Naipasngay Dagiti Baro a Parsua!

KINUNA iti naminsan ni Ari Salomon: “Awan ti baro a banag iti baba ti init.” (Eclesiastes 1:9) Pudno dayta iti pisikal a lubong a pagbibiagantayo, ngem komusta ngay iti nagdakkel a lubong ti naespirituan a sangaparsuaan ni Jehova? Iti dayta a lubong, daydiay pudno a dakdakkel ngem ni Salomon, nga isu ti katan-okan pay laeng a tao a nagbiag, ket nagbalin a maysa a naisangsangayan a baro a parsua. Kasano a napasamak daytoy?

Idi tawen 29 iti Kadawyan a Panawentayo, indatag ti perpekto a tao, ni Jesus, ti bagina ken ni Juan tapno agpabautisar idiay Karayan Jordan. “Ket ni Jesus, idi nalpas a nabautisaran, dagus a simmang-at nanipud iti danum; ket, adtoy! dagiti langlangit nalukatanda kenkuana, ket nakitana ti espiritu ti Dios a bumabbaba a kasla kalapati ket um-umay kenkuana. Ket adtoy ti maysa a timek a nanipud kadagiti langlangit a kunkunana: ‘Daytoy ti Anakko a dungdunguek, isu a pakapnekak unay kenkuana.’” (Mateo 3:16, 17) Gapuna, ni tao a Kristo Jesus ti immuna a baro a parsua, a napulotan a mangaramid iti pagayatan ti Dios. Idi kamaudiananna, maibatay iti daton nga ipapatayna, ni Jesus ti nagbalin a Manangibabaet ti maysa a baro a tulag iti nagbaetan ti Dios ken ti maysa a grupo dagiti tattao a napili. Nagbalin ti tunggal maysa kadagitoy a “baro a parsua,” a pinulotan ti espiritu ti Dios iti nailangitan a namnama, nga addaan gundaway a makipagturay ken ni Jesus iti nailangitan a Pagarianna.​—2 Corinto 5:17; 1 Timoteo 2:5, 6; Hebreo 9:15.

Iti las-ud ti adu a siglo, naurnong dagitoy napulotan, nayanak-espiritu a Kristiano a naikaykaysa ken Kristo kas ti pudno a kongregasion Kristiano, maysa a baro a parsua. Inayaban ti Dios daytoy manipud itoy a lubong agpaay iti maysa a panggep, kas kunaen ni apostol Pedro: “Dakayo ti ‘maysa a napili a rasa, maysa a naarian a kinapadi, nasantuan a nasion, maysa nga ili a maipaay a naisangsangayan a kukua, tapno ipaduyakyakyo dagiti kinatan-ok’ daydiay nangayab kadakayo manipud kinasipnget inggana iti nakaskasdaaw a lawagna.” (1 Pedro 2:9) Kas ken Kristo Jesus, ti immuna a baro a parsua ti Dios, addaan daytoy sumaruno a baro a parsua iti kangrunaan nga obligasion a mangikasaba ti naimbag a damag. (Lucas 4:18, 19) Kas indibidual, dagiti miembrona, nga agdagup amin iti 144,000, masapul nga ‘‘ikawesda ti baro a kinatao a naparsua a maitunos iti pagayatan ti Dios iti pudno a kinalinteg ken kinasungdo.” (Efeso 4:24; Apocalipsis 14:1, 3) Masapul a sukayanda dagiti “bunga ti espiritu,” a nadeskribir idiay Galacia 5:22, 23, ken simamatalek a tungpalenda ti pagrebbenganda.​—1 Corinto 4:2; 9:16.

Komusta ngay daytoy baro a parsua iti moderno a panawen? Idi tawen 1914, kas ipakita ti pagorasan ti Biblia, natungpal dagiti sasao ti Apocalipsis 11:15: “Ti pagarian ti lubong nagbalin a pagarian ti Apotayo [ni Jehova] ken iti Kristona, ket agturayto a kas ari iti agnanayon awan inggana.” Ti immuna nga inaramid ni Kristo kas kaipatpatugaw nga Ari isu ti panangigarangugongna manipud langit ken ni Satanas ken dagiti demonio nga anghelna iti kaparanget ti daga. Nangyeg daytoy iti “ay iti daga,” iti porma ti umuna a gubat sangalubongan ken dagiti kakuyogna a riribuk.​—Apocalipsis 12:9, 12, 17.

