Kristiano a Papanglakayen​—‘Katrabahuan Maipaay iti Rag-otayo’

 1. Ania ti nagrag-oan ni Pablo mainaig kadagiti Kristiano idiay Corinto?

TAWEN 55 C.E. idi ket adda ni apostol Pablo iti sangladan a siudad ti Troas, ngem saanna a maiwaksi iti isipna dagiti Kristiano idiay Corinto. Iti nasapa a paset dayta a tawen, naladingitan idi naammuanna nga adda di panagtutunos dagiti kakabsat sadiay. Gapu iti pannakaseknanna a kas iti maysa nga ama, nagsurat kadakuada tapno aturenna ida. (1 Cor. 1:11; 4:15) Imbaonna met kadakuada ti kaduana a ni Tito ket imbilinna nga agsubli idiay Troas tapno ipadamagna ti kasasaadda. Ita, ur-urayennan a sumangpet ni Tito idiay Troas ta magagaran a mangammo iti kasasaad dagiti kakabsat idiay Corinto. Ngem nadismaya ni Pablo ta di met simmangpet ni Tito. Ania ngata ti aramiden ni Pablo? Naglayag a nagpa-Macedonia, ket naragsakan a nakakita ken Tito sadiay. Impadamag ni Tito nga impangag dagiti taga-Corinto ti surat ni Pablo ket magagaranda a makakita manen kenkuana. Gapuna, ‘nagrag-o nga ad-adda pay’ ni Pablo.​—2 Cor. 2:12, 13; 7:5-9.

 2. (a) Ania ti insurat ni Pablo kadagiti taga-Corinto maipapan iti pammati ken rag-o? (b) Ania dagiti saludsod nga usigentayo?

² Di nagbayag kalpasan dayta, inaramid ni Pablo ti maikadua a suratna kadagiti taga-Corinto. Imbagana kadakuada: “Saan a gapu ta dakami dagiti appo iti pammatiyo, no di ket katrabahuandakami a maipaay iti rag-oyo, ta babaen ti pammatiyo sitatakderkayo.” (2 Cor. 1:24) Ania ti kayat a sawen ni Pablo? Ania ti maadal dagiti Kristiano a panglakayen kadagita a sasao ni Pablo?

 3. (a) Ania ti kayat a sawen ni Pablo idi insuratna: “Babaen ti pammatiyo sitatakderkayo”? (b) Kasano a tultuladen ita dagiti panglakayen ti ulidan ni Pablo?

³ Dinakamat ni Pablo ti dua a napateg a banag iti panagdayawtayo​—ti pammati ken rag-o. Insuratna maipapan iti pammati: “Saan a gapu ta dakami dagiti appo iti pammatiyo, . . . ta babaen ti pammatiyo sitatakderkayo.” Binigbig ni Pablo a matalek nga agserserbi dagiti kakabsat idiay Corinto gapu iti pammatida iti Dios, saan a gapu kenkuana wenno iti asinoman a tao. Isu nga ammona a saanna a rumbeng a kontrolen ti pammatida, ket saanna met a kayat nga aramiden dayta. Agtalek nga agbalinda a nasungdo a Kristiano ken aramidenda no ania ti umiso. (2 Cor. 2:3) Tultuladen dagiti panglakayen ita ti ulidan ni Pablo babaen iti panangyebkasda iti panagtalekda nga agserserbi iti Dios dagiti kakabsatda gapu iti pammati ken nadalus a motibo. (2 Tes. 3:4) Imbes a mangaramidda kadagiti nainget a pagalagadan iti kongregasion, agpannurayda kadagiti prinsipio ti Biblia ken panangiwanwan ti organisasion ni Jehova. Dagiti panglakayen ita ket saan nga appo iti pammati dagiti kakabsatda.​—1 Ped. 5:2, 3.

