Uppat nga Adalan a Nagbalin a Mangngalap iti Tattao

Kalpasan a ginandat dagiti taga-Nazaret a papatayen ni Jesus, napan iti siudad ti Capernaum nga asideg iti Baybay ti Galilea, a maawagan met iti “baybay ti Genesaret.” (Lucas 5:1) Natungpal ti impadto ni Isaias a dagiti tattao iti Galilea makakitada iti dakkel a lawag.—Isaias 9:1, 2.

Wen, idiay Galilea, intultuloy ni Jesus nga ipakaammo nga “asidegen ti Pagarian ti langit.” (Mateo 4:17) Nasarakan ni Jesus ti uppat kadagiti adalanna sadiay. Nakipagdaliasatda idi kenkuana, ngem idi nagsublida idiay Judea a kaduada ni Jesus, sinublianda ti negosioda a panagkalap. (Juan 1:35-42) Ngem panawenen tapno kanayon a makikaduada ken Jesus tapno masanayna ida a mangitultuloy iti trabaho a panangasaba inton saandan a kadua ni Jesus.

Bayat a magmagna ni Jesus iti igid ti baybay, nakitana ni Simon Pedro, ti kabsatna a ni Andres, ken ti kakaduada a mangiwaywayat iti iket iti baybay. Naglugan ni Jesus iti bangka ni Pedro ket imbagana nga umadayoda bassit iti igid ti baybay. Idi nakaadayoda bassiten, nagtugaw ni Jesus ket rinugianna nga isuro ti kinapudno maipapan iti Pagarian kadagiti tattao a naummong iti igid ti baybay.

Kalpasanna, kinuna ni Jesus ken Pedro: “Ipanmo iti adalem, ket iwayatyo dagiti iketyo ta agkalapkayo.” Insungbat ni Pedro: “Mannursuro, nagpatpatnagkami a nagkalap ket awan a pulos naalami. Ngem gapu ta imbagam, iwayatko dagiti iket.”—Lucas 5:4, 5.

Inwayatda dagiti iket, ket uray la mapigisen gapu iti kaadu ti ikan a nakalapda! Dagus a nagpatulongda kadagiti kakaduada nga adda iti sabali a bangka. Apagbiit a napno iti ikan ti dua a bangka ket dandanin lumned gapu ta nadagsen unay. Gapu iti dayta, nagparintumeng ni Pedro iti sango ni Jesus ket kinunana: “Adaywannak, Apo, ta maysaak a managbasol.” Kinuna ni Jesus: “Dika agbuteng. Manipud ita, agkalapkan kadagiti tattao a sibibiag.”—Lucas 5:8, 10.

Imbaga ni Jesus kada Pedro ken Andres: “Surotendak, ket pagbalinenkayto a mangngalap iti tattao.” (Mateo 4:19) Inawisna ti dua a sabali pay a mangngalap, da Santiago ken Juan, nga annak ni Zebedeo. Simmurotda met a dagus ken Jesus. Gapuna, pinanawan dagitoy uppat a mangngalap ti negosioda ket nagbalinda nga umuna nga ad-adalan ni Jesus.