Agregtakayo Maipaay iti Balay ni Jehova!

“Ti regta maipaay iti balaymo ibusennakto.”​—JUAN 2:17.

1, 2. Iti templo idi 30 K.P., ania ti inaramid ni Jesus, ken apay?

DAREPDEPENYO ti eksena. Paskua idi ti 30 K.P. Innem a bulan sakbayna, rinugian ni Jesus ti ministeriona ditoy daga. Ita agturongen idiay Jerusalem. Sadiay, iti templo iti paraangan dagiti Gentil, nadatngan ni Jesus “dagidiay aglaklako kadagiti baka ken karnero ken kalapati ken dagiti managsukat iti kuarta kadagiti tugawda.” Babaen ti panangiwasawasna iti pagsaplit a taltali, pinaruarna dagiti amin nga animal, ket dagiti aglaklako sinurotda dagita. Imbukbok met ni Jesus dagiti sinsilio dagiti agsuksukat iti kuarta, ken imbalintuagna dagiti lamisaanda. Imbilinna kadagidiay aglaklako kadagiti kalapati nga alaenda dagiti tagilakoda ket pumanawda.​—Juan 2:13-16.

² Ipasimudaag dagiti tignay ni Jesus a maseknan unay iti templo. Imbilinna: “Isardengyo a pagbalbalinen ti balay ni Amak a balay ti tagilako!” Nakita dagiti adalan ni Jesus dagita a pasamak, ket nalagipda dagiti sasao a sinurat ni salmista a David sinigsiglon ti napalabas: “Ti regta maipaay iti balaymo ibusennakto.”​—Juan 2:16, 17; Sal. 69:9.

 3. (a) Ania ti regta? (b) Ania ti iyimtuodtayo iti bagbagitayo?

³ Nagutugot ni Jesus nga agtignay gapu iti pannakaseknan ken regtana iti balay ti Dios. Ti regta ket “kinagagar ken nasged nga interes a mangitungpal iti maysa a banag.” Iti daytoy maika-21 a siglo, nasurok a pito a milion a Kristiano ti mangiparparangarang iti pannakaseknan iti balay ti Dios. Nalabit iyimtuod ti tunggal maysa kadatayo, ‘Kasano nga agbalinak a naregregta iti balay ni Jehova?’ Tapno masungbatan dayta, usigentayo pay nga umuna no ania ita ti balay ti Dios. Kalpasanna, usigentayo dagiti pagarigan a nailanad iti Biblia maipapan kadagiti matalek a lallaki ken babbai a nangiparangarang iti regta maipaay iti dayta. Naisurat dagiti ulidanda “a pakasursuruantayo” ken ad-adda pay a mangparegta kadatayo.​—Roma 15:4.

Ti Balay ti Dios​—Idi ken Ita

 4. Ania ti panggep ti templo nga imbangon ni Solomon?

⁴ Iti nagkauna nga Israel, ti balay ti Dios isu ti templo idiay Jerusalem. Siempre, saan nga agnanaed ni Jehova sadiay. Kinunana: “Ti langlangit isu ti tronok, ket ti daga isu ti pagbatayan ti sakak. Sadino, ngarud, ti ayan ti balay a maibangonyo maipaay kaniak, ket sadino, ngarud, ti disso a kas lugar a paginanaan maipaay kaniak?” (Isa. 66:1) Nupay kasta, ti templo a naibangon idi nagturay ni Solomon ti nagserbi a sentro ti panagdaydayaw ken Jehova, a sadiay ti pagkararagan.​—1 Ar. 8:27-30.

 5. Ania nga urnos iti kaaldawantayo ti iladladawan ti templo ni Solomon?

⁵ Iti kaaldawantayo, ti balay ni Jehova ket saan a maysa a balay idiay Jerusalem wenno iti sadinoman a lugar. Imbes ketdi, maysa dayta nga urnos tapno makaadanitayo nga agdayaw kenkuana maibatay iti daton a subbot ni Kristo. Amin a matalek nga adipen ti Dios ditoy daga agkaykaysada nga agdayaw ken Jehova iti daytoy a naespirituan a templo.​—Isa. 60:4, 8, 13; Ara. 17:24; Heb. 8:5; 9:24.

