Sansanayennakon ni Jehova Sipud Pay Idi Agtutuboak

Ngem sakbay nga ituloyko, bay-anyo nga iyestoriak ti biagko. Nayanakak idiay Calgary, Canada bayat ti Gubat Sangalubongan II. Iti maudi a paset ti 1940’s, adda agtutubo a payunir a nagtuktok iti balaymi. Donald Fraser ti naganna. Idi kuan, nagpayadal iti Biblia ni Nanang. Nagustuanna unay dagiti kinapudno a naadalna iti Biblia. Ngem gapu ta adda sakitna, manmano laeng a makagimong. Nupay kasta, inkagumaanna latta agingga a nabautisaran idi 1950. Makapaladingit ta dua la a tawen kalpasanna, natay ni Nanang. Saan pay idi a Saksi ni Tatang. Ngem immanamong a dagiti Saksi ti agpalawag iti pumpon ni Nanang.

Sumagmamano nga aldaw kalpasan ti pumpon, inawisnak a makigimong ni Sister Alice a maysa a dinutokan ti espiritu. Am-ammonakon ta makitkitanak idi a sumursurot ken Nanang a makigimong iti ngudo ti lawas idi kayana pay. Isu a nagpakadaak ken Tatang no mabalinak a mapan. Pinalubosannak ken kinaduanak pay ketdi. Ngem imbagana a “maminsan laeng” a mapan. Kayatna la ngamin ti agyaman iti brother a nagpalawag iti pumpon ni Nanang. Ti gimong iti dayta a rabii ket ti Teokratiko nga Eskuelaan ti Panagministro ken Gimong ti Serbisio. Nagmayat ta dayta ti kaunaan a gimong a naatenderan ni Tatang. Nangala ngamin iti kurso maipapan iti public speaking ket nagustuanna unay dagiti palawag a naiparang iti dayta a gimong. Sipud idin, at-atenderanen ni Tatang ti amin a gimong iti tengnga ti lawas. Ket idi kuan, in-inuten nga at-atenderanna ti amin a gimong.

Kadagidi a tiempo, irugi ti mangidaulo iti Teokratiko nga Eskuelaan ti Panagministro ti gimong babaen ti panangbasana iti nagan ti amin a nagpalista. No mangngegda ti naganda, isungbatda, “Addaak!” Adda idi gimong a dinamagko iti brother no mabalin met a maibasa ti naganko iti sumaruno a gimong. Kinomendarannak ngem saanna a dinamag no naawatak met laeng no anianto ti aramidek.

Diak man la impagarup nga agbolboluntarioak gayamen nga agpalawag. Ti kayatko laeng met ngamin idi ket maibasa ti naganko. Iti simmaruno a lawas, inayabanda ti naganko isu nga insungbatko, “Addaak!” Kalpasan ti gimong, kinomendarandak dagiti kakabsat. Sumagmamano a lawas kalpasanna, inyawatda kaniak ti papel a dinakamatko iti rugi daytoy nga artikulo.

Ayna, permi ti nerbiosko! Idi ngamin, masapul a mangisagana dagiti estudiante iti palawag a kurang nga innem a minuto ngem saan a nalablabes iti walo a minuto. Awan pay idi ti paset a panagbasa iti Biblia. Ngem imbag laengen ta tinulongannak ni Tatang. Namin-20 a nagpraktiskami. Kalpasan ti palawagko, nakatulong kaniak ti imbalakad ti manangaywan iti eskuelaan. Iti panaglabas dagiti tawen, sinanaynak ni Jehova babaen ken Tatang, dagiti nalaing a kakabsat, ken ti organisasionna.

INTULTULOYNAK A SINANAY NI JEHOVA

Ni Sister Alice a dinakamatko itay ti damo a nangsanay kaniak a mangasaba. Kadagidi nga aldaw, ibasaanmi ti kasabaanmi iti tallo a teksto sa mangipaimakami iti libro. No batangko ti agsao, makiam-ammo pay laeng ni Sister Alice, irugina ti saritaan sa ipabasana kaniak ti umuna a teksto. Kalpasanna, siakon ti mangituloy iti saritaan. Ibasak ti maikadua ken maikatlo a teksto sa ipaimak ti publikasion. Idi kuan, nasursurok met laengen ti mangirugi iti saritaan. Kalpasan a nagpabautisar ni Tatang idi 1954, isunan ti nangsanay kaniak a mangasaba. Kas agsolsolo a nagannak, inaramid ni Tatang ti amin a kabaelanna tapno masursurok nga ayaten ni Jehova. Nakapatpateg ken Tatang dagiti naespirituan nga aktibidad. Ammok lattan a no ngudo ti lawas, mangasaba ken makigimongkami.

