Ad-adda Pay a Panangsukimat iti Sao ti Dios

‘No itultuloymo a sapulen kas nalmeng a gameng, iti kasta masarakamto ti pannakaammo iti Dios.’​—PROVERBIO 2:4, 5.

1. Ania ti pudno a gubuayan iti ragsak, ken apay?

“NARAGSAK ti tao a makasarak iti sirib, ken ti tao a makaala iti pannakaawat, ta ti pannakagun-od kenkuana nasaysayaat ngem ti pannakagun-od iti pirak ket ti magunggona kenkuana nasaysayaat ngem balitok a nasudi. Napatpateg ngem dagiti rubis, ket awan kadagiti bambanag a mabalinmo a tarigagayan ti maiyasping kenkuana. Ti kaatiddog dagiti al-aldaw adda iti imana a kanawan . . . isu ti kayo ti biag kadagiti kumpet kenkuana, ket naragsak ti siasinoman a mangsalimetmet kenkuana.”​—Proverbio 3:13-18.

2. Apay a naragsak dagiti Saksi ni Jehova, ngem ania a balakad ti naited kadakuada manipud iti tiempo ti pannakabautisarda?

² Kinapudnona, dagiti pudno a Kristiano naragsakda, a makasarak iti sirib. Dayta kaipapananna ti abilidadda a mangusar iti pannakaammoda iti Sao ti Dios iti aktibo a panagdayawda, iti panangrisotda kadagiti inaldaw-aldaw a parparikutda, ken iti panangaramidda kadagiti pangngeddeng maipapan kadagiti kalatda iti biag. Sakbay ti panangawat dagiti Saksi ni Jehova kadakuada a maipaay iti bautismo, ti kangrunaan a pannakaammo ti tunggal kandidato ti masubok babaen iti nasaknap a serie dagiti nakalawlawag a salsaludsod. Maysa kadagiti maudi a salsaludsod a maintuod ket: “Kalpasanto ti pannakabautisaryo iti danum, apay a nasken para kadakayo ti mangtaginayon iti nasayaat nga eskediol a maipaay iti personal a panagadal ken ti pannakiraman a kanayon iti ministerio?” Daytoy ti mangipasagepsep iti isip ti kandidato iti bautismo ti pannakasapul iti agtultuloy a panagadal iti labes dagiti pamunganayan a sursuro ken “agtultuloy iti kinanataengan.” (Hebreo 6:1) Ngem amin kadi dagitoy ipangagda daytoy a balakad?

3, 4. (a) Ania ti kinuna ni Pablo maipapan kadagiti dadduma a Kristiano idiay Corinto ken idiay Judea? (b) Ania ti agparang a kasasaad dagiti dadduma a Kristiano ita?

³ Iti umuna a suratna kadagiti Kristiano a taga Corinto, ni apostol Pablo nagreklamo a dina mabalin ti makisarita kadakuada “kas naespirituan a tattao,” ngem masapul ti pannakisaritana kadakuada “kas ubbing ken Kristo.” (1 Corinto 3:1) Kasta met, isut’ nagsurat, mabalin kadagiti Kristiano nga agnanaed idiay Judea: “Ket adda adu a sawenmi maipapan kenkuana ngem narigat nga ipalawag, agsipud ta nagbalinkayo a ngelngel a dumngeg. Ta, idinto a, dakay koma ti mannursuron gapu iti kabayagyon, masapulyo manen ti mangisuro kadakayo no ania dagiti pamunganayan a sursuro kadagiti sagrado a sasao ti Dios; ket nagbalinkayo a kasla dagiti makasapul ti gatas, a saan a ti taraon a nakired. Ta tunggal maysa a mangaramat ti gatas awan padpadasna iti sao ti kinalinteg, ta isu maysa nga ubing.”​—Hebreo 5:11-13.

⁴ Kasta met, ita, agparang a dadduma, apaman a makagun-oddan ti umdas a pannakaammo a mangidedikar kadagiti bagbagida ken Jehova nga addaan ti namnama nga agbiag nga agnanayon idiay Paraiso a daga, saanda a mangpataud iti serioso a napaut nga ugali iti panagadal. Mabalin a mariknada nga umdasen ti ammoda tapno “rumang-ayda,” iti naespirituan a panagsao. Saanda a rumang-ay iti labes ti panagtaraon iti “gatas.” Sipaprangkesa a kinuna ni Pablo a dagiti kakasta agtalinaedda nga “awan padpadasna iti sao ti kinalinteg,” kayatna a sawen, saanda a nairuam a mangusar “iti sao ti kinalinteg” a mangsubok kadagiti bambanag. Kinuna pay ni Pablo: “Ngem ti taraon a nakired maipaay kadagiti tattao a nataengan, dagidiay a gapu iti pannakaasaasda dagiti pannakaawatda nairuamdan a mangilasin ti naimbag ken dakes.”​—Hebreo 5:14.

