Pudno Aya a Panagtakaw Dayta?

NI Abiodun ket maysa a mamangulo a serbidor iti maysa a dakkel nga hotel idiay Nigeria. Kabayatan nga irikrikepna ti banquet hall iti maysa a rabii, nakakita iti sanga-bag a kuarta a katupag ti $1,827, E.U. Dagus nga inyawatna ti kuarta, a di nagbayag ket sinapul ti akinkukua, a maysa a bisita iti hotel. Ni Abiodun ket ginunggonaan ti management ti hotel babaen ti panangital-oda iti saadna ken panangpadayawda kenkuana a kas “kasayaatan a trabahador iti tawen.” Isut’ ginunggonaan met ti akinkukua iti kuarta.

Ti Quality, maysa a lokal a pagiwarnak, intampokna ti estoria, nga inawaganna ni Abiodun kas “Naimbag a Samaritano.” Idi pinagsaludsodan ti Quality no nasulisog a mangilemmeng iti kuarta tapno agpaay kenkuana, kinuna ni Abiodun: ‘Maysaak kadagiti Saksi ni Jehova. Gapuna no adda masarakak nga aniaman a banag a saanko a kukua, isublik dayta iti akinkukua.’

Adu kadagiti lumugar ti nasdaaw iti panangipakita ni Abiodun iti kinamapagtalkan. Naragsakan dagiti kapada ni Abiodun a Saksi iti napasamak, ngem saanda a nasdaaw. Iti intero a lubong nalatak dagiti Saksi ni Jehova gapu kadagiti nangato a prinsipioda. Para kadakuada saan a maipuera ti kinamapagtalkan; isu dayta ti pagannurotanda a nagpateg a paset ti pudno a Kinakristiano.

Nupay kasta, no dadduma, gapu kadagiti kasasaad kasla narigat a pagdumaen no ania ti mapagtalkan ken saan. Usigenyo daytoy a kasasaad. Ni Festus, a mangig-iggem kadagiti kontribusion ken kuenta iti maysa a kongregasion dagiti Saksi ni Jehova idiay Makinlaud nga Africa, ket agkasapulan unay iti kuarta.a Kasapulan ni baketna ti dakkel nga operasion ket kuna dagiti doktorna a di rumbeng nga itantan dayta. Kalikaguman ti ospital ti kagudua a bayad a nasaksakbay.

Kurang ti kuarta ni Festus. Idi pinadasna ti umutang iti nadumaduma a tao, isut’ napaay. Idi kuan napanunotna ti kuarta nga iduldulinna ket inkalinteganna, ‘Umiso kadi a baybay-ak lattan ti asawak a matay no adda met maaramidak a manglapped iti dayta? Apay a diak “bumulod” iti kuarta ti kongregasion? Maisublikto dayta no agbayad dagiti sumagmamano a nakautang kaniak.’

Inusar ni Festus dayta a kuarta a saanna a kukua tapno mabayadan ti ospital. Umiso aya ti panagrasrasonna? Nainkalintegan aya ti inaramidna mainaig iti di ninamnama a kasasaad a nakaipasanguanna?

Akinkuarta iti Dayta?

Iti pananganag kadagitoy a saludsod, repasuentay iti apagbiit ti sumagmamano a punto maipapan iti nagtaudan ken panggep ti kuarta a kas iti inusar ni Festus. Nagtaud dagiti pundo manipud kadagiti boluntario a kontribusion dagiti kameng ti kongregasion nga agtarigagay a mangsuporta iti nadalus a panagdaydayaw ken Jehova. (2 Corinto 9:7) Saan a mausar dayta a pangsueldo, tangay awan ti masuelduan gaput’ adda a maaramidanda iti kongregasion. Maisupadi ketdi, ti naikontribusion a kuarta ket mausar kangrunaanna iti pananggun-od ken panangaywan iti lugar a paggigimongan, kas iti Kingdom Hall. Mangipaay daytoy ti kumbiniente ken komportable a lugar a sadiay dagiti tattao​—agtutubo ken lallakay, nabaknang ken napanglaw​—makapagtataripnong nga agadal iti Biblia.