 4. (a) Ania ti tuktukoyen ni Pablo idi insuratna: “Katrabahuandakami a maipaay iti rag-oyo”? (b) Kasano a tultuladen ita dagiti panglakayen ti ulidan ni Pablo?

⁴ Kinuna met ni Pablo: “Katrabahuandakami a maipaay iti rag-oyo.” Tuktukoyenna ti bagina ken dagiti nasinged a kakaduana. Kasanotay nga ammo? Iti isu met laeng a surat ni Pablo kadagiti taga-Corinto, dinakamatna ti dua kadagiti kakaduana: “[Ni] Jesus . . . naikaskasaba kadakayo babaen kadakami, kayatna a sawen, babaen kaniak ken ni Silvano ken ni Timoteo.” (2 Cor. 1:19) Kasta met, no dakamaten ni Pablo ti sao a ‘katrabahuan’ kadagiti suratna, kanayon a tumukoy dayta kadagiti nasinged a kakaduana, kas kada Apolos, Aquila, Prisca, Timoteo, Tito, ken dadduma pay. (Roma 16:3, 21; 1 Cor. 3:6-9; 2 Cor. 8:23) Gapuna, idi kinuna ni Pablo: “Katrabahuandakami a maipaay iti rag-oyo,” impasiguradona kadagiti taga-Corinto nga isu ken dagiti kakaduana kayatda nga aramiden ti amin a kabaelanda a tumulong iti kongregasion nga agserbi iti Dios buyogen iti rag-o. Kasta met laeng ti tarigagay dagiti Kristiano a panglakayen ita. Kayatda nga aramiden ti amin a kabaelanda tapno matulonganda dagiti kakabsatda nga ‘agserbi ken Jehova buyogen ti rag-o.’​—Sal. 100:2; Fil. 1:25.

 5. Ania ti naisaludsod iti sumagmamano a kakabsat, ken ania koma ti usigen ti tunggal maysa kadatayo?

⁵ Iti di pay nabayag, kastoy ti naisaludsod iti sumagmamano a naregta a kakabsat iti nadumaduma a pagilian, “Ania a sasao ken tigtignay ti maysa a panglakayen ti nangnayon iti rag-om?” Usigentay ita dagiti komentoda, ket idiligmo dagita iti sungbatmo no sika koma ti mapagsaludsodan. Panunoten met ti tunggal maysa kadatayo no kasano a makatulong para iti rag-o ti kongregasiontayo.a

6, 7. (a) Ania ti maysa a pamay-an a matulad dagiti panglakayen da Jesus, Pablo, ken dadduma pay nga adipen ti Dios? (b) Apay a rumayray ti rag-o dagiti kakabsat no maawaganda iti naganda?

⁶ Kuna ti adu a kakabsattayo a rumayray ti rag-oda no makitada ti personal nga interes kadakuada dagiti panglakayen. Ti maysa a pamay-an a maaramidan dayta dagiti panglakayen ket babaen ti panangsurotda iti ulidan da David, Eliu, ken Jesus. (Basaen ti 2 Samuel 9:6; Job 33:1; Lucas 19:5.) Nangipakita dagitoy nga adipen ni Jehova iti napasnek nga interes iti sabsabali babaen ti panangusarda iti nagan dagiti indibidual. Ammo ni Pablo a napateg ti panangtandaan ken panangusar iti nagan dagiti kapammatianna. Iti ngudo ti maysa kadagiti suratna, kinablaawan ken innagananna ti nasurok a 25 a kakabsat a lallaki ken babbai. Karaman ni Persida kadagiti kakabsat a babbai. Kinuna ni Pablo maipapan kenkuana: “Kablaawanyo ni Persida a dungdungnguentayo.”​—Roma 16:3-15.

⁷ Adda dagiti panglakayen a marigatan a manglagip iti nagan dagiti kakabsat. Ngem ikagkagumaanda a tandaanan dagita, ket arigna ibagbagada kadakuada, ‘Napategka kaniak.’ (Ex. 33:17) Ad-adda a maparayray dagiti panglakayen ti rag-o dagiti kakabsatda no awaganda ti nagan dagiti agkomento iti Panagadal iti Pagwanawanan wenno dadduma pay a gimong.​—Idilig iti Juan 10:3.

