Apay nga Idedikarmo ti Biagmo ken Jehova?

“Iti daytoy a rabii nagtakder iti asidegko ti maysa nga anghel ti Dios a makinkukua kaniak.”​—ARA. 27:23.

 1. Ania dagiti addang nga inaramiden dagiti kandidato iti bautismo, ken ania dagiti saludsod a tumaud?

“MAIBATAY iti daton ni Jesu-Kristo, nagbabawyanyo kadin dagiti basolyo ken indedikaryon ti bagiyo ken Jehova tapno aramidenyo ti pagayatanna?” Maysa dayta kadagiti dua a saludsod a sungbatan dagiti kandidato iti bautismo iti ngudo ti palawag ti bautismo. Apay a dagiti Kristiano masapul nga idedikarda ti biagda ken Jehova? Ania dagiti gunggona nga itden ti panagbalin a dedikado iti Dios? Apay a saan a makaay-ayo iti Dios ti panagdayaw ti maysa a saan a dedikado kenkuana? Tapno maammuantayo dagiti sungbat, masapul nga usigentayo nga umuna no ania ti kayat a sawen ti panagdedikar.

 2. Ania ti kayat a sawen ti panagdedikar ken Jehova?

² Ania ti kayat a sawen ti panagdedikar iti Dios? Imutektekam no ania ti kuna ni apostol Pablo maipapan iti relasionna iti Dios. Iti imatang ti adu a nakasakay iti agpegpeggad a barangay, inawaganna ni Jehova kas “ti Dios a makinkukua kaniak.” (Basaen ti Aramid 27:22-24.) Kukua ni Jehova ti amin a pudno a Kristiano. Iti kasumbangirna, ti lubong ket “adda iti pannakabalin daydiay nadangkes.” (1 Juan 5:19) Agbalin a kukua ni Jehova dagiti Kristiano inton mangaramidda iti dedikasion a makaay-ayo kenkuana babaen ti kararag. Personal a kari ti kasta a panagdedikar. Sarunuen dayta ti panagpabautisar iti danum.

 3. Ania ti isimbolo ti bautismo ni Jesus, ken kasano a dagiti pasurotna matuladda ti ulidanna?

³ Nangted ni Jesus iti pagwadan idi inkeddengna nga aramiden ti pagayatan ti Dios. Gapu ta nagtaud iti naidedikar a nasion ti Israel, makuna a ni Jesus ket kukua ti Dios. Kaskasdi, bayat ti bautismona, adda pay inaramid ni Jesus malaksid iti kalikaguman ti Linteg. Sigun iti Sao ti Dios, kinuna ni Jesus: “Adtoy! Umayak . . . tapno aramidek ti pagayatam, O Dios.” (Heb. 10:7; Luc. 3:21) Gapuna, ti bautismo ni Jesus isimbolona ti panangidatagna iti biagna iti Dios tapno aramidenna ti pagayatan ti Amana. Dagiti pasurotna tuladenda ti ulidanna no idatagda ti bagida iti bautismo. Ngem iti biangda, ti bautismo iti danum ket publiko a panangiparangarang a personal a nagdedikarda iti Dios babaen ti kararag.

Dagiti Gunggona nga Itden ti Panagdedikar

 4. Ania ti masursurotayo iti panaggayyem da David ken Jonatan no maipapan iti pannakarikna iti obligasion?

⁴ Serioso a banag ti panagdedikar ti maysa a Kristiano. Saan laeng a basta pannakarikna dayta nga adda obligasionna. Kasano ngarud a makagunggona kadatayo ti panagdedikar? Kas panangyilustrar, usigentayo no ania dagiti gunggona nga itden ti pannakarikna iti obligasion iti maysa a relasion. Ti maysa a pagarigan ket ti panaggayyem. Tapno matagiragsakmo ti pannakigayyemmo, masapul a bigbigem nga adda responsabilidadmo kas gayyem. Ramanen dayta ti pannakariknam nga obligadoka a mangaywan iti gayyemmo. Ti maysa a naidumduma a panaggayyem a nadakamat iti Biblia ket ti panaggayyem da David ken Jonatan. Pinatalgedanda pay ti panaggayyemda babaen ti maysa a tulag. (Basaen ti 1 Sam. 17:57; 18:1, 3.) Nupay manmano ti kasta a nasinged a panaggayyem, ad-adda a tumibker ti kaaduan a panaggayyem no marikna dagiti aggayyem nga adda obligasionda iti maysa ken maysa.​—Prov. 17:17; 18:24.