 6. Siasino kadagiti ari iti Juda ti nangipakita iti naisangsangayan a regta iti pudno a panagdayaw?

⁶ Kalpasan ti pannakabingay ti Israel idi 997 K.K.P., uppat kadagiti 19 nga ari a nagturay idiay Juda, iti makin-abagatan a paset, ti nangipakita iti naisangsangayan a regta iti pudno a panagdayaw. Dagitoy da Asa, Jehosafat, Ezekias, ken Josias. Ania dagiti napateg a masursurotayo kadakuada?

Ti Naimpusuan a Panagserbi Mangyeg Kadagiti Bendision

7, 8. (a) Ania a kita ti panagserbi ti bendisionan ni Jehova? (b) Ania ti inaramid ni Ari Asa a pakapakdaarantayo?

⁷ Idi nagturay ni Ari Asa, nangibaon ni Jehova kadagiti mammadto a mangiwanwan iti nasionna tapno agtalinaedda a matalek. Kas pagarigan, kunaen kadatayo ti Biblia a nagimdeng ni Asa ken propeta Azarias, ti anak ni Oded. (Basaen ti 2 Cronicas 15:1-8.) Gapu kadagiti panagbalbaliw nga inaramid ni Asa, nagkaykaysa dagiti umili iti Juda agraman ti adu nga umili manipud iti pagarian ti Israel nga immay maipaay iti dakkel a panagtitipon iti Jerusalem. Sangsangkamaysa nga impakaammoda ti determinasionda nga agdayaw a sisusungdo ken Jehova. Mabasatayo: “Gapuna nagsapatada ken Jehova buyogen ti natbag a timek ken buyogen ti narag-o a panagdir-i ken buyogen dagiti trumpeta ken buyogen dagiti tangguyob. Ket nagragrag-o ti intero a Juda gapu iti banag a naisapata; ta nagsapatada buyogen ti isuamin a pusoda ken isu sinapulda buyogen ti naan-anay a ragsak iti biangda, iti kasta impalubosna nga isu masarakanda; ket intuloy ni Jehova nga ipaayan ida iti inana iti intero nga aglikmut.” (2 Cron. 15:9-15) Umasping iti dayta, sigurado a bendisionannatayo met ni Jehova no naimpusuan nga agserbitayo kenkuana.​—Mar. 12:30.

⁸ Idi agangay, makapaladingit ta kinarurod ni Asa ti panangilinteg ni Hanani a pumaparmata. (2 Cron. 16:7-10) Ania ti reaksiontayo no ipaayannatayo ni Jehova iti balakad wenno pammilin babaen kadagiti Kristiano a panglakayen? Dagus kadi nga ipangagtayo ti Nainkasuratan a balakadda ket liklikantayo ti panagsakit ti nakem?

 9. Ania a pangta ti naipasango ken Jehosafat ken iti Juda, ken ania ti inaramidda?

⁹ Nagturay ni Jehosafat kas ari ti Juda kabayatan ti maika-sangapulo a siglo K.K.P. Isu ken ti intero a Juda ket pinangtaan dagiti nagkaykaysa a buyot dagiti Ammonita, Moabita, ken dagiti umili iti kabambantayan ti Seir. Nupay mabuteng ti ari, ania ti inaramidna? Ni Jehosafat ken dagiti lallaki iti Juda, agraman dagiti assawa ken dagiti annakda, naguummongda iti balay ni Jehova tapno agkararagda. (Basaen ti 2 Cronicas 20:3-6.) Maitunos iti sasao ni Solomon idi maidedikar ti templo, natignay ni Jehosafat nga umararaw ken Jehova: “O Diosmi, saanmonto aya nga ipakat ti panangukom kadakuada? Ta awanankami iti pannakabalin iti sanguanan daytoy dakkel a bunggoy nga um-umay a bumusor kadakami; ket dakami saanmi nga ammo no ania ti rebbeng nga aramidenmi, no di ket situturong kenka dagiti matami.” (2 Cron. 20:12, 13) Kalpasan ti panagkararag ni Jehosafat, sadiay “iti tengnga ti kongregasion,” ti espiritu ni Jehova tinignayna ti Levita a ni Jahaziel tapno mangyebkas iti panangliwliwa a nakapabilgan dagiti umili.​—Basaen ti 2 Cronicas 20:14-17.