“Taraon a Nakired” Kasapulan iti Panagdakkel

5, 6. (a) Ania ti pudno kadagiti dadduma nga addan iti kinapudno bayat dagiti adun a tawtawen, ken apay a daytoy ket saan a gagangay a pasamak? (b) Ania ti kinuna ni Pablo kadagiti kakasta, ket ania koma ti aramidenda?

⁵ Manon a tawen a maysakayon a dedikado nga adipen ni Jehova? Panunotenyo ti naespirituan a panagdakkelyo bayat dagidiay a tawtawen. Ti laeng kadi kabaelanyo nga ilawlawag manipud iti Biblia isu dagiti kangrunaan a kinapudno, “dagiti pamunganayan a sursuro kadagiti sagrado a sasao ti Dios”? Sumagmamano kadagidiay nga addan iti dalan iti Kinakristiano bayat dagiti 10 wenno 20 a tawtawen ti kaskasdi nga adda pay laeng iti panagtaraon iti “gatas.” Aniat’ mabalin a pagarupen dagiti tattao iti maysa nga ubing a 10 ti tawennan, wenno iti agtutubo a lalaki wenno babai nga agtawen 20, a matartaraonan pay laeng iti gatas? Saan kadi a daytoy maisupadi iti kaaduan a paglintegan? Saan kadi a ti taraon a gatas tiltilenna ti panagdakkel ti tao? Mabalin nga agbiag ti indibidual, ngem isu saan a dumakkel a napigsa ken nasalun-at a nataengan. Pudno met dayta iti naespirituan.

⁶ Apay a dagiti dadduma a nagbalinen a Kristiano bayat dagiti adun a tawtawen saanda a nabileg iti naespirituan tapno aktibo a makipasetda a mangtulong kadagiti gagangay nga “ubbing,” dagidiay a nabiit pay a nangala iti takderda a maipaay ken Jehova? Dagitoy a saan a rimmang-ay nakaawatdan kadagiti adu a tawtawen iti tiempo ken atension dagiti Kristiano a panglakayen ken dagiti dadduma a natataengan. Kaskasdi, kas kunaen ni Pablo, dagitoy isuda ‘koma ti mannursuron gapu iti kabayagdan.’ Tapno agbalinda a mannursuro, masapul a rumang-ayda iti labes ti panagtaraon iti “gatas” ket masapul a mairuamda iti pannangan iti “taraon a nakired.” Kasano a maaramidanda daytoy?​—Hebreo 5:12.

7. Sigun iti Hebreo 5:14, maipaay iti siasino ti “taraon a nakired,” ket kasano a ti maysa a Kristiano agbalin a kasta?

⁷ Kunaen ni Pablo a ti “taraon a nakired maipaay kadagiti tattao a nataengan,” ket depinarenna dagiti kakasta a kas “dagidiay a gapu iti pannakaasaasda dagiti pannakaawatda nairuamdan a mangilasin ti naimbag ken dakes.” Iti sabali a pannao, dagidiay a mangiyugali iti panangusar iti aniaman a pannakaammo iti Sao ti Dios nga adda kadakuada tapno mangilasin iti naimbag ken dakes ti main-inot a masanay ti pannakaawatda ket magun-odandanto ti Nakristianuan a kinanataengan. Dagitoy mairuamdanto a mangusar “iti sao ti kinalinteg” a mangsubok kadagiti bambanag ket iti kasta ilasindanto no ania ti nasayaat wenno makagunggona ken no ania ti makadangran iti moral, naespirituan, ken uray pay iti pisikal. Babaen iti panangiyaplikar iti masursuroda, saandanton nga agbalin nga “awan padpadasna iti sao ti kinalinteg.” Dagitoy agbalindanton a “nataengan a tattao,” dagidiay a pagpaayan ti “taraon a nakired.”​—Hebreo 5:13, 14.

Pataudenyo ti Nasayaat nga Ugali ti “Pannangan”

8. Kasano koma a ti maysa a Kristiano agpatingga laeng iti taraon a “gatas,” ngem kasano a mabaliwanna iti ugalina a “pannangan” iti naespirituan?

