Panangsaranget Itoy Panawen iti Kinaranggas a Buyogen iti Panagtalek
“Ni Soberano nga Apo Jehova nagsao! Siasinonto ti di mangipadto?”—AMOS 3:8.
1. (a) Maipapan iti nagan ni Jehova, ania a naindaklan a pribilehio ti adda kadatayo? (b) Kasano nga intan-ok ni Jesus ken ni Pablo ni Jehova ken ti naganna?
“NI Soberano nga Apo Jehova”—anian a nagpintas ti panangiladawan dagidiay a sasao ti Kangatuan nga Agturay iti uniberso! Maikontra iti isusuppiat dagiti sekta, maysa nga engrande a pribilehio ti iyaawag iti nagan ni Jehova iti naganna, a maaddaan ti nasinged a pannakirelasion ken Jehova ken ti panangiwaragawag ti nagan ken pangpanggep ni Jehova kadagiti dadduma. Ni Jesus, nga Anakna, idi adda ditoy daga kunana: “Ti espiritu ni Jehova adda kaniak, . . . a mangted ti naimbag a damag kadagiti napanglaw.” Iti kararagna ken Jehova, kunana maipapan kadagiti adalanna: “Impakaammok kadakuada ti naganmo ket ipakaammokto.” Ket ni apostol Pablo, iti panangadawna kadagiti mammadto a Hebreo idi ugma, kunana: “Siasinoman nga umawagto iti nagan ni Jehova maisalakanto.”—Lucas 4:18; Juan 17:26; Roma 10:13; Joel 2:32.
2. (a) Iti ania a pamay-an nga intan-ok ni Amos ni Jehova? (b) Maitunos iti kaipapanan ti nagan ni Amos, ania a trabaho ti inawatna?
2 Maysa ni Amos kadagiti mammadto idi ugma. Intantan-okna ti nagan ni Jehova, a ti sasao a “ni Soberano nga Apo Jehova” ti nagparang iti 21 daras iti librona idiay Biblia. Ti nagan nga Amos kaipapananna “Panangbagkat ti Awit.” Pudno unay, isut’ mangbagbagkat ti nadagsen nga awit ti responsabilidad, kas kadagiti nasungdo a saksi ni Jehova kadagitoy nga al-aldaw. Maysa idi ni Amos a pastor ti karnero ken managtaraken ti kaykayo, ket agparang nga isut’ awan pormal a panageskuelana a maipaay iti trabahona a panagipadto. Kaskasdi nalawag a pagaammona unay ti Sao ti Dios, ket adda ti espiritu ni Jehova kenkuana tapno maaramidanna ti narikut a nakaitudinganna a trabaho. Ania ngay dayta? Isut’ panangpanawna ti ilina idiay Juda ket mapan kas maysa a misionero iti sabali a daga iti simmina a sangapulo-tribo a pagarian ti Israel iti amianan. Idiay Israel, nga Samaria ti kabiserana, iwaragawagnanto ti di unay popular a mensahe ti pannakadadaelda.
3. Ania a naintiempuan a “kompidensial a banag” ti naipakaammo babaen ken Amos?
3 Nagtukiad kadi ni Amos iti daytoy naituding a trabahona? Nikaanoman! Panawen idi a naranggas dagidiay, ngem masapul a silalagip koma dagiti tattao iti yaadanin ti “dakes [pay] nga aldaw.” Naisentro ti panagbibiagda iti pampannangan ken panagin-inum. Babaen panagid-iddada kadagiti pagiddaanda a marfil ken rabaw dagiti papagda a naluho, saanda pulos a pinampanunot ni Jehova ken ti pudno a panagdaydayawna. (Amos 6:3-6) Naikeddeng ni Jehova ti panangdusana kadakuada, ngem umuna masapul nga umawatda pay ti naimpadtuan a pammakdaar. Maitunos itoy, kuna a mismo ni Jehova: “Kinapudnona awanto ti aramiden ni Soberano nga Apo Jehova a dinto maipalgak ti kompidensial a banagna kadagiti adipenna, dagiti mammadto.”—Amos 3:7.
