Magna Gapu iti Pammati!

“Gapuna . . . a sitatalgedkami a kankanayon ket ammomi, a no agtaengkami iti bagi, awankami iti Apo, ta magnakami gapu iti pammati, saan nga iti panagkita.”​—2 CORINTO 5:6, 7.

1. Aniada dagiti sumagmamano a bendision a tagtagiragsakentayo gapu iti natauan a mata?

MAYSA kadagiti pagsidsiddaawan iti natauan a bagi isu ti mata. Babaen iti daytoy a nakaskasdaaw a potograpiko a mekanismo, saantay laeng a maliklikan dagiti lapped no di ket nagadu pay dagiti magun-odantayo nga impresion, nga adu kadakuada ti mangapektar ti pannakirelasion kadagiti dadduma. Nalawag a ti Diseniador ti mata dina inranta iti panagar-arikaptayo iti planetario a pagtaengantayo iti kinasipnget. No di ket, pinanggepna a makita ken tagiragsakentayo dagiti nakaskasdaaw a panamarsuana​—natauan man ken an-animal, dagiti bambantay ken karkarayan, dagiti danaw ken baybay, dagiti sabsabong ken dadduma pay a mulmula, ti langit ken iti nadayag a maris iti panaglennek ti init. Dagiti addaan panangipateg a managbuya mabalinda ti dumir-i a kadua ti salmista: “O Jehova, anian a nagadu dagiti ar-aramidmo! Nainsiriban ti panangaramidmo kadakuada amin. Ti daga napno iti pagsanikuaam.”​—Salmo 104:24.

2. Apay a saan a supisiente ti pannagna babaen ti panagkita, ket aniat’ kuna ni Pablo maipapan itoy a banag?

² Numan pay nakaskasdaaw nga agpayso ti pisikal a panagkita, nupay kasta, ti pannagna babaen laeng iti dayta ti napnuan kadagiti dakkel a peggad. No kayattayo a tagiragsaken ti nadiosan a pabor, masapul a makipagnatayo iti pammati a kadua ti Diseniador ti natauan a mata. Masapul a birukentay ti panangiwanwanna tapno maaramidantayo laeng no ania ti naimbag. Idi nagsurat kadagiti padana a napulotan a Kristiano, maiyanatop la unay kinuna ni apostol Pablo: “Gapuna . . . sitatalgedkami a kankanayon, ket ammomi a no agtaengkami iti bagi, awankami iti Apo, ta magnakami gapu iti pammati, saan nga iti panagkita. Sitatalgedkami ket kaykayatmi koma ti maawanan iti bagi ket agtaengkami iti Apo [babaen ti ipapatay ken pannakapagungar idiay nailangitan a biag]. Gapuna umagawakami met tapno uray agtaengkami, uray awan iti bagi, makaay-ayokami koma kenkuana. Ta masapul a datay amin maiparangarangtayto iti pangukoman ni Kristo, tapno tunggal maysa awatenna dagiti supapak ti inaramidna babaen iti bagina, naimbag man wenno dakes.”​—2 Corinto 5:6-10.

3. Aniat’ rebbeng koma a tarigagayan amin a dedikado nga ad-adipen ni Jehova, ket ania a salsaludsod ti maikari ti panangusigtayo?

³ Amin dagiti dedikado nga ad-adipen ni Jehova​—adda man kadagiti napulotan a natda wenno iti umad-adu a bilang dagiti “dakkel a bunggoy” nga addaan naindagaan a namnama​—kayatda nga aramiden no ania ti naimbag. (Apocalipsis 7:9) Ngem apay a maikuna nga adda ti dakkel unay a peggad iti ‘pannagna babaen iti panagkita’? Ket aniat’ kaipapanan ti ‘pannagna gapu iti pammati’?

Dagiti Peggad iti ‘Pannagna babaen ti Panagkita’

4. (a) Apay di alaen amin a banag sigun ti parupa a pateg? (b) Kasano ti panangmatmat ti Nangaramid iti mata kadagiti bambanag?

