Agtalinaed iti Mangsalaknib a Ginget ni Jehova

1, 2. Ania a pudpudno a gubat ti sumungsungad, ken ania ti saan a kasapulan nga aramiden dagiti adipen ti Dios inton dumteng dayta?

IDI Oktubre 30, 1938, minilion a tattao iti United States ti dumdumngeg iti maysa a nalatak a programa iti radio a mangitamtampok kadagiti drama. Ti programa iti daydi a rabii ket panangidrama iti maysa a nobela a science fiction a napauluan iti The War of the Worlds. Dagiti aktor a nagakem a reporter inladawanda ti panagdisso dagiti rumaraut a puersa manipud planeta a Mars nga umay mangdadael iti Daga. Nupay naipakaammo a drama laeng dayta, impagarup ti adu a dumdumngeg nga agpaypayso nga adda rumaraut ket nagbutengda. Adda pay ket dagidiay nangaramid iti pamuspusan a mangsalaknib iti bagbagida manipud kadagiti makunkuna nga alien.

² Iti kaaldawantayo, adda sumungsungad a pudpudno a gubat. Ngem di ikankano dayta dagiti tattao. Naipadto daytoy a gubat, saan nga iti maysa a nobela a science fiction, no di ket iti impaltiing ti Dios a Saona, ti Biblia. Dayta ti gubat ti Armagedon​—ti gubat ti Dios maibusor iti daytoy a dakes a sistema ti bambanag. (Apoc. 16:14-16) Iti daytoy a gubat, saan a kasapulan dagiti adipen ti Dios ditoy daga a salakniban ti bagbagida kadagiti alien manipud iti sabali a planeta. Kaskasdi, agamangadanto iti makapasiddaaw a paspasamak ken iti nakaam-amak a pannakaiparangarang ti pannakabalin ti Dios.

 3. Ania a padto ti usigentayo, ken apay nga interesadotayo iti dayta?

³ Ti maysa a padto ti Biblia a nailanad iti Zacarias kapitulo 14 ket direkta a nainaig iti gubat ti Armagedon. Nakapatpateg dayta kadatayo uray no naisurat agarup 2,500 a tawenen ti napalabas. (Roma 15:4) Kaaduan a sagudayen dayta a padto ket mainaig kadagiti kasasaad a mangapektar iti ili ti Dios manipud iti pannakaipasdek ti Mesianiko a Pagarian idiay langit idi 1914 agingga kadagiti makapagagar a bambanag nga asidegen a mapasamak. Ti nagpapateg a paset ti padto ramanenna ti pannakabukel ti “dakkel unay a ginget” ken ti panagayus ti “nabiag a dandanum.” (Zac. 14:4, 8) Iti daytoy nga artikulo, maammuantayo no ania daytoy a ginget ken no kasano a masalakniban sadiay dagiti agdaydayaw ken Jehova. No maawatantayo ti kinapateg ti nabiag a dandanum, saantay laeng a mabigbig a kasapulantayo dayta no di pay ket tarigagayantayo ti uminum iti dayta. Nasken ngarud nga usigentayo daytoy a padto.​—2 Ped. 1:19, 20.

 4. (a) Kaano a nangrugi ti ‘aldaw a kukua ni Jehova’? (b) Ania ti impakaammo dagiti agdaydayaw ken Jehova pinullo a tawen sakbay ti 1914, ken ania ti reaksion dagiti agtuturay iti lubong?

⁴ Mangrugi ti maika-14 a kapitulo ti Zacarias iti panangdakamatna iti ‘aldaw a kukua ni Jehova.’ (Basaen ti Zacarias 14:1, 2.) Ania dayta nga aldaw? Isu ti “aldaw ti Apo,” a nangrugi idi nagbalin ti “pagarian ti lubong” kas “pagarian ni Apotayo ken ni Kristona.” (Apoc. 1:10; 11:15) Napasamak dayta idi 1914 idi naipasdek ti Mesianiko a Pagarian idiay langit. Pinullo a tawtawen sakbay ti 1914, dagiti agdaydayaw ken Jehova impakaammodan kadagiti nasion nga agpatingga iti dayta a tawen ti “naituding a pampanawen dagiti nasion” ken agpasarto ti lubong iti nagpaiduma a riribuk. (Luc. 21:24) Ania ti reaksion dagiti nasion iti dayta a naintiempuan a pakdaar? Imbes a mangipangag dagiti agtuturay ken dagiti lider ti relihion, linais ken indadanesda ketdi dagiti nareregta a napulotan nga ebanghelisador. No kasta, rinabrabakda ti mismo a Mannakabalin-amin a Dios, ta dagiti napulotan nga embahador ti Pagarian irepresentarda ti “nailangitan a Jerusalem,” ti Mesianiko a Pagarian​—ken kamengda met iti dayta.​—Heb. 12:22, 28.

