ARAUNA

Ti Jebuseo a makinkukua iti pagirikan a ginatang ni Ari David a pakaibangonan ti maysa nga altar ken Jehova. Daytoy a tignay ti dinakamat ti Dios a pamay-an tapno agpatingga ti pannaplit nga imbunga ti panangpabilang ni David kadagiti umili.​—2Sm 24:16-25; 1Cr 21:15-28.

Agparang nga intukon ni Arauna daytoy a lugar, agraman ti bakbaka ken ramramit a kayo nga agpaay kas sakripisio, nga awan bayadna, ngem impapilit ni David ti agbayad. Ti rekord iti 2 Samuel 24:24 ipakitana a ginatang ni David ti pagirikan ken ti bakbaka iti 50 a siklo a pirak ($110). Nupay kasta, dakamaten ti salaysay iti 1 Cronicas 21:25 a nagbayad ni David iti 600 a siklo a balitok (a. $77,000) maipaay iti dayta a disso. Ti mannurat ti Maikadua a Samuel dakdakamatenna laeng ti napasamak a panaggatang bayat a tuktukoyenna ti nagsaadan ti altar ken dagiti material a maipaay iti panagisakripisio a naaramid kalpasanna, ngarud agparang a ti tinukoyna a gatad a pakailakuan ket agpaay laeng kadagitoy a banag. Iti sabali a bangir, ti mannurat ti Umuna a Cronicas salsalaysayenna ti bambanag a mainaig iti templo a naibangon iti dayta a disso idi agangay, ket ti panaggatang inaigna iti naaramid a panagbangon. (1Cr 22:1-6; 2Cr 3:1) Yantangay nakalawlawa ti intero a disso ti templo, agparang a ti gatad nga 600 a siklo a balitok ramanenna ti pannakagatang daytoy a nalawa a disso imbes nga iti bassit a benneg a kasapulan maipaay iti altar nga immuna nga imbangon ni David.

Adda pay laeng ita ti maysa a nainkasigudan a bato iti baba ti Dome of the Rock dagiti Muslim a nagsaad iti maysa a paset ti sigud nga ayan ti templo. Daytoy a bato ket mabalin nga isu ti nagkauna a pagirikan ni Arauna.

Iti rekord dagiti Cronicas, ni Arauna ket naawagan iti Ornan.​—1Cr 21:18-28; 2Cr 3:1.