⁴ No alaentay dagiti isuamin a bambanag iti parupana ket agpannuraytay laeng kadagiti pammarang a langlanga, adda iti peggad iti pannakaallilaw nga agturong iti bukodtayo a pakadangranan. Kas pangarigan, ti maysa a tao magmagna iti kadaratan apaman latta a makitana ti bagina a naalun-onen iti gayong-gayong. Wenno mabalin a ti maysa nga indibidual ti mabalin a di makapagannad gapu iti naingayyeman a langa iti ‘maysa nga agbalinto kas lobo a nagkawes iti karnero.’ (Mateo 7:15) Gapuna masapul a naalibtaktay koma. Ti Nangaramid iti mata ket saan a paiwanwanwan babaen kadagiti makinruar a langa. Kinunana ken ni mammadto a Samuel: “Ta ti Dios saan a kumita kas iti ikikita ti tao, ta ti tao kitaenna ti makinruar a panagparang; ngem ni Jehova kitaenna ti puso.” (1 Samuel 16:7) Pudno unay, Daydiay nangbukel ti mata maawatanna dagiti makin-uneg a pampanunot ken panagem, ket iti panangtingitingna iti asinoman wenno aniaman ti kanayon nga apagpag-isu. (Idiligyo ti Hebreo 4:12.) Gapu iti perpekto a panagkitana ken pannakaawatna, pudno unay nga isu Daydiay makakita iti isuamin.

5. Apay a nasken a mapakdaarantayo maipapan kadagiti peggad iti ‘pannagna babaen ti panagkita’?

⁵ Kas tattao laeng, nupay kasta, ditay matarusan a silalawag no ania ti adda iti puso ti sabali a tao. Uray pay kadagiti inted-Dios a kababalintayo, imperpektotayo ket masansan a maallilawtayo. Kinapudnona, ti mismo a pusotayo ti mabalin a mangyaw-awan kadatayo, ta dayta “ti manangallilaw a nakarkaro ngem dagiti amin a banag ket isu napalalo a nagdakes.” (Jeremias 17:9) Gapuna nasken unay a mapakdaarankayo maipapan kadagiti peggad ti ‘pannagna babaen ti panagkita.’ Adda aya impaay ni Jehova a maipaay iti daytoy naganat a pagkasapulan? Pudno adda impaayna! Agpaay a pakasursuruantayo, impailanadna dagiti sumagmamano a naisangsangayan a paspasamak a mangipakita kadagiti peggad iti pannagna babaen laeng iti panagkita.​—Roma 15:4.

6. Ti ‘pannagna babaen ti panagkita’ ti addaan ania nga epekto kadagiti Israelitas?

⁶ Dagiti kapadasan ti kadaanan nga ili ti Dios, dagiti Israelitas, ti nakalawlawagda iti punto. Numan pay ti di agbiddut a panangiwanwan ni Jehova ti adda a sisasagana nga agpaay iti dayta naparaburan unay a nasion, dagiti awanan-pammati nga umariwekwekna ti sitatangken a nagna “kadagiti bukbukodda a balbalakad.” (Salmo 81:12) Babaen ti ‘pannagna[da] babaen ti panagkita’ nagturongda iti panagdaydayaw kadagiti ladladawan wenno didiosen a makitkita ti natural a mata. Babaen pannakaiturongda kadagiti makinruar a langa, nagpigergerda iti panagbuteng iti mangnibinibi a bilang dagiti kabkabusorda. Nupay kasta, gapu iti ‘pannagna[da] babaen ti panagkita a saan nga iti pammati,’ kinarit met dagiti Israelitas ti inted-Dios a kinapangulo ni Moises ket nagreklamoda maipapan iti gasatda iti panagbiag. (Idiligyo ti Judas 16.) Wen, ken adu kadakuada ti kaawatan immapal iti kasla iti panagkitada wayawaya ken kinarang-ay dagiti nasnasion iti aglawlawda, a nalipatanda ti kinapudno a dagidiay a tattao naigamerda iti nakababain a kasasaad ken natnagda iti nademoniuan nga impluensia.​—Levitico 18:1-3, 30.

7. Aniat’ napasamak kadagiti Israelitas a nangilaksid iti nadiosan a panangiwanwan?

⁷ Aniat’ napasamak kadagiti Israelitas a nangipapilit nga agturong iti bukodda a dalan, a linaksidda ti nasantuan a pannakaiwanwan? Apay, nagun-odanda ti panagsimron ni Jehova, ket inikkatna ti panangsalaknibna tapno maabakda kadagiti kabkabusorda! Uray pay idiay Naikari a Daga, masansan nagbalin nga adipen dagiti Israelitas kadagiti awan-asina a kabkabusorda. (Oc-ocom 2:17-23) Saan a kas ken Moises, a dina kinayat a tagiragsaken dagiti nailubongan a pagnam-ayan dagiti klase managturay ti Egipto, ti ili ti Israel pinilina ketdi “ti makiranud kadagiti aglabas a ragragsak ti basol” ket saanda a nagtultuloy a nagna a “kasla kitkitaenna Daydiay saan a makita.” Nagkurangda ti pammati. Ket laglagipenyo, “no awan ti pammati saan a mabalin nga ay-aywen [ti Dios] a naimbag.”​—Hebreo 3:16-19; 11:6, 24-27.

