No ti maysa a Kristiano ket saan a nataengan iti naespirituan, nalaka laeng a ‘maallilaw’ ken mayaw-awan kadagiti “ulbod a sursuro.” Mabalin met a nalaka a mamatpati kadagiti agim-imbento iti impormasion ken kadagiti apostata. Baka nalaka nga agimon, masair ti riknana, mannakiapa, ken nalaka a matnag iti sulisog. (1 Cor. 3:3) Ti Kasuratan inkomparana ti panagrang-ay iti naespirituan iti panagdakkel ti maysa nga ubing. (Efe. 4:15) Adu pay ti saan nga ammo ti maysa nga ubing isu a kasapulanna ti panangiwanwan. Kas pagarigan, kibinen ti ina ti bassit pay nga anakna no bumallasiwda iti kalsada. Bayat a dumakdakkel ti anakna, mabalin a palubosannan a bumallasiw nga is-isuna. Ngem palagipanna latta ti anakna a kumita nga umuna iti agsumbangir ken sa la bumallasiw no awanen ti aglabas a lugan. No adulton, ammonan a liklikan ti kasta a peggad. Kasta met, no nataenganen iti naespirituan ti maysa a Kristiano, panunotenna a naimbag dagiti prinsipio ti Biblia ken ti panangmatmat ni Jehova iti dayta. Kalpasanna, aramidenna ti umiso. w24.04 3 ¶5-6

Iti adu a tawen, dagiti laeng kakadua ti Dios idiay langit a pagnanaedanna ti mabalin a makigayyem kenkuana. Idi agangay, pinarsuana dagiti tattao ditoy daga, ket mabalinda metten ti makigayyem kenkuana. Ti dadduma kadagiti nagbalin a sangailina ket da Enoc, Noe, Abraham, ken Job. Nadeskribirda kas gagayyem ti Dios ta nakipagnada “iti pudno a Dios.” (Gen. 5:24; 6:9; Job 29:4; Isa. 41:8) Iti ginasut a tawen, intultuloy nga awisen ni Jehova dagiti gagayyemna nga agbalin a sangailina. (Ezek. 37:26, 27) Kas pagarigan, naammuantayo iti padto ni Ezekiel a talaga a kayat ti Dios a dagiti napudno nga agdaydayaw kenkuana ket maaddaan iti nasinged a relasion kenkuana. Ikarkarina a mangaramid kadakuada iti “tulag ti kappia.” Ti tuktukoyen dayta a padto ket ti tiempo inton dagiti napili nga agbiag idiay langit ken dagidiay addaan iti namnama nga agbiag nga agnanayon ditoy daga ket agkaykaysa iti simboliko a toldana kas “maymaysa nga arban.” (Juan 10:16) Itan dayta a tiempo! w24.06 2 ¶2, 4; 3 ¶5

Kas adipen ni Jehova, masansan a kasapulantayo ti tured tapno naimpusuan a masuportarantayo ti Pagarian ti Dios. (Mat. 6:33) Kas pagarigan, iti daytoy dakes a lubong, kasapulantayo ti tured tapno makapagbiagtayo maitunos kadagiti pagalagadan ni Jehova ken maikasabatayo ti naimbag a damag maipapan iti Pagarian. Kumarkaro ti di panagtutunos dagiti tattao gapu iti politika, isu a kasapulantayo ti tured tapno makapagtalinaedtayo a neutral. (Juan 18:36) Adu nga agserserbi ken Jehova ti agrigrigat gapu iti problema iti ekonomia. Adda met dagiti makabkabil wenno maibalbalud gapu ta dida kayat ti makiraman iti politika wenno agsoldado. Agbalintayo met a natured no panunotentayo dagidiay nangipakita iti kinatured tapno agtalinaedda a matalek ken Jehova ken iti Pagarianna. Idi adda ditoy daga ti Aritayo a ni Kristo Jesus, dina pulos kayat ti agbalin a paset ti politika iti daytoy a lubong ni Satanas. (Mat. 4:8-11; Juan 6:14, 15) Kanayon a dimmawat iti bileg ken Jehova. w24.07 3 ¶4; 4 ¶7