5, 6. (a) Ania a tignay ti naipadto nga aramiden dagiti nasion maibusor iti “siudad” ken ‘dagiti umilina’? (b) Siasino dagiti ‘nabati kadagiti umili’?

⁵ Impadto ni Zacarias ti aramiden dagiti nasion: “Ti siudad [Jerusalem] mapanto iti pannakaidestiero.” Ti “siudad” isimbolona ti Mesianiko a Pagarian ti Dios, a dagiti pannakabagina ditoy daga ket dagiti ‘umilina,’ dagiti natda a napulotan a Kristiano. (Fil. 3:20) Bayat ti Gubat Sangalubongan I, dagiti prominente a kameng ti naindagaan a paset ti organisasion ni Jehova ket ‘naidestiero,’ wenno naaresto, ken naibalud idiay Atlanta, Georgia, U.S.A. Arigna ‘nakamkam dagiti balay’ gapu ta nagsagaba dagitoy iti kinaawan hustisia ken kinaranggas ken ti dadduma pay nga inosente nga adipen ti Dios. Dagiti rimmaut inikkatda ti impluensia dagiti natda babaen ti panangiparitda kadagiti literatura ken aktibidad dagiti manangiwaragawag iti Pagarian.

⁶ Nupay dagiti nabileg a kabusor indadanes ken pinadpadakesda ti ili ti Dios, saanda a nabaelan a pukawen ti pudno a panagdaydayaw. Adda ‘nabati kadagiti umili,’ nga isuda dagiti napulotan a natda a di nangipalubos a maipanawda iti “siudad.”

 7. Ania ti inyulidan dagiti napulotan a Saksi ni Jehova para kadagiti amin a pudno nga agdaydayaw iti Dios ita?

⁷ Naan-anay kadi a natungpal daytoy a padto kalpasan ti Gubat Sangalubongan I? Saan. Adu pay a panangidadanes ti impalak-am dagiti nasion kadagiti napulotan a natda ken kadagiti nasungdo a kakaduada nga addaan iti naindagaan a namnama. (Apoc. 12:17) Kasta ti napasamak bayat ti Gubat Sangalubongan II. Ti kinatarnaw dagiti matalek a napulotan a Saksi ti mangpabileg kadagiti adipen ti Dios ita a mangibtur iti aniaman a dumteng a suot, pakairamanan ti ibubusor dagiti di manamati a kabagian, katrabahuan, wenno kaeskuelaanda a manglalais kadakuada gapu iti pammatida. (1 Ped. 1:6, 7) Aniaman ti pagilian a pagnanaedanda, ad-adda itan a determinado dagiti pudno nga agdaydayaw iti Dios nga ‘agtakder a sititibker iti maymaysa nga espiritu,’ a saanda a ‘mabuteng kadagiti kabusorda.’ (Fil. 1:27, 28) Sadino ngarud ti pagkamangan ti ili ni Jehova iti lubong a manggurgura kadakuada?​—Juan 15:17-19.

 8. (a) Ania ti isimbolo dagiti bantay iti Biblia? (b) Ania ti irepresentar ti “bantay dagiti kayo nga olibo”?

⁸ Yantangay simboliko ti “siudad,” wenno ti nailangitan a Jerusalem, simboliko met ngarud ti “bantay dagiti kayo nga olibo, nga adda iti sango ti Jerusalem.” Ania ti irepresentar ti bantay? Kasano a ‘mapisi iti tengngana’ ket agbalin a dua a bantay? Apay nga inawagan dagita ni Jehova kas “bambantayko”? (Basaen ti Zacarias 14:3-5.) Iti Biblia, dagiti bantay irepresentarda dagiti pagarian, wenno gobierno. Kasta met, dagiti bendision ken pannalaknib ket nainaig iti bantay ti Dios. (Sal. 72:3; Isa. 25:6, 7) Ti ngarud bantay dagiti kayo nga olibo a pagtaktakderan ti Dios iti daya ti Jerusalem irepresentarna ti kinasoberano ni Jehova iti intero nga uniberso, ti kangatuan a turayna.

