Dagiti An-animal iti Apocalipsis—Apay Basaen ti Maipapan Kadakuada?
APOCALIPSIS! Daytat’ maysa kadagiti naminar a nagan a naited iti maudi a libro ti Biblia. Dayta met ti maaw-awagan ti libro ti Paltiing. Ti libro ti napunno kadagiti nakalawlawag a sasao a panangiladawan, a ti naisangsangayan kadagitoy isu daydiay maipapan ti maysa a dragon ken ti tallo nga atap nga an-animal. Dadduma makitkitada dagitoy nga an-animal a nakabutbuteng. Dadduma palabasenda ida kas ar-arapaap laeng ti maysa a lakay. Ngarud, apay, a rebbengyo a basaen ti maipapan kadagiti an-animal iti Apocalipsis? Agsipud ta nairaman ti kinaragsakyo.
Agpayso, lakay idin ni apostol Juan idi insuratna ti libro ti Apocalipsis ngangngani 1,900 a tawtawen ti napalabasen. Ngem, kaipapanan kadi dayta, a dagiti an-animal nga inladawanna ket ar-arapaap laeng ti maysa nga agkabawen a kapanunotan? Saan, ket ni Juan saan nga isu ti immuna a lakay a naaddaan kadagita a sirmata. Maysa a lalaki nga agnagan Daniel ti nakakita met kadagiti sirmata dagiti an-animal idi kalakayna, ket dagitoy a sirmata ti napaneknekan nga apagpag-isu a padto iti panagbalbaliw dagiti natauan a gobierno. (Daniel, kapitulo 7 ken 8) Mainayon pay, ni Jesu-Kristo mismo minatmatanna ni Daniel kas nasantuan ti pannakaipaltiingna, nga inawaganna a maysa a mammadto ken nagadaw kadagiti sursuratna.—Mateo 24:15.
Impamatmat ni Jesus a dagiti apostolna umawatdanto pay ti kanayonan a nadiosan a sursuro kalpasan ti ipapatayna. (Juan 16:12, 13) Ket yantangay adu kadagiti paset ti libro nga Apocalipsis ti nakaskasdaawen ti pannakatungpalda, masigurotayo a dagiti sirmata ni apostol Juan maipapan kadagiti an-animal iti Apocalipsis ket impaltiing met ida ti Dios.—2 Timoteo 3:16.
Ti pangrugian ti libro nga Apocalipsis kunana: “Paltiing ni Jesu-Kristo, nga inted ti Dios kenkuana . . . Ket isu intedna ket pinaibagana gapu iti anghelna nga imparangna dayta kadagiti pagilasinan ken adipenna a Juan.” (Apocalipsis 1:1) Gapuna, dagiti ladladawan iti libro ti Apocalipsis, agraman dagidiay maipapan iti an-animal, ket simbolikoda, saan a literal. Di kasapulan ti agbuteng iti panangbasbasa maipapan kadakuada. Dagitoy simboliko nga an-animal ti mangted kadagiti Kristiano kadagiti nasken a pannakaammo, a makatulong kadakuada a mangipreserbar ti pannakirelasionda iti Dios. Gapuna, naisurat ni apostol Juan: “Naragsak ti bumasa ken dagiti agdengngeg kadagiti sasao daytoy a padto, ket salimetmetanda dagiti bambanag a naisurat kenkuana; ta ti naituding a panawen asidegen.” Wen, ti pannakaawatyo kadagitoy a simbolo ti makaiyeg ragsak itan ken iti masanguanan.—Apocalipsis 1:3.