Idaydayawyo ni Jehova iti Kongregasion

 1. Ania ti kayat ni David nga ipaay ken Jehova, ken ania ti nakatignayanna a mangaramid iti dayta?

INSURAT ni Ari David: “Naindaklan ni Jehova ken maikari unay a maidaydayaw.” (Sal. 145:3) Ay-ayatenna ni Jehova, isu a natignay a mangidaydayaw iti Dios iti “tengnga ti kongregasion.” (Sal. 22:22; 40:5) Sigurado nga ay-ayatem ni Jehova ken umanamongka iti imbaga ni David: “Maidaydayawka koma iti agnanayon, O Jehova a Dios ni Israel nga amami.”​—1 Cron. 29:10-13.

 2. (a) Kasanotayo a maidaydayaw ni Jehova? (b) Ania ti problema ti dadduma, ken ania ti repasuentayo?

² Ita, ti maysa a pamay-an a maidaydayawtayo ni Jehova ket ti panagkomento kadagiti gimong. Ngem marigatan ti dadduma a kakabsattayo. Kayatda ti agkomento, ngem agnerbiosda. Kasano a malabananda dayta? Ken ania dagiti praktikal a suhestion tapno makaipaaytayo iti makaparegta a komento? Sakbay a sungbatantayo dagita, repasuentayo nga umuna ti uppat a rason no apay nga agkomentotayo kadagiti gimong.

3-5. (a) Kas nailawlawag iti Hebreo 13:15, apay nga agkomentotayo iti gimong? (b) Masapul kadi nga agpapada ti kita ti komentotayo? Ilawlawag.

³ Inikkannatayo amin ni Jehova iti pribilehio a mangidaydayaw kenkuana. (Sal. 119:108) Dagiti komentotayo iti gimong ket paset ti “daton ti panangidaydayaw[tayo],” ket awan ti makaidaton iti dayta para kadatayo. (Basaen ti Hebreo 13:15.) Kidkiddawen kadi ni Jehova iti tunggal maysa kadatayo ti agpapada a kita ti daton, wenno komento? Saan!

⁴ Ammo ni Jehova a nagduduma ti abilidad ken kasasaadtayo, ket apresiarenna dagiti maidatontayo kenkuana. Panunotem no ania a kita ti daton dagiti Israelita ti inawatna. Nangidaton iti kordero wenno kalding ti dadduma nga Israelita. Ngem mabalin nga idaton ti napanglaw nga Israelita ti “dua a pagaw wenno dua a sibong ti atap a kalapati.” Ket no saan a kaya ti maysa nga Israelita ti dua a billit, awaten ni Jehova ti “apagkapullo ti maysa nga efa ti napino nga arina.” (Lev. 5:7, 11) Nalaklaka ti arina, ngem apresiaren latta dayta ni Jehova, no la ket ta “napino nga arina.”

⁵ Kasta met laeng ti marikna ita ti naasi a Diostayo. No agkomentotayo, dina kidkiddawen a kas ken Apolos ti kalaingtayo nga agsao wenno kas ken Pablo ti kalaingtayo a mangkombinsir. (Ara. 18:24; 26:28) Ti laeng kayat ni Jehova ket ti kasayaatan a komento a kabaelantayo. Laglagipem ti balo a babai a nangted iti dua a babassit a sinsilio. Ipatpateg ni Jehova ta intedna ti kasayaatan a maipaayna.​—Luc. 21:1-4.

 6. (a) Sigun iti Hebreo 10:24, 25, ania ti epekto kadatayo dagiti mangngegtayo a komento? (b) Kasano a maipakitam nga ap-apresiarem dagiti sungbat a makaparegta kenka?

⁶ Maparegtatayo ti maysa ken maysa no agkomentotayo. (Basaen ti Hebreo 10:24, 25.) Maragsakantayo amin a dumngeg iti nadumaduma a komento kadagiti gimongtayo. Maragsakantayo iti simple ken naimpusuan a komento ti maysa nga ubing. Maparegtatayo iti maysa a magaggagaran a mangikomkomento iti kinapudno a baro a naammuanna. Ken apresiarentayo dagidiay ‘pinaturedda’ ti bagida nga agkomento, uray no managbabain wenno rugrugianda pay laeng a sursuruen ti lengguahetayo. (1 Tes. 2:2) Kasanotayo a maipakita nga ap-apresiarentayo ti panagreggetda? Mabalintayo a pagyamanan ti makaparegta a komentoda kalpasan ti gimong. Ti sabali pay a pamay-an ket ti mismo a panagkomentotayo. Iti kasta, saan laeng a datayo ti maparegta iti gimongtayo no di ket parparegtaentayo pay ti sabsabali.​—Roma 1:11, 12.

