No Kasano nga Intandudo ni Jesus ti Kinalinteg ti Dios

“[Ni Kristo ket] impasdek ti Dios kas maysa a daton a maipaay iti pannakikappia babaen ti pammati iti darana. Daytoy ket tapno maipakita ti bukodna a kinalinteg.”​—ROMA 3:25.

1, 2. (a) Ania ti isuro kadatayo ti Biblia maipapan iti kasasaad ti sangatauan? (b) Ania a salsaludsod ti mausig iti daytoy nga artikulo?

NALATAK ti salaysay ti Biblia maipapan iti panagrebelde iti hardin ti Eden. Mariknatayo amin dagiti epekto ti panagbasol ni Adan kas ipakita dagitoy a sasao: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Uray kasano ti panangikagumaantayo a mangaramid iti umiso, agkamalitay latta. Gapuna, kasapulantayo ti pammakawan ti Dios. Uray ni apostol Pablo inyasugna: “Ti naimbag a kayatko diak aramiden, no di ket ti dakes a diak kayat isu ti an-annurotek. Nakaay-ay-ayak a tao!”​—Roma 7:19, 24.

² Gapu ta managbasoltayo, rumbeng laeng nga isaludsodtayo: Kasano a ni Jesus a taga-Nazaret ket nayanak nga awan ti natawidna a basol, ken apay a nabautisaran? Kasano a ti wagas ti panagbiag ni Jesus intandudona ti kinalinteg ni Jehova? Kangrunaan iti amin, ania ti naibanag ti ipapatay ni Kristo?

Nakuestionaran ti Kinalinteg ti Dios

 3. Kasano a ni Satanas inallilawna ni Eva?

³ Ti umuna a nagannaktayo a da Adan ken Eva simamaag nga inlaksidda ti kinasoberano ti Dios ket nagpaiturayda iti “kadaanan a serpiente, daydiay naawagan iti Diablo ken Satanas.” (Apoc. 12:9) Usigentayo no kasano a napasamak dayta. Kinuestionaran ni Satanas ti kinalinteg ti panangituray ni Jehova a Dios. Imparipiripna dayta babaen ti panangisaludsodna ken Eva: “Pudno kadi a kinuna ti Dios a dikay mangan manipud iti tunggal kayo iti minuyongan?” Inulit ni Eva ti nalawag a bilin ti Dios a dida sagsagiden ti maysa nga espesipiko a kayo, di la ket ta matayda. Gapuna, inallilawna ni Eva. Pinagparang ni Satanas nga agul-ulbod ti Dios. “Sigurado a saankayto a matay,” kinuna ti Diablo. Kayatna pay a patien ni Eva nga adda naimbag a banag nga ipapaidam ti Dios ket no mangan iti bunga ti kayo, agbalin ni Eva a kas iti Dios, a kabaelanna nga ikeddeng ti naimbag ken dakes.​—Gen. 3:1-5.

 4. Kasano a naipasidong ti sangatauan iti makiribribal a turay ni Satanas?

⁴ Ipaspasimudaag ni Satanas a naragragsak ti sangatauan no saan nga agpaituray iti Dios. Imbes nga itandudo ni Adan ti kinalinteg ti Dios kas soberano, impangagna ni baketna ket nakikadua kenkuana a nangan iti maiparit a bunga. Gapuna, napukaw ni Adan ti nalinteg a takderna iti imatang ni Jehova ken impasidongnatayo iti mangparigat a sangol ti basol ken ipapatay. Malaksid iti dayta, naipasidong ti sangatauan iti makiribribal a turay ni Satanas, “ti dios daytoy a sistema ti bambanag.”​—2 Cor. 4:4; Roma 7:14.

 5. (a) Kasano a pinaneknekan ni Jehova a di agbiddut ti saona? (b) Ania a namnama ti inted ti Dios kadagiti kaputotan da Adan ken Eva?

