Itultuloyyo nga Iparangarang ti Kinaimbag

“Ti bunga ti lawag buklen ti tunggal kita ti kinaimbag ken kinalinteg ken kinapudno.”​—EFESO 5:9.

 1. Kasano a ti minilion ita ipakpakitada nga umanamongda iti Salmo 31:19?

TI KASAYAATAN a maaramid ti asinoman isu ti panangitan-ok ken Jehova. Minilion ita ti mangar-aramid iti kasta babaen ti panangidayawda iti Dios gapu iti kinaimbagna. Kas nasungdo a Saksi ni Jehova, naimpusuan nga umanamongtayo iti salmista a nangikanta: “Anian a kinaruay ti kinaimbagmo, nga indulinmo maipaay kadagidiay agbuteng kenka!”​—Salmo 31:19.

2, 3. Ania ti mapasamak no ti trabahotayo a panagaramid iti adalan ket saan a nabuyogan iti naimbag a kababalin?

² Ti nadayaw a panagbuteng ken Jehova tignayennatayo a mangidayaw kenkuana gapu iti kinaimbagna. Tignayennatayo met a ‘mangbendito ken Jehova, ken mangipakaammo iti dayag ti kinaarina.’ (Salmo 145:10-13) Dayta ti makagapu a sireregta nga ikaskasabatayo ti Pagarian ken mangar-aramidtayo iti adalan. (Mateo 24:14; 28:19, 20) Siempre, nasken a nabuyogan iti naimbag a kababalin ti panangasabatayo. Ta no saan, maumsi ti nasantuan a nagan ni Jehova.

³ Adu a tattao ti agkuna nga agdaydayawda iti Dios, ngem saan met a maitunos ti kababalinda kadagiti pagalagadan a naituyang iti naipaltiing a Saona. No maipapan kadagiti aginsisingpet, insurat ni apostol Pablo: “Sika a mangisursuro iti asinoman, dika aya isuro ta bagim? Sika, a mangikaskasaba iti ‘Dika agtakaw,’ agtakawka aya? Sika, nga agkunkuna iti ‘Dika makikamalala,’ makikamalalaka aya? . . . ‘Ti nagan ti Dios matabtabbaawan maigapu kadakayo iti tengnga dagiti nasion’; kas adda a naisurat.”​—Roma 2:21, 22, 24.

 4. Ania ti epekto ti naimbag a kababalintayo?

⁴ Imbes nga agaramid iti pakaumsian ti nagan ni Jehova, pagreggetantayo nga ipadayag dayta babaen ti naimbag a kababalintayo. Nasayaat ti epektona kadagiti adda iti ruar ti kongregasion Kristiano. Tumulong dayta kadatayo a mangpaulimek kadagiti bumusbusor kadatayo. (1 Pedro 2:15) Napatpateg pay, ti naimbag a kababalintayo iyadanina dagiti tattao iti organisasion ni Jehova, a mangted kadakuada iti gundaway a mangipadayag iti Dios ken manggun-od iti biag nga agnanayon.​—Aramid 13:48.

 5. Ania a salsaludsod ti usigentayo ita?

⁵ Yantangay imperpektotayo, kasanotay a maliklikan ti kababalin a pakaibabainan ni Jehova ken pakaitibkolan dagiti agsapsapul iti kinapudno? Kasano a maiparangarangtayo ti kinaimbag?

Bunga ti Lawag

 6. Ania ti sumagmamano a “di nabunga nga ar-aramid a kukua ti kinasipnget,” ngem ania a bunga ti masapul nga agminar kadagiti Kristiano?