⁸ Dagiti agsakit a tattao a naikabil iti panagtaraon iti gatas bayat ti atiddog a panawen masapul nga iruamda ti bagida iti panagtaraon iti taraon a nakired iti maminsan manen. Kasta met, dagidiay a nakapataud iti ugali a mangan a “sipdusipdut” kadagiti naespirituan a taraon nga idasar “ti matalek ken naannad nga adipen” nga ibatida iti pingir ti platoda, kas kunaen, dagidiay naimas wenno nasasayaat a paset a makasapul iti bassit a “panagngalngal” (panagpanunot ken panagsukimat), masapuldanto ti panangipaay iti panangikagumaan a mangpataud iti nasayaat nga ugali iti naespirituan a “pannangan.” Masapuldanto ti ‘mangtignay kadagiti nasin-aw a panagpampanunotda’ ken ‘mangipaay iti panangikagumaan.’​—Mateo 24:45; 2 Pedro 3:1, 2; Lucas 13:24.

9. Ania ti makatulong iti maysa a nakapukaw iti ganasna a mangan?

⁹ Tallo a bambanag ti mabalin a makatulong iti maysa a tao a nagsakit tapno mapasublina ti ganasna a mangan iti nakired, makapasalun-at a taraon: (1) umiso a pakatignayan, kayatna a sawen, ti panagtarigagay nga umimbag ken pumigsa manen, (2) naimas a taraon a maidasar a kanayon iti padapada a baet, ken (3) umdas a presko nga angin ken ehersisio wenno panagwatwat. Kasano a dagitoy a punto matulonganda ti maysa a nakapukaw iti ganasna a mangan kadagiti nauuneg a bambanag iti Sao ti Dios?

10. Ania nga umiso a pakatignayan ti mangtignay kadatayo a mangparang-ay iti pannakaammotayo iti Sao ti Dios?

¹⁰ Aniaman a tao a nangidedikaren iti biagna ken Jehova ti masapul a maaddaan iti nabileg a pakatignayan a mangparang-ay iti pannakaammona iti Sao ti Dios. Ti ayattayo ken Jehova ti mangtignay kadatayo nga agbalin nga ad-adda pay a makaammo kadagiti nakaskasdaaw a kualidadna, ti pagayatanna, ken dagiti pangpanggepna. Daytoy kasapulanna ti ad-adda pay a panagadal ken panagmennamenna. (Salmo 1:1, 2; 119:97) Kasta met, ti namnamatayo nga agbiag nga agnanayon iti Paraiso a daga ti Dios agpannuray iti agtultuloy a ‘pananggun-odtayo iti pannakaammo iti maymaysa a pudno a Dios ken iti Anakna, ni Jesu-Kristo.’ (Juan 17:3) Ngem ti tarigagaytayo iti biag nga agnanayon saan koma nga isu ti kangrunaan a panggeptayo iti panagadal iti Kasuratan. Dayta ti biddut nga inaramid dagiti dadduma nga awanan pammati a Judio. Ti “panagsukimattayo iti Kasuratan” ti masapul a maaramid a nangnangruna gapu iti ayattayo iti Dios ken ti tarigagay a mangaramid iti pagayatanna.​—Juan 5:39-42; Salmo 143:10.

11. Kasano a maidasdasarantayo kadagiti naimas a taraon a kanayon?

¹¹ Ti kinawadwad ti naimas a naespirituan a taraon a maidasar a kanayon ken “iti umiso a tiempo” babaen “ti matalek ken naannad nga adipen” ti mangtignay koma kadatay amin a mangipakita iti panangapresiartayo babaen ti pananggun-odtayo iti naan-anay a pananggundaway kadagiti nasasayaat a bambanag a naipaay. (Mateo 24:45) Masapul a pataudentayo koma ti nasayaat nga ugali iti naespirituan a “pannangan” babaen iti panangilasin iti umdas a tiempo a panangbasa ken panangadal kadagiti amin a nasasayaat a material a naipablaak kadagiti liblibro ken magasin iti Watch Tower Society. Dagiti naespirituan a taraon ti maidasar kadagiti regular a tiempo iti lima a linawas a gimgimong a naorganisar kadagiti kongregasion dagiti Saksi ni Jehova iti isuamin a lubong. Addakayo kadi kadagitoy amin a gimgimong ken nakasagana a naimbag a mangawat ti taraon a naidasar?

12. (a) Ania ti sabali pay a pamay-an a maparang-ay ti maysa a Kristiano ti ganasna a mangan iti naespirituan? (b) Gapuna, ania a salsaludsod ti mabalin nga imtuodentayo kadagiti bagbagitayo?