 8. Ania ti maysa a napateg a pamay-an a tinulad ni Pablo ti ulidan ni Jehova ken ni Jesus?

⁸ Impakita met ni Pablo ti interesna iti dadduma babaen ti napasnek a panangkomendarna kadakuada. Maysa pay daytoy a pamay-an tapno maparayray dagiti panglakayen ti rag-o dagiti kakabsat. Iti surat ni Pablo kadagiti taga-Corinto, dinakamatna a pagpannakkelna ida idi kinunana: “Addaanak iti dakkel a panagpasindayag no maipapan kadakayo.” (2 Cor. 7:4) Naragsakan la ketdi dagiti kakabsat idiay Corinto iti dayta a komendasion. Inyebkas met ni Pablo ti apresasionna iti dadduma a kongregasion. (Roma 1:8; Fil. 1:3-5; 1 Tes. 1:8) Kinapudnona, kalpasan a dinakamatna ni Persida iti suratna iti kongregasion idiay Roma, innayon ni Pablo: “Adu a panagbannog iti Apo ti nagapuananna.” (Roma 16:12) Napabileg la ketdi ni Persida kadagita a sasao! Tultuladen ni Pablo ti ulidan ni Jehova ken ni Jesus iti panangtedna iti komendasion.​—Basaen ti Marcos 1:9-11; Juan 1:47; Apoc. 2:2, 13, 19.

 9. Apay a rumayray ti rag-o ti kongregasion no komendaran dagiti kakabsat ti maysa ken maysa?

⁹ Bigbigen met dagiti panglakayen ita a napateg no iyebkasda ti apresasionda kadagiti kakabsatda. (Prov. 3:27; 15:23) No kasta ti aramiden ti maysa a panglakayen, arigna ibagbagana kadagiti kakabsat: ‘Ammok ti naaramidam. Maseknanak kenka.’ Nakapatpateg a mangngeg dagiti kapammatiantayo ti makapabileg a sasao dagiti panglakayen. Kasta ti narikna ti maysa a kabsat a babai nga agedad iti nasurok a 50. Kinunana: “Manmano nga apresiarendak iti pagtrabahuak. Awan pannakaseknan dagiti katrabahuak iti maysa ken maysa ken agkikinnompetensiada. Isu a no komendarandak dagiti panglakayen iti naaramidak iti kongregasion, mabang-aranak unay, ken maparegtaak! Mariknak nga ay-ayatennak ti nailangitan nga Amatayo.” Kasta met ti narikna ti ama nga agmaymaysa a mangpadpadakkel iti dua nga annakna. Naimpusuan a kinomendaran ti maysa a panglakayen. Ket ania ti epektona kenkuana? Kinunana: “Talaga a napabilegak iti imbaga ti panglakayen!” Wen, babaen iti napasnek a komendasion, maparegta ti panglakayen dagiti kapammatianna ken maparayrayna ti rag-oda. Dayta met ti mangnayon iti pigsada nga agtultuloy a magna iti dalan ti biag ket “saanda a mabannog.”​—Isa. 40:31.

10, 11. (a) Kasano a matulad dagiti panglakayen ti ulidan ni Nehemias? (b) Ania ti makatulong iti maysa a panglakayen tapno makaipaay iti naespirituan a sagut no mangipastor?