⁶ Kas dedikado a Kristiano, adda ti tumulong kadatayo a mangliklik iti “di nabunga nga ar-aramid a kukua ti kinasipnget,” ar-aramid a pakaibabainan ti Dios kas iti panagulbod, panagtakaw, panagsao iti dakes, narugit a saritaan maipapan iti sekso, nakababain a kondukta, naalas nga ang-angaw, ken panagbartek. (Efeso 4:25, 28, 31; 5:3, 4, 11, 12, 18) Imbes a makiraman kadagita nga aramid, ‘itultuloytayo ti magna kas annak ti lawag.’ Kuna ni apostol Pablo a “ti bunga ti lawag buklen ti tunggal kita ti kinaimbag ken kinalinteg ken kinapudno.” (Efeso 5:8, 9) Maitultuloytayo ngarud a maiparangarang ti kinaimbag no magnatayo iti lawag. Ngem ania a kita ti lawag daytoy?

 7. Ania ti rumbeng nga aramidentayo tapno agtultuloy a maiparangarangtayo ti bunga ti kinaimbag?

⁷ Iti laksid ti kinaimperpektotayo, maiparangarangtayo ti kinaimbag no magnatayo iti naespirituan a lawag. “Ti saom ket pagsilawan iti sakak, ken silaw iti danak,” inkanta ti salmista. (Salmo 119:105) No kayattayo a maitultuloy a maiparangarang “ti bunga ti lawag” babaen ti “tunggal kita ti kinaimbag,” masapul a kanayon nga aprobetsarentayo ti naespirituan a lawag a masarakan iti Sao ti Dios, a masukimat a naimbag kadagiti Nakristianuan a publikasion, ken regular a mapagsasaritaan kadagiti gimongtayo mainaig iti panagdayaw. (Lucas 12:42; Roma 15:4; Hebreo 10:24, 25) Masapul met nga ipaayantayo iti naisangsangayan nga atension ti ulidan ken pannursuro ni Jesu-Kristo, “ti silaw ti lubong” ken ti “silnag ti dayag [ni Jehova].”​—Juan 8:12; Hebreo 1:1-3.

Bunga ti Espiritu

 8. Apay a kabaelantayo nga iparangarang ti kinaimbag?

⁸ Di pagduaduaan a ti naespirituan a lawag tulongannatayo a mangiparangarang iti kinaimbag. Kanayonanna, maiparangarangtayo daytoy a galad gapu ta iturturongnatayo ti nasantuan nga espiritu wenno aktibo a puersa ti Dios. Ti kinaimbag ket maysa kadagiti “bunga ti espiritu.” (Galacia 5:22, 23) No agpaiwanwantayo iti nasantuan nga espiritu ni Jehova, patanorenna kadatayo ti nagsayaat a bunga a kinaimbag.

 9. Kasano a makapagtignaytayo maitunos iti sasao ni Jesus a nairekord iti Lucas 11:9-13?

⁹ Ti nasged a tarigagaytayo a mangay-ayo ken Jehova babaen ti panangiparangarang iti bunga ti espiritu a kinaimbag tignayennatayo koma nga agtignay maitunos iti sasao ni Jesus: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo. Ta ti tunggal maysa nga agdawdawat umawat, ken ti tunggal maysa nga agsapsapul makasarak, ket iti tunggal maysa nga agtuktuktok mailukatto dayta. Kinapudnona, siasino kadakayo ti ama a, no ti anakna dumawat iti ikan, nalabit iyawatnanto kenkuana ti maysa a serpiente imbes nga ikan? Wenno no dumawat met iti itlog, iyawatnanto kenkuana ti maysa a manggagama? Gapuna, no dakayo, nupay [imperpekto ket iti kasta makuna met a] nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!” (Lucas 11:9-13) Surotentayo ti balakad ni Jesus babaen ti panangikararag iti espiritu ni Jehova tapno maitultuloytayo a maiparangarang ti bungana a kinaimbag.