Ti Moderno-Aldaw nga Aplikasionna
4. (a) Apay a dagiti padto idi ugma ti naitalimengda? (b) Babaen iti ania a kalasugan a maipakpakaammo itan dagiti kaiyuloganda?
4 Adda kadi kaipapanan daytoy padto idi ugma para kadatayo itatta? Wen, addaan napigsa a mensahe dayta para kadatayo itatta! Ti naipaltiing a Sao ti Dios ti naaramid iti sidong ti nadiosan a pannakaiwanwan, ket daytat’ naitalimeng agingga “iti panawen ti panungpalan” a pakagunggonaan ti ili ti Dios “a dimtengan ti panungpalan ti sistema dagiti bambanag.” Ti propetiko a kaipapananda ti naipakaammo kadatayo babaen “ti matalek ken naannad nga adipen,” ti bunggoy dagiti napulotan a Kristiano nga isut’ us-usaren ita ni Apotayo a Jesu-Kristo, a mangted ti naespirituan “a taraon iti umiso a tiempona” iti intero nga ili ti Dios.—Daniel 12:4; 1 Corinto 10:11; Mateo 24:45-47.
5. Kasanot’ panagtignaytay koma iti sao ni Jehova idiay Amos 3:8?
5 Matmatmatantay kadi daytoy “kompidensial a banag” iti padto ni Amos kas segundario laeng ti pategna a mabalin tamingen laeng no daydiay kaadda laeng ti wayatayo? No koma agmaymaysatayo idiay katantanapan, ket bigla a nabuong ti kinaulimek gaput’ panaguga ti maysa a leon, kasanot’ panagriknatayo? Iti dayta biag-wenno-patay a kasasaad, ditay kadi bigla nga agtignay? Ditay nga agtaktak! Saan kadi a kasta met ti panagtignaytayo kadagiti naimpadtuan a sasao ni Jehova? Kuna a mismo ni Jehova: “Naguga ti leon! Siasino ti di agbuteng? Ni Soberano nga Apo Jehova nagsao! Siasino ti di mangipadto?” (Amos 3:8) Ngarud, nasken, nga ipakaammotayo ti padto ken ti kaipapananna kadagiti dadduma. Ngem kasano?
“Inka, Agipadtoka”
6. Kadagiti ania a pamay-an a ti Kakristianuan umas-asping iti kadaanan a Samaria?
6 Ti bilin ni Jehova ken Amos ket: “Inka, agipadtoka iti ilik nga Israel.” (Amos 7:15) Ti nagapostata a pagarian ti Israel ti addaan katupagna itatta iti Kakristianuan, a materialistiko ti panangmatmatna, nga agpampannuray iti kinaranggas wenno pammutbuteng iti kinaranggas a maipaay iti pannakailasatna, ken isut’ lumablaban ken Soberano nga Apo Jehova, a kagurgurana ti naganna. No maipapan iti titulo a “Kristiano,” us-usaren laeng ti Kakristianuan daytoy kas maysa nga etiketa, ta isut’ bumusbusor iti iyaay ti Pagarian ni Kristo ti kinalinteg. Inladawan ni Jesus mismo dagiti relrelihion ti Kakristianuan kas “dakayo nga agaramid ti dakes.”—Mateo 7:21-23.
7, 8. (a) Kasano a ti pannakadadael ti Kakristianuan ‘maipabpablaak’ a nagtultuloy kadagiti naglabas a tawtawen? (b) Ania a “wayawaya” ti naiwaragawag a maipaay kadagiti ‘nakayawan,’ ket ania ti resultana?