¹² Ti panagayat iti Dios agraman ti panagayat iti kaarruba ti mangtignay koma kadatayo nga agadal iti Saona. (Lucas 10:27) Ti maysa a tao a nakapukaw iti pisikal a ganasna a mangan magunggonaan manipud iti presko nga angin ken panagwatwat. Kasta met, ti Kristiano nga agtarigagay a mangpasayaat iti ganasna a mangan iti “taraon a nakired” ti mabalin a matulongan babaen iti iruruarna iti trabaho a panangasaba ken panangusarna iti pannakaammona a mangisaknap iti “daytoy naimbag a damag iti pagarian” ken ti “panangaramid ad-adalan kadagiti amin a nasnasion.” (Mateo 24:14; 28:19, 20) Laglagipenyo, a kinuna ni Pablo kadagidiay a “nagbalin a kasla kadagiti makasapul iti gatas,” wenno naespirituan nga ubbing, a dagitoy ‘koma ti mannursuron gapu iti kabayagdan.’ (Hebreo 5:12) Sadino ti pagtakderanyo, gapu iti kabayagyon a maysa a pudno a Kristiano? No maysakayo a kabsat a lalaki, rimmang-aykayo kadin iti tukad a sadiay mabalin a mausarkayo kas “mannursuro” iti tay-ak, ken nalabit maysa a panglakayen iti kongregasion? No maysakayo a Kristiano a kabsat a babai, kabaelanyo kadi ti mangikondukta kadagiti makapabileg a panagadal iti Biblia iti pagtaengan dagiti tattao a mangipakita iti interes iti kinapudno iti Dios wenno nalabit tumulong kadagiti Kristiano a kakabsatyo a babbai iti trabaho a panangasaba?

Aramidenyo a Makaparagsak ti Panagadal

13. Ania ti nagdumaan ti panagbasa ken panagadal?

¹³ Naikuna a ti panagbasa ket pagragsakan ngem ti panagadal ken maysa a trabaho. Adda kinapudno iti dayta. Adu a makapabileg a panagbasa ti mabalin a maaramid a makaparagsak a paginanaan. Ania koma ti ad-adda pay a makaparagsak ngem ti maysa wenno dua nga oras a nabusbos iti nanam-ay a kasasaad a panangbasa iti maysa a report manipud iti Yearbook of Jehovah’s Witnesses wenno maysa a ruar iti Agriingkayo! a magasin? Ti panagadal, nupay kasta, kaipapananna ti panagtrabaho. Kuna ti maysa a diksionario: “Ti panagadal ipamatmatna ti panangtaginayon iti addaan panggep a panangipamaysa a buyogen iti kasta unay annadna nga atension kadagiti detalye a mabalin a mangipalgak kadagiti posibilidad, aplikasion, nagdudumaan, wenno pagnanaigan dagiti bambanag a naadal.” Wen, ti panagadal kasapulanna ti panangikagumaan. Ngem kas met iti aniaman a trabaho a nasayaat ti pannakaaramidna ket makapnek ken makagunggona, ti panagadal mabalin met a makaparagsak ken makagunggona iti naespirituan. Paginteresantayo ti panangaramidtayo iti dayta a kasta. Kasano?

14. Ania ti mabalin a kasapulanyo a mamagbalin nga ad-adda a naragsak ken makagunggona iti personal a panagadalyo?

¹⁴ Tapno ti panagadal agbalin a makaparagsak ken pudno a makagunggona, nasken ti mangipaay iti umdas a tiempo iti dayta. Agsipud ta “ti panagadal ipamatmatna ti panangtaginayon iti addaan panggep a panangipamaysa” ken ti “kasta unay annadna nga atension kadagiti detalye,” kasano kasansan a sipupudno a makunayo a nagadalkayo iti Pagwanawanan wenno ti publikasion a nausar iti Panagadal ti Libro iti Kongregasion? Saan kadi nga ad-adda nga umiso a kunaenyo a masansan a palabasanyo laeng ti adalen a material ket dagdagus nga ugedan dagiti sungbat dagiti salsaludsod, a saan a pudno a maawatan dagiti detalye ken dagiti rason iti naited a panangilawlawag? No kastoy ti kasasaadyo, nalabit ti umuna nga addang nga alaenyo tapno maparang-ay ti ugaliyo iti naespirituan a “pannangan” isu ti ‘panangusaryo a nasayaat iti amin a gundawayyo’ nga agadal. (Efeso 5:15-17) Daytoy mabalin a kaipapananna ti panangaramid kadagiti dagus a panangiyakar iti tiempo manipud kadagiti saan unay a nasken nga ar-aramid ngem mabalin a masdaawkayo no kasano a nakaragragsak ti pagbalinan ti panagadal no addaankayo ti tiempo a mangapresiar iti material imbes a dardarasenyo a basaen ken ileppas dayta.

