Ti Epektibo a Ministerio nga Agturong iti Ad-adu nga Adalan
“Dagitoy dagiti sagsagutna: dadduma . . . manag-ebanghelio, dadduma papastor ken mannursuro, tapno makabalan ti ili ti Dios a maipaay iti trabaho iti serbisiona.”—EFESO 4:11, 12, The New English Bible.
1. Kasano ti panagrikna ni Jesus kadagiti tattao?
NI Kristo Jesus saan a maysa nga ermitaño. Ti ministeriona ti naan-anay a naipasango kadagiti tattao. Kadagiti uppat a salaysay ti Ebanghelio ngangngani kanayon a nairaman ni Jesus kadagiti tattao. Bayat panagdaldaliasatna nakitana ti pudno a kasasaadda ket isut’ naasian unay kadakuada. No maysakay a Kristiano a ministro, adda aya met asiyo maipaay kadagiti tattao a masabsabatyo?—Mateo 9:35, 36.
2. Kasano a tultuladen dagiti Saksi ni Jehova ti ulidan ni Jesus?
2 Ti Nakristianuan a ministerio itatta masapul met a mairaman kadagiti tattao. Agsipud ta silalagipda iti dayta a kinapudno, dagiti Saksi ni Jehova addaanda iti maibagay-bagay nga iyaasideg iti serbisioda iti Dios. Iti intero a lubong makitkita a makisasaoda kadagiti tattao, iti lansangan, iti ruruangan, iti kupado a lugar ti paglaklakuan, iti aglawlaw dagiti estasion ti bus, subway ken train, iti pabrika, opisina ken distrito ti negosio. Sadinoman a pakasarakan ti tattao, dagiti Saksi addada sadiay nga agserserbi a managebanghelio. Apay a kasta? Agsipud ta ti sao nga “evangel” naggapu manipud sao a Griego a euaggelion, a kayatna a sawen “naimbag a damag.” Kas ken Kristo, tunggal Kristiano a Saksi ni Jehova ti masapul nga agbalin a ministro ti naimbag a damag, maysa a managebanghelio. Gapuna tunggal saksi masapul met a mairaman kadagiti tattao.—2 Timoteo 4:5; Efeso 4:11, 12.
3. Ania iti kaepektibuan a metodo iti Nakristianuan a ministerio?
3 Kasano ti rebbeng a pannakaaramid daytoy a trabaho a panagebanghelio a siepektibo? Ti kadi iyaasideg babaen iti radio ken TV nga us-usaren ti adu a relihion ti pudno a sungbat? Bueno, saludsodanyo laeng ti bagiyo, Ti kadi radio ken TV masungbatanna a dagus ti salsaludsodyo? Saan—dagita, iti kaiyariganna, isuda dagiti di personal a media ti komunikasion. Ti kaepektibuan unay a ministerio ti kaskasdi isu daydiay inaramid ni Jesus ken dagiti adalanna, a sisasangoda kadagiti agsapsapul ti kinapudno. Ngem daytat’ makasapul ti panawen ken panagregget, nga isut’ impamatmat ni Pablo babaen iti simple a panangiladawan: “Nagmulaak, ni Apolos nagsibug, ngem inted ti Dios ti idadakkel; iti kasta, uray ti agmula, uray ti agsibug, awan ti aniamanna no di laeng ti Dios a mangted ti idadakkel.”—1 Corinto 3:5-7.