⁵ Maitunos iti di agbiddut a saona, impataw ni Jehova ti dusa nga ipapatay kada Adan ken Eva. (Gen. 3:16-19) Ngem dina kayat a sawen a napaay ti panggep ti Dios. Imbes ketdi, idi sinentensiaanna da Adan ken Eva, nangipaay ni Jehova iti naraniag a namnama kadagiti kaputotanda. Inaramidna dayta babaen ti panangipakaammona iti panggepna a mangpataud iti ‘bin-i,’ daydiay a ti mukodna ket dunorento ni Satanas. Ngem dayta a naikari a Bin-i umimbagto manipud iti pannakadunorna ket ‘dunorennanto ti ulo ni Satanas.’ (Gen. 3:15) Linawlawagan dayta ti Biblia idi kinunana maipapan ken Jesu-Kristo: “Iti daytoy a panggep naiparangarang ti Anak ti Dios, awan sabali, tapno dadaelenna dagiti aramid ti Diablo.” (1 Juan 3:8) Ngem kasano a ti kondukta ken ipapatay ni Jesus intandudona ti kinalinteg ti Dios?

Ti Kaipapanan ti Bautismo ni Jesus

 6. Kasanotayo nga ammo a saan a natawid ni Jesus ti basol ni Adan?

⁶ Kas adulto, agbalin ni Jesus nga eksakto a katupag ti perpekto idi a ni Adan. (Roma 5:14; 1 Cor. 15:45) Kaipapanan dayta a masapul a mayanak a perpekto ni Jesus. Kasano a nagbalin a posible dayta? Kastoy ti nalawag a kinuna ni anghel Gabriel iti ina ni Jesus a ni Maria: “Ti nasantuan nga espiritu umayto kenka, ket ti pannakabalin ti Kangatuan salinongannakanto. Iti dayta met a rason ti mayanak maawaganto iti nasantuan, Anak ti Dios.” (Luc. 1:35) Idi ubing pay ni Jesus, nalabit nga insuro kenkuana ni Maria ti sumagmamano a banag maipapan iti pannakayanakna. Gapuna, idi a da Maria ken ti pannakaamana a ni Jose nasarakanda ni Jesus iti templo ti Dios, insaludsod ti ubing pay idi a ni Jesus: “Saanyo aya nga ammo a masapul nga addaak iti balay ni Amak?” (Luc. 2:49) Nalawag a sipud kinaubingna, ammo ni Jesus nga isu ti Anak ti Dios. Gapuna, napateg unay kenkuana ti panangitandudo iti kinalinteg ti Dios.

 7. Ania dagiti napateg nga ik-ikutan ni Jesus?

⁷ Impakita ni Jesus ti dakkel nga interesna kadagiti naespirituan a bambanag babaen ti regular nga itatabunona kadagiti gimong para iti panagdayaw. Gapu ta perpekto ti isipna, sigurado a natarusanna ti amin a nangngegan ken nabasana iti Hebreo a Kasuratan. (Luc. 4:16) Isu ket addaan iti sabali pay a nagpateg nga ik-ikutan​—ti perpekto a natauan a bagina a maidaton para iti sangatauan. Idi nabautisaran, nagkarkararag ni Jesus ken nalabit a pampanunotenna dagiti naimpadtuan a sasao iti Salmo 40:6-8.​—Luc. 3:21; basaen ti Hebreo 10:5-10.a

 8. Apay a ni Juan a Mammautisar dina kayat a bautisaran ni Jesus idi damo?

⁸ Ni Juan a Mammautisar dina kayat a bautisaran ni Jesus idi damo. Apay? Gapu ta ti panangbautisar ni Juan kadagiti Judio ket simbolo ti panagbabawida kadagiti basolda mainaig iti panangsalungasing iti Linteg. Kas asideg nga agkabagian, sigurado nga ammo ni Juan a nalinteg ni Jesus isu a dina kasapulan ti agbabawi. Ngem ni Jesus a mismo ti nangibaga ken Juan a maikanatad laeng nga isu ket mabautisaran. “Iti kasta a pamay-an,” inlawlawag ni Jesus, “maikanatad kadatayo nga itungpal ti isuamin a nalinteg.”​—Mat. 3:15.