 9. Iti ania nga anag a nagudua ti “bantay dagiti kayo nga olibo”?

⁹ Ania ti kaipapanan ti pannakagudua ti bantay dagiti kayo nga olibo? Nagudua ti bantay nga adda iti daya ti Jerusalem iti anag a nangipasdek ni Jehova iti sabali a panagturay nga adda iti babaenna. Daytoy a sumegunda a panagturay isu ti Mesianiko a Pagarian nga iturayan ni Jesu-Kristo. Dayta ti makagapu no apay nga imbaga ni Jehova a ‘bambantayna’ ti dua a bantay a resulta ti pannakagudua ti “bantay dagiti kayo nga olibo.” (Zac. 14:4) Agpada a kukuana dagita.

10. Ania ti irepresentar ti “dakkel unay a ginget” iti nagbaetan ti dua a bantay?

¹⁰ Idi nagudua ti simboliko a bantay, a kagudua ti nagpaamianan ken kagudua ti nagpaabagatan, nagtalinaed a nakabaddek dagiti saka ni Jehova kadagita a bantay. Kas resultana, naadda ti “dakkel unay a ginget” iti nagbaetan dagiti saka ni Jehova. Daytoy a simboliko a ginget irepresentarna ti pannalaknib ti Dios, a pagkamangan dagiti adipenna iti sidong ti sapasap a kinasoberanona ken ti Mesianiko a Pagarian ti Anakna. Siguraduen ni Jehova a saanto pulos mapukaw ti pudno a panagdayaw. Kaano a napasamak daytoy a pannakagudua ti bantay dagiti kayo nga olibo? Idi naipasdek ti Mesianiko a Pagarian idi nagpatingga ti Panawen dagiti Gentil idi 1914. Kaano a nangrugi ti panagkamang dagiti pudno nga agdaydayaw iti dayta a simboliko a ginget?

11, 12. (a) Kaano a nangrugi ti panagkamang iti simboliko a ginget? (b) Ania ti mangpaneknek a salsalakniban ni Jehova ti ilina?

¹¹ Impakdaar ni Jesus kadagiti pasurotna: “Puntiriakayto ti pananggura ti amin a nasnasion maigapu iti naganko.” (Mat. 24:9) Kimmaro dayta a pananggura bayat ti maudi nga al-aldaw daytoy a sistema ti bambanag a nangrugi idi 1914. Iti laksid ti narungsot a pannakaraut ti napulotan a natda bayat ti Gubat Sangalubongan I, saan a natalipupos daytoy a matalek a grupo. Nawayawayaanda idi 1919 manipud iti impluensia ti Babilonia a Dakkel​—ti sangalubongan nga imperio ti palso a relihion. (Apoc. 11:11, 12)a Dayta ti panangrugi ti panagkamang iti ginget iti nagbaetan dagiti bantay ni Jehova.

¹² Sipud 1919, mangipapaayen dayta a ginget iti nadiosan a pannalaknib kadagiti pudno nga agdaydayaw iti intero a lubong. Iti panaglabas ti pinullo a tawtawen, naparitan ti panangasaba dagiti Saksi ni Jehova iti adu a paset ti lubong kasta met ti panagiwarasda kadagiti literatura a naibatay iti Biblia. Adda pay laeng kasta a restriksion iti sumagmamano a pagilian. Ngem uray ania ti ar-aramiden dagiti nasion, saandanto a pulos agballigi a mangpukaw iti pudno a panagdayaw! Ti nabileg a takiag ni Jehova ti agtultuloy a mangispal iti ilina.​—Deut. 11:2.

13. Kasano a makapagtalinaedtayo iti mangsalaknib a ginget ni Jehova, ken apay a nakapatpateg itan nga aramidentayo dayta?

¹³ No agtalinaedtayo a matalek ken salimetmetantayo ti kinapudno, saanto nga ipalubos ni Jehova ken ti Anakna, ni Jesu-Kristo, nga adda asinoman wenno aniaman a ‘mangrabsut kadatayo iti imana.’ (Juan 10:28, 29) Nakasagana ni Jehova a mangipaay iti aniaman a tulong a kasapulantayo tapno makapagtulnogtayo kenkuana kas Soberano iti Uniberso ken makapagtalinaedtayo a nasungdo kas iturayan ti Mesianiko a Pagarian. Nasken ngarud nga agtalinaedtayo iti mangsalaknib a ginget, nangnangruna ta umad-adanin ti dakkel a rigat.

14, 15. Inton ‘aldaw a pannakigubat ti Dios’ kadagiti kabusorna, anianto ti kasasaad dagidiay adda iti ruar ti ginget?