4. Ania dagiti tallo a tukad a mairaman iti epektibo a ministerio?
4 Dagitoy a sasao ipasimudaagda ti tallo a tukad iti Nakristianuan a ministerio—ti panagmula, panagsukay ken panagani. Kasano a kasta? Umuna adda panagmula, ti umuna a pannakisango babaen iti naimbag a damag ti pagarian. Kalpasanna umayen ti panagsukay, agraman panangsibug iti adda a naimula. Kasano ti pannakaaramid dayta? Babaen iti kanayonan a pannakipatpatang tapno masungbatan ti salsaludsod ken maikkat ti panagduadua. Daytoy ti masansan mangiturong iti maysa a regular a panagadal ti Biblia nga isut’ mangipasagepsep a naimbag kadagiti kinapudno ti Biblia iti isip ken puso ti tao; a babaen iti bendision ti Dios, maaramid met ti panagdakkel. Ti maudi a resultana isunto manen ti aktibo nga adalan ni Kristo Jesus, maysa manen a ministro. Ita kasanotay amin kas ministro maaddaan iti dayta naragsak a bendision a panagapit ti maysa nga adalan?
5. Aniat’ makatulong kadatayo nga agbalin kas epektibo a ministro?
5 Kas kinuna ti napalabas nga artikulotayo, sinursuruan ni Jesus dagiti adalanna ti praktikal a pamay-an a panangaramid ti ministerioda. Ken nagsao ni Pablo maipapan “kadagiti metodo ken Kristo Jesus.” (1 Corinto 4:17) Dagiti agsasaruno a kongregasion a tinulonganna tapno maipasdek iti aglawlaw ti Asia Menor ken Grecia ti nabatad a pammaneknek iti balligina. Nasaklawtay metten ti sumagmamano kadagiti metodona (ken metodo ni Jesus), ngem addada pay kadi dadduma a mabalin a mausar a siepektibo itatta?
Ania ti Pakaibatayanna? Ken ti Mensahe?
6. Aniat’ masapul nga agbalin a bato a pasuli iti ministeriotayo?
6 Iti ania ti masapul a pakaibatayan ti Nakristianuan a mensahe? Kadagiti natauan a kinasirib ken pilosopia? Ti surat ni Pablo ken Timoteo mangted ti nalawag a sungbat: “Ngem sika agtalinaedka kadagiti bambanag a sinursurom ken pinatalgedam, nga ammom . . . a nanipud iti kinaubingmo naammuam dagiti nasantuan a sursurat, a makabalin a mamagsirib kenka a maipaay iti pannakaisalakan gapu iti pammati ken Kristo Jesus. Isuamin a Surat nga impaltiing ti Dios isu met ti naimbag a pakasursuruan.” Nalawag, ti Biblia, ti Sao ti Dios, isut’ agbalin a bato a pasuli ti ministeriotayo.—2 Timoteo 3:14-17.
7, 8. Kasano a nangipakita ni Jesus ken ni Pablo ti ulidan ti panagusar kadagiti kasuratan?
7 Iti daytoy a banag ni Kristo Jesus nangted ti ulidan—isut’ kanayon a nagadaw kadagiti kasuratan; kasta met ti inaramid ni apostol Pablo. Kas pangarigan, isu aya ti nagparang idiay Tesalonica a nangisursuro iti pilosopia a Griego? Saan, ta kas kunaen kadatayo ti salaysay: “Ket ni Pablo kas ugalina simrek kadakuada, ket kadagiti tallo nga aldaw a panaginana nakisupsuppiat kadakuada iti maipapan kadagiti Sursurat, nga impalawagna ken imparangarangna a masapul nga agsagaba ni Kristo ket agungar kadagiti natay.”—Aramid 17:1-3.
8 Ania ti resultana? “Ket dagidi dadduma kadakuada namatida.” Gapuna, ti panangsurot iti metodo ni Pablo, ti panangaskasabatayo ita ti masapul met a maibatay iti Sao ti Dios. Isut’ gapuna nga addaantayo iti naisingasing a tema ti Biblia a pakisarsaritaantayo iti ministerio. Iti dayta a pamay-an ti kinapudno ti Sao ti Dios makakalbitto iti agdengngeg a lapayag kadagidiay silalagip ti naespirituan a kasapulanda.—Aramid 17:4.
9, 10. (a) Ania.t’ masapul a tema ti panangaskasabatayo itatta? (b) Mangted kadagiti pangarigan manipud ministerio ni Pablo.