 9. Ania ti isimbolo ti bautismo ni Jesus?

⁹ Kas perpekto a tao, mabalin nga ammo ni Jesus a kas ken Adan, kabaelanna ti mangpataud iti maysa a perpekto a kaputotan. Ngem saan a pulos a tinarigagayan ni Jesus nga aramiden ti kasta yantangay saan a dayta ti pagayatan ni Jehova para kenkuana. Ti Dios imbaonna ni Jesus ditoy daga tapno itungpalna ti akem ti naikari a Bin-i, wenno Mesias. Karaman iti dayta ti panangidatonna iti perpekto a natauan a biagna. (Basaen ti Isaias 53:5, 6, 12.) Siempre, saan nga agpada ti kayulogan ti bautismo ni Jesus ken ti bautismotayo. Ni Jesus dina kasapulan ti agdedikar ken Jehova, yantangay isu ket nagtaud iti nasion ti Israel a naidedikar iti Dios. Imbes ketdi, ti bautismona ket simbolo ti panangidatagna iti bagina tapno aramidenna ti pagayatan ti Dios kas naipadto iti Kasuratan nga itungpal ti Mesias.

10. Ania ti karaman iti panangaramid iti pagayatan ti Dios a masapul nga itungpal ti Mesias, ken ania ti panangmatmat ni Jesus iti dayta?

¹⁰ Karaman iti pagayatan ni Jehova a masapul nga itungpal ni Jesus ket ti panangikasaba iti naimbag a damag ti Pagarian ti Dios, panangaramid kadagiti adalan, ken panangisagana kadakuada a mangaramid met kadagiti adalan. Gapu ta indatag ni Jesus ti bagina, masapul a sidadaan nga ibturanna ti pannakaidadanes ken naulpit nga ipapatay tapno maitandudona ti nalinteg a kinasoberano ni Jehova a Dios. Pakaragsakan unay ni Jesus nga aramiden ti pagayatan ti Dios ken idatag ti bagina kas daton gapu iti pudno a panagayatna iti nailangitan nga Amana. (Juan 14:31) Makaay-ayo met kenkuana ti pannakaammo a ti pateg ti perpekto a biagna ket mabalin a maidaton iti Dios kas pangsubbot kadatayo manipud iti panangadipen ti basol ken ipapatay. Inanamongan kadi ti Dios ti panangitungpal ni Jesus kadagita nga agkakapateg nga annongen? Sigurado dayta!

11. Kasano nga impakita ni Jehova ti anamongna ken Jesus kas ti naikari a Mesias, wenno Kristo?

¹¹ Ti uppat a mannurat iti Ebanghelio pinatalgedanda ti nalawag a panangipakita ni Jehova a Dios iti anamongna ken Jesus idi nabautisaran daytoy iti Karayan Jordan. “Naimatangak ti espiritu a bumabbaba a kas kalapati manipud langit,” kinuna ni Juan a Mammautisar, “ket nagtalinaed [ken Jesus] . . . Ket nakitak dayta, ken sinaksiak a daytoy isu ti Anak ti Dios.” (Juan 1:32-34) Iti dayta met la a gundaway, kinuna ni Jehova: “Daytoy ti Anakko, ti dungdungnguen, nga inanamongak.”​—Mat. 3:17; Mar. 1:11; Luc. 3:22.

Matalek Agingga ken Patay

12. Ania ti inaramid ni Jesus bayat ti tallo ket kagudua a tawen kalpasan ti bautismona?

¹² Iti simmaruno a tallo ket kagudua a tawen, impamaysa ni Jesus ti biagna iti panangisuro kadagiti tattao maipapan iti Amana ken iti kinalinteg ti Dios kas soberano. Nupay nabannog gapu iti panangwanasna iti intero a Naikari a Daga, saan a dayta ti nakalapped kenkuana a mangipaay iti naan-anay a panangsaksi iti kinapudno. (Juan 4:6, 34; 18:37) Insuro pay ni Jesus ti maipapan iti Pagarian ti Dios. Idi simimilagro a pinaimbagna dagiti masakit, pinakanna dagiti mabisin a bunggoy, ken pinagungarna dagiti natay, impakitana no ania ti aramidento ti Pagarian iti sangatauan.​—Mat. 11:4, 5.

