Triniltrilion ti Magasgastos Para iti Gubat—Ngem Ania a Talaga ti Maisaksakripisio?

Nakadakdakkel ti magasgastos para iti gubat.

• “Iti napalabas a tawen, gimmastos dagiti gobierno iti intero a lubong iti $2.2 a trilion gapu iti nadumaduma a gubat. Daytoy pay laeng ti kadakkelan a nagastosda para iti gubat iti maysa a tawen.”—The Washington Post, Pebrero 13, 2024.

Ngem saan laeng a kuarta ti maisaksakripisio. Kitaem ti maysa laeng a pagarigan: Ti gubat idiay Ukraine.

• Soldado. Natantia a dandani 500,000 a soldado ti napapatay wenno nasugatan sipud idi nangrugi ti gubat dua a tawenen ti napalabas.

• Sibilian. Sigun iti United Nations, nasurok a 28,000 ti napapatay wenno nasugatan. Ngem kuna ti maysa a nabayagen nga opisial ti UN: “Imposible a maammuan no kasano kaadu a biag ti naapektaran iti daytoy a makadadael a gubat.”a

Nagkaro ti dakes nga epekto iti biag dagiti tattao dagiti gubat ken panaglalaban iti intero a lubong.

• 114 a milion. Bilang dagiti napilitan a pumanaw iti lugarda gapu iti gubat ken kinaranggas iti intero a lubong agingga idi Septiembre 2023.

• 783 a milion. Bilang dagiti tattao nga awan ti umdas a kanenda. “Ti panaglalaban ti kangrunaan latta a rason ti bisin. Pitopulo a porsiento iti bilang dagiti mabisbisinan a tattao iti intero a lubong ti aggigian kadagiti lugar nga apektado iti gubat ken kinaranggas.”—World Food Programme.

Agpatingganto pay kadi ti gubat? Addanto pay ngata talna? Addanto kadi tiempo a mausar dagiti kinabaknang iti lubong tapno masolusionan ti bisin ken kinarigat ti biag? Ania ti ibaga ti Biblia?

Impakpakauna ti Biblia ti gubat iti nadumaduma a paset ti lubong, a nailadawan kas maysa a kumakabalio.

• “Adda sabali pay a rimmuar a kabalio a kasla apuy ti kolorna, ket naikkan iti autoridad daydikay nakasakay iti dayta a mangikkat iti talna iti daga tapno agpipinnatay dagiti tattao, ken adda dakkel nga espada a naited kenkuana.”—Apocalipsis 6:4.

Dayta a simboliko a kumakabalio ket sarsarunuen ti dua pay a kumakabalio a mangirepresentar iti nasaknap a bisin ken ipapatay gapu kadagiti makaakar a sakit wenno dadduma pay a rason. (Apocalipsis 6:5-8) Tapno maammuam ti ad-adu pay maipapan iti daytoy a padto ti Biblia ken no apay a makasiguradotayo a matungtungpalen dayta iti panawentayo, basaem ti artikulo a “Ti Uppat a Kumakabalio—Siasinoda?”

Asidegen ti tiempo a saanen a mausar dagiti kinabaknang iti lubong para iti gubat. Ngem saan a tao ti makaaramid iti dayta. Kuna ti Biblia:

• ‘Pasardengento ti Dios dagiti gubat iti intero a daga.’—Salmo 46:9.

• Pukawento ti Dios dagiti dakes nga epekto ti gubat. “Punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”—Apocalipsis 21:4.

• Siguraduen ti Dios nga agbiagto a natalna ti amin a tattao iti agnanayon. “Agnaedto ti ilik iti natalna a lugar, kadagiti natalged ken natalna a paginanaan.”—Isaias 32:18.

Ipakita dagiti padto ti Biblia a dagiti gubat ken dadduma pay a pasamak a makitkitatayo ita ket pagilasinan a dandanin dayta a tiempo ti talna.

Kasanonto nga ipaay ti Dios dayta a natalna a masakbayan? Aramidenna dayta babaen ti nailangitan a gobierno, wenno Pagarianna. (Mateo 6:10) Tapno maammuam no ania dayta a Pagarian ken no ania ti maaramidanna kenka, buyaem ti ababa a video nga Ania ti Pagarian ti Dios?