Nagserbi met daytoy a pakaammo kadagiti natda iti baro a parsua ditoy daga a masapul a makiramanda a mangtungpal iti padto ni Jesus: “Daytoy naimbag a damag ti [naipasdeken a] pagarian maikaskasabanto iti amin a mapagnaedan a daga kas pammaneknek iti isuamin a nasion; ket iti kasta umayton ti panungpalan.” Ania dayta a “panungpalan”? Ituloy nga ilawlawag ni Jesus: “Addanto dakkel a rigat a nanipud idi punganay ti lubong agingga ita, awan pay kasta a napasamak, ket awanto metten iti uray kaano. Ket no dagita nga aldaw saanda koma a napaababa, awan koma ti lasag a maisalakan; ngem gapu kadagiti napili dagita nga aldaw mapaababadanto.”​—Mateo 24:3-14, 21, 22.

Tinignay ti espiritu ni Jehova dagidiay napulotan iti baro a parsuana nga agbalin nga okupado iti kasaknapan pay laeng a kampania a panangasaba a naipatungpal ditoy daga. Manipud iti sumagmamano a ribo idi 1919, kimmalay-at ti bilang dagitoy naregta a manangiwaragawag ti Pagarian iti agarup 50,000 idi ngalay ti 1930’s. Kas naipadto, “ti awengda nagsaknap iti amin a daga, ken dagiti sasaoda agingga kadagiti pungpungto ti lubong.”​—Roma 10:18.

Dagiti laeng aya natda iti baro a parsua ti maurnong a maipaay iti pannakaisalakan? Saan, ta kunaen ti padto a tenglen dagiti anghel ti Dios dagiti angin ti dakkel a rigat agingga a maturpos ti pannakaurnong saan laeng dagitoy naespirituan nga Israelitas a para langit no di pay ket dagiti sabsabali, “ti dakkel nga umariwekwek, nga awan tao a makabalin a bumilang, a naggapuda kadagiti amin a nasion ken kadagiti tribo ken kadagiti ili ken kadagiti dila.” Aniat’ pagtungpalandanto? Lumasatdanto a di maan-ano “iti dakkel a rigat” tapno tagiragsakenda ti biag nga agnanayon iti paraiso a daga!​—Apocalipsis 7:1-4, 9, 14.

Makaparagsak, daytoy dakkel nga umariwekwek, a naurnong manipud 229 a daga, immadudan iti agarup a 4,500,000 nga aktibo a Saksi. Adu pay ti um-umay, kas ipasimudaag ti 11,431,171 a timmabuno iti Panglaglagip iti ipapatay ni Jesus idi Abril 17 idi napan a tawen. Kadagitoy a riniwriw, 8,683 laeng a mangak-ako a natda ditoy daga iti baro a parsua, ti nakiraman kadagiti emblema ti Panglaglagip. Saan a kabaelan daytoy bassit a grupo nga iringpas ti dakkel a trabaho a panangasaba ita nga is-isuda. Ti riniwriw a mangbukel iti dakkel nga umariwekwek ita ti makibimbinnulig kadakuada a mangiringpas iti trabaho. (Sofonias 3:9) Mainayon pay, tumultulong ita dagiti nasayaat pannakasanayna a miembro ti dakkel nga umariwekwek a mangaywan iti administratibo ken dadduma pay a responsable a trabaho iti napulotan a Bagi a Manarawidwid ti naespirituan nga Israel, a kas dagiti di-Israelita a Netineo a timmulong kadagiti papadi a nangtarimaan kadagiti bakud ti Jerusalem.​—Nehemias 3:22-26.

Panangparsua iti “Baro a Langlangit ken Baro a Daga”

Anian a rag-o ti kakuyog daytoy a panangurnong! Kas iti kinuna ni Jehova a mapasamak: “Adtoy mamarsuaak kadagiti baro a langlangit ken baro a daga; ket dagiti immun-una a bambanag didanto malagipen, didanto mapanunoten. Ngem agragsakkayo ken agrag-okayo iti agnanayon iti daydiay a parsuaek. Ta adtoy, a parsuaek ti Jerusalem a maysa a pagrag-oan ken ti umili kenkuana a maysa a ragsak. Ket agrag-oakto iti Jerusalem ken agragsakakto iti ilik; ket dinto mangngegen kenkuana ti timek ti sangit ken ti timek ti aganug-og.” (Isaias 65:17-19) Ti baro a langlangit a pinarsua ni Jehova ti buklento inton kamaudiananna ni Kristo Jesus ken dagiti 144,000 a napagungar a miembro ti baro a parsua a nagatang manipud iti sangatauan iti las-ud ti napalabas a 19 a siglo. Nadaydayag nga adayo dayta ngem ti aniaman a naindagaan a gobierno a nangituray iti literal a Jerusalem, uray idi kaaldawan ni Salomon. Iramanna dayta ti Baro a Jerusalem, maysa a nailangitan a siudad, a nailadawan iti sumilsilap a pintasna idiay Apocalipsis kapitulo 21.