7 Nanipud pay pannakaipasdek ti Pagarian kadagiti langlangit idi 1914, ti moderno-aldaw a klase Amos, dagiti Saksi ni Jehova, ti mangiwarwaragawagen ti aldaw nga ibabales ni Jehova iti intero a Kakristianuan. Maysa a naan-anay a pakdaar ti naiproklamaren kadagiti dagdaga ti Kakristianuan manipud 1919 ingganat’ 1939 nangnangruna, ket nagtultuloy daytoy agingga kadagitoy nga al-aldaw. Para kadagiti Saksi ni Jehova, dagiti tawen ti Gubat Sangalubongan II, 1939-45, ti panawen ti pannakaidadanes, ngem panawen met ti pannakareorganisarda. Idi 1943 nangrugi ti Watchtower Bible School of Gilead a mangsanay kadagiti misionero para kadagiti ganggannaet a dagdaga, ket idi nagpatinggan ti Gubat Sangalubongan II dagitoy ti naibaon kadagiti agsasaruno a pagilian tapno maisaknap ti pannakaikaskasaba ti Pagarian. Ti trabaho iti masaksakopan ti Kakristianuan ti napalawa, nangnangruna idiay Italia, Portugal, Espana ken iti naglawaan a teritoria ti Latin America.
8 “Inka, agipadto,” ti awag idi! Dagiti debosionado a pamilia ti pimmampanawda manipud Canada, ti Estados Unidos, Islas Britanicas, Europa ken Australasia tapno makitimpuyogda kadagiti misionero kadagiti baro a teritoria a sadiay dakdakkel ti pakasapulan. Sitatalek impablaakda ti ‘sinao a mismo ni Soberano nga Apo Jehova.’ Ti espiritu ni Jehova ti adda kadagiti saksina tapno iwaragawagda, iti sangalubongan, ti “aldaw nga ibabales” ti Dios iti Kakristianuan, ken kasta met ti “wayawaya kadagiti nakayawan” ti ulbod a relihion. (Isaias 61:1, 2; Zacarias 4:6) Gapuna, iti las-ud laeng ti 40 a tawtawen, adda naibunga dayta a nakaskasdaaw nga irarang-ay iti binulan a promedio dagiti Saksi a mangiwarwaragawag ti Pagarian: manipud 109,794 idi 1943 ingganat’ 2,501,722 idi 1983.
Maysa a Sangalubongan a Padron
9, 10. (a) Kasano kasaknap ti pannakaiwaragawag dayta iti kaaldawan ni Amos, ket aniat’ katupag daytoy itatta? (b) Kas inladawan ti padto ni Amos, kasanot’ panangmatmat dagiti makunkuna a pagano iti Kakristianuan?
9 Suroten daytoy ti padron idi kaaldawan ni Amos, idi naiwaragawag met ti pannakadadael idiay Asdod—ti sentro ti pagano a panagdaydayaw iti arubayan a Filistia—ken agingga idiay nakaad-adayo nga Egipto. Ta nagsao ni Soberano nga Apo Jehova, a kunkunana: “Iwaragawagyo kadagiti palasio idiay Asdod ket kadagiti palasio iti daga ti Egipto, ket kunayo: ‘Aguurnongkayo kadagiti bambantay ti Samaria, ket kitaenyo dagiti nagdakkel a gulogulo nga adda sadiay ken amin a pannakaparigat iti nagtengngaanda. Ta dida ammo ti agaramid iti nalinteg,’ kuna ni Jehova, ‘dagidiay agipempenda iti panangranggas ken panagtakaw kadagiti palasioda.’”—Amos 3:9, 10.
