Binalbaliwanna ti Panunotna

NAKITA ti agtutubo a lalaki a ni Saulo iti Tarso ti panangubor dagiti Judio ken Esteban agingga a natay.a Kombinsido isuna a husto laeng a mapapatay ni Esteban gapu ta patienna unay a ti relihion dagiti Judio ti pudno. Ti agpayso, ibaga ti Biblia a ‘makapungpungtot kadagiti adalan ti Apo ken kayatna a papatayen ida,’ isu nga indadanesna ida. Adu nga adalan ni Jesus ti impaibaludna. Isu a gapu iti nakaro a pannakaidadanes, adu a pasurot ni Jesus ti pimmanaw iti Jerusalem. Ngem kagurgura unay ni Saulo ida, isu a kayatna nga idadanes uray dagiti Kristiano nga adda iti sabali a lugar. Dimmawat pay ketdi iti surat iti nangato a padi tapno mapalubosan a mangidadanes kadagiti Kristiano idiay Damasco.

Idi naalan ni Saulo dagiti surat, dagus a napan ken dagiti kakaduana iti siudad ti Damasco. Kombinsido a natayen ni Jesus. Ngem sibibiag ni Jesus ken kaduana ni Amana idiay langit. Am-ammoda unay ni Saulo. Makitkitada nga adu dagiti nagsasayaat a kualidadna ken ammoda a kayana ti agbalbaliw ken adunto ti maaramidanna. Idi asidegen da Saulo iti Damasco, bigla nga adda naraniag a lawag a nangsilnag kadakuada. Naranraniag pay dayta ngem iti init! Gapu iti dayta, natumba ni Saulo ket nabulsek.

Idi kuan, adda nangngegna a boses. Kunana: “Saulo, Saulo, apay nga idaddadanesnak?” Imbagana pay a parparigatenna laeng ti bagina ta kasla kugkugtaranna ti tirad a pagabug ti pastorna. Insaludsod ni Saulo, “Asinoka, Apo?” Sigurado a nakigtot idi simmungbat. “Siak ni Jesus, nga idaddadanesmo.” Idi kuan, imbaga ni Jesus a tumakder ni Saulo ken imbagana no ania ti kayatna nga aramidenna. Kayatna nga agbalin a Saksi ni Saulo ken paneknekanna kadagiti tattao a pudno ti amin nga insurona. Bulsek ni Saulo ngem masapul nga arigna luktanna dagiti mata dagiti di manamati tapno maawatanda ti kinapudno maipapan ken Jesus ken ti naimbag a damag ti Pagarian ti Dios.

Kalpasan a nangngegna ti amin nga imbaga ni Jesus, naawatan ni Saulo a natangsit ken naulpit isuna, isu a kasapulanna ti agbalbaliw. Gapu ta saan pay idi a makakita, kinibin dagiti kakaduana a mapan idiay Damasco. Idiay nga inurayna ti maysa a Kristiano. Tallo nga aldaw a saan a nangnangan ni Saulo. Posible a tapno ipakitana a maladladingitan ken nagbabawyannan dagiti dakes nga inar-aramidna. Mabalin a namin-ano a napasnek a nagkarkararag ken Jehova ken dumawdawat iti pammakawan gapu ta indadanesna ti ipatpategna nga Anak. Idi kuan, imbaon ni Jesus ti maysa a Kristiano nga agnagan Ananias a mapan ken Saulo. Idi damo, mabuteng ni Ananias ngem napan latta. Imparabawna ti imana ken Saulo. Kalpasan dayta, “natnag kadagiti matana dagiti kasla siksik.” Makakitan ni Saulo! Nagbalbaliwen, napakpakumbaba, ken nasirsiriben. Kalpasanna, “timmakder ken nabautisaran.”

Idi nagbalin a Kristiano ni Saulo, dagus a rinugianna ti nangasaba. Imbes nga agsubli idiay Jerusalem, napan ketdi kadagiti sinagoga idiay Damasco. Nagrigat la ketdi dayta para kenkuana ta am-ammo isuna dagiti tattao kas maysa a manangidadanes kadagiti pasurot ni Jesus. Sigurado nga inkarkararagna a maaddaan koma iti tured. Panunotem laengen ti reaksion dagiti nakangngeg idi imbagana a kamali dagiti dati nga insursurona ken maysa isunan a pasurot ni Jesus. Ngem saan la a dayta ti inaramidna. “Ad-adda a nagbalin nga epektibo ni Saulo a mangasaba ket saan a makapagrason kenkuana dagiti Judio nga agnanaed idiay Damasco, bayat a silalawag a pinaneknekanna a daytoy ti Kristo.”