15. Ania pay ti kasapulan unay a maipaay iti panagadal tapno agbalin nga agpadpada a makaparagsak ken makagunggona iti naespirituan?

¹⁵ Mainaig met iti tiempo isu ti banag maipapan ti panagkararag. Ti bendision ni Jehova nasken iti panagadal tapno agbalin a makagunggona iti naespirituan. Masapul ti panagkararagtayo kenkuana iti nagan ni Jesus, a dawatentayo kenkuana a luktanna dagiti pampanunot ken pusotayo ken pagbalinenna ida a pudno nga umawat kadagiti kinapudno nga adalen. Kasano kasansan ti panagtugawyo a sidadaras tapno agsagana a maipaay iti gimong, a mabigbigyo laeng kalpasanna a nalipatanyo a dinawat ken Jehova ti bendisionna ken ti sirib a mangiyaplikar iti inaldaw-aldaw a panagbiagyo kadagiti bambanag a naadalyo? Apay nga ilibakyo iti bagiyo met laeng ti tulong ni Jehova no dayta adda sadiay tapno dawatenyo?​—Santiago 1:5-7.

Ad-adda Pay a Panangsukimat

16. Maitunos iti tema iti teksto a maipaay iti daytoy a panagadal, ania ti masapul nga aramidentayo tapno masarakan ti pannakaammo, pannakatarus, ken pannakaawat?

¹⁶ Kunaen ti Proverbio 2:4, 5: ‘No itultuloyyo a sapulen kas nalmeng a gameng, iti kasta masarakamto ti pannakaammo iti Dios.’ Ti aglikmut iti dayta a grupo dagiti sasao saritaenna ti pannakasapul iti panangsapul kadagiti “sasao,” “bilbilin,” “sirib,” “panangtarus,” ken “pannakaawat” ni Jehova. Ti panagsapul kadagiti gameng kasapulanna ti panangikagumaan ken panagan-anus. Kasapulanna ti adu a panagkali. Awan pannakaidumana iti panagsapul iti “pannakaammo iti Dios,” a maipaay iti “panangtarus,” ken iti “pannakaawat.” Daytoy kasapulanna met ti adu a panagkali, wenno panangdanon saan laeng nga iti rabaw dayta. Dikay koma marikna nga umdasen ti basta panangpalabas iti rabaw ti Sao ti Dios.

17. Ania ti kunaen ti Kasuratan maipapan kadagiti pampanunot ni Jehova, gapuna ania koma ti pagyamanantayo?

¹⁷ Inyebkas ti maysa a salmista: “Anian a nagdakkel dagiti ar-aramidmo, O Jehova! Dagiti pampanunotmo naunegda unay.” (Salmo 92:5) Ni apostol Pablo nagsurat a buyogen ti pannakaawis: “O nagunegen dagiti kinabaknang ti sirib ken ti met pannakaammo iti Dios!” (Roma 11:33) Iti sabali a suratna, sinaritana “dagiti nauneg a bambanag ti Dios.” (1 Corinto 2:10) Pudno, kas inlawlawag ni Pablo, ipalgak ti Dios dagiti kakasta a nauneg a bambanag “babaen iti espirituna,” a dayta nga aktibo a puersa agtignay a sibibileg kadagiti napulotan a Kristiano a tinudingan ni Kristo Jesus a mangipaay iti naespirituan a taraon. Pudno nga agyamantayo koma kadagiti naespirituan a panagkali nga ar-aramiden ti klase “adipen” a mamagbalin nga ad-adda pay a nalawlawag a maipaay kadatayo “kadagiti nailinged a nauneg a bambanag iti pangpanggep ti Dios.”​—1 Corinto 2:10, Today’s English Version.

18. Kasano a tunggal Kristiano ad-adda pay ti panangsukimatna iti Sao ti Dios, ket ania a naisangsangayan nga alikamen a pagsukimat ti naipaay?

