ELIAKIM

(Ti Diosko Mangibangon).

1. Anak ni Hilkias; panguluen nga administrador iti ar-aramid iti balay ni Ezekias nga ari ti Juda idi tiempo a ti Asirio nga ari a ni Senaquerib rinautna ti Juda idi 732 K.K.P.

Bayat a ni Sebna pay laeng ti “agaywan iti balay,” impakpakauna ni mammadto Isaias nga isu maikkatto iti daytoy a saad ket sukatan ni Eliakim, nga awagan ni Jehova iti “adipenko.” Dayta a pannakayakar ti saad ket maaramid babaen ti pannakaikawes ken Eliakim ti opisial a pagan-anay ken sintas ni Sebna. Kasta met, maikabil iti rabaw ti abaga ni Eliakim “ti tulbek ti balay ni David,” a mangipaspasimudaag a maitalek kenkuana ti panangaywan kadagiti siled ti ari ken ti autoridad a mangikeddeng no siasino ti maawat nga agserbi iti ari.​—Isa 22:15-24.

Ni Eliakim nga agak-akem iti daytoy nga opisial nga annongen, ni Sebna a sekretario, ken ni Joa a nalabit ti agilislista, rimmuarda a makisao ken Rabsaque, nga immay iti Jerusalem nga addaan iti napigsa a puersa militar tapno idagadagna ti isusuko ti siudad. Idin, napanda a tallo a naray-ab dagiti kawesda tapno ipadamagda ken Ari Ezekias ti sasao ti pannakangiwat ni Senaquerib, a kalpasanna imbaon ni Ari Ezekias da Eliakim, Sebna, ken dagiti lallakay ti papadi a mapanda ken Isaias tapno agimtuodda ken Jehova.​—Isa 36:11, 22; 37:1, 2; 2Ar 18:17, 18, 26, 36, 37; 19:1, 2.

2. Ari ti Juda (628-618 K.K.P.) nga insaad ni Faraon Necoh iti trono, a sinukatanna iti Jehoiaquim ti naganna. Ni Eliakim ket anak ni Ari Josias.​—2Ar 23:34; kitaenyo ti JEHOIAQUIM.

3. Maysa kadagiti addaan trumpeta a Levita a papadi a karaman iti martsa nga inyurnos ni Nehemias idi inagurasion ti nabangon manen a pader ti Jerusalem.​—Ne 12:31, 41.

4. Inapo ti pannakaama ni Jesus a ni Jose.​—Mt 1:13.

5. Inapo ti natauan nga ina ni Jesus a ni Maria.​—Lu 3:30.