Inaramidda ti Pagayatan ni Jehova

Sipapakumbaba a Nagserbi ti Katan-okan a Tao

AMMO idi ni Jesus a napateg dagidi maudi nga oras a kaduana dagiti apostolna. Asideg idin a matiliw ket masuotto ti pammatina iti wagas a dina pay napasaran. Ammo met ni Jesus nga agur-uray dagiti naindaklan a bendision. Iti saan a mabayag, maitan-okto iti makannawan ti Dios ket maited kenkuana ti “nagan a nangatngato ngem iti tunggal sabali pay a nagan, tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga.”​—Filipos 2:9, 10.

Ngem saan a ti umad-adani nga ipapatayna wenno gagarna iti naikari a gunggona ti nakaringgoran ni Jesus a dina maipaay ti masapsapul dagiti apostolna. “Inayatna ida agingga iti panungpalan,” kas insurat ni Juan iti Ebangheliona. (Juan 13:1) Ket kadagitoy nagpateg a maudi nga oras ti biagna kas perpekto a tao, adda nagpateg a leksion nga insuro ni Jesus kadagiti apostolna.

Leksion Maipapan iti Kinapakumbaba

Adda da Jesus ken dagiti apostolna iti makinngato a siled ti maysa a balay idiay Jerusalem tapno rambakanda ti Paskua. Adda idi gundaway a nangngeg ni Jesus ti panagsusuppiatda no siasino kadakuada ti katan-okan. (Mateo 18:1; Marcos 9:33, 34) Kinasaritana ida maipapan iti daytoy a banag ken inkagumaanna nga ilinteg ti panagpampanunotda. (Lucas 9:46) Ngem iti daytoy a gundaway, sabali a wagas ti inusar ni Jesus a mangipaganetget kadagita a leksion. Saanna a basta kinasarita ida maipapan iti kinapakumbaba no di ket indemostrana dayta.

Insurat ni Juan: “Timmakder [ni Jesus] manipud iti pangrabii ket impaknina dagiti makinruar a kawesna iti igid. Ket, idi nangala iti tualia, binariksanna ti bagina. Kalpasan dayta isu nangikabil iti danum iti maysa a palanggana ket rinugianna a bugguan ti saksaka dagiti adalan ken pamagaan ida babaen ti tualia a naibarikes kenkuana.”​—Juan 13:4, 5.

Iti nadagaang a klima ti nagkauna a Makintengnga a Daya, nakapalluka dagiti tattao a magna kadagiti natapok a dalan. Apaman a makastrekda iti pagtaengan ti ordinario nga umili, sangailien ida ti bumalay, a mangala kadagiti basehas ken iti danum a pagbuggoda kadagiti sakada. Kadagiti nabaknang a pagtaengan, ti adipen ti mangbuggo iti saka.​—Oc-ocom 19:21; 1 Samuel 25:40-42.

Iti makinngato a siled, saan a sangsangaili da Jesus ken dagiti apostolna. Awan idi ti bumalay a mangiruar kadagiti basehas, ken awan dagiti adipen a mangbuggo kadagiti sakada. Idi inrugi ni Jesus a bugguan dagiti sakada, mabain dagiti apostol. Daydiay ketdin katan-okan kadakuada ti nangaramid iti kanunumuan a trabaho!

Idi damo, di kayat ni Pedro a pabugguan dagiti sakana ken Jesus. Ngem kinuna kenkuana ni Jesus: “Malaksid no bugguanka, awan ti pannakabagim kaniak.” Idi nabugguanen ni Jesus ti saka dagiti amin nga apostolna, kinunana: “Ammoyo kadi no ania ti inaramidko kadakayo? Awagandak iti, ‘Mannursuro,’ ken, ‘Apo,’ ket umiso ti panagsaoyo, ta kastaak. Ngarud, no siak, nupay Apo ken Mannursuro, binugguak dagiti sakayo, rebbengyo met a bugguan dagiti saka ti maysa ken maysa. Ta impasdekko ti pagtuladan a maipaay kadakayo, tapno, kas iti inaramidko kadakayo, aramidenyo met koma.”​—Juan 13:6-15.

Saan a nangipasdek ni Jesus iti ritual a panangbuggo iti saka. Imbes ketdi, tultulonganna idi dagiti apostolna a mangbaliw iti panagpampanunotda​—agpakumbabada ken madadaanda a mangaramid iti kanunumuan a trabaho a maipaay kadagiti kakabsatda. Nalawag a naawatanda dayta. Usigenyo ti napasamak sumagmamano a tawen kalpasanna, idi rimsua ti isyu maipapan iti panagkugit. Nupay napasamak ti “kasta unay a panagsusuppiat,” minantener dagiti adda sadiay ti nasayaat nga urnos ken sidadayaw nga inimdenganda ti kapanunotan ti tunggal maysa. Maysa pay, agparang a ni adalan a Santiago ti nangidaulo iti dayta a taripnong​—saan a maysa kadagiti apostol, kas nalabit ninamnamatayo, yantangay addada. Daytoy a detalye iti salaysay ti Aramid ipamatmatna a nasursuro dagiti apostol ti agpakumbaba.​—Aramid 15:6-29.

Ti Maadaltayo

Babaen ti panangbuggona kadagiti saka dagiti adalanna, nangted ni Jesus iti nabileg a leksion maipapan iti kinapakumbaba. Saan koma a panunoten dagiti Kristiano nga importanteda unay ket rebbeng a kanayon a pagserbian ida dagiti dadduma. Saanda met koma nga agtarigagay kadagiti saad a pakaitan-okan ken pakaidayawanda. Rebbeng ketdi a surotenda ti padron nga impasdek ni Jesus, nga “immay, saan a tapno pagserbian, no di ket tapno agserbi ken tapno itedna ti kararuana a subbot a kasukat dagiti adu.” (Mateo 20:28) Wen, rebbeng a madadaan dagiti pasurot ni Jesus a mangaramid iti kanunumuan a serbisio iti maysa ken maysa.

Adda naimbag a rason nga insurat ni Pedro: “Bariksanyo ti bagbagiyo iti kinapakumbaba iti panagpampanunot maipaay iti maysa ken maysa, agsipud ta ti Dios busorenna dagiti natangsit, ngem mangted iti di kaikarian a kinamanangaasi kadagiti napakumbaba.” (1 Pedro 5:5) Ti Griego a sao para iti ‘bariksan’ ket naggapu iti sao a kayuloganna “apron ti adipen,” a maigalut iti likudan ti lawlaw a kawes. Ti ngata panangibarikes ni Jesus iti tualia ken panangbuggona kadagiti saka dagiti apostolna ti adda iti panunot ni Pedro? Saan a masinunuo daytoy. Nupay kasta, impapuso ni Pedro ti napakumbaba a panagserbi ni Jesus, ket ipapuso met koma dayta dagiti amin a pasurot ni Kristo.​—Colosas 3:12-14.