Akinkuarta iti dayta? Dayta ket kukua ti kongregasion. Awan ti indibidual a kameng a makaikeddeng no kasano a mabusbos ti kuarta. Nupay usaren ti bagi dagiti panglakayen a pagbayad kadagiti paggastuan ti kongregasion, no adda kanayonan a paggastosan, idatag dagiti panglakayen ti banag iti intero a kongregasion maipaay iti anamong.

Panangbulod Wenno Panagtakaw?

Gapu iti planona a panangisubli iti kuarta iti kabiitan met laeng a panawen, minatmatan ni Festus ti inaramidna kas panangbulod. Nupay kasta, usaren ti Webster’s New Dictionary of Synonyms ti dadduma a sasao maipapan “ti panangala ken panangikkat ti sanikua ti sabali masansan babaen ti panangilimed wenno di pangipakada kenkuana ken kankanayon nga awan pammalubosna.” Dagiti sasao ket “panagtakaw” ken “mannanakaw.” Uray awan pammalubos, innala ni Festus ti kuarta a kukua ti kongregasion. Gapuna, wen, mapabasol isuna iti panagtakaw. Isut’ maysa a mannanakaw.

Siempre, nadumaduma ti pakatignayan [ti maysa] nga agtakaw. Makitatayo dayta iti ulidan ni Judas Iscariote, a napusgan a mangiggem iti kuarta a naurnong da Jesus ken dagiti matalek nga apostolna. Kunaen ti Biblia: “[Ni Judas] ket maysa a mannanakaw ken adda kenkuana ti kahon ti kuarta ket al-alaenna dagiti kuarta a naikabil iti dayta.” (Juan 12:6) Gapu ta tinignay ti dakes a puso ken naan-anay a kinaagum, dimmakes pay nga ad-adda ni Judas. Kamaudiananna, nagtungpal iti panangliputna iti Anak ti Dios​—gapu iti 30 a kapisi a pirak.​—Mateo 26:14-16.

Nupay kasta, natignay ni Festus gapu iti pannakaseknanna iti masaksakit nga asawana. Kayat kadi a sawen daytoy a din mapabasol? Saan. Usigenyo ti kunaen ti Biblia maipapan iti panagtakaw iti sabali a kasla di ninamnama a pasamak: “Dagiti tattao saanda nga umsien ti mannanakaw no agtakaw tapno agpennek no mabisin. Ngem, no masalamaan, isublinanto ti maminpito; itednanto amin a sanikua iti balayna.” (Proverbio 6:30, 31) Iti sabali a pannao, no masalamaan, masapul a sanguen ti mannanakaw ti naan-anay a pannusa ti linteg. Sigun iti Linteg Mosaiko, masapul nga agbayad ti maysa a mannanakaw gapu iti dakes nga inaramidna. Gapuna imbes nga iparegta wenno ikalinteganna ti panagtakaw, mamakdaar ti Biblia nga uray kadagiti di ninamnama a kasasaad, ti panagtakaw ket agresulta iti panagpanglaw, pannakaibabain, ken ti kakaruan, pannakapukaw iti anamong ti Dios.

Kas Saksi ni Jehova, amin dagiti pudno a Kristiano, nangruna dagidiay addaan kadagiti responsabilidad iti uneg ti kongregasion, masapul a mapagulidanan koma, a ‘siwayawaya iti pammabasol.’ (1 Timoteo 3:10) Saan a nagun-od ni Festus ti kuarta a ninamnamana, ket iti kasta dina nabaelan a sinuktan ti kuarta nga innalana. Naibutaktak ti inaramidna. Ania ti napasamak kenkuana? No saanna a pinagbabawian ti panagtakawna, nailaksid koman iti nadalus a kongregasion Kristiano. (1 Pedro 4:15) Ngem nadudog unay ti pusona ket nagbabawi. Iti kasta, nakapagtalinaed iti kongregasion, nupay napukawna dagiti pribilehiona iti serbisio.