9 Ita ti sumaganad a saludsod ket, Ania a mensahe ti masapul nga ikasabatayo? Bueno, ania kadi ti tema ti ministerio ni Jesus? Ni Jesus ti siaammo iti nakaibaonanna, ta kinunana: “Kadagiti sabsabali a siudad masapul met nga ipakaammok ti naimbag a damag ti pagarian ti Dios, ta daytoy ti panggep a nakaibaonak.” Maipapan iti maudi nga al-aldaw ti agdama a sistematayo, kinunana: “Ket daytoy naimbag a damag ti pagarian maikaskasabanto iti amin a mapagnaedan a daga kas maysa a pammaneknek kadagiti isuamin a nasion; ket iti kasta umayton ti panungpalan.”—Lucas 4:43; Mateo 24:14.
10 Daytoy met laeng a panangipaganetget ti masarakan iti panangaskasaba ni Pablo. Kas pangarigan, kadagiti Judio iti maysa a sinagoga “nagsao a situtured iti bayat ti tallo a bulan, a nakisupsuppiat ken namagbaga iti maipapan ti pagarian ti Dios.” Kadagidiay taga Roma, ‘inkaskasabana ti pagarian ti Dios.’ Gapuna “ti pagarian ti Dios” isu met ti puersa ti Nakristianuan a ministeriotayo itatta.—Aramid 19:8; 28:23, 31.
Dakayo Kadi ti Agatakar wenno Mangatrakar?
11. Kasano ti masansan a panagrikna dagiti tattao no naipasangoda iti maysa a Saksi, ket kasanotayo a maparmek dayta? (Aramid 17:17, 18)
11 Idi umuna a siglo, dagiti tattao ti nabingaybingayda iti relihion, rasa ken nasionalidad kas met laeng itatta. (Aramid 2:7-11) Kaipapanan dayta a kaaduan kadagiti tattao addaandan ti kabukbukodanda a nabukel nga idea no maipapan iti relihion. Masansan mariknada a kasla agpegpeggadda gapuna isuda ti agdepensa no makasabatda iti maysa a Saksi. Kasanotay a mabalbaliwan dayta? Babaen ti panangusar ti kinaasi, kinataktika ken pannakibagaybagay.
12, 13. Kasano ti panagsao ni Pablo kadagiti managdaydayaw ti didiosen idiay Atenas? Kasanot’ panagriknada?
12 Kitaenyo no kasano a sinango ni Pablo ti kasta a situasion idiay managdaydayaw ti idolo nga Atenas. Ti umuna a riknana idi makitana ti nagadu a ladladawan ket isu ti panagsimronna. Idi nagtakder tapno agpalawag idiay Areopago, dagus kadi nga inatakarna iti panagdaydayawda kadagiti didiosen? Ti introduksionna idi ket: “Lallaki a taga Atenas, iti isuamin a banag makitak a managdaydayawkayo unay kadagiti didiosen. Ta iti ilalabasko ken panangkitak kadagiti karkararaganyo, nakasarakak met ti maysa nga altar a yan daytoy a surat ‘Maipaay iti Dios a Di Ammo.’ Daydiay ngarud daydayawenyo a dikay ammo, isu ti ipadamagko kadakayo.”—Aramid 17:16-23.
13 Pinaadayo kadi ni Pablo dagiti agdengdengngegna kadagidiay panglukat a sasaona? Nikaanoman. Ti iyaasidegna ti maysa a naintaktikaan, saan a dogmatiko. Saanna a kinondenar ida, numan pay manipud panangmatmat ti Dios ti panagdaydayawda awan mamaayna. Isut’ adda sadiay tapno ikasaba ti mensahe ti Pagarian, saan a tapno atakaren ida. Nabigbigna ti napigsa a narelihiusuan a rikriknada ket inusarna dagitoy kas pangibatayan tapno makapagturongen iti temana maipapan iti pudno a Dios ken ti pannakabagina, ti napagungaren a Jesus. Ania iti resulta daytoy naintaktikaan nga iyaadanina? Numan pay dadduma kadakuada nanglais, “dagidi sabsabali kinunada: ‘Denggendakanto pay manen iti maipapan itoy.’” Wen, isut’ naaddaan iti imbitasion iti panagsarungkar manen!—Aramid 17:22-32.