 5. Kasano a masigurado ti maysa nga adipen nga isu ket permanenten a kukua ti nasingpet nga amona?

⁵ Ti Linteg nga inted ti Dios iti Israel dakamatenna ti sabali pay a relasion a pakagunggonaan dagiti tattao no bigbigenda nga adda obligasionda. No kayat ti maysa nga adipen nga isu ket agbalin a natalged ken permanente a kukua ti nasingpet nga amona, mabalinda ti mangaramid iti permanente ken legal a katulagan. Kuna ti Linteg: “No ipilit a kunaen ti adipen, ‘Pudno nga ay-ayatek ni apok, ni asawak ken ti annakko; diak kayat ti pumanaw a kas maysa a nawayawayaan,’ ngarud masapul nga iyadani ni apona iti pudno a Dios ket masapul nga ipidegna iti ridaw wenno iti bautek; ket masapul a tebbengan ni apona ti lapayagna babaen ti maysa a kulukol, ket adipennanto agingga iti tiempo a di nakedngan.”​—Ex. 21:5, 6.

6, 7. (a) Ania ti pagimbaganna no marikna ti maysa nga adda obligasionna iti sabali a tao? (b) Ania ti ipasimudaag dayta no maipapan iti relasiontayo ken Jehova?

⁶ Ti panagassawa ti maysa pay a relasion nga agkalikagum iti pannakarikna iti serioso nga obligasion, saan nga iti maysa a kontrata no di ket iti maysa a tao. Ti agkabkabbalay a di nagkasar dida pulos marikna ti pudno a kinatalged agraman dagiti annakda. Iti sabali a bangir, dagiti nagkasar sakbay a nagdennada ken mangbigbig nga adda obligasionda iti maysa ken maysa ket addaan iti nabileg a Nainkasuratan a rason a mangikagumaan a mangrisut kadagiti parikutda buyogen ti ayat.​—Mat. 19:5, 6; 1 Cor. 13:7, 8; Heb. 13:4.

⁷ Idi panawen ti Biblia, nakagunggona kadagiti tattao no adda legal a kontratada iti negosio ken pagtrabahuan. (Mat. 20:1, 2, 8) Kasta met la ita. Kas pagarigan, pagimbagantayo no adda legal a kasuratan wenno kontrata sakbay a mangirugitayo iti negosio wenno agtrabaho iti maysa a kompania. Gapuna, no kasano a ti pannakarikna iti obligasion patibkerenna ti maysa a relasion kas iti panaggayyem, panagassawa, ken iti panggedan, ad-adda pay a makagunggona kenka ti naimpusuan a panagdedikarmo ken Jehova! Usigentayo itan no kasano a nagunggonaan dagiti nagkauna a tattao iti panagdedikarda ken Jehova a Dios ken no kasano a dayta ket saan laeng a basta pannakarikna iti obligasion.

No Kasano a Nagunggonaan ti Israel iti Panagdedikarda iti Dios

 8. Ania ti kaipapananna iti Israel ti panagbalinda a naidedikar iti Dios?

⁸ Ti Israel ket nagbalin a naidedikar a nasion ken Jehova idi nagkarida iti Dios. Inummong ida ni Jehova iti asideg ti Bantay Sinai, ket kinunana kadakuada: “No siiinget nga agtulnogkayto iti timekko ket pudno a salimetmetanyonto ti tulagko, iti kasta sigurado nga agbalinkayto a naisangsangayan a sanikuak manipud iti amin a sabsabali nga ili.” Sangsangkamaysa nga insungbat dagiti umili: “Isuamin a sinao ni Jehova situtulokkami a mangaramid.” (Ex. 19:4-8) Ammo ti Israel a ti panagdedikarda ket saan laeng a basta pannakarikna nga adda rumbeng nga aramidenda. Kaipapananna a kukua ida ni Jehova ken ibilangna ida kas ‘naisangsangayan a sanikuana.’

