Mangrugi Kadi ti Armagedon iti Israel?—Ania ti Ibaga ti Biblia?

Deskribiren ti Biblia ti Armagedon, saan a kas gubat a mangapektar laeng iti bassit a paset ti daga, no di ket sangalubongan a gubat iti nagbaetan ti amin a gobierno ti tao ken ti Dios.

• ‘Dagiti sasao dagiti demonio mapanda kadagiti ari iti intero a daga, tapno urnongenda ida iti gubat ti naindaklan nga aldaw ti Dios a Mannakabalin-amin. Inurnongda ida iti lugar a maaw-awagan iti Armagedon iti Hebreo.’—Apocalipsis 16:14, 16.

Ti sao nga “Armagedon” ket naggapu iti Hebreo a sao a Har Meghid·dohnʹ, a kayatna a sawen, “Bantay ti Megiddo.” Ti Megiddo ket maysa a siudad iti nagkauna a teritoria ti Israel. Gapu iti dayta, patien ti dadduma a ti Armagedon ket mapasamakto iti Israel. Ngem ti rehion ti Megiddo wenno ti aniaman a lugar iti Middle East ket saanna a malaon ‘dagiti ari iti intero a daga’ ken dagiti armadada.

Ti libro nga Apocalipsis ket naisurat kadagiti “mangirepresentar a ladawan,” wenno iti simboliko a pamay-an. (Apocalipsis 1:1) Ti Armagedon tukoyenna saan a ti literal a lugar, no di ket ti sangalubongan a situasion inton agtitipon dagiti nasion para iti maudi a panangpadasda a manglaban iti gobierno ti Dios.—Apocalipsis 19:11-16, 19-21.