 7. Kasano a magunggonaantayo no agkomentotayo?

⁷ Magunggonaantayo no agkomentotayo. (Isa. 48:17) Kasano? Umuna, no iplanotayo ti agkomento, ad-adda a matignaytayo nga agsagana a naimbag iti gimong. No agsaganatayo a naimbag, umuneg ti pannakaawattayo iti Sao ti Dios. Ket no naun-uneg ti pannakaawattayo, mas mayaplikartayo dagiti masursurotayo. Maikadua, ad-adda a matagiragsaktayo ti gimong ta karamantayo iti diskusion. Maikatlo, gapu ta pinagreggetantayo ti agkomento, masansan a malagiptayo dagiti punto nga imbagatayo uray nabayagen a naikomentotayo dagita.

8-9. (a) Kas nadakamat iti Malakias 3:16, ania ngata ti panagrikna ni Jehova kadagiti komentotayo? (b) Ania latta ti pagdanagan ti dadduma?

⁸ Maparagsaktayo ni Jehova no iyebkastayo ti pammatitayo. Masiguradotayo a dengdenggennatayo ni Jehova ken naimpusuan nga apresiarenna ti panagreggettayo nga agkomento iti gimong. (Basaen ti Malakias 3:16.) Ipakitana ti apresasionna babaen ti panangbendisionna kadatayo no ikagumaantayo a paragsaken.​—Mal. 3:10.

⁹ Nalawag ngarud nga adda dagiti nasayaat a rason nga agkomentotayo iti gimong. Ngem mabalin nga agnerbios latta ti dadduma a mangitayag iti imada. No kasta ti marikriknam, saanka koma a maupay. Usigentayo ti dadduma a prinsipio ti Biblia, sumagmamano nga ehemplo, ken dadduma a suhestion a makatulong tapno mas makapagkomentotayo iti gimong.

10. (a) Ania ti pakadanagan ti adu kadatayo? (b) Apay a nasayaat a seniales ti panagnerbios a sumungbat?

¹⁰ Agnerbioska kadi uray pampanunotem pay laeng nga itayag ti imam? No wen, dika agmaymaysa. Kinaagpaysuanna, agnerbios no agkomento ti kaaduan kadatayo. Sakbay a malabanam daytoy a rikna, ammuem pay ti rason no apay nga agnerbioska. Maamakka kadi baka malipatam ti kayatmo nga ibaga wenno sabali ti maibagam? Madanaganka kadi amangan no ti komentom ket saan a kas kapintas ti komento ti dadduma? Kinapudnona, mabalin a nasayaat a seniales dagita. Ipakitada a napakumbabaka ken ibilangmo a nangatngato ngem sika ti dadduma. Kayat ni Jehova dayta a kualidad. (Sal. 138:6; Fil. 2:3) Ngem kayatna met nga idaydayawmo ken paregtaem dagiti kakabsatmo iti gimong. (1 Tes. 5:11) Ay-ayatennaka ken itedna ti tured a kasapulam.

11. Aniada a Nainkasuratan a palagip ti makatulong kadatayo?

¹¹ Usigem ti dadduma a Nainkasuratan a palagip. Kuna ti Biblia nga agkamalitayo amin iti maibaga ken iti panangibagatayo iti dayta. (Sant. 3:2) Ammo ni Jehova a saantayo a perpekto, ket ammo met dayta dagiti kakabsat. (Sal. 103:12-14) Kapamiliatayo ida iti naespirituan, ket ay-ayatendatayo. (Mar. 10:29, 30; Juan 13:35) Maawatanda a no dadduma saan a ti kayattayo nga ikomento ti maibagatayo.

12-13. Ania ti masursurotayo iti ehemplo da Nehemias ken Jonas?

¹² Panunotem ti sumagmamano nga ehemplo iti Biblia a makatulong tapno malabanam ti nerbiosmo. Lagipem ni Nehemias, a nagserbi iti palasio ti mannakabalin nga ari. Nalidayan ta nangngegna a nadadael dagiti pader ken ruangan ti Jerusalem. (Neh. 1:1-4) Panunotem laengen ti nerbiosna idi dinamag ti ari no apay a naliday! Dagus a nagkararag ni Nehemias sa simmungbat. Idi nangngeg daytoy ti ari, adu ti inaramidna a nakatulong iti ili ti Dios. (Neh. 2:1-8) Panunotem met ni Jonas. Idi imbaga ni Jehova nga agsao ni Jonas kadagiti taga-Nineve, permi ti butengna nga uray la napan iti sabali a direksion. (Jon. 1:1-3) Ngem iti tulong ni Jehova, naaramid ni Jonas ti nakaibaonanna. Ket nakatulong kadagiti taga-Nineve ti mensahena. (Jon. 3:5-10) Masursurotayo ken Nehemias ti kinapateg ti panagkararag sakbay a sumungbattayo. Masursurotayo met ken Jonas a tulongannatayo ni Jehova nga agserbi kenkuana uray kasano kakaro ti butengtayo. No panunotentayo, mas nakabutbuteng kadi dagiti kakabsat iti kongregasion ngem kadagiti taga-Nineve?

