Ti Pamilia ni Jesus​—Siasinoda?

ITI adu a paset ti lubong, bayat ti Disiembre, masansan a makitayo dagiti eksena a mangiladladawan ken ni Jesus kas maladaga iti nadungngo nga aywan ni nanangna a Maria ken ti pannakaamana a ni Jose. Dagiti kasta a buya ti pamilia ti mabalin a makakayaw uray kadagiti agkunkuna a saanda a Kristiano. Yantangay ni Jesus ti nakaisentruan dagita nga eksena, ania ti ibaga kadatayo ti Kasuratan maipapan iti pamilia ni Jesus ditoy daga?

Makapainteres unay ti pakasaritaan ti pamilia ni Jesus. Maysa a birhen nga agnagan Maria ti nangipasngay kenkuana, isu a nagbalin a kameng ti natauan a pamilia. Sigun iti Biblia, nayakar ti biagna manipud langit iti aanakan ni Maria babaen ti nasantuan nga espiritu. (Lucas 1:30-35) Sakbay a naipakaammo ti milagro a pannakayinaw ni Jesus, naitulag a mayasawa ni Maria iti lalaki nga agnagan Jose, a nagbalin a pannakaama ni Jesus.

Kalpasan a nayanak ni Jesus, naaddaan da Jose ken Maria iti dadduma nga annak, dagiti kakabsat ni Jesus iti ina. Nabatad dayta idi inyimtuod dagiti agnaed iti Nazaret maipapan ken ni Jesus: “Saan aya nga isu daytoy ti anak ti allawagi? Saan aya a ni inana naawagan Maria, ket ti kakabsatna a lallaki isu da Santiago ken Jose ken Simon ken Judas? Ket ti kakabsatna a babbai, saan aya a kaduatayo amin ida?” (Mateo 1:25; 13:55, 56; Marcos 6:3) Gapuna, maikunatayo a ti pamilia ni Jesus ket buklen dagiti nagannak kenkuana ken dagiti adingna nga uppat a lallaki ken di kumurang a dua a babbai.

Nupay kasta, iti kaaldawantayo, adda dagiti saan a mamati nga annak da Jose ken Maria dagiti lallaki ken babbai a kakabsat ni Jesus. Apay? “Sipud pay idi rugrugina,” kuna ti New Catholic Encyclopedia, “insuro ti Simbaan a nagtalinaed a birhen ni Maria. Maibatay ngarud iti dayta a panangmatmat, sigurado nga awan ti sabali nga annak ni Maria.” Kuna ti isu met laeng a reperensia a dagiti sao a “kabsat a lalaki” ken “kabsat a babai” ket mabalin a tumukoy iti “tao wenno tattao a karelihion wenno dadduma a kakadua” wenno kakabagian, nalabit kakasinsin.

Pudno kadi dayta? Uray dagiti dadduma a Katoliko a teologo, a di kumanunong iti tradisional a doktrina, suportaranda ti panangmatmat nga adda kakabsat ni Jesus iti lasag. Insurat ni John P. Meier, dati a presidente ti Catholic Bible Association of America: “Iti B[aro] a [T]ulag, saan laeng a piguratibo wenno metapora ti nakausaran ti adelphos [ti Griego a sao para iti “kabsat”] no di ket nausar a mangtukoy iti kita ti pisikal wenno legal a relasion, awanen sabali a tuktukoyenna no di ti kabsat iti lasag wenno kabsat iti ama wenno iti ina.”a Wen, ipasimudaag ti Kasuratan nga addaan ni Jesus kadagiti kakabsat a lallaki ken babbai, nga annak da Jose ken Maria.

Dagiti Ebanghelio dakamatenda ti dadduma a kabagian ni Jesus, ngem ipamaysatayo ita ti atensiontayo iti mismo a pamilia ni Jesus ket kitaentayo no ania ti maadaltayo kadakuada.

[Footnote]