10 Kasta met, ti moderno-aldaw a deklarasion ti panangbales ni Jehova a maibusor iti Kakristianuan ti nagsaknap iti labes dagiti masaksakopanna—iti intero nga Africa, kadagiti purpuro ti baybay ken adu pay a paset ti Oriente. Kas pannakaus-usar ti Egipto idiay Biblia a simbolo ti intero a dakes a lubong a naisina iti Dios, kasta met ti mensahe ti pannakadadael ti Kakristianuan ti maiwarwaragawagen iti sangalubongan. (Idiligyo iti Isaias 19:19, 20.) Adu kadagiti makunkuna a pagano a nasnasion ti makaammo iti ‘gulogulo, panangparigat, kinakillo, kinaranggas ken panagtaktakaw’ iti Kakristianuan. Kadagiti adun a siglo mapalpaliiwda dagiti misioneros ti Kakristianuan a makipaspaset kadagiti ideolohikal a gubgubat ken rebolusion ken agtigtignayda kas pammarang a maipaay kadagiti internasional a panagkomersio iti ig-igam ken narkotiko. Idi rinugian ti maysa a misionero ti Watch Tower ti makisarsarita iti maysa a Buddhista, masansan isut’ maipaspasango iti isusuppiat nga: ‘Ngem kitaem laengen ti moral a kasasaad dagiti Kristiano; dakami a Buddhista ti addaan ti adayo a nasaysayaat a moral, gapuna apay pay nga agbalbaliwkami?’ Masapul nga ilawlawag ti misionero a ti relihion ti Kakristianuan ti naiduma unay manipud iti Kinakristiano ti Biblia. Babaen laeng iti dayta nga isut’ naaddaan kadagiti tattao a dumngegen.
11. Ti kinadakes idiay Samaria ti katupag ti ania itatta?
11 Kas met laeng idiay Samaria idi ugma, kasta met iti Kakristianuan, dagiti politiko ken opisiales, dadakkel ken babassit, “dida ammo ti agaramid iti nalinteg.” Mainayon pay, iti kaaduan kadagiti makunkuna a Nakristianuan a dagdaga, ti kinaranggas ken kinadakes ti agsipsiput kadagiti lanlansangan. (Mateo 24:3, 12) Maisupadi la unay daytoy iti nataltalna a kasasaad iti adu a “di Kristiano” a dagdaga.
12. Kasano a ti Kakristianuan “agipempenda iti panangranggas ken panagtakaw”?
12 Ti “kinaranggas ken panagtakaw” ti maipalplano met iti nakakigkigtot a rukodna iti internasional a tay-ak. Saan nga umdas a dagiti nasnasion ti Kakristianuan ti nangrugian dagiti dua a gubat sangalubongan, a gapu iti dayta aw-awitenda ti basol maibusor iti dara maipapan iti pannakapapatay dagiti agangay 69,000,000 a tattao. Ita ti Kakristianuan ti maysa manen a kangrunaan a paset iti panagsalisal dagiti dua a dakdakkel a pannakabalin, “ti ari ti abagatan” ken “ti ari ti amianan,” a ti resultana ket dagiti nasnasionda ti uman-anamongda ti pannakaiwaras dagiti makapapatay a nuklear nga ig-igamda iti intero a terteritoriada.
13. Kasano a dagiti napolitikaan a managaramid ti kinaranggas makibibiangda iti kaitungpalan ti Daniel 11:40 ken Lucas 21:25?
13 Iti ibibisitana idiay Japan, ti kangrunaan a pannakabagi “ti ari ti abagatan” ti nagkuna: “Ti kakaisuna a pateg ti panangikut kadagiti nuklear nga ig-igam ket isut’ panangisigurado a saanda koma a maus-usar—nikaanoman.” Apay ngarud nga addaanda pay laeng kadagita? Ngamin ta ni Satanas, ti dios daytoy a lubong, nasiluanna dagiti nasnasion iti maysa a parikut a saandan a pakatalawan. Kas sungbat iti “panangiduron” ti “ari ti abagatan,” ti kangrunaan met a pannakabagi “ti ari ti amianan” ti nangiyanunsio ti panangpuntiria dagiti medium-range nuclear missiles iti U.S. mainland babaen “ti panangipuestoda kadagita kadagiti tataaw ken baybay.” Amin daytoy ti mangtungtungpal ti padto ni Jesus maipapan “dagiti nasion nga agdanag gapu iti daranudor ti baybay ken dagiti dalluyon.”—Daniel 11:40; Lucas 21:25; Apocalipsis 12:9, 12.
14. Kadagiti ania a pamay-an a daytoy a situasion ken ti tungpalna ipalagipna kadatayo ti napaspasamak idi kaaldawan ni Noe?