‘Itultuloy nga Aramiden ti Naimbag’

10. Aniada nga aspeto ti kinaimbag ni Jehova ti nadakamat iti Exodo 34:6, 7?

¹⁰ Babaen ti lawag ti Sao ti Dios ken ti tulong ti nasantuan nga espirituna, ‘maitultuloytayo nga aramiden ti naimbag.’ (Roma 13:3) Babaen ti regular a panagadal iti Biblia, umadu ti pannakaammotayo no kasano a tuladen ti kinaimbag ni Jehova. Iti napalabas nga artikulo, nausig dagiti aspeto ti kinaimbag ti Dios a nadakamat iti pakaammo ken Moises a nailanad iti Exodo 34:6, 7, a pakabasaantayo iti kastoy: “Jehova, Jehova, maysa a Dios a naasi ken managparabur, nabannayat nga agunget ken naruay iti naayat a kinamanangngaasi ken kinapudno, mangsalsalimetmet iti naayat a kinamanangngaasi maipaay iti rinibu, mamakpakawan iti biddut ken salungasing ken basol, ngem nikaanoman saanto a mangipaay iti pannakailaksid iti dusa.” Ti naun-uneg a panangusig kadagitoy nga aspeto ti kinaimbag ni Jehova tulongannatayo nga ‘agtultuloy nga agaramid iti naimbag.’

11. Ania koma ti epektona kadatayo ti pannakaammo a naasi ken naalumamay ni Jehova?

¹¹ Daytoy a nadiosan a pakaammo gutugotennatayo a mangtulad ken Jehova babaen ti panagbalin a naasi ken naalumamay. “Naragsak dagiti naasi,” kinuna ni Jesus, “yantangay maipakitaandanto iti asi.” (Mateo 5:7; Lucas 6:36) Gapu ta ammotayo a naalumamay ni Jehova, matignaytayo nga agbalin a naalumamay ken makaay-ayo no makilangentayo iti sabsabali, agraman kadagiti kasabaantayo. Maitunos daytoy iti balakad ni Pablo: “Ti panagsaoyo kankanayon koma a mabuyogan iti kinaparabur, natemplaan iti asin, tapno ammoyo no kasano ti rebbengyo nga isusungbat iti tunggal maysa.”​—Colosas 4:6.

12. (a) Gapu ta nabannayat nga agunget ti Dios, ania koma ti kababalintayo kadagiti sabsabali? (b) Ti naayat a kinamanangngaasi ni Jehova tignayennatayo nga agaramid iti ania?

¹² Gapu ta nabannayat nga agunget ti Dios, ti tarigagaytayo nga ‘agtultuloy nga agaramid iti naimbag’ tignayennatayo a mangpalabas kadagiti babassit a pagkamalian dagiti kapammatiantayo ken mangipamaysa kadagiti agkakaimbag a galadda. (Mateo 7:5; Santiago 1:19) Ti naayat a kinamanangngaasi ni Jehova tignayennatayo a mangiparangarang iti nasungdo nga ayat, uray iti sidong ti karirigatan a kasasaad. Pudno a makaay-ayo dayta.​—Proverbio 19:22.

 13. Ania ti nasken nga aramidentayo tapno mayanninaw a ‘naruay iti kinapudno’ ni Jehova?

¹³ Gapu ta ‘naruay iti kinapudno’ ti nailangitan nga Amatayo, ikagumaantayo nga ‘irekomenda ti bagbagitayo kas ministrona babaen ti napudno a sasao.’ (2 Corinto 6:3-7) Karaman kadagiti pito a banag a makarimon ken Jehova isu ti “ulbod a dila” ken “ulbod a saksi nga agyesngaw kadagiti kinaulbod.” (Proverbio 6:16-19) Gapuna, ti tarigagaytayo a mangay-ayo iti Dios tignayennatayo a ‘mangiwaksi iti kinaulbod ken agsao iti kinapudno.’ (Efeso 4:25) Sapay koma ta kanayon a maiparangarangtayo ti kinaimbag iti kastoy a nagpateg a wagas.

 14. Apay a mamakawantayo koma?

¹⁴ Ti impakaammo ti Dios ken ni Moises tignayennatayo met koma a mangpakawan, gapu ta sidadaan a mamakawan ni Jehova. (Mateo 6:14, 15) Siempre, dusaen ni Jehova dagidiay saan nga agbabawi. Nasken ngarud nga itandudotayo dagiti pagalagadanna iti kinaimbag tapno mataginayon ti naespirituan a kinasin-aw ti kongregasion.​—Levitico 5:1; 1 Corinto 5:11, 12; 1 Timoteo 5:22.

