JETER

[nagtaud iti sao a kaipapananna ti “aglaplapusanan; agliplippias”].

1. Ni Jetro a katugangan ni Moises ket naawagan Jeter iti Masoretiko a teksto iti Exodo 4:18.​—Kitaenyo ti JETRO.

2. Maysa a kaputotan ni Juda iti linia ni Perez. Natay ni Jeter nga awanan iti annak.​—1Cr 2:4, 5, 25, 26, 28, 32.

3. Ti umuna a nainaganan nga anak ni Ezra; kaputotan ni Juda.​—1Cr 4:17.

4. Kaputotan ni Aser. (1Cr 7:30, 38) Nalabit isu met laeng ti Itran iti 1Cr 7 bersikulo 37; agkaasping unay dagita a nagan iti Hebreo.

5. Ti inauna nga anak ni Gideon. Nalawag a kimmuyog ni Jeter iti amana iti panangkamat ken panangkautibo iti Midianita nga ar-ari a da Zeba ken Zalmunna, ngem idi nabilin a papatayenna ida, nagbuteng ti agtutubo a ni Jeter a mangasut iti kampilanna. (Uk 8:20) Kalpasan ti ipapatay ni Gideon, ni Jeter ket pinapatay ni Abimelec a kabsatna iti ama.​—Uk 9:5, 18.

6. Ama ni Amasa a sigud a panguluen ti buyot ni David. (1Ar 2:5, 32) Iti 2 Samuel 17:25 iti Masoretiko a teksto, isu naawagan kas Itra ken naikuna a maysa nga Israelita. Ngem naawagan kas Ismaelita iti 1 Cronicas 2:17, mabalin a gapu ta nakipagnaed kadagiti Ismaelita iti sumagmamano a tiempo.