 9. Kasano a nagunggonaan ti Israel iti panagdedikarda iti Dios?

⁹ Nagsayaatan dagiti Israelita ti panagbalinda a kukua ni Jehova. Isu ket nasungdo ken inaywananna ida kas iti panangaywan ti naayat a nagannak iti anakna. Kinuna ti Dios iti Israel: “Mabalinan aya ti asawa a babai a lipatan ti agsussusona iti kasta saanna a kaasian ti anak ti tianna? Uray dagitoy a babbai makalipatda, ngem siak saankanto a malipatan.” (Isa. 49:15) Inwanwan ida ni Jehova babaen ti Linteg, pinaregtana ida babaen kadagiti mammadto, ken sinalaknibanna ida babaen kadagiti anghel. Insurat ti maysa a salmista: “Ibagana ti saona ken Jacob, dagiti alagadenna ken dagiti hudisial a pangngeddengna iti Israel. Saanna nga inaramid ti kasta a wagas iti aniaman a sabali pay a nasion.” (Sal. 147:19, 20; basaen ti Salmo 34:7, 19; 48:14.) No kasano nga inaywanan ni Jehova ti nagkauna nga ili a kukuana, aywananna met dagidiay nagdedikar kenkuana ita.

No Apay nga Idedikartayo ti Biagtayo iti Dios

10, 11. Nayanaktayo kadi a paset ti sapasap a pamilia ti Dios? Ilawlawagyo.

¹⁰ Bayat a pampanunoten ti dadduma ti Nakristianuan a panagdedikar ken bautismo, mabalin a maisaludsodda, ‘Saanko kadi a mabalin nga idayaw ti Dios uray diak agdedikar kenkuana?’ Maammuantayo ti sungbat no usigentayo ti pudno a takdertayo iti imatang ti Dios. Laglagipentayo a gapu iti basol ni Adan, saantayo a naipasngay a kameng ti pamilia ti Dios. (Roma 3:23; 5:12) Ti panangidedikar iti biagtayo iti Dios ket napateg nga addang tapno agbalintayo a kameng ti sapasap a pamiliana. Kitaentayo no apay.

¹¹ Awan kadatayo ti addaan iti natauan nga ama a makaited iti perpekto a biag a pinanggep ti Dios. (1 Tim. 6:19) Saantayo a naipasngay kas annak ti Dios gapu ta idi nagbasol ti umuna a pagassawaan, naisina ti sangatauan manipud iti naayat nga Ama ken Namarsua. (Idilig ti Deuteronomio 32:5.) Sipud idin, naisinan ti sangatauan iti sapasap a pamilia ni Jehova.

12. (a) Kasano a dagiti imperpekto a tattao agbalinda a kameng ti pamilia ti Dios? (b) Ania dagiti addang a masapul nga aramidentayo sakbay ti bautismo?

¹² Nupay kasta, mabalintayo a kiddawen kas indibidual nga awatennatayo ti Dios iti pamiliana a buklen dagiti naanamongan nga adipenna.a Kasano a posible dayta kadagiti managbasol a kas kadatayo? Insurat ni apostol Pablo: “Idi datayo ket kabkabusor, naikappiatayo iti Dios babaen ti ipapatay ti Anakna.” (Roma 5:10) Iti bautismotayo, kiddawentayo iti Dios a maaddaantayo iti nadalus a konsiensia tapno agbalintayo a makaay-ayo kenkuana. (1 Ped. 3:21) Ngem sakbay ti bautismo, adda dagiti addang a masapul nga aramidentayo. Gumun-odtayo iti pannakaammo maipapan iti Dios, sursuruentayo ti agtalek kenkuana, agbabawitayo, ken balbaliwantayo dagiti aramidtayo. (Juan 17:3; Ara. 3:19; Heb. 11:6) Ken adda pay aramidentayo sakbay nga agbalintayo a kameng ti pamilia ti Dios. Ania dayta?