8. Apay a rebbeng a mapakdaaran dagiti moderno nga ad-adipen ni Jehova manipud iti kapadasan dagiti Israelitas idi ugma?

⁸ Dagiti moderno nga al-aldaw nga ad-adipen ni Jehova mabalinda ti mangala ti pakdaar manipud kadagidiay a pasamak idi un-unana. Uray datayo met, agpegpeggadtayo a kumapuy ti pammati wenno mapukaw pay ti pammatitayo. Saan aya a pudno a datayo ti naglaka a maimpluensiaan kadagiti makinruar a langa dagiti bambanag ket iti kasta mangrugi manen a ‘magna babaen ti panagkita’? Wen, ket dayta ti gapuna a gapu iti asi ni Jehova nangipaay iti pakaiwanwanan dagidiay agserbi kenkuana iti pammati. Inaramatna dagiti Israelitas ken ti pannakilangenna kadakuada kas leksion a maipaay kadagiti maud-udi a kaputotan, agraman ti kaputotantayo. (1 Corinto 10:11) Babaen iti dayta mapapigsatayo babaen kadagiti umiso a pannakaammo, babaen ti napigsa a namnama, ken babaen iti panagibtur.

9. No ‘magmagnatayo babaen ti panagkita,’ kasano komat’ panagriknatayo maipapan kadagiti ar-aramid wenno tigtignay ken maipapan kadagiti nateokratikuan nga urnos?

⁹ No awan daytoy sigurado a direksion manipud ti naayat a Namarsuatayo, agpegpeggadtayo iti panangkarit iti Dakdakkel a Moises, a ni Jesu-Kristo, a liplipaten a ti Dios ken ni Kristo ti mangiturturong ita kadagiti pudno a Kristiano. (Idiligyo iti 1 Corinto 11:3; Efeso 5:24.) Mabalin a matmatantayonto ti organisasion dagiti Saksi ni Jehova kas namunganay laeng iti tao ket mabalin a mariknatayo a siwayawaya a mangaramid iti kasla nalinteg iti mismo a matatayo. (Idiligyo ti Oc-ocom 21:25.) Mainayon pay, mabalin a matnagtayo iti panagkamali dagiti dadduma a pampanunotenda a la ketdi no dagiti dadduma a tigtignay ket saanda a riribuken ti konsiensiatayo, mabalin dayta. Mabalin a dadduma mangrugi a panunotenda a ti teokratiko nga organisasion ket agpaay iti pagnam-ayan ken panglakaganda ket amin dagiti al-alagadenna ti rebbeng a maaramid a nalaka, nga awan ti panagsakripisio a kasapulan kadakuada. Ti sabali pay a peggad isu ti panangpampanunot a ti urnos ti kongregasion ti maaramidda a maitunos koma iti pagayatantayo imbes a ti pagayatan ti Dios. Kaskasdi, ti Pagulidanantayo, ni Jesu-Kristo, kanayon nga inaramidna a siraragsak ti pagayatan ti nailangitan nga Amana.​—Salmo 40:8; Hebreo 10:5-10.

10. Kasano koma a maapektaran ti kababalintayo iti tay-ak ti ministerio ken dagiti dadduma pay a nateokratikuan nga ar-aramid no lipatentayo ti nasantuan a panangiwanwan wenno laglag-anentay dayta?