14. Kasanotay a maiyaplikar ti ulidan ni Pablo iti ministeriotayo?
14 Kasanotay met a maiyaplikar daytoy a metodo iti ministeriotayo itatta? Umuna, rebbeng nga agalibtaktayo koma nga agpaliiw kadagiti pagilasinan iti narelihiusuan a panangmatmat iti maysa a tao—nalabit babaen kadagiti narelihiusuan a bambanag nga isusuotna wenno makitkita idiay ruanganda wenno iti paraangan ti pagtaenganda. Gapuna, kas inaramid ni Pablo masansan a maaddaantayo iti nasayaat nga idea iti narelihiusuan a panangmatmat dagiti dadduma a tattao. Daytoy ti mangted kadatayo iti pangiturongan a maipaay iti nainggayyeman, makaparayray ti interes ngem saan a kontrobersial nga introduksion. Laglagipenyo a bumisbisitatayo kadagiti tattao nangnangruna tapno maisarita kadakuada maipapan ti Pagarian ti Dios—saan a tapno dagus a maigamer iti maysa a diskusion ti doktrina. Kayattayo a maallukoy dagiti tattao, saan laeng a makiargumento.—Idiligyo iti 2 Timoteo 2:23-26.
15. Ania pay dagiti dadduma a nagsayaat a leksion ti maadaltayo manipud ministerio ni Jesus? (Lucas 10:38-42)
15 Ania pay ti intay maadal manipud ti ulidan ni Kristo? No sukimatentayo ti ministeriona sigurado a mailasintayo ti napasnek a rikriknana ken ti kinasimplena. Isut’ saan a mariribukan iti aniaman a situasion no di ket nagsao a maipaay iti Pagarian ti Dios iti amin a kita ti sirkumstansia, paborable man wenno saan a paborable. Mabalinna ti mangasaba iti kinasinged iti maysa a pagtaengan wenno makapagtakder iti sanguanan ti adu a tattao ken mangted ti maysa a sermon—nga awan dagiti nota, Biblia wenno pangpapigsa ti timek! Addaan met iti pangkaaduan wenno kumon a kualidad. Dagiti nanumo laeng a tattao mariknada a mabalinda ti umasideg kenkuana. Isut’ nagsao ti pagsasaoda iti taltalon ken ap-apitda, maipapan kadagiti iket ken panagdaklis. Dagiti ilustrasionna nalakada a maawatan nupay naguneg ti kaipapananda. Ipampamatmattayo aya dagitoy met laeng a nasasayaat a kualidad iti ministeriotayo?—Mateo 4:18-25; 13:1-33; Lucas 5:1-3.
No Kasano a Madanon ti Puso
16. Apay a masapul ti panagbalintayo a kualipikado a mannursuro?
16 Kas gagangay alaenna ti panawen ken naannad a panagadal para iti maysa a tao tapno agbalin a kumbinsido iti mensahe ti Biblia maipapan iti Pagarian ti Dios. Daytat’ makagapu no apay addaantayo iti urnos ti regular a panangyadal ti Biblia iti pagtaengan, nga awan bayadna wenno obligasion iti biangda, iti siasinoman a tao nga agtarigagay nga agimbestigar kadagiti karkari ti Dios baeten ken Kristo. Dagiti kasta a panagadal ti umabot iti nawatiwat a panawen ket saklawenda ti adu a tema ken salsaludsod. Nalawag a daytoy kaipapananna ti panagbalintayo koma a kualipikado a mannursuro. Ngem ania a talaga ti kaipapanan wenno kababagas ti panangisuro?—1 Timoteo 4:16.