13. Apay a maitutop a ti maysa ket agkari nga idedikarna ti biagna iti Dios sakbay nga agbalin a paset ti pamiliana a buklen dagiti naanamongan nga agdaydayaw?

¹³ Sakbay a ti maysa a naisina iti Dios ket agbalin a kameng ti pamiliana a buklen dagiti naanamongan nga adipenna, masapul a mangaramid iti napasnek a kari ken Jehova. Tapno maawatam no apay, panunotem ti maysa a mararaem nga ama a mangipakita iti napudno a pannakaseknan iti maysa nga ulila nga agtutubo ken kayatna nga amponen tapno agbalin a kameng ti pamiliana. Ti ama ket pagaammo a nasingpet a tao. Kaskasdi, sakbay nga ibilangna ti agtutubo kas anakna, kayatna nga agkari daytoy. Gapuna, kinuna ti ama, “Sakbay nga ibilangka nga anak, kayatko a maammuan no ayaten ken raemennak kas amam.” Sana laeng ibilang ti agtutubo a paset ti pamiliana no situtulok daytoy a mangaramid iti napasnek a kari. Saan kadi a nainkalintegan dayta? Umasping iti dayta, dagidiay laeng situtulok nga agkari nga idedikarda ti biagda ken Jehova ti awatenna nga agbalin a paset ti pamiliana. Kuna ti Biblia: “Idatonyo ti bagiyo kenkuana: maysa a sibibiag a sakripisio, naidedikar ken maikari iti anamongna.”​—Roma 12:1, The New English Bible.

Ebkas ti Ayat ken Pammati

14. Iti ania a pamay-an a ti panagdedikar ket ebkas ti ayat?

¹⁴ Ti kari nga agdedikar iti Dios ket ebkas ti naimpusuan a panagayattayo ken Jehova. Adda pagpadaanda iti sapata iti kasar. Ti Kristiano a nobio iyebkasna ti ayatna babaen ti panangikarina nga agbalin a nasungdo iti nobiana aniaman ti mapasamak. Panagsapata dayta iti maysa a tao imbes a basta panagkari a mangaramid iti maysa a banag. Bigbigen ti Kristiano a nobio a saan nga agbalin nga asawana ti nobia no saan a mangaramid iti sapata iti kasar. Umasping iti dayta, saantayo a naan-anay a matagiragsak dagiti gunggona nga itden ti panagbalin a kameng ti pamilia ni Jehova no saantayo a mangaramid iti kari nga agdedikar kenkuana. Gapuna, idedikartayo ti biagtayo iti Dios gapu ta iti laksid ti kinaimperpektotayo, tarigagayantayo ti agbalin a kukua ti Dios ken determinadotayo nga agbalin a nasungdo kenkuana aniaman ti mapasamak.​—Mat. 22:37.

15. Kasano a ti panagdedikar ket ebkas ti pammati?

¹⁵ No idedikartayo ti biagtayo iti Dios, ipakpakitatayo nga adda pammatitayo. Kasano a kasta? No adda pammatitayo ken Jehova, makapagtalektayo a pagimbagantayo ti iyaadani kenkuana. (Sal. 73:28) Ammotayo a saan a kanayon a nalaka ti makipagna iti Dios bayat nga agbibiagtayo iti tengnga ti “nakillo ken tiritir a kaputotan.” Ngem agtalektayo iti kari ti Dios a tulongannatayo kadagiti panagreggettayo. (Fil. 2:15; 4:13) Ammotayo nga imperpektotayo, ngem makapagtalektayo a tratuennatayo a siaasi ni Jehova uray no makaaramidtayo kadagiti biddut. (Basaen ti Salmo 103:13, 14; Roma 7:21-25.) Manamnamatayo a gunggonaan ni Jehova ti determinasiontayo a mangsalimetmet iti kinatarnawtayo.​—Job 27:5.