Saan met a siak ti kalaingan idiay eskuelaan. Ngem nakatulong ti dadduma a nasursurok iti 12 a tawen a panageskuelak. Kas pagarigan, adu ti nasursurok iti Mathematics ken grammar ti English. Nangalaak met kadagiti kurso iti English ken iti panagsurat kadagiti estoria. Agingga ita, maus-usarko dagiti nasursurok kadagita a kurso iti agdama nga asaynmentko iti Writing Department.

Adu ti agdamdamag kaniak no apay a mahiligak iti musika. Mahilig met ngamin dagiti nagannakko. Idi pito ti tawenko, nagsursuroak nga agpiano. Ngem para iti titserko, saanak a nalaing isu nga imbagana ken Tatang nga isardengko lattan. Maawatak met ketdi no apay. Saanak pay ngamin idi nga interesado nga agsursuro.

Kalpasan ti sumagmamano a bulan, nakabirok ni Tatang iti sabali a mangisuro kaniak. Ngem ita, pinaggiddankon nga adalen ti agpiano ken agkanta ket limmaingak met uray kaskasano. Idi ubingak, nangato ti bosesko. Adda pay ketdi dagiti contest a nangabakak. Nagadalak iti musika ta kayatko ti agisuro iti musika tapno masuportarak ti panagpayunirko. Ngem idi dandaniakon aggraduar, naamirisko nga adu gayam nga oras ti busbosek nga agadal iti musika ken agsagana para kadagiti eksamenasionko maipapan iti harmony, music history, ken iti panangputar kadagiti kanta. Isu nga idi 1963, nagsardengakon nga ageskuela sa nagregular payunirakon.

NARAGSAK TI AGPAYUNIR

Kalpasan a nagpayunirak iti makatawen, naapointaranak nga agserbi kas special pioneer iti Kapuskasing, Ontario. Ti kaduak a payunir ket ni Daniel Skinner. In-inauna kaniak iti nasurok a 20 a tawen. Nagadu ti insurona kaniak maipapan iti panangasikaso kadagiti kasapulan ti kongregasion. Agtawenak laeng iti 20 idi naapointaranak nga agserbi iti Komite ti Serbisio ti Kongregasion, isu nga adu ti masapul a sursuruek. Maragragsakanak ta iparparegta manen ti organisasion ita ti panangsanay kadagiti agtutubo a brother. No ikagumaanda ti agpasanay, usaren ida ni Jehova uray ubingda pay!

Adda rigrigatna idiay Kapuskasing ta no winter, sobra ti kalamiisna. Bumaba no kua ti temperatura agingga iti -44 degree Celsius (-47°F). No “bumara” man bassit, aginggana laeng iti -33 degree Celsius (-27°F). Masansan a magmagnakami ken Manong Dan no mangasabakami. Ngem adu ti nagraragsak a kapadasanmi iti asaynmentmi. Ti maysa kadagita ket idi naam-ammok ti sister a ni Linda Cole, a nagbalin idi agangay a Linda Splane.

Nakaregregta ni Linda a mangasaba ken nagadu ti sarsarungkaranna. Naparabur, nasingpet, ken mannakigayyem. Matalek met a sister ti nanangna a ni Goldie. Ni met tatangna a ni Allen ket bumusbusor pay laeng idi iti kinapudno. Ngem uray no kasta, regular latta nga ikuykuyog ni Goldie dagiti annakna a da Linda, John, ken Gordon a makigimong ken sinanayna ida a mangasaba. Adda pay ngarud tiempo a nagpayunirda amin. Kalpasan ti sumagmamano a tawen, inawat met laengen ni Allen ti kinapudno. Nakaregregta idi isuna iti kongregasion.

Idi 1965, naawisak nga ageskuela iti makabulan iti Kingdom Ministry School iti Bethel idiay Canada. Bayat ti panageskuelami, naikkannak iti aplikasion nga ageskuela iti Gilead. Diak man la pulos naimadyin ti bagik nga agmisioneroakto. Ngem nagaplayak latta. Idi kuan, naawisak iti maika-42 a klase. Iti Gilead, kanayon nga ibagbaga dagiti instruktormi dagiti maob-obserbaranda maipapan kadakami. Ti immuna a naiparegta kaniak ket ammuek ti amin a posible a masursurok maipapan iti organisasion bayat nga ages-eskuelaak. Nagustuak la unay dayta a pammaregta ta 21 pay la idi ti tawenko.