¹⁰ Gaput’ pannakalipatda iti nadiosan a panangiturong wenno pananglaglag-an iti dayta, mabalin a dadduma panunotenda a dagiti panaggigimongtayo ti rebbeng a mapaababada koma, a dagiti lugar a pagaasamblean saanda koma unay nga adayo, ken ti material a pagadalan ti kanayon koma a nalaka, a dina koma iramraman dagiti “natangken a taraon.” (Hebreo 5:12) Kadagiti dagdaga a sadiay tagtagiragsaken dagiti Kristiano ti kinatalna ken kinaulimek, mabalin a dadduma laglag-anenda laeng dagiti bendision ti Pagarian, a pampanunotenda nga awan koma ti aniaman a panagbannog iti sagrado a serbisio. No mapatanortayo dagiti kasta a kababalin, mabalin pay nga agbalintayto a “managayat iti ragragsak imbes a managayat iti Dios,” a nalabit iresreserbatayon ti tunggal ngudo ti lawas a maipaay iti panaglinglingay imbes a panangusar kadagita a tiempo iti tay-ak iti ministerio ken dagiti dadduma pay a nateokratikuan nga ar-armaid a mangipakita iti amin-puso a debosiontayo ken ni Jehova. (2 Timoteo 3:1, 4) No mapasamak dayta, sipupudno kadi a maikunatayo a “magnakami gapu iti pammati, saan nga iti panagkita”?

11. Ti panangpagpagusto ti bagbagitayo, ti mabalin maaddaan ti ania nga epekto, ngem kasapulan ti intay panangaramid iti ania?

¹¹ Sa adda met ti peggad iti nalabes a panangpagusto ti bagbagitayo. Nakalaklaka ti panangkumbinsirtay ti bagbagitayo a panunoten a ti bassit laeng a sakit ti ulo wenno umas-asping pay a problema ti dakdakes ngem ti pudno a kasasaadna. Ti imperpekto a lasagtayo ti mabalin a mangdagadag kadatayo a mangusar iti kasta a pambar tapno saantay a maitungpal ti maysa a responsabilidad, kas ti panangted ti maysa a palawag iti Teokratiko nga Eskuelaan iti Panagministro. Ngem posible kadi a ditay pulos mapanunot ti panangipalubos ti isu met laeng a sakit a mamasardeng kadatayo a makiraman iti maysa a langa ti panaglinglingay? Siempre, masapul nga usarentay ti umiso a panagpampanunot ket ditay laglag-anen ti aniaman a serioso a sintomas. Nupay kasta, masapul ti intay koma panagagawa. (Lucas 13:24) Ket siempre, ti pammati dakkel koma iti pasetna iti pangngeddengtayo tapno ditay ‘magna babaen ti panagkita’ laeng, a maitunos kadagiti kabukbukodantayo nga awan tulongna a balakad.​—Roma 12:1-3.

12. Iti ania a kita ti pannakidangadang ti pakasarakantay kadagiti bagbagitayo a mangawis iti ania a kababalin iti biangtayo?

¹² Ditay koma liplipatan nga addatayo iti maysa a pannakidangadang a maibusor kadagiti dakes a puersa dagiti espiritu. (Efeso 6:11-18) Ti kangrunaan a kabusortayo, ni Satanas a Diablo, ti makaiyeg ti nagpigsa unay nga impluensia kadatayo babaen ti panangaramatna kadagiti ig-igamna a nairanta a mangdadael iti pammatitayo ken ni Jehova. Mabalinan ni Satanas ti agapelar iti tunggal inaagum a tarigagay dagiti tattao ket awan tipo ti panangallukoy ti lipatennanto a mabalin a mangallukoy kadatayo iti panagpampanunottayo. No naitimpuyogtayo kadagiti “natda” iti “bin-i” iti “babai” a kukua ti Dios, wenno ti nailangitan nga organisasion, addatayo iti maysa a pannakigubat. Daytat’ maysa a gubat nga awan a pulos ti panagbakasion agingga a ni Jehova, a mangpabpabileg kadatayo tapno maibturan dagiti sataniko nga iraraut, iyegnan ti intero nga organisasion ti Diablo iti panungpalanna. (Apocalipsis 12:16, 17; 1 Pedro 5:6-11) Gapuna, rebbeng aya nga agbalintayo a natured ken maaddaan iti pannakaawat iti kinaganat? Rebbengna koma a kasta!​—Salmo 31:24.