10. (a) Kasano a naiwanwan ni Jehosafat ken ti Juda? (b) Kasanotayo a maipakita ti apresasion iti panangiwanwan nga ipapaay ita ni Jehova?

¹⁰ Wen, ni Jehosafat ken ti pagarian ti Juda immawatda idi iti panangiwanwan ni Jehova babaen ken Jahaziel. Ita, umaw-awattayo iti liwliwa ken panangiwanwan babaen ti klase matalek ken masirib nga adipen. Siempre, kanayon a kayattayo ti tumulong ken mangipakita iti panagraem kadagiti nadutokan a panglakayen, a siaanep a mangipaspastor kadatayo ken mangipatpatungpal kadagiti panangiwanwan “ti matalek ken masirib nga adipen.”​—Mat. 24:45; 1 Tes. 5:12, 13.

11, 12. Ania ti masursurotayo iti napasamak ken Jehosafat ken iti Juda?

¹¹ No kasano a naguummong ni Jehosafat ken dagiti iturayanna tapno agpaiwanwanda ken Jehova, ditay met koma liwayan ti makitaripnong kadagiti kakabsattayo babaen kadagiti gimong iti kongregasion. No maipasangotayo iti nakaro a pakarigatan, ket ditay ammo ti aramidentayo, tuladentayo koma ti nasayaat nga ulidan ni Jehosafat ken dagiti umili iti Juda ket umararawtayo ken Jehova buyogen ti naan-anay a panagtalek Kenkuana. (Prov. 3:5, 6; Fil. 4:6, 7) Uray no agmaymaysatayo, ti ararawtayo ken Jehova ti mangikaykaysa kadatayo iti ‘intero a timpuyog ti kakabsattayo ditoy lubong.’​—1 Ped. 5:9.

¹² Ni Jehosafat ken dagiti iturayanna sinurotda ti panangiwanwan ti Dios babaen ken Jahaziel. Ania ti resultana? Nagballigida iti gubat ket nagsublida iti Jerusalem “buyogen ti panagrag-o” ken “buyogen dagiti pagtokar nga adda kuerdasna ken buyogen dagiti arpa ken buyogen dagiti trumpeta agingga iti balay ni Jehova.” (2 Cron. 20:27, 28) Umasping iti dayta, kayattayo met a raemen ti panangiwanwan ni Jehova babaen ti kalasuganna ken makiraman iti panangdayaw kenkuana.

Aywanantayo Dagiti Paggigimongantayo

13. Ania a trabaho ti inyusuat ni Ezekias iti rugrugi ti panagturayna?

¹³ Iti umuna a bulan ti panagturay ni Ezekias, impakitana ti regtana iti panagdayaw ken Jehova idi linuktanna ti templo ken rinugianna ti panangtarimaan iti dayta. Inorganisarna dagiti papadi ken Levita tapno dalusanda ti balay ti Dios. Inaramidda dayta iti 16 nga aldaw. (Basaen ti 2 Cronicas 29:16-18.) Dayta a panagregget ipalagipna kadatayo ti trabaho a panangmantener ken panangtarimaan kadagiti lugar a paggigimongantayo tapno maiparangarang dagita a naregtatayo iti panagdayaw ken Jehova. Ipakita dagiti kapadasan nga adu ti mangap-apresiar iti regta dagiti kakabsat a makipaspaset iti kasta a trabaho. Wen, maidaydayaw ni Jehova gapu kadagita a panagregget.

14, 15. Ania a trabaho ita ti nangyeg iti dakkel a pakaidayawan ni Jehova? Mangted kadagiti pagarigan.

¹⁴ Iti maysa a siudad iti amianan ti England, binusor ti maysa a lalaki ti dakkel a trabaho a panangtarimaan iti Kingdom Hall a kaabay ti pasdekna. Nainggayyeman a trinato dagiti kakabsat iti dayta a lugar. Idi makitada a kasapulan a matarimaan ti pader iti nagbaetan ti Kingdom Hall ken ti pasdek ti lalaki, intukonda a tarimnen dayta nga awan bayad. Siaanep a nagtrabahoda, ket saanda laeng a tinarimaan dayta no di ket dandani interamente nga imbangonda manen dayta. Nagsayaat ti pinamay-anda isu a nagbaliw ti kababalin dayta a kaarruba, ket tumultulong itan a mangbantay iti Kingdom Hall.

