Ania ti Isuro Kadatayo ti Subbot?

 1. Apay a pagsayaatantayo no tinawen nga atenderantayo ti Memorial ti ipapatay ni Kristo?

SIGURADO nga umanamongka a ti subbot ket di magatadan a regalo ni Jehova a Dios! (2 Cor. 9:15) Gapu ta natay ni Jesus para kenka, mabalinmon ti maaddaan iti nasinged a pannakigayyem ken Jehova a Dios. Addaanka metten iti namnama nga agbiag nga agnanayon. Adu ngarud ti rasontayo nga agyaman ken Jehova iti panangipaayna iti subbot gapu ta ay-ayatennatayo unay! (Roma 5:8) Tapno ditay pulos malipatan dagiti inaramid da Jehova ken Jesus, imbilin ni Jesus a tinawen a selebrarantayo ti Memorial.—Luc. 22:​19, 20.

 2. Ania ti usigentayo iti daytoy nga artikulo?

² Ita a tawen, selebrarantayo ti Memorial inton Sabado, Abril 12, 2025. Sigurado nga ikagumaantayo amin ti umatender. Magunggonaantayo unay no bayat ti tiempo ti Memorial, iwayaantayo nga utoben wenno panunoten a naimbag dagiti inaramid da Jehova ken Jesus para kadatayo. Iti daytoy nga artikulo, usigentayo dagiti isuro kadatayo ti subbot maipapan ken Jehova ken iti Anakna. Maammuantayo met iti sumaruno nga artikulo no kasanotayo a magunggonaan iti subbot ken no kasanotayo nga ipakita nga agyamyamantayo gapu iti dayta.

TI ISURO KADATAYO TI SUBBOT MAIPAPAN KEN JEHOVA

 3. Kasano a ti ipapatay ti maysa a tao ket mangsubbot iti minilion a tattao? (Kitaen met ti ladawan.)

³ Isuro kadatayo ti subbot ti maipapan iti hustisia ni Jehova. (Deut. 32:4) Kasano? Panunotem daytoy: Gapu iti panagsukir ni Adan, natawidtayo ti basol nga agresulta iti ipapatay. (Roma 5:12) Tapno mawayawayaantayo iti basol ken ipapatay, imbaon ni Jehova ni Jesus a mangsubbot kadatayo. Ngem kasano a ti ipapatay ti maysa a perpekto a tao ket mangsubbot iti minilion a tattao? Inlawlawag ni apostol Pablo: “Gapu iti kinasukir ti maysa a tao [ni Adan], adu ti naibilang a managbasol, isu a gapu met iti kinatulnog ti maysa a tao [ni Jesus], adu ti mapagbalinto a nalinteg.” (Roma 5:19; 1 Tim. 2:6) Iti sabali a pannao, gapu iti panagsukir ti maysa a perpekto a tao, nagbalintayo nga adipen ti basol ken ipapatay. Masapul ngarud nga adda met perpekto ken natulnog a tao a mangwayawaya kadatayo.

 4. Apay a saan latta koman nga impalubos ni Jehova nga agbiag nga agnanayon dagiti annak ni Adan a nagtulnog kenkuana?

⁴ Talaga kadi a masapul a matay ni Jesus tapno maisalakannatayo? Saan kadi a mabalin latta koman nga impalubos ni Jehova nga agbiag nga agnanayon dagiti annak ni Adan a nagtulnog kenkuana? Para kadagiti imperpekto a tattao, nagsayaat ken rasonable dayta. Ngem para ken Jehova, saan nga ipakita dayta ti perpekto a hustisiana. Gapu ta nalinteg ni Jehova, saanna a basta binay-an lattan ti inggagara a panagsukir ni Adan.

 5. Apay a masiguradotayo a kanayon nga aramiden ni Jehova ti umiso?

⁵ Ngem kasano ngay no saan nga inted ni Jehova ti subbot ken dina impatungpal ti hustisiana no di ket impalubosna lattan nga agbiag nga agnanayon dagiti imperpekto nga annak ni Adan? Posible a panunoten no kuan dagiti tattao nga uray iti dadduma pay a banag, dina metten ipatungpal ti hustisiana. Kas pagarigan, baka saannan a tungpalen ti dadduma a karina. Ngem ammotayo a saan a pulos a mapasamak dayta. Ngamin, impatungpal ni Jehova ti hustisia, uray pay no kaipapanan dayta ti panangisakripisiona iti patpatgenna la unay nga Anakna. Masiguradotayo ngarud a kanayon nga aramidenna ti umiso.