Idi adda isuna iti Damasco, adda tiempo a napan iti Arabia, a mabalin nga iti desierto ti Siria. Saan nga ibaga ti Biblia no apay, ngem mabalin a kayatna ti agmaymaysa tapno makapagkararag ken Jehova ken mapagpanunotanna ti imbaga ni Jesus kenkuana ken ti baro a responsabilidadna. Intultuloyna nga inadal ken pinampanunot a naimbag ti Kasuratan. Talaga a binalbaliwannan ti kapanunotanna. Idi agangay, pinaregtana dagiti padana a Kristiano idiay Roma nga aramidenda met ti kas iti inaramidna.—Roma 12:2.

Uray limmabasen ti adu a tawen, malaglagip latta ni Saulo dagiti dakes nga inar-aramidna iti napalabas. Imbagana: “Dati nga agsasaoak maibusor iti Dios ken manangidadanes ken natangsitak.” (1 Tim. 1:13) Pinagbabawyanna met unay nga inaprobaranna ti pannakaubor ni Esteban. (Ara. 22:​19-21) Ngem sigurado ni Saulo iti daytoy: Pinakawanen da Jehova ken Jesus, ken bembendisionanda isuna.

Kalpasan ti agarup tallo a tawen ni Saulo idiay Damasco, masapul a pumanaw ta kayat a patayen dagiti Judio. Tinulongan isuna dagiti kapammatianna tapno makalibas. Inkargada iti basket sa imbabada iti maysa nga abut iti pader. Idi kuan, napan idiay Jerusalem. Ngem mangrugrugi pay laeng ti biagna kas maysa a Kristiano. Adu pay ti masapul nga aramidenna.

Basaem ti salaysay ti Biblia:

• Aramid 8:​1-3; 9:​1-25; 26:​4, 5, 9-20

• Galacia 1:​13-18

Pagsasaritaan:

Kasano nga impakita ni Saulo iti Tarso ti kinatured iti daytoy a paset ti biagna?

Agkalika Pay

1. 1. Apay a naibaga ni Saulo a ti Tarso, ti ili a nakayanakanna, ket “nalatak a siudad”? (Ara. 21:39; w99 5/15 30 ¶1) A

   Ti sungbatmo

   

   Todd Bolen/BiblePlaces.com

2. 2. Apay a maibagatayo nga adu ti ammo ni Saulo iti kultura dagiti Judio, Griego, ken Romano? (bt 62, kahon ¶1-3)

   Ti sungbatmo

3. 3. Ania ti kayat a sawen ni Saulo idi imbagana nga idi nagparang ni Jesus kenkuana, nariknana a ‘kasla nayanak a kurang ti bulanna’? (1 Cor. 15:8; w22.09 27)

   Ti sungbatmo

4. 4. Ania dagiti ebidensia a mangipakita nga agpaypayso ti insurat ni Lucas a pannakakomberte ni Saulo idiay Damasco? (Ara. 9:​11, 24, 25; g03 2/8 24-26) B

   Ti sungbatmo

   

   Photo by ROLOC Color Slides

Panunotem Dagiti Leksion

• Sipapakumbaba nga inawat ni Saulo ti tulong ni Ananias ken ti dadduma a Kristiano. (Ara. 9:​17, 18; Col. 4:​10, 11) Ania dagiti situasion a masapul nga awatentayo ti tulong ti dadduma?

  Ti sungbatmo

• Saan nga impalubos ni Saulo a maapektaran ti panagdayawna ken Jehova gapu kadagiti nagapuananna iti napalabas wenno dagiti naaramidna a kamali. (Fil. 3:​4-8; 1 Tim. 1:​12-16) Kasanotayo a matulad isuna? C

  Ti sungbatmo

  

• Kasanom pay a matulad ti kinatured ni Saulo iti daytoy a salaysay?

  Ti sungbatmo

Utobem ti Napatpateg a Banag

• Ania ti isuro kaniak daytoy a salaysay maipapan ken Jehova?

  Ti sungbatmo

• Kasano a konektado daytoy a salaysay kadagiti panggep ni Jehova?

  Ti sungbatmo

• Ania dagiti naammuam maipapan ken Saulo iti daytoy a salaysay a pagyamyamanam a napili isuna a makipagturay ken Jesus idiay langit?

  Ti sungbatmo

Ammuem ti Ad-adu Pay

Kitaem no kasano a nagbalbaliw ti maysa a manangidadanes a kas ken Saulo.

Ayat ti Nangbalbaliw iti “Saulo ti Sado” (5:50)

Ania ti masursurotayo ken Saulo maipapan iti regular a panagadal iti Biblia, panangipakita iti ayat iti dadduma, ken panagbalin a napakumbaba?

“Rumang-aykayo iti Naespirituan Babaen ti Panangtuladyo ken Pablo” (w08 5/15 21-25)