¹⁴ Bayat nga umad-adani ti panungpalan daytoy a sistema ti bambanag, degdegan ni Satanas ti panangrautna kadagiti adipen ni Jehova. Kalpasanna, umayton ti “aldaw ti pannakigubat [ti Dios]” kadagiti kabusorna. Siguraduento ni Jehova nga agpatingga dagiti iraraut ni Satanas. Iti dayta nga aldaw, ti Soberano iti uniberso ipakitana ti bilegna kas Mannakigubat a nadaydayag nga amang ngem kadagiti napalabas nga “aldaw ti dangadang.”​—Zac. 14:3.

¹⁵ Inton aldaw a pannakigubat ti Dios, anianto ti kasasaad dagidiay adda iti ruar ti mangsalaknib a ‘dakkel a ginget’? ‘Awanto kadakuada ti napateg a lawag’ ti anamong ti Dios. Iti dayta nga um-umay nga aldaw a pannakigubat, maapektaranto ti “kabalio, ti mulo, ti kamelio, ken ti kalakian nga asno, ken ti tunggal kita ti naamo nga animal”​—dagiti simbolo ti igam dagiti nasion. Arigna “agbalayto” dagita gapu iti lamiis. Usaren met ni Jehova ti angol ken “pannaplit.” Literal man dayta wenno saan, dayta a pannaplit pagtalnaenna dagiti nakabutbuteng a pangta. Iti dayta nga aldaw, ‘agrunotto dagiti mismo a mata ken dila ti maysa,’ nga arigna mabulsek dagiti rumaraut ken mapagsardeng ti panagipangtada. (Zac. 14:6, 7, 12, 15) Awanto kadakuada ti makalasat. Adunto ti dumasig ken Satanas iti dayta a gubat. (Apoc. 19:19-21) “Dagidiay pinapatay ni Jehova pudno unay a maaddanto iti dayta nga aldaw manipud iti maysa nga ungto ti daga agingga iti sabali nga ungto ti daga.”​—Jer. 25:32, 33.

16. Gapu ta umad-adanin ti aldaw a pannakigubat ti Dios, ania dagiti saludsod a rumbeng a pagpanunotantayo, ken ania ti masapul nga aramidentayo?

¹⁶ Ti gubat ket kanayon nga agresulta iti panagsagaba, uray kadagidiay mangabak. Mabalin a kumirang ti taraon, mapukaw dagiti sanikua, rumigat ti panagbiag, ken maksayan ti wayawaya. No mapasamak dagita kadatayo, ania koma ti reaksiontayo? Agdanagtayo kadi? Tallikudantayo kadi ti pammatitayo? Maupaytayo kadi ken maawanantay iti namnama? Anian a nagpateg inton dakkel a rigat ti panangtaginayontayo iti panagtalektayo iti panangispal ni Jehova ken ti panagtalinaed iti mangsalaknib a ginget ni Jehova!​—Basaen ti Habakuk 3:17, 18.

17, 18. (a) Ania ti “nabiag a dandanum”? (b) Ania ti irepresentar ti “makindaya a baybay” ken ti “makinlaud a baybay”? (c) Bayat a segseggaam ti masanguanan, ania koma ti determinasionmo?

¹⁷ Kalpasan ti Armagedon, agtultuloyto nga agayus ti “nabiag a dandanum” manipud iti trono ti Mesianiko a Pagarian. Dagitoy a “nabiag a dandanum” isu dagiti probision ni Jehova a mangtaginayon iti biag. Ti “makindaya a baybay” isu iti Natay a Baybay, ket ti “makinlaud a baybay” isu ti Baybay Mediteraneo. Agpadpada a tumukoy dagita kadagiti tattao. Irepresentar ti Natay a Baybay dagidiay adda iti kadawyan a tanem ti sangatauan. Yantangay napno ti Baybay Mediteraneo iti nadumaduma a kita ti biag, mayanatup nga isimbolona ti “dakkel a bunggoy” a nakalasat iti Armagedon. (Basaen ti Zacarias 14:8, 9; Apoc. 7:9-15) Dagitoy a grupo ti tattao uminumdanto iti “nabiag a dandanum” manipud iti “karayan ti danum ti biag.” Iti kasta, agbalindanto a perpekto ken agbiagda iti agnanayon.​—Apoc. 22:1, 2.

¹⁸ Babaen iti pannalaknib ni Jehova, malasatantayto ti panungpalan daytoy dakes a sistema ti bambanag ket sumrektayo iti nalinteg a baro a lubong ti Dios. Nupay datayo ti puntiria ti pananggura ti amin a nasion, determinadotayo koma nga agbalin a nasungdo nga iturayan ti Pagarian ti Dios ken agtalinaed iti mangsalaknib a ginget ni Jehova.