Mangirugi iti Saritaan Babaen Kadagiti Tract

Sipud idi Enero 2018, makita iti akkub ti Workbook iti Gimong a Panagbiag ken Ministeriotayo dagiti pagtuladan iti pannakisarita. Naiparegta kadatayo nga agpokustayo iti pannakisarita kadagiti tattao imbes a basta agipaima lattan iti literatura. Tapno matulongan dagiti agibumbunannag a mangaramid iti daytoy, adda dagiti video ti pagtuladan iti pannakisarita a mangipakita no kasano nga irugi ti saritaan a Biblia laeng ti usaren. Kayatna kadi a sawen a saantayon nga agusar kadagiti literatura no mangasabatayo? Saan! Kas pagarigan, mabalin nga epektibo dagiti tract a pangirugi iti saritaan. No usarentayo ti aniaman kadagiti tract, mabalintayo a suroten dagitoy:

1. Usaren ti saludsod, nga addaan iti pagpilian a sungbat, iti parupa ti tract.

2. Ipakita ti sungbat ti Biblia a makita iti ngato ti maikadua a panid. No adda pay ti oras, basaen ken pagsasaritaan ti dadduma nga impormasion nga adda iti uneg ti tract.

3. Ited ti tract iti bumalay, ken paregtaem nga ituloyna a basaen no adda wayana.

4. Sakbay a pumanawka, ipakitam ti saludsod iti “Panunotem” sa makitulagka a pagsaritaanyonto ti sungbat ti Biblia inton agsublika.

Inton agsublika, pagsaritaanyo ti sungbat sa mangibatika iti sabali a saludsod a pagsaritaanyonto inton sumarungkarka. Mabalinmo ti agpili kadagiti saludsod manipud iti website wenno iti publikasion iti makinlikud a panid ti tract. Iti umiso a tiempo, usarem ti broshur a Naimbag a Damag Manipud iti Dios wenno ti sabali pay a pangyadal a publikasion iti Toolbox iti Panangisuro.