Mabalin Kadi ti Agaramid iti Naimbag iti Sabbath?

Adu ti naaramid ni Jesus bayat ti nasaknap a ministeriona idiay Galilea. Ngem idi imbagana a, “Masapul nga ipakaammok met ti naimbag a damag ti Pagarian ti Dios iti dadduma pay a siudad,” saan laeng a ti Galilea ti pampanunotenna. Gapuna, “napan nangaskasaba kadagiti sinagoga iti Judea.” (Lucas 4:43, 44) Maikanatad dayta ta primavera idin ken dandanin ti piesta idiay Jerusalem.

No idilig iti nasaknap a ministeriona idiay Galilea, bassit ti mabasatayo iti Ebanghelio maipapan iti inaramid ni Jesus idiay Judea. Nupay saan nga interesado ti kaaduan a tattao idiay Judea, saan a dayta ti nangpasardeng ken Jesus iti naregta a panangasaba ken panangaramidna iti naimbag sadinoman ti ayanna.

Di nagbayag, napanen ni Jesus iti kangrunaan a siudad ti Judea, ti Jerusalem, para iti Paskua ti 31 C.E. Iti okupado a lugar iti asideg ti Ruangan Dagiti Karnero, adda dakkel a nalinongan a pagdigusan a maawagan Bethzatha. Adu a masakit, bulsek, ken pilay ti mapmapan iti daytoy a pagdigusan. Apay? Patienda ngamin nga umimbag dagiti masakit no tumapogda iti pagdigusan apaman a makibur ti danum.

Aldaw idi ti Sabbath. Adda nakita ni Jesus iti pagdigusan a maysa a lalaki a 38 a tawenen a masakit. Dinamag ni Jesus: “Kayatmo kadi ti umimbag?” Simmungbat ti lalaki: “Apo, awan ti mangipan kaniak iti pagdigusan no makibur ti danum, isu a bumabbabaak pay laeng, addan nakauna kaniak.”—Juan 5:6, 7.

Adda imbaga ni Jesus a nagsiddaawan ti lalaki ken dagiti nakangngeg. Kinunana: “Bumangonka, bagkatem ta pagiddaam ket magnaka.” (Juan 5:8) Kasta nga agpayso ti napasamak. Dagus nga immimbag ti lalaki, binagkatna ti pagiddaanna, sa nagna!

Imbes a maragsakan dagiti Judio iti nagsayaat a napasamak, sinapulda ti lalaki ket inukomda: “Sabbath ita, ket saan nga umiso nga awitem ti pagiddaam.” Simmungbat ti lalaki: “Imbaga ngamin daydiay nangpaimbag kaniak, ‘Bagkatem ta pagiddaam ket magnaka.’” (Juan 5:10, 11) Babalawen dagitoy a Judio ti asinoman a mangpaimbag iti Sabbath.

“Asino ti nangibaga a bagkatem dayta ket magnaka?” insaludsodda. Apay a dinamagda dayta iti lalaki? Gapu ta “timmipon ni Jesus kadagiti tattao,” ken saan nga ammo ti lalaki ti nagan ni Jesus. (Juan 5:12, 13) Ngem makitanto manen ti lalaki ni Jesus. Idi agangay, nakita ti lalaki nga adda ni Jesus idiay templo ket naammuanna ti maipapan iti nangpaimbag kenkuana iti pagdigusan.

Nakita ti napaimbag a lalaki dagiti Judio a nangdamag kenkuana no asino ti nangagas kenkuana. Imbagana a ni Jesus. Idi nangngegda dayta, napanda ken Jesus. Binirokda kadi tapno ammuenda no apay a kabaelanna ti agaramid iti nakaskasdaaw a bambanag? Saan. Napanda tapno akusaranda iti panangaramidna iti naimbag a bambanag iti Sabbath. Inrugida pay ketdi nga idadanes ni Jesus!