Ti Biag ken Ministerio ni Jesus

Panangtagiragsak iti Nasinged a Relasion

SIMMARUNO iti pannangan a panglaglagip, pinarparegta ni Jesus dagiti apostolna babaen iti impormal a palawag iti puso-ti-puso. Nalabit a limbes payen iti tengngat’ rabii. Gapuna indagadag ni Jesus: “Tumakderkayo, pumanawtay ditoy.” Nupay kasta, sakbay a makapanawda, ni Jesus, a natignay gaput’ ayatna kadakuada, nagtultuloy a nagsao, a nangted ti makapatignay a pangngarig.

“Siak ti pudno a puon ti ubas, ket ni Amak ti agtaltalon,” rinugianna. Ti Naindaklan nga Agtaltalon, a ni Jehova a Dios, ti nangimula itoy simboliko nga ubas idi pinulotanna ni Jesus iti nasantuan nga espiritu idi mabautisaran idi otonio ti 29 K.P. Ngem intuloy nga impakita ni Jesus a ti ubas isimsimbolonat’ ad-adda pay ngem isuna, a kunkunana:

“Isuamin a santakko a di agbunga ikkatennanto, ket amin dagiti sanga nga agbunga isu ti dalusanna, tapno mangted koma ti ad-adu a bunga. . . . Kas ti santak a saanna a mabalin ti agbunga nga is-isu no di maikamang iti ubas, kasta met a dikay mabalin, no saankayo nga agtaeng kaniak. Siak ti ubas, dakayo dagiti santak.”

Iti Pentecostes, 51 nga al-aldaw iti kamaudiananna, dagiti apostol ken ti dadduma pay nagbalinda a santak ti ubas idi a ti nasantuan nga espiritu naiparukpok kadakuada. Idi agangay, 144,000 a tattao ti nagbalin a santak iti makailadawan a puon ti ubas. Agraman iti puon ti ubas, a ni Jesu-Kristo, dagitoy ti mangbukel ti simboliko nga ubas a mangted bungbunga ti Pagarian ti Dios.

Inlawlawag ni Jesus ti tulbek iti panagbunga: “Ti agnaed kaniak, ket siak kenkuana, daytoy ti agbunga ti adu; ta no awanak, awan ti mabalinyo nga aramiden.” Nupay kasta, no ti tao saan nga agbunga, kuna ni Jesus, “maibellengto iti ruar a kas ti santak ket magangonto; ket urnongendanto ket ibelleng iti apuy ket mapuoranto.” Iti kasumbangirna, inkari ni Jesus: “No agnaedkayo kaniak ket dagiti saok agtaengda kadakayo, dawatenyo ti aniaman a kayatyo ket maaramidto kadakayo.”

Intuloy nga impakita ni Jesus kadagiti apostolna no aniat’ pakaidayawan ni Amana, awan sabali, “nga agbungakayo ti adu ket agbalinkay koma nga adalak.” Ti bunga a tarigagayan ti Dios manipud kadagiti santak ket isut’ panangipamatmatda kadagiti kas ken Kristo a kualidad, nangnangruna ti ayat. Mainayon pay, gapu ta ni Kristo ket manangiwaragawag ti Pagarian ti Dios, ti matarigagayan a bunga ramanenna met ti ar-aramidda a panagaramid ti ad-adalan kas inaramidna.

“Agtaengkay iti ayatko,” inggunamgunam ita ni Jesus. Kaskasdi, kasano a maaramidan dagiti apostolna dayta? “No tungpalenyo dagiti bilbilinko,” kunana, “agtaengkayto iti ayatko.” Iti panangituloyna, inlawlawag ni Jesus: “Daytoy ti bilinko, nga agayan-ayatkayo iti maysa ken maysa a kas ti panagayatko kadakayo. Awan ti addaan dakdakkel nga ayat ngem daytoy, ti mangted ti biagna gapu kadagiti gagayyemna.”