“Itultuloyyo ti Agaluad”

15, 16. Kasano a ti balakad ni Pablo a nairekord iti Efeso 5:15-19 tulongannatayo nga agtultuloy nga agaramid iti naimbag?

¹⁵ Tapno maitultuloytayo a maaramid ti naimbag iti laksid ti kinadakes iti aglawlawtayo, masapul a mapnotayo iti espiritu ti Dios ken aluadantayo ti pannagnatayo. Gapuna, indagadag ni Pablo kadagiti Kristiano idiay Efeso: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda. Gapu itoy sardenganyo ti panagbalin a di nainkalintegan, no di ket itultuloyyo a lasinen no ania ti pagayatan ni Jehova. Kasta met, dikay agbarbartek iti arak, nga iti dayta adda kinagaramugam, no di ket agtultuloykayo a mapno iti espiritu, nga agsasaokayo iti bagbagiyo kadagiti salmo ken daydayaw iti Dios ken naespirituan a kankanta, nga agkankanta ken pakpakuyoganyo ti bagbagiyo iti musika iti puspusoyo ken Jehova.” (Efeso 5:15-19) Sigurado a naintiempuan daytoy a balakad kadatayo kadagitoy napeggad a maudi nga al-aldaw.​—2 Timoteo 3:1.

¹⁶ Tapno agtultuloy a maaramidtayo ti naimbag, nasken a siiinget a siguraduentayo a magmagnatayo kas kadagidiay addaan iti nadiosan a sirib. (Santiago 3:17) Masapul a liklikantayo dagiti nadagsen a basol ken nasken a mapnotayo iti nasantuan nga espiritu, ket agpaiwanwantayo iti dayta. (Galacia 5:19-25) Babaen ti panangyaplikar kadagiti naespirituan nga instruksion a maipapaay kadagiti Nakristianuan a gimong, asamblea, ken kombension, maitultuloytayo ti agaramid iti naimbag. Ti sinao ni Pablo kadagiti taga Efeso mabalin nga ipalagipna kadatayo nga iti kaaduan kadagiti taripnongtayo agpaay iti panagdayaw, magunggonaantay no naimpusuan a kantaentayo dagiti “naespirituan a kankanta”​—a kaaduan kadagita ti mainaig kadagiti naespirituan a galad, kas iti kinaimbag.

17. Nupay saan nga ipalubos ti kasasaadda a makatabunoda a regular kadagiti gimong, ania ti masigurado dagiti Kristiano nga addaan iti nakaro a sakit?

¹⁷ Komusta met dagiti kapammatiantayo a di regular a makatabuno kadagiti Nakristianuan a gimong gapu iti nakaro a sakit? Mabalin a maldaanganda gapu ta dida kanayon a madanggayan dagiti naespirituan a kakabsatda iti panangidayaw ken Jehova. Ngem makapagtalekda a maawatan ni Jehova ti kasasaadda, a pagtalinaedenna ida iti kinapudno, nga ipaayanna ida iti nasantuan nga espiritu, ken tulonganna ida a makapagtultuloy nga agaramid iti naimbag.​—Isaias 57:15.

18. Ania ti tumulong kadatayo a makapagtultuloy nga agaramid iti kinaimbag?

¹⁸ Tapno agtultuloy a makaaramidtayo iti kinaimbag, masapul a pilientay dagiti pakikaduaantayo ket adaywantayo dagidiay “awanan panagayat iti kinaimbag.” (2 Timoteo 3:2-5; 1 Corinto 15:33) No ipangagtayo daytoy a balakad, saantay a ‘mapagleddaang ti nasantuan nga espiritu ti Dios’ babaen ti saan a panagpaidalan iti dayta. (Efeso 4:30) Kanayonanna, maaramidtayo ti naimbag no sisisinged a makilangentayo kadagidiay mangyan-anninaw iti biagda nga ay-ayatenda ti kinaimbag ken iturturong ida ti nasantuan nga espiritu ni Jehova.​—Amos 5:15; Roma 8:14; Galacia 5:18.