Ti maysa kadagiti nasursuromi iti Gilead ket no kasano ti makisarita iti media, kas kadagiti estasion ti radio ken telebision ken kadagiti mangipabpablaak iti diario. Nagustuak unay dagita a nasursuromi. Diak man la impagarup a nagdakkel gayam ti maitulongna dayta kaniak iti masanguanan kas iyestoriak madamdama.

NAIBAONAK IDIAY SENEGAL

Sumagmamano nga aldaw kalpasan a naggraduarkami, naibaonkami ken Michael Höhle idiay Senegal, Africa kas misionero. Iti dayta a tiempo, agarup 100 pay laeng ti agibumbunannag iti dayta a pagilian.

Kalpasan ti sumagmamano a bulan, naawisak nga agtrabaho iti sanga nga opisina, maminsan kada lawas. Ti “sanga nga opisina” ket maysa la a kuarto iti balay a pagdagdagusan dagiti misionero. Ngem uray no kasta, nagmayat ti imbaga kaniak ni Brother Emmanuel Paterakis nga agserserbi kas branch servant. Imbagana a diak pulos liplipatan a dayta a sangay ti mangirepresentar iti organisasion ni Jehova iti dayta a pagilian. Naminsan, inkeddeng ni Brother Paterakis a mangaramidkami iti surat a mangparegta kadagiti misionero. Saan idi a nalaka ti mangaramid iti adu a kopia ti surat ken nangina pay. Isu a saggaysa nga immakiniliami dagita. Nagadu a trabaho dayta, numona ta saankami a mabalin nga agkamali iti panag-type—pulos!

Sakbay a nagawidak iti dayta a rabii, adda sobre nga inyawat kaniak ni Brother Paterakis. Imbagana, “David, adda surat kenka ti Sosiedad.” Idi linukatak, maysa gayam dayta kadagiti surat nga immakiniliak! Nasursurok iti dayta a masapul a respetuek ti organisasion, kasano man kadakkel wenno kabassit ti sanga nga opisina.

Adu ti nagbalin a gagayyemko iti kongregasion. Masansan a kada rabii ti Sabado, agduduma a pamilia ti pakikadkaduaak. Nakaragragsak! Agingga ita, makasarsaritak pay la ida. Nasursurok met ti agsao iti French ta dayta ti opisial a lengguahe ti Senegal. Ket nakatulong dayta kaniak no agbisbisitaak kadagiti sangay iti intero a lubong a French met ti lengguaheda.

Idi 1968, nagtulagkamin ken Linda nga agkasar. Kalpasan ti sumagmamano a bulan, nagsapulak iti part-time a trabaho tapno makapagpayunirkami koma ken Linda idiay Senegal. Ngem nalaklaka idi a makastrek iti trabaho dagiti umili sadiay, kompara kadagiti naggapu iti sabali a pagilian. Gapu iti dayta, nagawidak idiay Canada ket nagkasarkami ken Linda. Idi kuan, naapointarankami nga agserbi kas special pioneer iti Edmundston, New Brunswick a maysa a bassit a siudad iti beddeng ti probinsia ti Quebec.

PANAGPAYUNIR ITI NEW BRUNSWICK KEN QUEBEC

Awan pay idi ti Saksi sadiay ken manmano laeng ti mayat nga agpayadal iti Biblia. Nagpigsa met ti impluensia ti Katolisismo iti biag dagiti tattao. Dandani amin a balay ket addaan iti karatula a “Maiparit Ditoy Dagiti Saksi ni Jehova.” Saanmi pay unay idi a pakaseknan dagiti kasta a karatula. Isu nga adda man karatula ti maysa a balay wenno awan, papananmi latta. Kada lawas, adda ipapaipablaak ti maysa nga organisasion dagiti Katoliko iti lokal a diario: “Biroken ken papanawentayo dagiti Saksi ni Jehova.” Up-uppat laeng ti Saksi idiay Edmundston—da Victor ken Velda Norberg ken dakami ken Linda—isu nga ammomi lattan a dakami ti puntiriada!

Diak pulos malipatan ti umuna a panangbisita kadakami ti manangaywan iti sirkito. Kalpasan a nagkakaduakami iti makalawas, imbagana, “Siguro ti kasayaatanen a maaramidanyo ditoy ket tulonganyo dagiti tattao a mangbalbaliw iti panangmatmatda kadagiti Saksi ni Jehova.” Sipud idin, dayta ti inkagumaanmi nga aramiden, ket nagballigikami! In-inut a nakita dagiti tattao ti nagdakkel a nakaidumaan dagiti napakumbaba a Saksi ni Jehova kadagiti napangato a lider ti Simbaan. Ita, addan bassit a kongregasion iti dayta a siudad.