¹⁵ Iti intero a lubong, makipaspaset ti ili ni Jehova iti trabaho a panagbangon. Dagiti lokal a boluntario sidadaanda a tumultulong kadagiti international servant nga agtartrabaho iti amin a tiempo tapno agibangonda kadagiti Kingdom Hall, Assembly Hall, ken pasilidad ti Bethel. Ni Sam ket maysa nga inheniero a nalaing iti heating, ventilation, ken air-conditioning. Nakapandan ken baketna a Ruth iti nagduduma a pagilian iti Europa ken Africa tapno tumulong iti proyekto a panagbangon sadiay. Sadino man ti papananda, tagtagiragsakenda met ti mangasaba a kadua ti lokal a kongregasion. Inlawlawag ni Sam no ania ti nakatignayanna a makipaset kadagiti kasta a proyekto iti sangalubongan: “Natignayak gapu iti pammaregta dagiti kakabsat a nagserbi kadagiti pagtaengan a Bethel iti nagduduma a pagilian. Talaga a matignayak nga agserbi iti kastoy a pamay-an no makitkitak ti regta ken rag-oda.”

Agtungpal Kadagiti Instruksion ti Dios

16, 17. Ania a naisangsangayan nga aktibidad ti nakipasetan ti ili ti Dios, ket ania ti resultana?

¹⁶ Malaksid iti panangtarimaan ni Ezekias iti templo, insublina pay ti pannakarambak ti tinawen a Paskua nga imbilin idi ni Jehova. (Basaen ti 2 Cronicas 30:1, 4, 5.) Ni Ezekias ken dagiti umili ti Jerusalem inawisda a makipagrambak ti intero a nasion agraman dagiti agnanaed iti makin-amianan a pagarian. Dagiti tumataray sipapartak nga indanonda dagiti naisurat nga imbitasion iti intero a pagilian.​—2 Cron. 30:6-9.

¹⁷ Kadagiti nabiit pay a tawen, nakiramantayon iti umasping a panangikagumaan. Nagusartayo kadagiti naimaldit nga imbitasion a mangawis kadagiti tattao iti teritoriatayo a makipagrambak a kaduatayo iti Pangrabii ti Apo kas panagtulnog iti bilin ni Jesus. (Luc. 22:19, 20) Sireregta a nakiramantayo iti daytoy a trabaho kas maitunos kadagiti instruksion a naawattayo kadagiti Gimong ti Serbisio. Anian a panangbendision ni Jehova iti daytoy a panangikagumaan! Iti napalabas a tawen, agarup pito a milion kadatayo ti nagiwaras iti imbitasion, ket 17,790,631 ti dagup dagiti timmabuno!

18. Apay a nakapatpateg kenka ti regta maipaay iti pudno a panagdayaw?

¹⁸ Naikuna maipapan ken Ezekias: “Nagtalek ken Jehova a Dios ti Israel; ket kalpasan kenkuana awan idin ti kas kenkuana iti amin nga ar-ari ti Juda, uray pay dagidiay immun-una ngem isu. Ket intultuloyna ti kimpet ken Jehova. Saan a simiasi iti isusurot kenkuana, no di ket intuloyna a sinalimetmetan dagiti bilinna nga imbilin ni Jehova ken Moises.” (2 Ar. 18:5, 6) Surotentayo koma ti ulidanna. Ti regtatayo maipaay iti balay ti Dios ti tumulong kadatayo nga ‘agtultuloy a kumpet ken Jehova’ buyogen ti namnama a biag nga agnanayon.​—Deut. 30:16.

Dagus a Sumurot iti Panangiwanwan

19. Ania a naregta a panangikagumaan ti maaramid iti panawen ti Memorial?

¹⁹ Idi nagturay ni Josias, inyurnosna met ti nasaknap a panagsagana kas panangrambak iti Paskua. (2 Ar. 23:21-23; 2 Cron. 35:1-19) Siguraduentayo koma a nakasaganatayo a naimbag maipaay kadagiti kombension distrito, asamblea sirkito, aldaw ti espesial nga asamblea, kasta met iti Memorial. Iti dadduma a pagilian, uray la irisgo dagiti kakabsat ti biagda tapno aggigimongda a sangsangkamaysa a manglagip iti ipapatay ni Kristo. Siguraduen dagiti naregta a panglakayen iti kongregasion nga awan ti mabaybay-an. Matulongan dagiti lallakay, babbaket ken dagiti baldado tapno matabunuanda ti panangrambak.

