Ti Panangikasaba iti Pagarian Tumulong a Mangispal iti Biag!
1 Daytoy ti kapatgan a trabaho nga agdama a maar-aramid iti sangalubongan. Naipamaysa iti dayta ti atension ni Jehova a Dios, ni Jesu-Kristo, ken dagiti linaklaksa nga anghel. Ania dayta, ken apay a nakapatpateg? Isu ti panangikasaba iti Pagarian, ket tumulong dayta a mangispal iti biag!—Roma 1:16; 10:13, 14.
2 Ipapan ti dadduma a tattao nga ad-adda a makatulongtayo kadagiti sabsabali no makipasettayo iti panagregget a mangpasayaat iti lubongtayo. Adu dagiti okupado unay kadagiti panangikagumaan a mangipasdek iti talna, mangpaimbag iti saksakit, ken mangpasayaat iti ekonomia. Ngem ania ti kasayaatan a tumulong kadagiti tattao?
3 Ti Kapatgan a Trabaho: Ti laeng mensahe ti Pagarian ti makailawlawag iti panggep ti biag, no apay nga agsagsagaba ti tao, ken ti kakaisuna a mapagtalkan a namnama iti masanguanan. Ti naimbag a damag tulonganna dagiti tattao nga agbalin a gayyem ni Jehova ket iti kasta, umawatda iti “talna ti Dios a mangringbaw iti isuamin a panunot.” (Fil. 4:7) Ti laeng mensahe ti Pagarian ti mangipaay iti praktikal a giya a tumulong kadagiti tattao a mangdaer kadagiti agdama a parikut iti biag ken mangilawlawag no kasano ti maitalimeng a sibibiag inton madadael ti nadangkes a lubong. (1 Juan 2:17) Saan kadi a napateg nga aramidentayo ti amin a kabaelantayo a mangikasaba iti Pagarian?
4 Kas pagarigan: Ania ti kasayaatan a pamay-an tapno matulongan dagiti nakaturog nga umili iti maysa a purok nga agpegpeggad gapu iti dam nga asidegen a bumtak? Kaoden ti danum iti marmarpuog a dam? Papintasen ti asidegen a madadael a purok? Saan! Masapul a mariing dagiti pumurok, maballaagan iti um-umay a peggad, ken matulonganda nga agtalaw! Agpegpeggad unay dagidiay matmaturog ita iti naespirituan. (Luc. 21:34-36) Yantangay asidegen nga agpatingga daytoy sistema dagiti bambanag, mangasabatayo koma a sigaganat buyogen ti amin a kabaelantayo!—2 Tim. 4:2; 2 Ped. 3:11, 12.
5 Itultuloyyo Dayta: Pagreggetantayo koma nga idanon ti naimbag a damag iti ad-adu pay a napasnek a tattao iti aniaman a pamay-an—kadagiti pagtaenganda, kadagiti lansangan, babaen ti telepono, ken babaen ti di pormal a pamay-an. Ti trabaho nga impabaklay ni Jehova kadatayo isu ti kapatgan a trabaho a mabalintayo nga aramiden. No sireregta nga aramidentayo dayta, ‘maisalakantayonto agpadpada ti bagitayo ken dagidiay agimdeng kadatayo.’—1 Tim. 4:16.