 6. Ania pay a kualidad ni Jehova ti isuro kadatayo ti subbot? (1 Juan 4:​9, 10)

⁶ Gapu iti subbot, naammuantayo a nalinteg ni Jehova. Ngem adda pay sabali a kualidadna nga ad-adda pay nga isuro kadatayo ti subbot—ti kauneg ti panagayatna kadatayo. (Juan 3:16; basaen ti 1 Juan 4:​9, 10.) Isuro kadatayo ti subbot a saan laeng a kayat ni Jehova nga agbiagtayo iti agnanayon no di ket kayatna met nga agbalintayo a paset ti pamiliana. Idi nagbasol ni Adan, saanen a paset ti pamilia ni Jehova. Kas resultana, amintayo ket saan a paset ti pamilia ni Jehova sipud idi nayanaktayo. Ngem gapu iti subbot, pakawanenen ni Jehova dagiti basoltayo. Ket inton agangay, pagbalinenna a paset ti pamiliana ti amin a natulnog a tattao ken mangipakpakita iti pammati kenkuana. Uray pay ita, mabalintayon ti maaddaan iti nasinged a relasion ken Jehova ken kadagiti padatayo nga agdaydayaw kenkuana. Talaga nga ay-ayatennatayo ni Jehova!—Roma 5:​10, 11.

 7. Kasano a gapu iti panagsagaba ni Jesus maawatantayo nga ay-ayatennatayo la unay ni Jehova?

⁷ Lallalo a maawatantayo nga ay-ayatennatayo la unay ni Jehova no panunotentayo ti saem a nariknana idi impaayna ti subbot. Imbaga ni Satanas nga awan kano ti adipen ti Dios nga agtalinaed a matalek Kenkuana no agsagaba. Tapno paneknekan ni Jehova nga ulbod ni Satanas, impalubosna nga agsagaba ni Jesus sakbay a matay. (Job 2:​1-5; 1 Ped. 2:21) Nakita ni Jehova ti panangumsi dagiti bumusbusor a lider ti relihion ken Jesus, ti panangsaplit kenkuana dagiti soldado, ken ti panangilansada kenkuana iti kayo. Nakita met ni Jehova ti panagsagaba ti patpatgenna nga Anak iti nakaut-ut-ot nga ipapatay. (Mat. 27:​28-31, 39) Adda pannakabalin ni Jehova a manglapped iti dayta. Kas pagarigan, idi imbaga dagiti tattao, “No talaga nga ipatpateg ti Dios, kitaentay man no isalakanna,” mabalin koma nga insalakan ni Jehova ti Anakna. (Mat. 27:​42, 43) Ngem no bimmallaet ti Dios, saan koma a naibayad ti subbot ken saantayo a naaddaan iti namnama. Isu nga impalubos ni Jehova nga agsagaba ti Anakna agingga a napugsat ti maudi nga angesna.

 8. Apay a masiguradotayo a nasaktan ti rikna ni Jehova idi nakitana nga agsagsagaba ti Anakna? (Kitaen met ti ladawan.)

⁸ Ditay koma ipagarup a gapu ta mannakabalin-amin ni Jehova ket awan ti riknana. Pinarsuana dagiti tattao nga addaan iti rikna. Ket gapu ta ibaga ti Biblia a pinarsuanatayo a kaladladawanna, kaipapanan dayta nga adda met rikna ni Jehova. Ibagbaga ti Biblia a ‘nasaktan ti riknana’ ken ‘nalidayan.’ (Sal. 78:​40, 41) Kitaentayo met ti napasamak kada Abraham ken Isaac. Kiniddaw ni Jehova ken Abraham nga idatonna ti kakaisuna nga anakna. (Gen. 22:​9-12; Heb. 11:​17-19) Maimadyintayo la ketdi ti aglalaok a narikna ni Abraham bayat nga agsagsagana a mangpapatay iti kakaisuna nga anakna. Sigurado a nakarkaro pay ti narikna ni Jehova idi nakitana a ti Anakna ket siuulpit a pinarparigat ken pinapatay dagiti managdakdakes!—Kitaen iti jw.org ti video a Tuladenyo ti Pammatida—Abraham, Paset 2.