Ti Baro a Jerusalem isu ti naespirituan a nobia ni Kristo, dagiti 144,000 a napulotan a pasurotna, a makikaykaysa iti Nobioda idiay langit kalpasan ti ipapatay ken naespirituan a panagungarda. Nailadawanda idiay Apocalipsis 21:1-4 kas “bumabbaba manipud langit a naggapu iti Dios,” kayatna a sawen, us-usaren [ti Dios] ida a mangbendision iti sangatauan ditoy daga. Iti kastoy a pamay-an a matungpal ti padto: “Adtoy! Ti tolda ti Dios adda iti sangatauan, ket isu ti makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti tunggal lua kadagiti matada, ket awanton ni patay, awanto metten ti panagdung-aw wenno panagsangit wenno ut-ot. Dagiti immuna a banag napalabasdan.”

Anian a yamantayo iti panangparsua ti Dios iti dayta baro a langlangit! Saan a kas kadagiti aglabas, dakes a turturay a nabayagen a mangparparigat iti sangatauan, daytoy gobierno nga inyurnos ti Dios ket agnanayon. Ti baro a parsua ken dagiti naespirituan a putotna, ti dakkel nga umariwekwek, agrag-oda iti kanayonan a kari ti Dios: “‘Ta kas kadagiti baro a langlangit ken baro a daga, nga aramidekto, agtalinaeddanto iti saklangko,’ kuna ni Jehova, ‘kastanto ti panagtalinaed dagiti putotyo ken naganyo.’”​—Isaias 66:22.

Dagitoy a putot dagiti napulotan iti baro a parsua ti umuna a mangbukel iti “baro a daga.” Isu dayta ti baro, managbuteng-Dios a kagimongan ti sangatauan ditoy daga. Ti gura, krimen, kinaranggas, panagkunniber, ken imoralidad iti natauan a kagimongan ita ipaganetgetna ti pannakasapul iti naan-anay a panagbalbaliw iti baro a daga a kagimongan, nga agtigtignay iti sidong ti panangiturong ti naparabur a baro a langlangit. Dayta ti panggep ni Jehova. No kasano a namarsua iti baro a langlangit, kasta met a mangparparsua iti baro a daga babaen ti panangummongna iti dakkel nga umariwekwek kas pangrugian ti maysa a natalna a baro a lubong a kagimongan. Daytoy laeng a kagimongan ti maisalakanto a sibibiag “iti dakkel a rigat.”​—Apocalipsis 7:14.

Aniat’ inanamaentayo kalpasan ti dakkel a rigat? Iti pannakisaona kadagiti apostolna, dagiti umuna a mangbukel iti baro a langlangit a mangiturayto iti baro a daga, inkari ni Jesus: “Pudno kunak kadakayo, dakayo a simmurot kaniak, Intono baro a pannakaparsua, intono ti Anak ti tao agtugawto iti trono ti gloriana, agtugawkayto met kadagiti sangapulo ket dua a trono.” (Mateo 19:28) Dagiti 144,000 iti daytoy Baro a Jerusalem ti makiramanto ken ni Jesus a mangukom iti sangatauan. Ti ayat ti mangsukat iti panagimbubukod ken gura a pakaibangonan ti natauan a kagimongan. Maikkatton dagiti parikut gapu iti tribo, rasa, ken ili. In-inut nga isublinto ti panagungar dagiti ingungotentayo. Agbalinto ti binilion a matalek a sangatauan a maysa a dakkel, nagkaykaysa a pamilia, a naitag-ay iti biag nga agnanayon iti maysa a daga a napagbalin a paraiso.

Saan laeng nga Utopia wenno Shangri-la dayta. Maysanto dayta a permanente a parsua​—“baro a langlangit ken baro a daga nga ur-urayentayo kas mayannurot iti karina, isuda a pagtaengan ti kinalinteg”! (2 Pedro 3:13) Pudno unay, maysa daytoy a nakaskasdaaw a namnama, maysa a naindaklan a kari daydiay nangikuna, “Adtoy! Pagbalbalinek dagiti amin a banag a baro,” ken nanginayon iti mangparayray-pammati a sasao: “Dagitoy a sao matalek ken napudnoda.”​—Apocalipsis 21:5.