Iti sumagmamano pay nga oras, idemostranton ni Jesus daytoy aglaplapusanan nga ayat babaen ti panangtedna ti biagna nga agpaay kadagiti apostolna, agraman kadagiti amin a sabsabali pay a mangalagad ti pammati kenkuana. Ti ulidanna rebbeng a tignayenna dagiti paspasurotna a maaddaan ti isu met laeng a managsakripisio nga ayat iti maysa ken maysa. Daytoy nga ayat ti mangipabigbig kadakuada, kas kinuna a nasapsapa ni Jesus: “Gapu itoy mailasindanto a dakayo ti adalak, no adda ayatyo iti maysa ken maysa.”

Iti panangbigbigna kadagiti gagayyemna, kuna ni Jesus: “Dakayo ti gagayyemko no aramidenyo dagiti ibilinko kadakayo. Dikay naganenen ti ad-adipen, ta ti adipen dina ammo ti aramiden ni apona. Ngem ninaganankayo ti pagpagayam, ta isuamin dagiti nangngegko ken Amak impakaammok kadakayo.”

Anian a nagsudi ti maaddaan ti kasta a relasion​—nga agbalin a nasinged a pagayam ni Jesus! Ngem tapno agtultuloy a tagiragsaken daytoy a relasion, masapul a dagiti pasurotna ti “agtultuloy nga agbunga.” No agbungada, kuna ni Jesus, “ti amin a dawatenyonto ken Ama iti naganko itdenna[nto] kadakayo.” Pudno unay, daytat’ dakkel a gunggona iti panangpataud ti bunga ti Pagarian!

Kalpasan ti panangigunamgunamna manen kadagiti apostolna nga “agayan-ayatkayo iti maysa ken maysa,” inlawlawag ni Jesus a ti lubong guraennanto ida. Kaskasdi, liniwliwana ida: “No ti lubong guraennakayo, ammoyo a ginuranak nga immun-una ngem dakayo.” Sumaganad nga impanayag ni Jesus no apay a ti lubong guraennanto dagiti paspasurotna, a kunkunana: “Gapu ta saankay a paset ti lubong, no di ket pinilikayo iti lubong, gapuna guraennakay ti lubong.”

Iti panangilawlawagna pay iti rason ti pananggura ti lubong, intuloy ni Jesus: “Ngem amin dagitoy aramidendanto kadakayo gapu iti naganko, ta dida ammo [ni Jehova a Dios] ti nangibaon kaniak.” Dagiti ar-aramid ni Jesus a datdatlag, iti epektona, pabasolenna dagidiay manggura kenkuana, ta kinunana: “No diak koma nagaramid kadakuada kadagiti ar-aramid nga awan sabali a nakaaramid, awan koma ti basolda; ngem ita nakitada ket ginurada, saan laeng a siak, no di ket ni Amak pay.” Gapuna, kas kinuna ni Jesus, natungpal ti kasuratan: “Ginuradak nga awan ti gapuna.”

Kas immuna nga inaramidna, liniwliwa manen ni Jesus ida babaen ti panangikarina a mangipatulod ti katulongan, ti nasantuan nga espiritu, nga isut’ napigsa nga aktibo a puersa ti Dios. “Paneknekannanto ti maipapan kaniak; ket, mangpaneknekkayto met.” Juan 14:31–15:27; 13:3, 35; Galacia 6:16; Salmo 35:19; 69:4.

▪ Kaano nga immula ni Jehova ti simboliko nga ubas, ket kaano ken kasano a dadduma agbalindanto a paset ti ubas?

▪ Inton agangay, manonto ti agbalin a santak ti simboliko nga ubas?

▪ Ania a bunga ti tarigagayan ti Dios manipud kadagiti santak?

▪ Kasanot’ panagbalintay a pagayam ni Jesus?

▪ Apay a ti lubong guraenna dagiti paspasurot ni Jesus?