SALUDSOD DAGITI AGTUTUBO

Masapul Kadi nga Agpabautisarak?—Paset 1: Kaipapanan ti Bautismo

Kada tawen, adu a tin-edyer ken agtutubo a napadakkel iti pamilia a Saksi ti agpabpabautisar. Pampanunotem met kadi ti agpabautisar? No wen, masapul a maawatam ti kaipapanan ti dedikasion ken bautismo.

Ania ti bautismo?

Ti bautismo a tuktukoyen ti Biblia ket ti pannakaitaneb ti intero a bagi iti danum—saan la a basta panangwarsi iti danum. Nakapatpateg ti isimbolo dayta.

Ti pannakaitaneb bayat ti bautismom ipakitana iti publiko a saankan nga agbiag nga aramidem laeng ti pagragsakam.
Ti iruruarmo iti danum ipakitana a nangrugin ti baro a biagmo a nakapokus iti panagaramid iti bambanag a mangparagsak iti Dios.

Babaen ti bautismom, ipakpakaammom iti publiko a bigbigbigem ti autoridad ni Jehova a mangibaga iti umiso ken di umiso, ken ti karim nga aramidem no ania ti kayatna.

Panunotem: Apay a kayatmo nga ipakaammo iti publiko nga agtulnogka ken Jehova iti intero a biagmo? Kitaem ti 1 Juan 4:19 ken Apocalipsis 4:11.

Ania ti panagdedikar?

Sakbay nga agpabautisarka, masapul nga idedikarmo ti bagim ken Jehova. Kasano?

Iti personal a kararagmo, ikarim ken Jehova nga agserbika kenkuana iti agnanayon ken aramidem ti pagayatanna uray ania ti mapasamak ken uray ania ti aramiden ti dadduma.

Ti bautismo ipakitana iti dadduma a nagdedikarkan ken saankan nga agbiag para iti bagim no di ket para ken Jehova.—Mateo 16:24.

Panunotem: Apay a sumayaat ti biagmo no agbiagka para ken Jehova? Kitaem ti Isaias 48:17, 18 ken Hebreo 11:6.

Apay nga importante ti bautismo?

Imbaga ni Jesus a kasapulan a mabautisaran dagiti agbalin nga adalanna. (Mateo 28:19, 20) Isu a masapul a mabautisaran dagiti Kristiano. Kinaagpaysuanna, ibagbaga ti Biblia a kasapulan dayta tapno maisalakan ti maysa.—1 Pedro 3:21.

Ngem ti koma motibom nga agpabautisar ket ay-ayatem ni Jehova ken ibilangmo nga importante ti relasionmo kenkuana. Ipakitam koma ti imbaga ti salmista: “Ania ti isubadko ken Jehova gapu iti amin a naimbag nga inaramidna kaniak? . . . Umawagakto iti nagan ni Jehova. Tungpalekto dagiti karik ken Jehova.”—Salmo 116:12-14.

Panunotem: Ania dagiti inaramid ni Jehova para kenka ken ania met ti kayatmo nga aramiden para kenkuana? Kitaem ti Deuteronomio 10:12, 13 ken Roma 12:1.

Saan nga agpayso a kapanunotan ken agpayso

SAAN NGA AGPAYSO A KAPANUNOTAN — Dagiti adulto laeng ti agpabautisar ta nataengandan.

AGPAYSO — Saan la a ti edad ti pakakitaan no nataengan ti maysa iti naespirituan no di ket ti panagayatna ken Jehova ken ti panagtulnogna kenkuana. Ubing pay laeng da Jose, Samuel, ken Josias, makita a nataengandan. Kasta met ti ipakpakita ti adu nga ubbing ita.

Ti kuna ti Biblia: “Maam-ammo ti ubing babaen ti ar-aramidna, no nadalus ken umiso ti kababalinna.”—Proverbio 20:11.

SAAN NGA AGPAYSO A KAPANUNOTAN — No agpabautisaren dagiti gagayyemmo, masapul nga agpabautisarka metten.

AGPAYSO — Personal a desision ti panagdedikar ken panagpabautisar ken aramidem dayta a naimpusuan. Saan a tradision dayta a no madanonmon ti espesipiko nga edad, masapulen nga agpabautisarka gapu ta kasta ti ar-aramiden ti dadduma wenno kasta ti ekspektarenda nga aramidem.

Ti kuna ti Biblia: “Sisasagananto dagiti [tattao ti Dios] nga agboluntario.”—Salmo 110:3.

SAAN NGA AGPAYSO A KAPANUNOTAN — No saanka pay a nagbautisar, okey lang uray ania ti ar-aramidem.

AGPAYSO — No ammomon ti umiso ken di umiso, uray saanka pay a nagpabautisar, addan sungsungbatam ken Jehova.

Ti kuna ti Biblia: “No ammo ti maysa ti agaramid iti umiso ngem saanna nga aramiden, isu ket agbasbasol.”—Santiago 4:17.

TIP: No mabutengka nga agdedikar ken agpabautisar kas maysa a Kristiano, mabalin nga ammuem no apay a kasta ti marikriknam ken no ania ti mabalinmo nga aramiden tapno malabanam dagiti pagbutbutngam. Makatulong no basaem ti Kapitulo 37 ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2.