¹⁰ Ania ti sabali pay a nagpateg a pamay-an a maipakita dagiti panglakayen ti personal nga interesda kadagiti kakabsat tapno rumayray ti rag-o ti kongregasion? Babaen ti madagdagus a panagtignayda a tumulong kadagidiay agkasapulan iti pammaregta. (Basaen ti Aramid 20:28.) No kasta ti aramiden dagiti panglakayen, tultuladenda dagiti nagkauna a naespirituan a papastor. Kas pagarigan, ibaga ti Biblia nga idi nakita ni Nehemias a maup-upay ti sumagmamano a Judio a kakabsatna, dagus a nagtignay a mangparegta kadakuada. (Neh. 4:14) Kayat met dagiti panglakayen a tuladen dayta. ‘Tumakderda’ wenno agtignayda a mangpabileg kadagiti kapammatianda. Sarungkaranda dagiti kakabsat iti mismo a pagtaenganda, no ipalubos ti kasasaad. Bayat dagita a panangipastor, kayatda ti ‘mangiburay iti naespirituan a sagut.’ (Roma 1:11) Ania ti makatulong kadagiti panglakayen a mangaramid iti dayta?

¹¹ Sakbay a mangipastor ti maysa a panglakayen, napateg a panunotenna ti kasasaad ti indibidual a bisitaenna. Ania dagiti pakarigatan dayta a kabsat? Ania ngata ti mabalin nga ibagana kenkuana tapno mapabileg? Ania a kasuratan wenno kapadasan ti maysa a karakter ti Biblia ti makaparegta kenkuana? No umuna a panunotenna dagita, makaipaay iti sasao a makatulong iti indibidual, imbes a makiin-innestoria laeng. Bayat ti panagsarungkar, palubosan koma ti panglakayen nga iyebkas dagiti kakabsat ti riknada, ket imdenganna ida a naimbag. (Sant. 1:19) Kinuna ti maysa a kabsat a babai: “Maliwliwaak unay no naimpusuan a dumngeg kaniak ti maysa a panglakayen.”​—Luc. 8:18.

12. Siasino iti kongregasion ti agkasapulan iti pammaregta, ken apay?

¹² Siasino ti agkasapulan iti panangipastor? Indagadag ni Pablo kadagiti padana a Kristiano a panglakayen nga ‘asikasuenda ti isuamin nga arban.’ Wen, agkasapulan iti pammaregta ti amin a kameng ti kongregasion, pakairamanan dagiti agibumbunannag ken payunir a matalek a mangitungtungpal iti ministerioda iti adun a tawen. Apay a kasapulanda ti suporta dagiti naespirituan a pastor? Gapu ta uray nabileg ti espiritualidadda, mariknada no dadduma a dida kabaelan a daeran dagiti adu a pakarigatan iti daytoy dakes a lubong. Tapno maawatantayo no apay nga agkasapulan iti tulong uray dagidiay nabileg ti espiritualidadna, usigentayo ti maysa a pasamak iti biag ni Ari David.

13. (a) Ania a kasasaad ni David ti ginundawayan ni Isbi-benob? (b) Kasano a nasalbar ni Abisai ti biag ni David?

¹³ Di nagbayag kalpasan a nadutokan kas ari ti agtutubo pay laeng a ni David, sinangona ni Goliat a maysa kadagiti Refaim, maysa a puli dagiti higante. Pinapatay ni natured a David dayta a higante. (1 Sam. 17:4, 48-51; 1 Cron. 20:5, 8) Tawtawen kalpasanna, bayat ti naminsan a pannakirupakda kadagiti Filisteo, naipasango manen ni David iti maysa a higante. Isu dayta ni Isbi-benob, a maysa met kadagiti Refaim. (2 Sam. 21:16.) Ngem iti daytoy a gundaway, ti higante gistayna napapatay ni David. Apay? Saan a gapu ta napukaw ni David ti turedna no di ket gapu ta napaksuyan. Kuna ti salaysay: “Nabannog ni David.” Idi nadlaw dayta ni Isbi-benob, “napanunotna a kabilen ni David.” Ngem sakbay nga agdisso ti igamna ken David, “madagdagus a timmulong ni Abisai nga anak ni Zeruia ket kinabilna ti Filisteo ket pinapatayna.” (2 Sam. 21:15-17) Gistay natay ni David iti dayta a gundaway! Napalalo la ketdi ti yamanna iti panangbantay kenkuana ni Abisai ken ti madagdagus nga itutulongna idi agpegpeggad ti biagna! Ania dagiti maadaltayo iti daytoy a salaysay?

