Ti Nasantuan nga Espiritu​—Maysa a Puersa a Kasapulam iti Biagmo

“SAANNAK nga ibelleng manipud iti sanguanam; ket ti nasantuan nga espiritum O saanmo nga ikkaten kaniak.” (Salmo 51:11) Dayta ti napasnek a kararag ni Ari David kalpasan a nakaaramid ti nadagsen a basol.

Masansan idi a tagtagiragsaken ni David ti tulong ti nasantuan nga espiritu. Idi agtutubo pay, dayta ti nangtulong kenkuana a mangparmek ken Goliat​—maysa a nakabutbuteng a soldado. (1 Samuel 17:45-50) Dayta pay ti nangtulong kenkuana a mangisurat iti sumagmamano a kapipintasan pay laeng a salmo. “Ti espiritu ni Jehova ti nagsao babaen kaniak, ket ti saona adda idi iti dilak,” kuna ni David.​—2 Samuel 23:2.

Pinatalgedan a mismo ni Jesu-Kristo ti akem ti nasantuan nga espiritu iti biag ni David. Naminsan, kinuna ni Jesus kadagiti agdengdengngeg kenkuana: “Babaen iti nasantuan nga espiritu kinuna ni David a mismo, ‘Kinuna ni Jehova iti Apok: “Agtugawka iti makannawanko agingga nga ikabilko dagiti kabusormo iti baba dagiti sakam.”’” (Marcos 12:36; Salmo 110:1) Ammo ni Jesus nga idi insurat ni David ti salmona, isu ket inwanwan ti nasantuan nga espiritu. Matulongannatayo met kadi dayta a nasantuan nga espiritu?

“Itultuloyyo ti Agdawat, ket Maitedto Dayta Kadakayo”

Mabalin nga awan pay ti insuratmo a salmo. Ngem nalabit a maipaspasangoka kadagiti namuntuon a pakarigatan. Kas pagarigan, usigentayo ti kapadasan ni Isabel.a Insukat ni lakayna iti ub-ubing. Gapuna, isu ti mangbayad iti adu nga utang ni lakayna, ken saan a mangmangted daytoy iti pinansial a suporta para kadagiti dua a babbalasitangda. “Panagriknak ket naliputanak ken naipababa ti kinataok,” kinunana. “Nupay kasta, nariknak a sinaranaynak ti nasantuan nga espiritu ti Dios sipud idi pinanawannak ni lakayko.”

Ninamnama kadi ni Isabel nga automatiko a makaawat iti nasantuan nga espiritu? Saan. Inaldaw a kiniddawna dayta iti Dios. Ammona a kasapulanna ti tulong ti Dios tapno situtured a madaeranna dagiti parikut, maaywananna a naimbag dagiti annakna, ken mapasublina ti panagraemna iti bagina. Impapusona dagiti sasao ni Jesus: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo.”​—Mateo 7:7.

Adda sabali met a rason no apay a narikna ni Roberto a kasapulanna ti espiritu ti Dios. Isu ket adikto iti sigarilio ken marihuana. Dua a tawen a nakidangdangadang iti pannakaadiktona, ngem pasaray agsubli iti dayta a bisio. “Diak makaidna no isardengko ti agdroga,” kuna ni Roberto. “Inaldaw a sapsapulen ti bagik ti droga.”

“Ngem determinadoak nga agbalbaliw tapno maay-ayo ti Dios iti panagserbik,” intuloy ni Roberto. “Inkagumaak a pinunno ti isipko kadagiti nasin-aw a pannursuro ti Biblia. Inaldaw a sipapasnek nga inkararagko a pabilgennak ti Dios a mangbalbaliw iti biagko. Ammok a diak kabaelan dayta a bukbukodko. Nakitak no kasano a sinungbatan ni Jehova dagiti kararagko, nangnangruna no maupayak kalpasan nga agusarak manen iti droga. Ammok a ti nasantuan nga espiritu ti Dios ti mangpabpabileg kaniak; no saan a gapu iti dayta, diak koma pulos naparmek ti pannakaadiktok.”​—Filipos 4:6-8.

Agtayab a “kas Kadagiti Agila”

Kas kada Isabel ken Roberto, minilion a Saksi ni Jehova ti nangtagiragsak iti tulong ti nasantuan nga espiritu. Ti aktibo a puersa ni Jehova​—ti puersa nga inusarna a nangparsua iti uniberso​—ket mabalinmo a magun-odan no kayatmo. Sidadaan ken magagaran ti Dios a mangiburay kenka iti dayta no sipapasnek a kiddawem. Ngem tapno magun-odmo dayta, masapul nga adalem ti kinapudno maipapan kenkuana ken naimpusuan nga aramidem ti pagayatanna.​—Isaias 55:6; Hebreo 11:6.