Nasayaat Dagiti Bunga ti Kinaimbag

19-21. Mangisalaysaykayo kadagiti kapadasan a mangipakita iti resulta ti panangipakita iti kinaimbag.

¹⁹ Ti pannagna iti naespirituan a lawag, ti panagpaidalan iti espiritu ti Dios, ken ti panagaluad iti pannagnatayo tulongandatayo a mangliklik iti dakes ken ‘agtultuloy nga agaramid iti naimbag.’ Mangyeg daytoy kadagiti nasayaat a bunga. Usigenyo ti kapadasan ni Zongezile, maysa kadagiti Saksi ni Jehova idiay South Africa. Maysa nga aldaw, idi mapan ageskuela, dimmaw-as iti banko tapno kitaenna ti bassit nga urnongna. Ipakita ti rekord ti banko nga adda R42,000 ($6,000, U.S.) a kamali a nainayon iti urnongna. Indagadag kenkuana ti guardia ti banko ken ti dadduma a tattao nga alaenna ti kuarta ket idepositona iti sabali a banko. Ti laeng agassawa a Saksi a pagnanaedanna ti nangkomendar kenkuana gapu iti dina panangala iti kuarta.

²⁰ Iti sumaruno nga aldaw ti trabaho, inreport ni Zongezile iti banko daydi a panagkamali. Natakuatan a ti numerona iti banko ket umasping iti numero ti maysa a nabaknang a negosiante a nagkamali a nangideposito iti kuartana iti sabali a numero. Gapu ta nasdaaw a di pulos inusar ni Zongezile ti kuartana, dinamag ti negosiante ken ni Zongezile: “Ania ti relihionmo?” Inlawlawag ni Zongezile nga isu ket maysa a Saksi ni Jehova. Sibabara a kinomendaran dagiti opisial iti banko, a kinunada: “No la koma napudno ti amin a tattao kas kadagiti Saksi ni Jehova.” Talaga a ti panagbalin a napudno ken naimbag tignayenna ti dadduma a mangidayaw ken ni Jehova.​—Hebreo 13:18.

²¹ Saan a nasken a naisangsangayan dagiti maaramid a kinaimbag tapno nasayaat ti resultana. Kas panangyilustrar: Maysa nga agkabannuag a Saksi a payunir iti isla ti Samoa ti napan iti maysa nga ospital iti lugarda. Bayat nga ur-urayen dagiti tattao ti doktor, nadlaw ti Saksi a masakit unay ti baket a sumarsaruno kenkuana. Pinaunana ti baket tapno maasikaso a dagus. Iti sabali a gundaway, nagkita daytoy a Saksi ken ti baket iti tiendaan. Nalagip ti baket daytoy a Saksi ken ti naimbag nga inaramidna idiay ospital. “Ita, ammokon a pudno nga ay-ayaten dagiti Saksi ni Jehova ti kaarrubada,” kinunana. Iyaleng-alengna idi ti mensahe ti Pagarian. Ngem nasayaat ti epekto ti kinaimbag nga impakita kenkuana ti Saksi. Nagpayadal iti Biblia ket rinugiannan ti gumun-od iti pannakaammo iti Sao ti Dios.

22. Ania ti maysa a nagsayaat a wagas a ‘maitultuloytayo ti agaramid iti naimbag’?

²² Mabalin nga addada maisalaysayyo nga umasping a kapadasan a mangipakita iti kinapateg ti panangiparangarang iti kinaimbag. Ti maysa a nagsayaat a wagas tapno ‘agtultuloy a makaaramid iti naimbag’ isu ti regular a pannakiraman iti panangipakaammo iti naimbag a damag ti Pagarian ti Dios. (Mateo 24:14) Sireregta koma nga itultuloytayo ti makipaset iti daytoy nagpateg a trabaho, a matmatantayo a maysa daytoy a wagas a makaaramidtayo iti naimbag, nangnangruna kadagidiay mangipangag. Kangrunaan ti amin, ti ministerio ken naimbag a kababalintayo ket pakaidayawan ni Jehova, ti mismo a gubuayan ti kinaimbag.​—Mateo 19:16, 17.