14. (a) Kasano a mapagballigiantayo dagiti arig Goliat a pakarigatan? (b) Ania ti maaramidan dagiti panglakayen tapno maisubli ti pigsa ken rag-o dagiti kakabsat? Mangted iti pagarigan.

¹⁴ Iti intero a lubong, itungtungpaltayo kas Saksi ni Jehova ti ministeriotayo uray no ikagkagumaan ni Satanas ken dagiti dadduma a parigatendatayo. Sumagmamano kadatayo ti naipasango kadagiti arig higante a pakarigatan, ngem gapu ta naan-anay a nagtalektayo ken Jehova, nabaelantayo a sinango ken pinarmek dagita. Ngem no dadduma, mabannog wenno maupaytayo gapu kadagiti di agsarday a pakarigatan iti daytoy a lubong. No kasta a nakapuytayo, marigatantayo a mangdaer kadagiti pakarigatan, a nalakatay laeng koma a sanguen no napigsatayo. Kadagita a gundaway, makatulong ti suporta ti maysa a panglakayen tapno mapasubli ti rag-o ken pigsatayo. Kasta ti kapadasan ti adu kadatayo. Maysa a payunir a babai nga agtawen iti nasurok a 60 ti nagkuna: “Adda idi gundaway a maup-upayak, ket makabannog payen kaniak ti panangasaba. Nadlaw ti maysa a panglakayen nga awan gaganaygayak ket kinasaritanak. Napabilegak iti teksto ti Biblia nga imburayna. Inyaplikarko dagiti singasingna, ket nagunggonaanak.” Innayonna: “Anian a pannakaseknan daydiay a panglakayen ta nadlawna a kimmapuyak ket tinulongannak!” Wen, makaparagsak a maammuan a maseknan kadatayo dagiti panglakayen ken kanayon a sidadaanda a ‘tumulong’ kas ken Abisai.

15, 16. (a) Apay a dagiti kakabsat impatpategda ni Pablo? (b) Apay nga ayatentayo dagiti nadungngo a panglakayen ti kongregasion?

¹⁵ Narigat ti trabaho a panangipastor. No dadduma, saan a maiturturog dagiti panglakayen ti panangpampanunot ken panangikarkararagda iti arban ti Dios wenno ti panangipaayda iti naespirituan a suporta kadagiti kapammatianda. (2 Cor. 11:27, 28) Ngem siraragsak latta nga itungtungpal dagiti panglakayen ti annongenda, kas ken Pablo. Insuratna kadagiti taga-Corinto: “Siraragsakakto unay a mangbusbos ken naan-anay a mabusbos maipaay kadagiti kararuayo.” (2 Cor. 12:15) Gapu iti ayatna, inaramid ni Pablo ti amin a kabaelanna a mangparegta kadagiti kakabsat. (Basaen ti 2 Corinto 2:4; Fil. 2:17; 1 Tes. 2:8) Dayta ti makagapu no apay nga impatpategda unay!​—Ara. 20:31-38.

¹⁶ Kas ad-adipen ti Dios ita, ay-ayatentayo met dagiti nadungngo a Kristiano a panglakayen ken pagyamanantayo ni Jehova ta impaayna ida a tumulong kadatayo. Maparayrayda ti rag-otayo babaen ti personal a pannakaseknanda kadatayo. Mapabilegtayo gapu iti panangipastorda. Agyamantayo met gapu ta sidadaanda a tumulong no kasla ditayon kabaelan dagiti pakarigatan iti daytoy a lubong. Wen, dagiti kasta a Kristiano a panglakayen ket talaga a ‘katrabahuantayo maipaay iti rag-otayo.’