13. Ania ti insuro ni Jesus maipapan iti kararag?

¹³ Imbes nga itan-okna ti bagina gapu kadagiti pannursurona ken inaramidna a panangpaimbag, nangipasdek ni Jesus iti nagsayaat nga ulidan babaen ti sipapakumbaba a panangiturongna iti amin a dayaw ken Jehova. (Juan 5:19; 11:41-44) Impalgak met ni Jesus dagiti kapatgan a banag a masapul nga ikararagtayo, kas iti ‘pannakasantipikar koma’ ti nagan ti Dios a Jehova ken ti pannakasukat ti dakes a turay ni Satanas babaen ti nalinteg a turay ti Dios tapno ‘maaramid ti pagayatanna, kas sadi langit, kasta met iti daga.’ (Mat. 6:9, 10) Indagadag pay ni Jesus a masapul nga agtignaytayo maitunos kadagiti kasta a kararagtayo babaen ti ‘panangsapul nga umuna iti pagarian ken iti kinalinteg ti Dios.’​—Mat. 6:33.

14. Nupay perpekto ni Jesus, apay a kasapulanna ti panagregget a mangitungpal iti akemna iti panggep ti Dios?

¹⁴ Bayat nga umad-adani ti ipapatay ni Jesus kas maysa a daton, pagaammona unay ti nadagsen a responsabilidad a masapul nga ibaklayna. Ti panggep ken reputasion ni Amana ket agpannuray iti panangibturna iti di nainkalintegan a pannakabista ken naulpit nga ipapatayna. Lima nga aldaw sakbay ti ipapatay ni Jesus, inkararagna: “Ita mariribukan ti kararuak, ket ania ti sawek? Ama, isalakannak iti daytoy nga oras. Nupay kasta, daytoy ti makagapu a dimtengak iti daytoy nga oras.” Kalpasan nga inyebkas ni Jesus dayta a natural a rikna ti tao, inturongna ti atensionna iti napatpateg a banag ket inkararagna: “Ama, padayagem ta naganmo.” Dagus nga insungbat ni Jehova: “Agpadpada a pinadayagko dayta ken padayagekto manen dayta.” (Juan 12:27, 28) Wen, situtulok ni Jesus a lumasat iti karigatan a pannakasubok ti kinatarnaw a mabalin a pakaipasanguan ti asinoman a tao. Ngem ti pannakangngegna kadagita a sasao ti nailangitan nga Amana ti awan duadua a nangpatalged iti riknana a sigurado a maitandudo ken maalangonna ti kinasoberano ni Jehova. Ket talaga a naibanagna dayta!

No Ania ti Naibanag ti Ipapatay ni Jesus

15. Sakbay unay a natay ni Jesus, apay a naikunana: “Naitungpalen”?

¹⁵ Idi mauyosen ti biag ni Jesus iti pagtutuokan a kayo, kinunana: “Naitungpalen!” (Juan 19:30) Agkakapateg dagiti naibanag ni Jesus babaen ti tulong ti Dios bayat ti tallo ket kagudua a tawen sipud idi nabautisaran agingga a natay! Adda napasamak a napigsa a ginggined idi natay ni Jesus, isu a naikuna ti opisial ti buyot ti Roma a nangimaton iti pannakapapatayna: “Pudno unay a daytoy ket Anak ti Dios.” (Mat. 27:54) Agparang a naimatangan daytoy nga opisial ti pannakaumsi ni Jesus gapu iti panangibagana nga isu ket Anak ti Dios. Iti laksid ti amin a sinagabana, sinalimetmetan ni Jesus ti kinatarnawna ken pinaneknekanna a napeklan nga ulbod ni Satanas. No maipapan iti amin nga adda iti dasig ti turay ti Dios, kuna ni Satanas: “Amin a cupicupan ti tao itdennanto gapu iti biagna.” (Job 2:4, Ti Biblia, Philippine Bible Society) Ti kinamatalek ni Jesus ket pammaneknek a nakapagtalinaed koma a matalek da Adan ken Eva yantangay nalaklaka nga amang ti nakaipasanguanda a pannubok. Kapatgan iti amin, ti panagbiag ken ipapatay ni Jesus ti nangitandudo iti nalinteg a turay ni Jehova. (Basaen ti Proverbio 27:11.) Adda pay kadi naibanag ti ipapatay ni Jesus? Adda!