Itultuloyyo nga ‘Aramiden ti Naimbag’

23. Apay a nasayaat a trabaho ti Nakristianuan a ministerio?

²³ Awan duadua a naimbag a trabaho ti ministeriotayo. Agresulta daytoy iti pannakaisalakantayo ken dagiti mangipangag iti mensahe ti Biblia. Iti kasta, magnadanto iti dalan nga agturong iti biag nga agnanayon. (Mateo 7:13, 14; 1 Timoteo 4:16) No maipasangotayo ngarud kadagiti panagdesision, ti tarigagay nga agaramid iti naimbag ti manggutugot koma kadatayo a mangyimtuod iti bagitayo: ‘Kasano ngata nga apektaran ti desisionko ti annongek a mangikasaba iti Pagarian? Talaga kadi a makagunggona ti pampanunotek nga aramiden? Tumulong kadi daytoy tapno matulongak ti dadduma nga umawat iti “agnanayon a naimbag a damag” ken maaddaan iti nasinged a relasion ken ni Jehova a Dios?’ (Apocalipsis 14:6) Dakkel ti ragsak nga iyeg ti desision a mangipangpangruna iti interes ti Pagarian.​—Mateo 6:33; Aramid 20:35.

24, 25. Ania ti sumagmamano a naimbag a maaramidtayo iti kongregasion, ket iti ania a makapagtalektayo no itultuloytay nga iparangarang ti kinaimbag?

²⁴ Ditay koma tagibassiten dagiti makagunggona nga epekto ti kinaimbag. Agtultuloy a maiparangarangtayo daytoy a galad babaen ti panangsuportatayo iti kongregasion Kristiano ken panangikagumaan a parayrayen dagiti interes ken pagimbaganna. Sigurado a naimbag ti maaramidantayo no regular a tumabuno ken makiramantayo kadagiti Nakristianuan a gimong. Ti mismo a kaaddatayo paregtaenna dagiti pada nga agdaydayaw, ket dagiti naisagana a naimbag a komentotayo pabilgenna ida iti naespirituan. Makaaramidtayo met iti naimbag no usarentay dagiti ik-ikutantayo a mangmantener iti Kingdom Hall ken makitinnulong iti panangaywan iti dayta. (2 Ar-ari 22:3-7; 2 Corinto 9:6, 7) Kinapudnona, “bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti amin, ngem nangnangruna kadagidiay nainaig kadatayo iti pammati.”​—Galacia 6:10.

²⁵ Ditay mapakadaan ti tunggal gundaway nga agkasapulan iti naimbag nga aramid. Gapuna, bayat a sanguentayo dagiti baro a karit, agpaiwanwantayo iti lawag ti Kasuratan, ikararag ti nasantuan nga espiritu ni Jehova, ken aramiden ti amin a kabaelantayo nga itungpal ti naimbag ken perpekto a pagayatanna. (Roma 2:9, 10; 12:2) Makapagtalektayo a sibabaknang a bendisionannatayo ni Jehova no itultuloytayo nga iparangarang ti kinaimbag.

Ania ti Sungbatyo?

• Ania ti kasayaatan a maaramidtayo?

• Apay a naawagan ti kinaimbag a ‘bunga ti lawag’?

• Apay a naawagan ti kinaimbag a ‘bunga ti espiritu’?

• Ania ti epekto ti naimbag a kababalintayo?

[Ladawan iti panid 17]

Ti Sao ti Dios ken ti nasantuan nga espirituna tulongandatayo a mangiparangarang iti kinaimbag

[Dagiti Ladawan iti panid 18]

Nasayaat dagiti bunga ti panangiparangarang iti kinaimbag