Ubbing a Mangparagsak iti Dios

SIASINO ti ammom nga ubing ditoy daga a kangrunaan a nangparagsak ken Jehova?— Ti Anakna a ni Jesus. Pagsaritaanta dagiti inaramid ni Jesus a nangparagsak iti nailangitan nga Amana.

Ti pagnanaedan idi ti pamilia ni Jesus ket agarup tallo nga aldaw a daliasaten manipud Jerusalem, nga ayan ti nagpintas a templo ni Jehova. Inawagan ni Jesus dayta a templo a “balay ni Amak.” Tinawen a mapmapan sadiay ni Jesus ken ti pamiliana tapno tabunuanda ti Paskua.

Iti maysa a tawen, idi agedad ni Jesus iti 12, agaw-awid idin ti pamiliana kalpasan ti Paskua. Nadlawda laengen nga awan ni Jesus kadagiti kabagian ken gagayyemda idi simmardengdan iti lugar a pagturoganda iti dayta a rabii. Nagsubli ngarud a dagus da Maria ken Jose idiay Jerusalem tapno birokenda ni Jesus. Sadino ti ammom nga ayanna?—

Nabirokanda ni Jesus idiay templo. Dumdumngeg kadagiti mannursuro, ken agsalsaludsod kadakuada. Ket no agsaludsodda kenkuana, kanayon a masungbatanna. Masmasdaawda kadagiti nagsayaat a sungbatna. Matarusam kadi no apay a naragsakan ti Dios iti Anakna?—

Siempre, idi nabirokanen da Maria ken Jose ni Jesus, nabang-aranda. Ngem saan a nagdanag ni Jesus. Ammona a natalged ti agyan iti templo. Gapuna, dinamagna: “Saanyo aya nga ammo a masapul nga addaak iti balay ni Amak?” Ammona a balay ti Dios daydiay a templo, ket naragsakan iti kaaddana sadiay.

Kalpasanna, inyawid da Maria ken Jose ti 12 ti tawenna a ni Jesus idiay Nazaret. Panagkunam, ania ngata ti kababalin ni Jesus kadagiti dadakkelna?— Kuna ti Biblia a “nagtultuloy a nagpasakup kadakuada.” Ania ti ammom a kaipapanan dayta?— Kayatna a sawen a nagtulnog kadakuada. Wen, nagtulnog kadagiti impaaramid kenkuana dagiti dadakkelna, a kas koma ti panagsakdo iti danum.​​—Lucas 2:​41-​52.

No kasta, panunotem daytoy: Nupay perpekto ni Jesus, nagtulnog kadagiti imperpekto a dadakkelna. Naragsakan kadi ti Dios iti daytoy?— Sigurado a naragsakan, yantangay ibilin ti Sao ti Dios kadagiti ubbing: “Agtulnogkayo kadagiti nagannak kadakayo.” (Efeso 6:1) Maparagsakmo met ti Dios no agtulnogka kadagiti dadakkelmo, a kas iti inaramid ni Jesus.

Ti maysa pay a pamay-an tapno maparagsakmo ti Dios ket babaen ti panangibagam kadagiti sabsabali ti maipapan kenkuana. Ngem mabalin a kunaen dagiti dadduma a saan a rumbeng nga aramiden daytoy dagiti ubbing. Ngem idi pinadas dagiti tattao nga atipaen dagiti ubbing a mangaramid iti kastoy, kinuna ni Jesus: ‘Saanyo aya a pulos a nabasa iti Kasuratan, “Manipud iti ngiwat dagiti babassit nga ubbing mangipaay ti Dios iti dayaw”?’ (Mateo 21:16) No kasta, mabalintayo amin nga ibaga kadagiti sabsabali ti maipapan ken Jehova ken ti nakaskasdaaw a kina-Diosna, no talaga a kayattayo. Ket no aramidentayo dayta, maparagsaktayo ti Dios.