Aniat’ Kayat a Sawen ti ‘Pannagna Gapu iti Pammati’

13. Aniat’ kaipapanan ti ‘pannagna gapu iti pammati’?

¹³ Ti ‘pannagna gapu iti pammati’ kayatna a sawen ti ilalasat kadagiti narikut a kasasaad a buyogen iti pammati iti Dios, iti abilidadna a mangiwanwan kadagiti panagaddangtayo, ken ti itutulokna a mangkita a makalasattayo iti kinatalged. (Salmo 22:3-5; Hebreo 11:6) Kaipapananna ti panagkitakit a paiwanwan babaen laeng kadagiti makinruar a langa wenno pammarang dagiti bambanag wenno babaen ti awan tulongna a natauan a panagrasrason. Ti pammati ti mangtignay kadatayo a magna iti direksion nga itudtudo ni Jehova, agpapan pay kasano ti kinarigat dayta a dana. No ‘magnatayo gapu iti pammati,’ agbalintayo a kas ken David, a nagkuna iti Dios: “Ipakitamto kaniak ti dana ti biag. Ita sanguanam adda ti naan-anay a rag-o; ita makanawanmo adda dagiti pakaay-ayuan nga agnanayon.” (Salmo 16:11) Mainayon pay, no palubosantay ni Jehova a mangiturong kadagiti addangtayo, itdennanto kadatayo ti talna ti panunot ket tulongannatayo a manggun-od ti panagballigi, agpapan pay kasano kadakkel dagiti rigatna a maibusor kadatayo. (Juan 16:33; Filipos 4:6, 7) Mainayon pay kadagiti dadduma a bambanag, ti ‘pannagna gapu iti pammati’ ti regular a mangipan kadatayo iti pannakitimtimpuyog kadagiti naespirituan a kakakbsattayo a lallaki ken babbai a maipaay iti nagkaykaysa a panagadal ti Biblia ken panagkararag.​—Hebreo 10:24, 25.

14, 15. (a) Aniat’ kababalin ni Jesus maipapan kadagiti kinabaknang, dayaw, ken pannakiraman iti politika? (b) Kas naiparangarang kadagiti Kasuratan, kasanot’ panangmatmat ni Jesus ti panangiwanwan ti Dios?

¹⁴ Iti sabali a pannao ti ‘pannagna gapu iti pammati’ pagbalinennatay met a kadkadua dagiti matalek nga ad-adipen ni Jehova idi ugma. Ti kangrunaan a maysa kadakuada isu ni Jesu-Kristo, “ti Kangrunaan nga Ahente ken Mangan-anay iti pammatitayo.” Bayat a pagregreggetantayo a “suroten dagiti addangna,” aniat’ masarakantayo?​—Hebreo 12:1-3; 1 Pedro 2:21.

¹⁵ Indian ni Jesus ti pannakairamanna iti nailubongan a politika ket dina pulos sinapsapul ti kinabaknang ken dayaw a birbiruken dagiti adu. Imbes ketdi, intudona a ti Pagarianna ket “saan a paset daytoy a lubong,” ket adayo iti panagbalinna kas materialista, isu ti ‘awan pay pangisaadanna ti ulona.’ (Juan 6:14, 15; 18:36; Lucas 9:57, 58) Numan pay ni Jesus addaan iti perpekto a panunot, isut’ di nagtignay a nagimbubukodan no di ket kimmita iti nailangitan nga Amana a maipaay iti pannakaiwanwan.​—Juan 8:28, 29.

16. Iti lawag ti ulidan ni Jesus, aniat’ maikuna maipapan iti kababalin dagiti Saksi ni Jehova?

¹⁶ Gapu iti ulidan ni Jesus, aniat’ maikuna maipapan kadagiti Saksi ni Jehova itatta? Bueno, kas dagiti manangitandudo iti nailangitan a Pagarian ti Dios, pagraraemantayo dagiti “nangangato a turturay” ti gobierno ngem tagtaginayonen ti neutralidad kadagiti napolitikaan a bambanag. (Roma 13:1-7; Mateo 6:9, 10; Juan 17:16) Imbes a sapsapulen dagiti kinabaknang ken dayaw iti daytoy a lubong, ‘birbirukentayo nga umuna ti Pagarian,’ a sitatalek a ni Jehova ipaaynanto dagiti kasapulan ti panagbiag. (Mateo 6:24-34; Salmo 37:25) Ket kas ken Jesus ‘ditay agtalged iti pannakaawattay met laeng’ no di ket siyayaman nga awatentayo ti panangiwanwan ti naayat a Diostayo. (Proverbio 3:5, 6) Pudno unay, amin daytoy tulongannatayo a ‘magna gapu iti pammati.’

Dagiti Suot ken Bendision

17. Masapul nga ibturan ti ili ni Jehova ti ania bayat a ‘magmagnada gapu iti pammati’? Pangngaasiyo ta iyilustraryo daytoy.