20. (a) Ania ti napasamak idi nagturay ni Ari Josias, ken ania ti reaksionna? (b) Ania a leksion ti kayattayo nga ipapuso?

²⁰ Idi panawen ti trabaho a panangisubli nga inorganisar ni Ari Josias, ti Nangato a Padi a ni Hilkias “nasarakanna ti libro ti linteg ni Jehova babaen ken Moises.” Intedna dayta ken Safan a sekretario ti ari a nangrugi a nangibasa iti linaon dayta ken Josias. (Basaen ti 2 Cronicas 34:14-18.) Ania ti nagbanagan dayta? Ti ari dagus a rinay-abna ti pagan-anayna gapu iti ladingitna ket imbilinna kadagiti lallaki nga agkonsultada ken Jehova. Babaen iti mammadtona a ni Hulda, impaay ti Dios ti mensahe a mangkondenar iti sumagmamano a narelihiosuan nga ar-aramid iti Juda. Ngem nakita ni Jehova dagiti panangikagumaan ni Josias a mangikkat iti panagdayaw iti idolo, ken nagtalinaed iti anamong ni Jehova nupay naipadto a mapasamak dagiti didigra agpaay iti intero a nasion. (2 Cron. 34:19-28) Ania ti masursurotayo iti daytoy? Sigurado a ti tarigagaytayo ket kas met laeng iti tarigagay ni Josias. Kayattayo ti dagus a sumurot iti panangiwanwan ni Jehova, nga ipapusotayo ti pagwadan a pakdaar maipapan iti mapasamak no palubosantayo a sumrek ti apostasia ken di kinamatalek iti panagdayawtayo. Agtalektayo a buyogen ti pananganamong, makita ni Jehova ti regtatayo maipaay iti pudno a panagdayaw, kas iti inaramidna ken Josias.

21, 22. (a) Apay a rumbeng nga ipakitatayo ti regta maipaay iti balay ni Jehova? (b) Ania ti usigentayo iti sumaganad nga artikulo?

²¹ Dagiti uppat nga ari ti Juda a da Asa, Jehosafat, Ezekias, ken Josias nangipakitada iti nagsayaat nga ulidan ti kinaregta agpaay iti balay ti Dios ken iti panagdayaw kenkuana. Ti regtatayo tignayennatayo koma met nga agtalek ken Jehova ken ikagumaantayo ti agbalin a naregta iti panagdayaw kenkuana. Talaga a masiribtayo ken naragsaktayo no tungpalentayo dagiti instruksion ti Dios ken agtungpaltayo iti naayat a panangiwanwan ken panangtubngarna babaen iti kongregasion ken dagiti panglakayen.

²² Ti sumaganad nga artikulo ipaganetgetna kadatayo ti regta iti ministerio ken mangipaay ti pammaregta kadagiti agtutubo nga agserbi a sireregta iti naayat nga Amatayo. Usigentayo met no kasano a maliklikantayo ti maysa a makadangran unay nga impluensia ni Satanas. Bayat a sireregta nga ipangagtayo ti amin a pammalagip ni Jehova, sursurotentayo ti ulidan a mismo ti anakna a ni Jesus, a maipapan kenkuana naikuna: “Ti bin-ig a regta maipaay iti balaymo inibusnak.”​—Sal. 69:9; 119:111, 129; 1 Ped. 2:21.

Malagipyo Pay Kadi?

• Ania a kita ti panagserbi ti bendisionan ni Jehova, ken apay?

• Kasano a maipakitatayo ti panagtalek ken Jehova?

• Kasano a ti regta tignayennatayo nga agtulnog iti bilin ti Dios?

[Dagiti Ladawan iti panid 9]

Kasano nga impakita da Asa, Jehosafat, Ezekias, ken Josias ti regtada maipaay iti balay ni Jehova?