Sadino ti pakasursuruantayo iti bambanag maipapan iti Dios a mabalintayo nga isarita kadagiti sabsabali?— Iti panagadaltayo iti Biblia iti pagtaengan. Ngem ad-adu pay ti masursurotayo iti pagad-adalan dagiti tattao ti Dios. Ngem kasanotayo nga ammo no siasino dagiti tattaona?—

Ania aya ti ar-aramiden dagita a tattao kadagiti gimongda? Talaga kadi nga adda iti Biblia dagiti isursuroda? Dayta kadi ti basbasaen ken pagsasaritaanda? Maimdengantayo ti Dios babaen iti dayta, di ngamin?— Ket saan aya a kadagiti Nakristianuan a gimong ti namnamaentayo a pakangngegan kadagiti ibagbaga ti Dios?— Ngem ania ngay no kuna dagiti tattao a saan a nasken a surotem ti ibagbaga ti Biblia? Maikunam kadi a dagita ti adipen ti Dios?—

Panunotem met daytoy. Kuna ti Biblia a dagiti tattao ti Dios ket agbalinda nga “ili a maipaay iti naganna.” (Aramid 15:14) Yantangay Jehova ti nagan ti Dios, mabalintayo nga isaludsod kadagiti tattao no ni Jehova ti Diosda. No kunada a saan, ammotayon a saan a dagita ti tattaona. Dagiti tattao ti Dios ibagbagada met kadagiti dadduma ti maipapan iti Pagarian ti Dios. Ket ipakpakitada ti ayatda iti Dios babaen ti panagtulnogda kadagiti bilinna.​​—1 Juan 5:3.

No adda am-ammom a tattao a mangar-aramid amin kadagita, isuda ngarud ti pakitimpuyogam nga agdayaw iti Dios. Masapul nga agimdengka a naimbag kadagita a gimong ken sumungbatka no adda maisaludsod. Kasta ti inaramid ni Jesus idi adda iti balay ti Dios. Ket no aramidem dagita, maparagsakmo ti Dios, a kas iti inaramid ni Jesus.

Adda kadi mapanunotmo a dadduma pay nga ubbing a nadakamat iti Biblia a nangparagsak iti Dios?— Maysa ni Timoteo a naisangsangayan a pagarigan. Saan nga agdaydayaw ken Jehova ti amana. Ngem agdaydayaw ken Jehova ni nanangna a Eunice ken kasta met ni lolana a Loida. Nagimdeng ni Timoteo kadakuada ket nakasursuro maipapan ken Jehova.

Idi dakkelen ni Timoteo, binisita ni apostol Pablo ti ili a pagnanaedanna. Nakitana a napalalo ti tarigagay ni Timoteo nga agserbi ken Jehova. Inawisna ngarud ni Timoteo a kumuyog kenkuana tapno ad-adda pay a makapagserbi iti Dios. Iti sadinoman a papananda, imbagada kadagiti tattao ti maipapan iti Pagarian ti Dios ken maipapan ken Jesus.​​—Aramid 16:​1-5; 2 Timoteo 1:5; 3:​14, 15.

Ngem dagiti laeng kadi ubbing a lallaki ti nadakamat iti Biblia a nangparagsak iti Dios?— Saan. Usigem ti maysa nga Israelita a balasitang a nangparagsak iti Dios. Idi sibibiag pay, agkabusor ti nasion ti Siria ken ti nasion ti Israel. Iti maysa nga aldaw, nakigubat dagiti Sirio iti Israel ket kinautiboda dayta a balasitang. Impanda ti balasitang iti balay ti panguluen ti militar a ni Naaman. Sadiay a nagserbi kas adipen ti asawa ni Naaman.

Naaddaan ni Naaman iti sakit a maawagan iti kukutel. Awan ti doktor a nakatulong kenkuana. Ngem patien ti balasitang nga Israelita nga adda naisangsangayan nga adipen ti Dios, maysa a propeta, a makatulong ken Naaman. Siempre, saan nga agdaydayaw ken Jehova ni Naaman ken ti asawana. Rumbeng kadi nga ibaga ti balasitang kadakuada no ania ti ammona? Ania koma ti inaramidmo no sika?—

Kinuna ti balasitang: ‘No la koma ta mapan ni Naaman iti propeta ni Jehova idiay Israel, iti kasta mapaimbag koma ti kukutel ni Naaman.’ Dimngeg ni Naaman iti balasitang, ket napan iti propeta ni Jehova. Idi tinungpalna ti impaaramid ti propeta, immimbag. Daytoy ti makagapu a nagbalin ni Naaman nga agdaydayaw iti pudno a Dios.​​—2 Ar-ari 5:​1-​15.

Kayatmo kadi nga adda matulongam a mangammo ken Jehova ken kadagiti maaramidanna, a kas iti inaramid dayta a balasitang?— Siasino ti mabalinmo a tulongan?— Siempre, iti damo mabalin a dida ipagarup a kasapulanda ti tulong. Ngem mabalinmo nga ibaga kadakuada dagiti nasayaat a banag a naaramidan ni Jehova. Ket mabalin a dumngegda. Masiguradom a maragsakan ti Dios iti daytoy.