¹⁷ Kadagiti adu a dagdaga dagiti padatayo a Saksi ni Jehova masapul nga ibturanda dagiti karkarna a rigat ken lapped, agraman pay ti naulpit a panangidadanes, bayat a ‘magmagnada gapu iti pammati.’ Siempre, dagiti suot ti pammati agparangda iti nadumaduma a langa. Kas pangarigan, usigenyo dagiti rigat ken ti matalek a serbisio ti maysa a lakayen a kabsat idiay Ecuador. Naammuanna ti kinapudno idi agtawen ti 80, kalpasanna naadalna ti panagbasa ken panagsurat. Isut’ nabautisaran dua a tawen kamaudiananna. Agsipud ta isu ket agtataeng kadagiti kabakiran, isut’ magna iti tallo nga oras tapno madanonna ti Kingdom Hall. Ti bumusbusor nga asawana ti mangilemmeng kadagiti kawesna ken kuartana tapno upayen manipud itatabuno kadagiti Nakristianuan a panaggigimong. Ngem dagitoy a problenma ti saan a nangpakapuy iti daytoy matalek a kabsat. Isut’ nagserbi kas maysa a temporario, wenno auxiliary, a payunir kada bulan iti las-ud iti sangapulo a tawen ken nangaskasaba kadagiti adu a purpurok, a masansan isu ti uy-uyawen dagiti umili. Nupay kasta, idi iti kamaudiananna dagiti payunir ken misionero nangaskasabada kadagitoy a disso, adu kadagiti tattao ti immasideg kadakuada ket nagkalikagumda ti pannakaiyadal ti Biblia kadakuada. Gapuna, adu a naimbag a bambanag ti imbunga ti naregta a panagtrabaho daytoy naregta a kabsat. Isut’ natay gapu iti kanser idi agtawen ti 92 ngem nangbusbos ti 40 nga oras iti ministerio iti mismo a bulan nga ipapatayna.

18. (a) Aniat’ masapul nga aramidentayo no kayattay a tagiragsaken ti nadiosan a pabor? (b) Ania dagiti gunggona a maadda kadatayo no agtultuloytayo a ‘magna gapu iti pammati, saan a babaen ti panagkita’?

¹⁸ Uray datayo, met, masapul nga agibturtayo agpapan pay kadagiti adu a parikut ken rigrigat. (Mateo 24:13) No kayattayo a tagiragsaken ti nadiosan a pabor, nasken nga iyaplikartayo dagiti balakad ti Dios, agpannuray kenkuana, ken agtalinaed a naisina manipud iti lubong, kadagiti kababalinna ken aw-awidna. (Salmo 37:5; 1 Corinto 2:12; Santiago 1:27) Gapuna pagreggetantayo a tuladen ti Pagulidanantayo, ni Jesu-Kristo. Agbalintayo a managsakripisio ken situtulok a mangigaed kadagiti bagbagitayo iti nadaeg a serbisio ni Jehova. Bayat ti panangar-aramidtayo iti daytoy, mabalintayo ti simamatalek a kumita iti kaitungpalan dagiti engrande a karkari ti nailangitan nga Amatayo agpaay kadagiti nasungdo a managdaydayawna. Ket anian dagiti nakaskasdaaw a bendision a pangiturongan daytoy nga inkarina a Baro nga Urnos! Kangrunaanna ti isuamin, ti ‘pannagna gapu iti pammati, saan a babaen ti panagkita’ ti mangyegto kadatayo iti gunggona a makiraman iti panangalangon iti sapasap a kinasoberano ni Jehova.

Malagipyo Pay Aya?

◻ Aniada dagiti peggad iti ‘pannagna babaen ti panagkita’?

◻ Ti kapkapadasan dagiti Israelitas ti mangted ania a pakdaar kadagiti ili ni Jehova itatta?

◻ Imbes a pagpagustuanan ti bagbagitayo, aniat’ kasapulan nga aramidentayo?

◻ Ti ‘pannagna gapu iti pammati’ kaipapananna ti panagaramid iti ania?

[Dagiti ladawan iti panid 12]

Bayat a dagiti padayo a saksi ni Jehova makiramramanda kadagiti nateokratikuan nga ar-aramid, dakayo aya ken ti pamiliayo masansan nga agturturongkayo iti maysa a lugar a paglinglingayan?

[Ladawan iti panid 14]

Ni Jesu-Kristo ti nangibati kadatayo ti naisangsangayan nga ulidan. Kas kenkuana, ‘magmagnatayo met aya gapu iti pammati’?