14 Ti kasta a panangdadael ti di pay naipasango iti sangatauan nanipud pay panawen ni Noe, agraman ti pammutbuteng ti dakdakkel a kinaranggas. Ti rekord ti historia ti tiempo ni Noe ti adda a mabasa: “Ket nakita ni Jehova a ti kinadakes ti tao dakkel iti daga, ken amin nga arapaap dagiti panunot ti pusona dakes a kankanayon. . . . Ket nagdakes ti daga iti sanguanan ti Dios ket napno ti daga iti ranggas.” Gapu iti dayta a kinadakes ken kinaranggas, inyeg ni Jehova ti pannakadadael dagiti managdakdakes babaen iti Layus. Ita, manen, pinanggepna a “dadaelen dagidiay mangdaddadael iti daga.”—Genesis 6:5-13; Apocalipsis 11:18; Lucas 17:26, 27.
Ti Panangsamsam iti Kakristianuan
15. Kasano a pinataud ni Jehova a “ti kabusor” ti mangdusa iti Samaria?
15 Anianto ti panginggaan ti komprontasion dagiti napipigsa a pannakabalin ti lubong? Adda maikuna ni Jehova iti dayta, kas mabasatayo idiay Amos 3:11: “Gapuna ni Soberano nga Apo Jehova kastoy ti kunana, ‘Addanto kabusor nga aglikmut met laeng iti daga, ket parukmaennakanto, ket dagiti palasiom masamsamdanto.’ ” Asino daytoy a “kabusor”? Idi kaaldawan ni Amos ti “kabusor” ket isu ti Asiria a Pannakabalin ti Lubong. Ti nabileg a buyot ti Asiria ti immaniobra ni Jehova ket isut’ inusarna kas simbolo a “pang-or” a mangdusa iti apostata a Samaria, kas naisalaysay idiay Isaias 10:5, 6: “O Asirio, pang-or ti pungtotko, ti sarukod nga iti imana adda ti rungsotko! Ibaonkonto a bumusor iti maysa a nasion a managtabbaaw, ken isu pagbalinekto a bumusor iti umili a kagurak, tapno alaenna ti samsam ken ti tinukmaan ken payatpayatenna ida a kasla iti pitak kadagiti kalsada.”
16. (a) Kasano nga isalaysay ti Apocalipsis 17 ti umasasping a komprontasion itatta? (b) Ania a paspasamak ti mangipamatmat a ti pannakadadael ti Kakristianuan asidegen?
16 Umasping iti dayta, iyegto ni Jehova ti armado unay a moderno-aldaw nga Asiria kas “pang-or” ken “wasay” a mangdadael iti apostata a Kakristianuan. Kinapudnona, ti intero a sangalubongan nga imperio ti ulbod a relihion, ti Babilonia a Dakkel, ti mamimpinsandanto a dadaelen dagiti narungsot a “sarsara”—dagiti militarisado a napolitikaan a pannakabalin a miembroda pay itan a nasnasion ti UN. (Isaias 10:15; Apocalipsis 17:5, 16, 17) Dagiti daranudor dayta umas-asidegen a komprontasion ti masansan a mangmangngegandan kadagiti damdamag ti aldaw. Kas pangarigan, idiay U.S.News & World Report ti nagkuna iti nabiit pay: “Saan laeng nga idiay Poland a ti Katolisismo ken ti Komunismo ti kasla agturturongen iti komprontasion. Iti intero a Makindaya nga Europa, dagiti relasion ti iglesia ken agtuturay a Komunista ti kumarkaro ti kinabarana nanipud nagbalin a Papa ti naiyanak a Polako a ni Juan Paulo II idi 1978. Maysa a baro kina-agresibo a lumaban ti nakalatlatak kadagiti Romano Katoliko nga obispo iti bloke a Soviet. . . . Ti maingel a panangkampeon ti Papa kadagiti gapuanan a Katoliko ti nangpunno iti atmospera ti komprontasion. . . . Dagiti gobierno a Komunista ti saanda pagregreggetan nga iseksekreto iti panagil-ilemda iti Papa.”