16, 17. (a) Sakbay ti panawen Kristiano, kasano a naaddaan dagiti saksi ni Jehova iti nalinteg a takder iti imatang ti Dios? (b) Kasano a ginunggonaan ni Jehova ti kinamatalek ti Anakna, ken ania ti agtultuloy nga ar-aramiden ti Apotayo a ni Jesu-Kristo?

¹⁶ Adu nga adipen ni Jehova ti nagbiag sakbay nga immay ni Jesus ditoy daga. Tinagiragsakda ti nalinteg a takder iti imatang ti Dios ken naaddaanda iti namnama a panagungar. (Isa. 25:8; Dan. 12:13) Ngem ania ti legal a nangibatayan ti nasantuan a Dios a ni Jehova iti panangbendisionna kadagiti managbasol a tattao iti kasta a nagsayaat a pamay-an? Kuna ti Biblia: “[Ni Jesu-Kristo ket] impasdek ti Dios kas maysa a daton a maipaay iti pannakikappia babaen ti pammati iti darana. Daytoy ket tapno maipakita ti bukodna a kinalinteg, agsipud ta pinakpakawanna dagiti basol a naaramid iti napalabas bayat a ti Dios watwatwatenna idi ti kinamanagpalabas; tapno maipakita ti bukodna a kinalinteg iti daytoy agdama a panawen, iti kasta isu nalinteg koma uray iti panangideklarana a nalinteg ti tao nga addaan iti pammati ken Jesus.”​—Roma 3:25, 26.b

¹⁷ Ni Jehova ginunggonaanna ni Jesus babaen ti panangpagungar ken panangisaadna kenkuana iti nangatngato a posision ngem iti tinagiragsakna sakbay nga immay ditoy daga. Tagtagiragsaken itan ni Jesus ti imortalidad kas nadayag nga espiritu a parsua. (Heb. 1:3) Kas Nangato a Padi ken Ari, ti Apotayo a ni Jesu-Kristo itultuloyna a tulongan dagiti pasurotna a mangitandudo iti kinalinteg ti Dios. Ken anian a yamantayo ta gunggonaan ti nailangitan nga Amatayo a ni Jehova ti amin a mangitantandudo iti kinalintegna ken sisusungdo nga agserserbi kenkuana kas panangtuladda iti Anakna!​—Basaen ti Salmo 34:3; Hebreo 11:6.

18. Ania ti mausig iti sumaruno nga artikulo?

¹⁸ Amin a matalek a tattao sipud ken Abel tinagiragsakda ti nasinged a relasion ken Jehova gapu ta pinaneknekanda ti pammatida ken mangnamnamada iti naikarida a Bin-i. Ammo ni Jehova a masalimetmetan ti Anakna ti kinatarnawna ken agserbi ti ipapatayna kas naan-anay a pangabbong iti “basol ti lubong.” (Juan 1:29) Ti ipapatay ni Jesus ket pakagunggonaan met dagiti tattao a sibibiag ita. (Roma 3:26) Gapuna, ania dagiti gunggona nga itden kenka ti subbot ni Kristo? Dayta ti mausig iti sumaruno nga artikulo.

[Footnotes]

Ania ti Sungbatyo?

• Kasano a nakuestionaran ti kinalinteg ti Dios?

• Ania ti isimbolo ti bautismo ni Jesus?

• Ania ti naibanag ti ipapatay ni Jesus?

[Ladawan iti panid 9]

Ammom kadi no ania ti isimbolo ti bautismo ni Jesus?