Panagtalek iti Dios

Namakdaar ni apostol Pablo a ti panagtakaw ti tao nga agkunkuna nga agserserbi ken Jehova makaited umsi iti nagan ti Dios ken iti ilina. Insurat ni Pablo: “Sika a mangisursuro iti asinoman, dika aya isuro ta bagim? Sika, a mangikaskasaba iti ‘Dika agtakaw,’ agtakawka aya? Ta ‘ti nagan ti Dios ket matabtabbaawan maigapu kadakayo.’”​—Roma 2:21, 24.

Ni Agur, maysa a masirib a lalaki idi un-unana a tiempo, nangipaay ti isu met laeng a punto. Iti kararagna indawatna a ‘di [koma] pumanglaw ket . . . agtakaw ken aramatenna a sibabassawang ti nagan ti Dios[na].’ (Proverbio 30:9) Paliiwenyo ta ti masirib a lalaki binigbigna a ti kinapanglaw mangituggod kadagiti kasasaad a mabalin a mangsulisog uray iti nalinteg a tao nga agtakaw. Wen, dagiti narikut a tiempo subokenna ti pammati ti maysa a Kristiano iti abilidad ni Jehova a mangaywan kadagiti kasapulan dagiti tattaona.

Nupay kasta, dagiti nasungdo a Saksi ni Jehova, agraman dagidiay napanglaw, addaandat’ pammati a ti Dios ‘gunggonaanna dagidiay sipapasnek a mangsapsapul kenkuana.’ (Hebreo 11:6) Ammoda a ni Jehova gunggonaanna dagiti matalek kenkuana babaen ti panangtulongna kadakuada a mangpaadda kadagiti kasapulanda. Pinagminar ni Jesus dayta iti Sermonna iti Bantay, a kunkunana: “Dikay pulos maringgoran ket kunaenyo, ‘Ania ti kanenminto?’ wenno, ‘Ania ti inumenminto?’ wenno, ‘Ania ti pagkawesminto?’ . . . Ta ti nailangitan nga Amayo ammona a kasapulanyo amin dagitoy a bambanag. Itultuloyyo, ngarud, a sapulen nga umuna ti pagarian ken ti kinalintegna, ket isuamin dagitoy sabsabali pay a bambanag mainayondanto kadakayo.”​—Mateo 6:31-33.

Kasano a mangipaay ti Dios kadagiti agkasapulan iti kongregasion Kristiano? Iti adu a pamay-an. Ti maysa ket babaen kadagiti kapammatian. Iparparangarang dagiti tattao ti Dios ti pudpudno nga ayat iti maysa ken maysa. Sipapasnek nga ipangagda ti pammalakad ti Biblia: “Siasinoman nga addaan kadagiti sanikua daytoy a lubong a pangtaginayon iti biag ket makitana ti kabsatna nga agkasapulan ket kaskasdi a punitanna ti ruangan dagiti nadungngo a pannakipagriknana kenkuana, iti ania a pamay-an nga agtalinaed kenkuana ti ayat ti Dios? Babassit nga annak, agayattayo koma, saan nga iti sao wenno babaen ti dila, no di ket iti aramid ken kinapudno.”​—1 Juan 3:17, 18.

Iti intero a lubong, iti nasurok a 73,000 a kongregasion, nasurok nga uppat ket kagudua a milion a Saksi ni Jehova ti sigaganetget a mangikagumaan nga agserbi iti Dios sigun kadagiti nalinteg a prinsipiona. Ammoda a pulos a dinto baybay-an ti Dios dagiti nasungdo kenkuana. Dagidiay agserserbi ken Jehova iti adun a tawen maikunada ti kas iti kinuna ni Ari David: “Nagubingak, ket ita lakayakon, ngem diak pay nakakita ti sililinteg a nabaybay-an, ken kadagiti putputotna man a makipalpalama ti kanen.”​—Salmo 37:25.

Anian a nasaysayaat nga amang ti panagkammatalek iti Dios a nangipaltiing kadagidiay a sasao, imbes a palubosan lattan ti bagi a masulisog nga agtakaw ket nalabit a mailaksid iti pabor ti Dios iti agnanayon!​—1 Corinto 6:9, 10.

[Footnote]