Kalpasan ti agarup makatawen a panagserbimi idiay New Brunswick, naawiskami a tumulong iti maysa a dakkel a kongregasion idiay Quebec City. Innem a bulan a nagserbikami a kadua dagiti managpadagus a kakabsat sakbay a naawiskami iti trabaho iti sirkito.

Iti simmaruno a 14 a tawen, nagserbikami kadagiti sirkito iti probinsia ti Quebec. Nakaragragsak dagita a tawen! Nakabungbunga idin ti trabaho iti Quebec. Kadagiti kongregasion a binisitami, gagangay a pamipamilia ti agpapayadal iti Biblia ken agpabpabautisar!

DAGITI MATALEK A KAKABSAT A DIMI MALIPATAN

Nalaka nga ayaten dagiti French-Canadian a kakabsat. Prangkada nga agsao, nagraragsakda, ken nagreregtada. Ngem saan a kaskarina para kadakuada ti agbalin a Saksi. Ngamin, busoren ida dagiti kapamiliada. Adda pay ngarud dagiti agtutubo a pinangtaan dagiti saan a Saksi a nagannakda: “No saanka a sumardeng a makipagadal kadagiti Saksi ni Jehova, pumanawkan ditoy balay!” Ngem nagtalinaedda latta a matalek. Sigurado nga ipagpannakkel unay ida ni Jehova!

Diak met malipatan dagiti matalek a regular ken special pioneer a nagserbi idiay Quebec kadagidi a tawen. Adu kadakuada ti naggapu iti dadduma a paset ti Canada. Malaksid a sursuruenda ti agsao iti French, masapul met a sursuruenda ti makibagay iti kultura ken panagpampanunot dagiti tattao sadiay a talaga a naimpluensiaan iti Katolisismo.

Masansan a maibaon dagiti special pioneer kadagiti adayo a teritoria nga awan pay a pulos ti Saksi. Ngem gapu iti diskriminasion kadagiti Saksi, nagrigat ti makasapul iti pagdagusan ken uray iti part-time a trabaho. No dadduma, mapilitan pay ngarud uray dagiti kakaskasar a makipagnaed iti balay a paggigiananen ti agingga iti walo a Saksi tapno makayada ti renta. Ngamin, no laeng is-isuda, saanda a kaya ta nangina unay. Naggagaget dagita a payunir. No adda mabirokanda a mayat nga agpayadal iti Biblia, talaga nga ikagumaanda a tulongan tapno rumang-ay. Ita, adun ti Saksi idiay Quebec, isu a naibaonen dagita a payunir kadagiti lugar nga addaan iti dakdakkel a panagkasapulan.

No agbisbisitakami kadagiti kongregasion, masansan a makikaduakami kadagiti tin-edyer a mangasaba iti bigat ti Sabado. Gapu iti dayta, naammuanmi dagiti problema a pakaipaspasanguanda. Dadduma kadagita a tin-edyer ket agserserbi itan kas misionero iti sabali a pagilian wenno naikkandan kadagiti nadagsen a responsabilidad iti organisasion.

Kadagidi a tiempo, saan a kaya ti dadduma a kongregasion nga isubli dagiti naggastuanmi. Isu a no dadduma, maibusankamin iti kuarta iti agtapus ti bulan. No kasta ti mapasamak, masapul a naan-anay nga agpannuraykami ken Jehova, ta isuna laeng ti makaammo iti situasionmi. Ket saannakami a pulos a binaybay-an. Uray kaskasano, nakapankami met latta kadagiti sumaruno a kongregasion a bisitaenmi.

DAGITI NASURSUROK KADAGITI MATALEK A KAKABSAT

Nayestoriak itay nga adu ti nasursurok iti kursomi iti Gilead no kasano ti makisarita iti media. Ket kadagidi a tiempo idiay Quebec, adu ti gundawaymi a mangasaba babaen ti radio, telebision, ken diario. Masansan a makipagtrabahoak ken Brother Léonce Crépeault, a padak a manangaywan iti sirkito ken nalaing a makisarita iti media. No adda kasaritami a nangato ti posisionna, imbes nga ibagana a propesionalkami, ibagana no kua: “Sir, ministrokami. Bassit laeng ti ammomi iti media. Ngem naibaonkami a mangipakaammo kadagiti tattao nga addanto angayen dagiti Saksi ni Jehova a dakkel a kombension. Apresiarenmi unay ti aniaman a maitulongyo kadakami.” Gapu iti kinapakumbabana, adu a taga-media ti timmulong kadakami.

