ACAN

[gapu ta umasping ti pannakaibalikasna, daytoy ket nainaig iti Acar, a kaipapananna ti “Manangyeg iti Pannakailaksid (Riribuk)”].

Ti anak ni Carmi iti sangakabbalayan ni Zabdi iti pamilia ni Zera iti tribu ti Juda; naawagan met iti Acar.​—1Cr 2:7.

Idi binallasiw dagiti Israelita ti Jordan, sibabatad nga imbilin ni Jehova a dagiti umuna a bunga iti panagparmek, ti siudad ti Jerico, “agbalinto a banag a naikeddeng iti pannakadadael; . . . dayta ket kukua ni Jehova.” Ti pirak ken balitok iti dayta ket masapul a maited iti pagidulinan ti gameng ni Jehova. (Jos 6:17, 19) Nupay kasta, idi nakasarak ni Acan iti nangina a kawes manipud Sinar ken maysa a 50-siklo a barra a balitok (aggatad iti agarup $6,400) ken 200 a siklo a pirak ($440), sililimed nga inkalina ida iti baba ti toldana. (Jos 7:21) Kinapudnona, tinakawanna ti Dios! Gapu iti daytoy a panangsalungasing kadagiti nabatad a pammilin ni Jehova, saan nga impaay ni Jehova ti pamendisionna idi rinautda ti simmaruno a siudad, ti Ai, ket ti Israel napagtaray. Siasino ti nakabasol? Awan ti nagpudno. Nabista ti intero nga Israel. Tumunggal tribu, kalpasanna tumunggal pamilia iti tribu ti Juda, ket kamaudiananna, tumunggal lalaki iti balay ni Zabdi, naipalasatda iti sanguanan ni Jehova agingga a ni Acan “ti napili.” (Jos 7:4-18) Idi laeng nga inannugotna ti basolna. Dagus a naipatungpal ti dusa nga ipapatay. Ni Acan, ti pamiliana (nga awan duadua a pagaammoda ti inaramidna), ken dagiti dinguenna nauborda nga umuna agingga a natayda, sa kalpasanna napuoranda iti apuy, agraman amin a sanikuana, idiay Ginget ti Acor, a kaipapananna ti “Pannakailaksid; Riribuk.”​—Jos 7:19-26.