Mangyeg iti Kinaragsak ti Panagdedikar iti Dios

16, 17. Apay a mangyeg iti kinaragsak ti panagdedikar ken Jehova?

¹⁶ Mangyeg iti kinaragsak ti panagbalin a naidedikar ken Jehova gapu ta ramanenna ti panangipaay iti bagitayo. Dinakamat ni Jesus ti maysa a napateg a kinapudno idi kinunana: “Ad-adu ti kinaragsak iti panangted ngem iti panangawat.” (Ara. 20:35) Naan-anay a napadasan ni Jesus ti kinaragsak ti panangted bayat ti ministeriona ditoy daga. No kasapulan idi, isakripisiona ti panaginana, pannangan, ken pagnam-ayan tapno matulonganna ti sabsabali a mangbirok iti dalan ti biag. (Juan 4:34) Pagrag-oan ni Jesus a paragsaken ti puso ni Amana. Kinunana: “Kankanayon nga aramidek ti bambanag a makaay-ayo kenkuana.”​—Juan 8:29; Prov. 27:11.

¹⁷ Gapuna, impatuldo ni Jesus kadagiti pasurotna ti makapnek a dalan ti biag idi kinunana: “No ti asinoman kayatna ti sumurot kaniak, paglikudanna koma ti bagina.” (Mat. 16:24) Nasingsingedtayo ken Jehova no aramidentayo dayta. Adda pay kadi sabali a pangitalkantayo iti biagtayo ngem iti daydiay ad-adda a siaayat a mangaywan kadatayo?

18. Apay a mangyeg iti dakdakkel a kinaragsak ti panagbiag a maitunos iti dedikasion ken Jehova ngem iti panagbalin a dedikado iti aniaman a banag wenno iti asinoman?

¹⁸ Ti panangidedikar iti biagtayo ken ni Jehova ken kalpasanna ti panagbiag a maitunos iti dayta a dedikasion babaen ti panangaramid iti pagayatanna ket mangyeg iti dakdakkel a kinaragsak ngem iti dedikasion iti aniaman a banag wenno iti asinoman. Kas pagarigan, adu a tattao ti mangipamaysa iti biagda a gumun-od kadagiti material a kinabaknang ngem dida masarakan ti pudno a kinaragsak ken pannakapnek. Nupay kasta, dagidiay mangidedikar iti biagda ken Jehova masarakanda ti manayon a kinaragsak. (Mat. 6:24) Pakaragsakanda ti pribilehio nga agbalin a ‘katrabahuan ti Dios.’ Kaskasdi, ti dedikasionda ket saan nga agpaay iti maysa a trabaho no di ket iti manangapresiar a Dios. (1 Cor. 3:9) Isu laeng ti addaan iti kasta kadakkel nga apresasion iti panagsakripisioda. Isublina pay ti kinasalibukag dagiti nasungdo kenkuana tapno matagiragsakda ti agnanayon a panangaywanna.​—Job 33:25; basaen ti Hebreo 6:10.

19. Ania a pribilehio ti tagiragsaken dagidiay mangidedikar iti biagda ken Jehova?

¹⁹ Suminged ti relasionmo ken Jehova no idedikarmo ti biagmo kenkuana. Kuna ti Biblia: “Umadanikayo iti Dios, ket isu umadaninto kadakayo.” (Sant. 4:8; Sal. 25:14) Iti sumaganad nga artikulo, usigentayo no apay a makapagtalektayo a pagimbagantayo ti pangngeddengtayo nga agbalin a kukua ni Jehova.

[Footnote]

Ania ti Sungbatyo?

• Ania ti kayat a sawen ti panangidedikar iti biagtayo iti Dios?

• Kasano a pakagunggonaantayo ti panagbalintayo a naidedikar iti Dios?

• Apay a masapul a naidedikar dagiti Kristiano ken ni Jehova?

[Ladawan iti panid 6]

Mangyeg iti agnanayon a kinaragsak ti panagbiag a maitunos iti dedikasiontayo