17. Ti libro ni Amos, agraman dadduma a padpadto, ti aniat’ kunada maipapan iti panangsamsam ti ulbod a relihion?
17 Gapuna matungpal kas kinuna ni Jehova idiay Amos 3:15: “‘Ket dagiti balbalay a marfil mapukawdanto, ket dagiti dadakkel a balbalay madadaeldanto,’ kuna ni Jehova.” Ti kinabaknang ken materialismo ti Kakristianuan ti madadaelto, agraman met ti kinabaknang ti intero a masaksakopan ti ulbod a relihion.—Ezequiel 7:19; Apocalipsis 18:15-17.
18. (a) Ania a natangsit a panagtignay ti sumaganad nga alaento ti “Asirio”? (b) Anianto ti tignayen daytoy, ket anianto ti ibungana iti ili ni Jehova?
18 Nupay kasta, kaipapananto aya daytoy ti dagdagus a pannakawayawaya dagiti nasungdo nga ad-adipen ni Jehova—manipud kadagiti pannakaum-umsi, dagiti pannakaidadanes, dagiti panangirurrurumen nga imbunton ti lubong ni Satanas kadakuada? Saan pay! Ta ti napolitikaan panagpampanunotna nga “Asirio”—“ti pang-or” ken “ti wasay” nga usaren ni Jehova a mangdusa iti apostata a Kakristianuan—ti sitatangsit a mangitan-okto ti bagina a maibusor ken Jehova babaen ti panangbueltananto kadagiti matalek a saksi ditoy daga. Ngem iti barengbareng laeng! (Isaias 10:15-19) Kas nakita ni apostol Juan iti sirmata, “dagiti ar-ari ti daga,” dagiti napolitikaan a pannakabalin ti ‘atap nga animal’ a UN, aguurnongdanto a manggubat iti introno ti Dios nga “Ari dagiti ar-ari ken Apo dagiti ap-appo.” Daytanton ti sinial para iti Har-Magedon, “ti gubat ti dakkel nga aldaw ti Dios a Mannakabalin-amin.” lyegto dayta ti pannakaikisap amin a puersa ni Satanas ditoy daga ken pannakaisalakan iti “siasinoman nga umawagto iti nagan ni Jehova.”—Apocalipsis 16:14, 16; 19:11, 16, 19-21; Roma 10:13.
19. Ti ulidan ni Amos ken ti kaitungpalan iti padtona a maibusor iti Samaria ti mangipanamnama iti ania a panagtalek kadatayo?
19 Kasano, ngaruden, a sanguen daytoy a panawen ti kinaranggas? Siempre babaen iti natibker a panagtalek a ni Jehova alangonennanto ti naimpadtuan a Saona! Ken buyogen ti kinatibker kas ken Amos, a nangikaskasaba iti di popular a mensahe ti pannakadadael iti apostata nga ili! Ngem kasano a makalasatkayto a sumrek ken mangtagiragsak ti engrande a Baro Urnos nga isagsagana ni Soberano nga Apo Jehova para kadagidiay agayat kenkuana? Ti sumaganad nga artikulo ti mangsungbat iti dayta a saludsod.
Salsaludsod a Pagrepaso:
□ Kasano a nagsayaat nga ulidan ni Amos kadatayo a sumango kadagiti panawen a naranggas?
□ Ania a “kompidensial a banag” ti pribilehiotay itan nga “iwaragawag“?
□ Kadagiti ania a pamay-an a ti kadaanan a Samaria iladladawanna ti Kakristianuan?
□ Kasano ti panagpatingga daytoy a panawen ti kinaranggas, ket aniat’ mangipamatmat a daytoy ti asidegen?
[Ladawan iti panid 9]
Imbaon ni Soberano nga Apo Jehova ni pastor nga Amos a mangipablaak ti di popular a mensahe
[Ladawan iti panid 12]
Agpaay iti Babilonia a Dakkel, ‘Surat iti Diding’