 9. Ania ti masursurom iti Roma 8:​32, 38, 39 maipapan iti kauneg ti panagayat ni Jehova kenka ken kadagiti kapammatiam?

⁹ Ay-ayatennatayo ti kasingedan a kapamilia wenno gayyemtayo. Ngem isuro ti subbot nga awanen ti ad-adda pay a mangay-ayat kadatayo no di ni Jehova. (Basaen ti Roma 8:​32, 38, 39.) Dakdakkel ti panagayat ni Jehova kadatayo ngem iti panagayattayo iti mismo a bagitayo. Kayatmo kadi ti agbiag nga agnanayon? Lallalo pay a kayat dayta ni Jehova. Kayatmo kadi a mapakawan dagiti basolmo? Lallalo pay a kayat ni Jehova a pakawanen ti amin a basolmo. Ti laeng kidkiddawenna ket akseptarentayo ti nagpateg a regalona babaen ti panangipakitatayo iti pammati ken panagtulnog. Ti subbot ket talaga a nagsayaat a regalo ni Jehova. Ken idiay baro a lubong, ad-adunto pay ti masursurotayo maipapan iti ayat ni Jehova.—Ecl. 3:11.

NO ANIA TI ISURO TI SUBBOT MAIPAPAN KEN JESUS

10. (a) Ania ti nangnangruna a nakaburiboran ni Jesus maipapan iti pannakapapatayna? (b) Kadagiti ania a pamay-an a naalangon ni Jesus ti nagan ni Jehova? (Kitaen met ti kahon a “Naalangon ti Nagan ni Jehova Gapu iti Kinamatalek ni Jesus.”)

¹⁰ Maseknan unay ni Jesus iti reputasion ti Amana. (Juan 14:31) Naburiboran ni Jesus di la ket ta madadael ti nagan ti Amana gapu ta naakusaran iti panagtabbaaw ken sedision. Isu nga inkararagna: “Ama, no mabalin, ikkatem koma kaniak daytoy a kopa.” (Mat. 26:39) Gapu ta nagtalinaed ni Jesus a matalek ken Jehova agingga iti ipapatayna, naan-anay a naalangonna ti nagan ti Amana.

11. Kasano nga impakita ni Jesus ti nauneg a panagayatna kadagiti tattao? (Juan 13:1)

¹¹ Isuro met kadatayo ti subbot a maseknan unay ni Jesus kadagiti tattao, nangruna kadagiti adalanna. (Prov. 8:31; basaen ti Juan 13:1.) Kas pagarigan, ammo ni Jesus a nakarigrigat ti dadduma nga aramidenna ditoy daga, nangruna ti mapasaranna a nakaut-ut-ot nga ipapatay. Ngem inaramid ni Jesus ti nakaibaonanna ditoy daga, saan laeng a gapu ta imbilin dayta ni Jehova no di ket gapu ta ay-ayatenna dagiti tattao. Impakita ni Jesus ti nagdakkel a panagayatna kadagiti tattao babaen ti panangasaba, panangisuro, ken panangtulongna kadakuada. Uray idi aldaw ti ipapatayna, inwayaan ni Jesus a binugguan ti saka dagiti apostolna. Insuro, liniwliwa, ken pinaregtana met ida. (Juan 13:​12-15) Ken idi agpapaut-ot ken dandanin matay iti kayo a nakailansaanna, inikkanna iti namnama ti kaabayna a kriminal a dandanin matay. Inyurnosna met ti pannakaaywan ni nanangna. (Luc. 23:​42, 43; Juan 19:​26, 27) Naipakita ngarud ni Jesus ti nauneg a panagayatna kadagiti tattao, saan laeng nga idi napapatay no di ket iti intero a panagbiagna ditoy daga.

12. Kasano nga agtultuloy nga agsaksakripisio ni Jesus para kadatayo?

¹² Nupay “naminsan laeng” a natay ni Kristo, agtultuloy nga agsaksakripisio para kadatayo. (Roma 6:10) Kasano? Agtultuloy a nagadu ti ar-aramidenna tapno magunggonaantayo iti subbot. Kas pagarigan, agserserbi kas Aritayo, Nangato a Padi, ken ulo ti kongregasion. (1 Cor. 15:25; Efe. 5:23; Heb. 2:17) Idadauluanna ti pannakaummong dagiti dinutokan ti espiritu ken dakkel a bunggoy—trabaho a mairingpas sakbay nga agpatingga ti dakkel a rigat.a (Mat. 25:32; Mar. 13:27) Sigsiguraduenna met a dagiti matalek nga adipenna ket mataraonan a naimbag iti naespirituan bayat dagiti maudi nga al-aldaw. (Mat. 24:45) Ket bayat ti panagturayna iti Sangaribu a Tawen, adunto pay ti aramidenna a pagimbagantayo. Talaga nga inted ni Jehova ti Anakna para kadatayo!

