Ti Biag ken Ministerio ni Jesus

Masikog ngem Di Kasado

ADDA iti maikatlo a bulanen ni Maria iti panagsikogna. Malagipyo pay nga isut’ nangbusbos iti nasapa a paset ti panagsikogna a simmarungkar ken ni Elisabet, ngem itan isut’ nagawiden idiay Nasaret. Di agbayag ti kasasaadna makitanton ti publiko idiay ilida. Pudno, nga isu, ket adda iti makapadanag a kasasaad!

Ti namagbalin a dakes iti kasasaad a ta ni Maria naitulagen nga agbalin nga asawa ni Jose nga alluwagi. Ket ammona nga iti sidong ti linteg ti Dios iti Israel, ti babai a naitulagen iti maysa a lalaki, ngem situtulok a naaddaan iti seksual a pannakidenna iti sabali a lalaki, ket maubor agingga ken patay. Kasano a mailawlawagna ti panagsikogna ken Jose?

Yantangay pimmanaw ni Maria iti tallo a bulan, masigurotayo a magagaran ni Jose a makakita kenkuana. Idi nagsarakda, awan duadua imbutaktak ni Maria ti damag kenkuana. Mabalin nga aramidenna ti inggat’ kabaelanna a mangilawlawag a babaen iti nasantuan nga espiritu ti Dios nga isut’ nagsikog. Ngem kas mailadawanyo, daytoy ti nagrigat a banag ken Jose.

Ammo ni Jose ti nasayaat a pakasarsaritaan ni Maria. Ket awan duadua nga isut’ inay-ayatna unay. Kaskasdi, agpapan pay iti kasta a panagkunana, agparang a kasla isut’ nagsikog gapu iti maysa a lalaki. Uray pay kasta, saan a kayat ni Jose nga isut’ maubor ken patay wenno isu ti maibabain iti publiko. Gapuna naikeddengna iti panunotna nga isina a sililimed ni Maria. Kadagidiay nga al-aldaw, dagiti tattao a nagtulagen nga agkasar ti mamatmatmatandan nga agassawa, ket ti maysa a diborsio ti kasapulan a mamagpatingga iti kasta a panagtulag.

Kamaudiananna, bayat nga us-usigen pay laeng ni Jose dagitoy a bambanag, isut’ naturog. Ti anghel ni Jehova nagparang kenkuana iti maysa a tagtagainep ket kunana: ‘Dika agbuteng a mangiyawid ken ni Maria nga asawam, agsipud ta isut’ addaan ti maysa nga ubing babaen iti nasantuan nga espiritu ti Dios. Ket panaganamto ti ubing iti Jesus agsipud ta isalakannanto ti ilina manipud kadagiti basbasolda.’

Idi makariingen ni Jose, anian ti panagyamanna! Awan taktak inaramidna kas ti imbilin ti anghel kenkuana. Inyawidna ni Maria idiay balayna. Daytoy a publiko a panagtignay ti nagserbi, iti epektona, kas seremonia ti kasar, a nangipakaammo a ni Jose ken ni Maria opisialen nga agassawada. Ngem ni Jose di nakidenna ken ni Maria bayat iti panagsikogna ken Jesus.

Adtoy! ni Maria ti masikog, kaskasdi ni Jose ti mangisaksakay kenkuana iti maysa nga asno. Sadino ti papananda, ken apay nga agdaliasatda idinto a ni Maria ket ngangnganin agpasngay? Lucas 1:39-41, 56; Mateo 1:18-25; Deuteronomio 22:23, 24.

◆ Aniat’ kasasaad ti panunot ni Jose idi naammuanna ti panagsikog ni Maria, ken apay?

◆ Kasano a ni Jose maisinana ni Maria idinto a dida pay met nagkasar?

◆ Ania a publiko a tignay ti nagserbi kas seremonia ti panagkasar da Jose ken Maria?