17. Aniat’ maysa kadagiti metodo nga inusar ni Jesus tapno madanon ti puso?
17 Maminsan manen agturongtayo ken Jesus a maipaay iti sungbat. Kasano ti panangisurona? Pangngaasiyo, ta sukimatenyo, dagiti sumaganad a teksto ket kitaenyo no mailasinyo ti simple a sistema ni Jesus a maipaay ti panangisuro kadagiti dadduma: Lucas 6:9, 32-34, 39-42. Ania ngay dayta? Isut’ nagusar kadagiti mannakaawat a salsaludsod. Apay nga inaramidna dayta? Tapno matulonganna dagiti agdengdengngeg kenkuana nga agrason ken tapno masukimatda dagiti bagbagida iti lawag ti pannursurona. Babaen kadagiti salsaludsodna naintaktikaan a nadanonna dagiti puspusoda. Masapul a mangipakitada no isudat’ pudpudno nga agtarigagay nga agbalin kas paspasurotna wenno dagiti motiboda ti panagdengdengngeg ket narabaw laeng.—Mateo 13:10-17; Marcos 8:34-38.
18. (a) Apay nga agus-usar dagiti Saksi ni Jehova ti salsaludsod a masansan kadagiti publikasionda? (b) Ania a padron ti rebbeng ditay us-usaren a kanayon bayat ti panangisursurotayo kadagiti dadduma?
18 Ngangngani amin dagiti katulongan ti panagadal ti Biblia nga us-usaren dagiti Saksi ni Jehova iti ministerioda addaan salsaludsod iti tunggal parapo iti teksto a mailawlawag. Daytoy ti maysa a katulongan ti panangisuro a mangtulong kadagidiay agad-adal ti Biblia tapno maiyebkasda ti bagida iti bukodda a sasao. Iti kasta agbalin a nalawag no ti tao matartarusanna met laeng ti material wenno saan. Nupay kasta, nupay nagaramat ni Jesus ti salsaludsod iti namin-adu nga okasion, saanna a pinagbalin dayta a maysa laeng nga ay-ayam ti pugpugto babaen ti panangipaayna iti umuna a sao wenno selaba iti maysa a sungbat. Nakitayo metten aya ti bagiyo a naminsan a matmatnag iti dayta a padron kadagiti estudianteyo ti Biblia? Apay a saan a nasayaat a metodo nga usaren dayta a regular? Agsipud ta ti pannakaammo iti Dios ken ni Kristo a mangiturong iti pannakaisalakan rebbeng a maibatay iti rason ken lohika, saan a ti awan mamaayna a pugpugto.—Juan 17:3; 1 Juan 5:20.
Makin Ad-adalan?
19, 20. Ania a panagannad ti kasapulan ditoy? Apay?
19 Maysa a pammagbaga ti nesesita iti daytoy a punto. No mangaskasabatayo ken mangisursurotayo a siepektibo iti nabunga a teritoria, iti agangay makapataudtayto ti ad-adalan. Ngem makin ad-adalan kadakuada? Rebbeng aya a panunotentay ida kas “ti karnerok”? Ket rebbeng aya nga ipalubostay ti bagbagitayo kas ministro a maisaad iti maysa a pedestal a pakaidaydayawan? Kitaenyo no kasano ti panagtignay da Pablo ken Bernabe idi a dagiti umili ti Listra kayatda ida a tratuen kas didios. Nagpukkawda kadagiti tattao: “Lallaki, apayapay aramidenyo dagitoy? Tattaokami met a kas iti kinataoyo, ket ipakaammomi kadakayo ti naimbag a damag, tapno manipud kadagitoy a palangguad a banag agsublikayo koma iti Dios a sibibiag.”—Aramid 14:14, 15.