Idi agangay, imbaonnak ti sanga nga opisina a makipagtrabaho ken Brother Glen How a maysa kadagiti abogadotayo. Isu ti mangas-asikaso kadagiti sensitibo a kaso a masansan a komkomentuan ti media. Dakkel ti naitulong ti training-ko iti Gilead ken ti pannakipagtrabahok ken Brother Léonce. Ibilangko met a maysa a pribilehio ti makipagtrabaho ken Brother How. Nakaturtured a mangidepensa iti legal a kalintegan ti organisasiontayo. Ngem kapatgan iti amin, talaga nga ay-ayatenna ni Jehova.

Idi 1985, naibaonkami nga agserbi iti sirkito nga asideg iti balay ni Tatang iti makinlaud a Canada isu a nakatulongkami iti pannakaaywanna. Tallo a bulan kalpasanna, natay ni Tatang. Intultuloymi ti nagserbi kadagiti sirkito iti makinlaud a Canada agingga idi 1989. Iti dayta a tawen, nasorpresakami ta naawiskami nga agbalin a paset ti pamilia ti Bethel iti United States. Masapul ngaruden a panawanmin ti trabaho iti sirkito kalpasan ti dandani 19 a tawen. Bayat dagita a tawen, nakipagyankami iti ginasut a balay ken rinibu a daras a nakipangankami kadagiti managpadagus a kakabsat. Agyamyamankami unay iti amin a nangpadagus ken nangpakpakan kadakami!

IMMAKARKAMI ITI UNITED STATES

Idi simmangpetkami idiay Brooklyn, ti asaynmentko ket iti Service Department. Kanayon nga agyamyamanak iti pannakasanay a naawatko iti dayta a departamento. Ti maysa kadagiti nasursurok ket masapul a siguraduek dagiti impormasion ken saanak nga agkonklusion a dagus. Idi 1998, nayakarak iti Writing Department. Adu latta pay ti masapul a sursuruek. Iti sumagmamano a tawen, pribilehiok ti timmulong ken Brother John Barr a koordineytor idi ti Writing Committee. Diakto pulos malipatan ti panangsanayna kaniak ken ti tiempo a panagkaduami. Talaga a tultuladenna ti ulidan ni Jesu-Kristo.

Makaparagsak unay ti makipagtrabaho kadagiti napakumbaba a kakabsat a lallaki ken babbai iti Writing Department. Kanayon a kidkiddawenda ti tulong ni Jehova iti trabahoda ken bigbigenda nga aniaman a maaramidanda ket gapu laeng iti espirituna, saan a gapu iti kinalaing wenno abilidadda.

Nagdakkel met a pribilehiomi ken Linda a nabisita dagiti matalek a kapammatiantayo iti 110 a pagilian. Iti pannakilangenmi kadagiti misionero, miembro ti Komite ti Sangay, ken dadduma pay nga agserserbi iti amin-tiempo, nakitami a mismo ti panagayatda ken Jehova. Nakitami met ti kinaregta ken kinamatalek dagiti kakabsat kadagita a pagilian, ta iyun-unada latta ti Pagarian uray no adda gubat, pannakaidadanes, ken uray narigat ti biagda. Sigurado nga ay-ayaten unay ida ni Jehova!

Iti panaglabas dagiti tawen, nagdakkel ti maitultulong kaniak ni Linda bayat nga ikagkagumaak nga itungpal dagiti annongek. Talaga nga ay-ayatenna dagiti tattao ken kanayon a mangbirbirok kadagiti pamay-an a tumulong iti dadduma. Naglaing a mangirugi iti saritaan. Adun ti natulonganna nga agbalin a Saksi ken adda met dagiti natulongannan a di aktibo nga agbalin manen a naregta nga agserbi ken Jehova. Talaga a regalo isuna kaniak ni Jehova! Bayat a tumataengankami, ap-apresiarenmi unay ken Linda ti tulong dagiti ub-ubing a kakabsat a lallaki ken babbai no kasta nga agbiahekami ken no adda ti dadduma pay a kasapulanmi.—Mar. 10:​29, 30.

No subliak ti napalabas a walo a dekada ti biagko, napalaus la unay ti panagyamanko ken Jehova. Umanamongak iti insurat ti salmista: “O Dios, isursuronakon sipud pay kinaagtutubok, ket agingga ita, isarsaritak dagiti nakaskasdaaw nga aramidmo.” (Sal. 71:17) Itultuloyko nga aramiden dayta agingga a sibibiagak.