DIMO ISARDENG TI AGSURSURO

13. Kasano a makatulong ti panagutob iti agtultuloy a panagsursurom maipapan iti ayat ti Dios ken ni Kristo para kadatayo?

¹³ Agtultuloy a makasursuroka maipapan iti panagayat kadatayo ni Jehova a Dios ken ni Kristo Jesus no itultuloymo nga utoben dagiti inaramidda para kadatayo. Iti lawlawas sakbay ken kalpasan ti Memorial ita a tawen, basaem a naimbag ti maysa wenno ad-adu pay kadagiti Ebanghelio. Saanmo a pampaminsanen a basaen ti adu unay a kapitulo. Dika agap-apura. Siputam ketdi ti dadduma pay a rason no apay a masapul nga ayatentayo da Jehova ken Jesus. Ibagam met iti dadduma dagiti nasursurom bayat ti panagbasam.

14. Maitunos iti Salmo 119:97 ken footnote, kasano a makatulong ti panag-research tapno maitultuloytayo ti agsursuro maipapan iti subbot ken iti dadduma pay a pannursuro? (Kitaen met ti ladawan.)

¹⁴ No nabayagkan iti kinapudno, baka mapanunotmo no adda pay baro a masursurom kadagiti ammomon a topiko kas iti kinahustisia ti Dios, ti ayatna, ken ti subbot. Ngem ti agpayso, kanayon nga adda baro a masursurom kadagita ken iti dadduma pay a topiko. Ania ngarud ti aramidem? Basaem ken adalem ti nagadu nga impormasion kadagiti publikasiontayo a naibatay iti Biblia. No adda mabasam a saanmo unay a maawatan, ag-research-ka. Ket iti intero nga agmalem, utobem dagiti naammuam ken nasursurom maipapan ken Jehova, iti Anakna, ken iti ayatda para kenka.—Basaen ti Salmo 119:97 ken footnote.

15. Apay nga itultuloytayo ti agkali kadagiti gameng manipud iti Biblia?

¹⁵ Dika koma maupay no awan ti mabirokam a baro wenno makapainteres nga impormasion kada agbasa wenno ag-research-ka. Panunotem nga agbirbirokka iti balitok. Nakaan-anus dagiti agbirbirok iti balitok. Adu nga oras wenno aldaw pay ketdi ti busbosenda nga agbirok iti nagbassit a balitok. Ngem porsegidoda ta uray nagbassit ti mabirokanda a balitok, napateg dayta kadakuada. Nupay kasta, adayo a napatpateg ti tunggal gameng a makalitayo iti Biblia! (Sal. 119:127; Prov. 8:10) Isu nga agan-anuska ken itultuloymo a suroten ti eskediulmo iti panagbasa iti Biblia.—Sal. 1:2.

16. Kasanotayo a matulad da Jehova ken Jesus?

¹⁶ Bayat nga agad-adalka, panunotem no kasanom a mayaplikar iti biagmo dagiti masursurom. Kas pagarigan, matuladmo ti kinahustisia ni Jehova no patas ti panangtratom iti amin. Matuladmo ti panagayat ni Jesus para ken Amana ken iti dadduma no situtulokka nga agsagaba para iti nagan ni Jehova ken no tulongam dagiti kapammatiam. Matuladmo met ni Jesus no kasabaam ti dadduma tapno maaddaanda iti gundaway a mangawat iti di magatadan a regalo ni Jehova.

17. Ania ti usigentayo iti sumaruno nga artikulo?

¹⁷ No naun-uneg ti pannakaawat ken apresasiontayo iti subbot, ad-adda nga ayatentayo ni Jehova ken ti Anakna. Gapu iti dayta, ad-adda met nga ayatendatayo. (Juan 14:21; Sant. 4:8) Isu nga itultuloytayo nga usaren ti amin nga ipapaay kadatayo ni Jehova tapno agtultuloy a makasursurotayo maipapan iti subbot. Usigentayo iti sumaruno nga artikulo ti dadduma a pamay-an a magunggonaantayo iti subbot ken no kasano a maipakitatayo nga agyamyamantayo unay iti ayat ni Jehova.