Naammuan ti Guardia ti Kinapudno

Idiay Filipos, adda adipen a babai a naluganan iti demonio. Gapu iti demonio, maibaga ti babai ti mapasamak iti masanguanan ket adu ti magangganansia dagiti amona gapu iti dayta. Idi napan da Pablo ken Silas idiay Filipos, sinursurotna ida iti adu nga aldaw ken ipukpukkawna: “Dagitoy a lallaki ket adipen ti Kangatuan a Dios.” Idi agangay, imbaga ni Pablo iti demonio: ‘Iti nagan ni Jesus, rummuarka kenkuana!’ Ket rimmuar ti demonio.

Idi naammuan dagiti amo ti babai nga awanen ti panguartaanda, permi ti ungetda. Ginuyodda da Pablo ken Silas nga impan kadagiti mahistrado sibil ket imbagada: ‘Suksukiren dagitoy a lallaki ti linteg ken rirriribukenda ti siudad!’ Imbilin dagiti mahistrado a mapangpang-or ken maibalud da Pablo ken Silas. Impan ida ti guardia iti kaunegan ken kasipngetan a paset ti pagbaludan sa inkabilna ida iti tul-ong.

Nagkankanta da Pablo ken Silas iti pammadayaw ken Jehova bayat nga agdengdengngeg dagiti balud. Iti tengnga ti rabii, bigla a nagginggined iti napigsa ket nagunggon ti pagbaludan. Naglukat dagiti ridaw, ken nawarwar ti kawar ken naikkat ti tul-ong dagiti balud. Nagdardaras ti guardia a napan iti makin-uneg a pagbaludan ket nakitana a nakalukat dagiti ridaw. Gapu ta pampanunotenna a nakalibasen dagiti balud, innalana ti espadana tapno agpakamatay.

Ngem impukkaw ni Pablo: ‘Dimo saktan ti bagim! Addakami amin ditoy!’ Nagdardaras a simrek ti guardia ket nagruknoy kada Pablo ken Silas. Insaludsodna: “Ania ti masapul nga aramidek tapno maisalakanak?” Insungbatda: ‘Masapul a mamatika ken Jesus, agraman ti pamiliam.’ Kalpasanna, insuro kadakuada da Pablo ken Silas ti sao ni Jehova, ket nabautisaranda.