20 Di pinadpadas da Pablo ken Bernabe nga iturong ti atension iti bagbagida. Numan pay binalakadan ni Pablo dagiti Kristiano a tumuladda kenkuana, kas ti panangtuladna ken Kristo, saanna a kayat nga isudat’ agbalin kas dagiti paspasurotna. Ti ministerio nga ar-aramidentayo ti masapul met nga agpaay a kanayon iti pakaidayawan iti Dios, saan a kadagiti tattao.—1 Corinto 3:6, 7; 11:1.
21. Apay a dagiti ad-adalan agbalindanto metten a ministro?
21 Iti agangay, dagiti adalan agbalindanto metten a ministro. Apay a kasta ti mapasamak? Bueno, ania kadi ti mapasamak no addaantayo iti pudpudno a naimbag a damag nga ibaga? Mabalintay kadi a bukbukodan la dayta? Iti kasupadina, datayo iti bumbumtak a mangibaga iti dayta kadagiti dadduma. Kas kinuna ni Jesus: “Ti naimbag a tao iti nasayaat a gameng ti pusona iruarna ti naimbag, . . . ta iti nawadwad iti puso sawen ti ngiwatna.” Kasta met iti maipapan iti naimbag a damag ti Pagarian. Ti adalan a ti pusona ket natignay kayatna met a suruan dagiti dadduma ken makikadua iti ministerio iti regular ken boluntario a pamay-an. Ti dedikasion iti Dios ken ti bautismo ti sumarsaruno. Iti kasta ti maulit-ulit a panagsasaruno dagiti ministro ti agtultuloy, a maitunos iti prinsipio ti balakad ni Pablo ken Timoteo: “Dagitoy ikumitmo kadagiti tattao a matalek, isuda a makabalinto a mangisuro met kadagiti sabsabali.”—Lucas 6:45; 2 Timoteo 2:2.
22. (a) Apay a ni Jehova nangpataud ti maysa nga organisasion dagiti mannursuro ken panag-ebanghelio? (b) Ania a masanguanan a trabaho ti masapul pay a mairingpas?
22 Itatta, iti intero a daga, ni Jehova a Dios addaan ti kasasayaatan pannakasanay nga organisasion dagiti mannursuro, manag-ebanghelio, ministro iti maika-20 a siglo. Adda nasurok a 2,600,000 kadakuada ti makipaspaset iti maudi a pammaneknek a maipapaay sakbay nga umay ti panagpatingga daytoy dakes a sistema. Ngem daytoy dumakdakkel a bunggoy maisagsagana met a maipaay iti dakdakkel pay a karit—ti pannakaisuro dagiti binilbilionto pay nga agsubli iti panagungar. Sisasaganakay metten aya a makipaset iti dayta nakaskasdaaw a pribilehio? Ti kadi ministerioyo itan ket nabunga? Sapay koma ta dayta ti kararagtayo a ti lawagtayo sumilnag koma a pakaidayawan ti Dios, bayat nga agserserbitayo kas dagiti epektibo a ministro.—Mateo 5:16; Juan 5:28, 29.
Dagiti Punto a Nasaklawyo
◻ Ania iti kaepektibuan unay a wagas ti panangikasaba ti naimbag a damag?
◻ Iti ania ti rebbeng a pakaibatayan ti pannursurotayo? Ania ti mensahe?
◻ Ania dagiti kualidad a kasapulan tapno dumngeg dagiti tattao kadatayo?
◻ Kasano a nadanon ni Jesus ti puso dagiti managdengngegna?
◻ Ania a panagannad ti kasapulan iti panangisurotayo kadagiti dadduma?
[Ladawan iti panid 22]
Dagiti Saksi ni Jehova ti mangaskasaba sadinoman ti pakasarakan kadagiti tattao
[Ladawan iti panid 24]
No mangaskasabatayo, managpaliiwtayo koma kadagiti mangipamatmat ti relihion ti maysa a tao