Iti tulong ti nasantuan nga espiritu, magun-odmo ti bileg nga agserbi iti Dios ken mangsaranget iti aniaman a karit a pakaipasanguam. Kastoy ti ipanamnama kadatayo ti Biblia: “[Ni Jehova] mangted iti bileg iti daydiay nabannog; ket iti daydiay awanan dinamiko nga enerhia paaduenna ti naan-anay a pannakabalin. . . . Dagidiay mangin-inanama ken Jehova mapasublidanto ti bilegda. Agpangatodanto a sipapayak a kas kadagiti agila. Agtaraydanto ket saanda a mapakil; magnadanto ket saanda a mabannog.”​—Isaias 40:28-31.

[Footnote]

[Blurb iti panid 8]

‘Iti inaldaw, sipapasnek nga inkararagko a pabilgennak koma ti Dios. Ammok a diak makapagballigi a bukbukodko. Nakitak no kasano a sinungbatanna dagiti kararagko’

[Kahon/Ladawan iti panid 7]

TI AKEM TI NASANTUAN NGA ESPIRITU

Inusar ti Dios ti nasantuan nga espiritu a nangparsua iti daga ken iti dadduma pay iti uniberso. “Anian a nagadu ti aramidmo, O Jehova! Isuda amin inaramidmo buyogen ti kinasirib. Ti daga napno kadagiti pinataudmo,” kinuna ti salmista. “No ibaonmo ti espiritum, maparsuada.”​—Salmo 104:24, 30; Genesis 1:2; Job 33:4.

Ti nasantuan nga espiritu pinaltiinganna dagiti matalek a lallaki a mangisurat iti Biblia. “Amin a Kasuratan impaltiing ti Dios ken makagunggona,” insurat ni apostol Pablo. (2 Timoteo 3:16) Ti Griego a sao a naipatarus kas “impaltiing ti Dios” literal a kaipapananna “inangsan ti Dios.” Ti anges, wenno espiritu, ni Jehova ti nangiwanwan iti panunot dagiti nangisurat iti Biblia isu a nayallatiwda “ti sao ti Dios.” ​—1 Tesalonica 2:13.

Babaen ti nasantuan nga espiritu, dagiti adipen ti Dios siuumiso a naipakpakaunada ti masakbayan. Kinuna ni apostol Pedro: “Awan ti padto ti Kasuratan nga agtaud iti aniaman a kabukbukodan a panangipaulog. Ta ti padto saan a naiyeg uray kaano babaen ti pagayatan ti tao, no di ket dagiti tattao nagsaoda manipud iti Dios bayat nga idaldalan ida ti nasantuan nga espiritu.”​—2 Pedro 1:20, 21; Joel 2:28.

Ti nasantuan nga espiritu tinulonganna ni Jesus ken ti dadduma pay a matalek a tattao a mangikasaba iti naimbag a damag ti Pagarian ken agaramid kadagiti milagro. Kinuna ni Jesus: “Ti espiritu ni Jehova adda kaniak, agsipud ta pinulotannak a mangideklara ti naimbag a damag kadagiti napanglaw, imbaonnak tapno ikasaba ti pannakaluk-at kadagiti kautibo ken ti pannakaisubli ti panagkita kadagiti bulsek.”​—Lucas 4:18; Mateo 12:28.

[Kahon/Dagiti Ladawan iti panid 9]

DAGITI PAMAY-AN A MATULONGANNATAYO TI NASANTUAN NGA ESPIRITU

Ti nasantuan nga espiritu pabilgennaka a mangsaranget iti sulisog ken mangiwaksi kadagiti makadangran nga ugali. Kinuna ni apostol Pablo: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.”​—1 Corinto 10:13.

Ti nasantuan nga espiritu tulongannaka a mangpatanor kadagiti nadiosan a galad. “Ti bunga ti espiritu ket ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.”​—Galacia 5:22, 23.

Ti nasantuan nga espiritu pabilgennaka a mangandur kadagiti suot. “Ta iti amin a bambanag addaanak iti bileg gapu iti daydiay mangmangted kaniak iti pannakabalin.”​—Filipos 4:13.