¹⁸ Ngem dayta dina bang-aran ti tunggal indibidual a Kristiano iti rebbengen nga ad-adda pay a mangsukimat iti Sao ti Dios, a maipaay iti panggep a pananggun-od iti naan-anay a kinauneg dagiti kapanunotan a nailawlawag. Daytoy ramanenna ti panangsukimat kadagiti naisitar a kasuratan. Dayta kaipapananna ti panangbasa kadagiti footnotes kadagiti artikulo iti Pagwanawanan, a dadduma kadagitoy ti mangiturong iti managbasa iti maysa a daanen a publikasion a mangipaay iti naan-anay a pannakailawlawag dagiti dadduma a sasao wenno padpadto. Dayta kasapulanna ti ad-adda pay a panangsukimat, panangipaay iti panangikagumaan a mangsapul kadagiti daanen a publikasion ket kalpasanna adalen dagiti pinanid a naibaga. Dayta ramanenna ti naan-anay a panangusar kadagiti naisangsangayan a katulongan iti panagadal iti Biblia nga inaramid ti klase “adipen” a magun-odantayo bayat dagiti adun a tawtawen, kas kadagiti indese, konkordansia, ti Aid to Bible Understanding, ken “All Scripture Is Inspired of God and Beneficial.” Wen, dagiti Kristiano naipaayanda kadagiti nagsayaatan nga alikamen a pagsukimat, a ti kaudian kadagitoy isu ti kabbaro nga Ingles ti pagsasaona a Reference Bible, a daytoy, kabayatanna, magun-odanto kadagiti adu a sabsabali a pagsasao. Usarentayo daytoy nga alikamen a pagsukimat iti nasayaat a pakausaran.

Agadal nga Addaan Panggep

19. Ania a pammakdaar ti nasken maipapan iti pannakaammo?

¹⁹ Ti panggep ti ad-adda pay a panangsukimat iti Sao ti Dios saan a tapno pagbalinennatayo a makarikna a natantan-ok ngem dagiti kakabsattayo a lallaki wenno tapno pagparammag ti pannakaammotayo. Masansan a kastoy ti kasasaad kadagiti nailubongan a tattao. Iti prinsipio, pudno ti insurat ni Pablo ditoy: “Ti sirib mamagtangsit, ngem ti ayat mamaglaing.” (1 Corinto 8:1) Ti ayat ti mangtignay kadatayo a sipapakumbaba a mangusar iti pannakaammotayo iti panangasaba ken panangaramid-adalan a trabaho ken siaannad a tumulong a mangipaay iti naespirituan a kinapateg dagiti Nakristianuan a gimgimong.

20. Ania a pammalakad ti impaay ni Pablo mainaig iti daytoy?

²⁰ Saantayo “koma nga agbalinen nga ubbing,” no di ket “rumang-aytayo koma kadagiti isuamin ken Kristo, isu nga ulo.” (Efeso 4:13-15) “Agtultuloytayo iti kinanataengan.” (Hebreo 6:1) Agbalintayo a nataengan a tattao, a makabael nga umawat kadagiti “taraon a nakired” a mamagbalin kadatayo a nabileg iti naespirituan ken napateg nga usaren iti uneg ti kongregasion Kristiano. Nupay kasta, daytoy ramanenna saan laeng a ti pananggun-od iti pannakaammo babaen iti panagadal. Daytoy sapulenna ti panagtaraon kadagiti sasao ni Jehova wenno dagiti naipablaak nga ebkas iti panangapresiar, isu nga usigentayto iti sumaganad nga artikulo.​—Salmo 110:1; Isaias 56:8; 66:2.

Babaen iti Panangipalagip

◻ Apay a dadduma agtalinaedda a naespirituan nga “ubbing”?

◻ Ania ti makatulong iti maysa a tao nga agbalin a nataengan?

◻ Kasano a mapataudtayo ti nasayaat a nga ugali iti naespirituan a “pannangan”?

◻ Ania ti mamagbalin iti personal a panagadaltayo nga ad-adda a makaparagsak?

◻ Apay a nasken ti ad-adda pay a panangsukimat iti Sao ti Dios?

[Kahon iti panid 11]

Bambanag a makatulong iti tao a nasalun-at iti naespirituan

1. Umiso a pakatignayan: Patauden ti nabileg a tarigagay a maaddaan ti nasaysayaat a pannakaammo ken Jehova

2. Kanayon a pannangan: Gundawayanyo dagiti naespirituan a taraon a kanayon nga idasar “ti matalek ken naannad nga adipen”

3. Panagwatwat: Usaren ti pannakaammo a tumulong kadagiti dadduma, kas iti iruruar a mangasaba