Ipangagyo ti Pakdaar!

BOOM! Idi Hunio 3, 1991, gumgumluong a nangipugso ti Bantay Fugen idiay Japan iti gas ken dapo ti bulkan. Nagayus ken nagwaras iti bakras ti agburburek a naipugso. Uppat a pulo ket tallo a tattao ti pinapatay dayta a panagbettak. Nakaro ti pannakadilnak ti adu a nangikagumaan a makalasat. “Danum, danum, pangngaasiyo,” inyikkis ti dadduma. Matartaranta a timmulong kadakuada dagiti bombero ken polis.

AGARUP dua a lawas kasakbayanna, napaliiwen nga adda kasla simburio ti lava iti ngatuen ti Bantay Fugen, isu a nakaalerton dagiti autoridad ken umili. Iti nasurok a makalawas sakbay ti didigra, nabagbagaan dagiti umili a panawandan dayta a lugar. Maysa nga aldaw sakbay ti panagbettak, kiniddaw dagiti polis kadagiti kameng ti warnakan a dida mapmapan iti maipagel a disso. Ngem, iti daydi a makapapatay a malem, adda dagiti 43 a biktima iti napeggad a disso.

Apay a nagadu ti nakaitured a napan iti dayta a lugar wenno nagtalinaed sadiay? Nagsubli ti dadduma a mannalon a nangpanaw kadagiti pagtaenganda tapno kitaenda dagiti sanikua ken talonda. Tallo a volcanologist ti nangikagumaan nga umasideg iti bulkan tapno mapennek ti interesda iti ad-adalenda. Situtured a napan ti sumagmamano a reporter ken retratista iti maiparit a lugar agsipud ta kayatda a maammuan ti mapaspasamak iti bulkan. Adda met iti dayta a disso ti tallo a tsuper ti taksi nga inarkila ti warnakan. Ar-aramiden dagiti polis ken boluntario a bombero ti trabahoda. Adda rason ti tunggal maysa a napan iti napeggad a disso​—ngem dayta ti nakapukawan ti biagda.

Addakayo Aya iti Napeggad a Disso?

Mabalin a saantay amin nga agnanaed iti asideg ti aktibo a bulkan. Ngem kasanon no sangsanguentayo ti maysa a sangalubongan a didigra a mangikabil kadatayo amin iti napeggad a disso nga intero a daga ti saklawenna? Pakdaarannatayo ti maysa a libro a napaneknekanen a mapagtalkan a gubuayan ti padto maipapan iti sumungsungad a sangalubongan a didigra ket kastoy ti panangdeskribirna: “Agsipngetto ti init, ket ti bulan dinanto itden ti lawagna, ket dagiti bituen matnagdanto manipud langit, ket dagiti pannakabalin ti langlangit agkintayegdanto. . . . Isuamin a tribu ti daga saplitendanto ti bagbagida iti panagun-unnoy.” (Mateo 24:29, 30) Nailadawan ti nakaskasdaaw a pasamak iti langit a sapasap ti saklawenna kas mangapektar iti “isuamin a tribu ti daga.” Iti sabali a pannao, tuktukoyen daytoy a padto ti didigra a mangapektarto iti tunggal maysa kadatayo.

Daytoy a libro ti mapagtalkan a padto isu ti Biblia. Makapainteres ta ti konteksto ti nadakamat a teksto ket mangted iti detalyado a pannakailadawan dagiti banag a mangiturong iti sangalubongan a kalamidad. No kasano a ti kasla simburio a lava ken dadduma pay a pagilasinan ti panagbettak ti bulkan ti namkuatan dagiti opisial ti siudad ti Shimabara tapno ilasinda ti napeggad a disso, ikkannatay ti Biblia kadagiti rason nga agsalukag ken agsagana, iti kasta makalasattayo. Adda masursurotayo iti trahedia idiay Bantay Fugen ket imutektekantayo ti peggad nga agur-uray iti masanguanan.

[Picture Credit Line iti panid 2]

AKKUB: Yomiuri/Orion Press/Sipa Press

[Picture Credit Line iti panid 3]

Yomiuri/Orion Press/Sipa Press