Ti Umuna nga Ari ti Israel

Inikkan ni Jehova dagiti Israelita kadagiti ukom a mangidaulo kadakuada, ngem kayatda ti maaddaan iti ari. Imbagada ken Samuel: ‘Adda ari dagiti nasion iti aglawlawtayo. Kayatmi met ti maaddaan iti ari.’ Ammo ni Samuel a kamali dayta, isu a nagkararag ken Jehova. Imbaga ni Jehova kenkuana: ‘Siak ti taltallikudan dagiti tattao, saan a sika. Ibagam a mabalinda ti maaddaan iti ari, ngem adunto ti kiddawen ti ari kadakuada.’ Ngem imbaga latta dagiti tattao: ‘Awan bibiangmi. Kayatmi ti maaddaan iti ari!’

Imbaga ni Jehova ken Samuel a ti maysa a lalaki nga agnagan Saul ti agbalin nga umuna nga ari. Idi binisita ni Saul ni Samuel idiay Rama, dinutokan ni Samuel ni Saul kas ari babaen ti panangibukbokna iti lana iti ulona.

Idi agangay, inummong ni Samuel dagiti Israelita tapno ipakitana kadakuada ti baro nga arida. Ngem dida mabirokan ni Saul. Ammom no apay? Aglemlemmeng ngamin kadagiti gargaret. Idi nabirokandan ni Saul, pinagtakderda iti tengnga dagiti tattao. Nataytayag ni Saul ngem kadakuada amin, ken nakaguapguapo. Imbaga ni Samuel: ‘Kitaenyo ti pinili ni Jehova.’ Impukkaw dagiti tattao: ‘Agbiag koma ti ari!’

Idi damo, agdengdengngeg ni Ari Saul ken Samuel ken agtultulnog ken Jehova. Ngem idi agangay, nagbalbaliw. Kas pagarigan, saan a mabalin nga agdaton ti ari. Naminsan, imbaga ni Samuel ken Saul nga urayenna, ngem saan a dagus a simmangpet ni Samuel. Isu a nagdaton lattan ni Saul. Ania ti reaksion ni Samuel? Imbagana: ‘Saanmo koma a sinukir ni Jehova.’ Nakasursuro ngata ni Saul iti kamalina?

Idi agangay, idi mapan gubaten ni Saul dagiti Amalekita, imbaga ni Samuel a patayenna ida amin. Ngem saan a pinatay ni Saul ni Ari Agag. Imbaga ni Jehova ken Samuel: ‘Tinallikudannakon ni Saul, ken dinakon dengdenggen.’ Permi ti liday ni Samuel, ket imbagana ken Saul: ‘Gapu ta saankan nga agtultulnog ken Jehova, mangpilinto iti sabali nga ari.’ Idi pumanawen ni Samuel, ginammatan ni Saul ti badona ket napisang ti gayadanna. Imbaga ni Samuel: ‘Pinisang ni Jehova ti pagarian manipud kenka.’ Ited ni Jehova ti pagarian iti maysa a mangay-ayat ken agtultulnog kenkuana.