¹³ Ania dagiti praktikal a pamay-an a makatulong tapno makaparegta ti komentom iti gimong? Pagsasaritaantayo ti sumagmamano a suhestion.

14. Apay a masapul nga agsaganatayo a naimbag para kadagiti gimongtayo, ken kaano koma nga aramidentayo dayta?

¹⁴ Agsaganaka para iti tunggal gimong. No nasapaka nga agplano ken agsaganaka a naimbag, dakdakkelto ti kompiansam nga agkomento. (Prov. 21:5) Siempre, saan nga agpapada ti rutinatayo. Ni Eloise, a balo nga agtawenen iti nasurok nga 80, nasapa iti lawas nga agsagana iti Panagadal iti Pagwanawanan. Kinunana, “Ad-adda a maragsakanak kadagiti gimong no nasapsapa nga agadalak.” Ni Joy, nga adda full-time a trabahona, ket mangilasin iti tiempona iti Sabado tapno agadal iti Pagwanawanan. “Kayatko a presko iti isipko ti mapagadalan,” imbagana. Ni Ike, nga okupado a panglakayen ken payunir, kunana, “Nakitak a nasaysayaat no bingaybingayek ti panagadalko iti ab-ababa nga oras iti makalawas imbes a pampaminsanek.”

15. Kasano a makapagsaganaka a naimbag para iti gimong?

¹⁵ Ania ti ramanen ti panagsagana a naimbag para iti gimong? Rugiam ti panagadalmo babaen ti panangikararagmo ken Jehova iti nasantuan nga espiritu. (Luc. 11:13; 1 Juan 5:14) Kalpasanna, mangiwayaka iti sumagmamano a minuto a mangpanunot iti paulo, subtitulo, ilustrasion, ken kahon a pangisuro. Bayat ti panangadalmo iti kada parapo, ikagumaam a basaen dagiti naisitar a teksto. Utobem ti impormasion, nangruna dagiti punto a kayatmo a komentuan. No nasaysayaat ti panagsaganam, ad-adda a magunggonaanka ken nalaklakakanto nga agkomento.​—2 Cor. 9:6.

16. Ania dagiti tool a magun-odam, ken kasano nga us-usarem dagita?

¹⁶ No posible, usarem dagiti digital tool iti lengguahe a maawatam. Babaen ti organisasion ni Jehova, impaayannatayo kadagiti digital tool a tumulong iti panagsaganatayo para iti gimong. Tulongannatayo ti JW Library^® app nga agi-download iti maadal a publikasion iti gadyettayo. Isu a makapagadaltayo​—wenno mabasa wenno mangngegtayo ti maadal a material—​iti aniaman nga oras ken lugar. Adda dagiti mangus-usar iti daytoy a tool tapno agadalda bayat ti lunch break iti trabaho wenno iti eskuelaan wenno bayat nga agbibiaheda. Gapu iti Watchtower Library ken Watchtower ONLINE A LIBRARIA^™, nakalaklakatayo a mabirokan dagiti punto iti maadal a material a kayattayo nga ad-adda a sukimaten.

17. (a) Apay a nasayaat ti agisagana iti sumagmamano a komento? (b) Ania ti naadalmo iti video nga Agbalinka a Gayyem ni Jehova—Isaganam ti Komentom?

¹⁷ No posible, agisaganaka iti sumagmamano a komento iti kada panagadal. Apay? Gapu ta mabalin a saan a sika ti maawagan no agtayagka. Mabalin nga adda dagiti kagiddanmo nga agtayag, ket baka maysa kadakuada ti pilien ti konduktor. Tapno saan nga agsobra ti oras iti gimong, mabalin a limitaran ti konduktor ti bilang ti komento iti espesipiko a punto. Isu a dika koma masuron wenno maupay no saannaka a maawagan a dagus. No mangisaganaka iti sumagmamano a komento, ad-adunto ti gundawaymo a makapagkomento. Mabalin a ti maysa kadagiti komento nga isaganam ket ti panagbasa iti teksto. Ngem no kabaelam, mangisaganaka met iti komento iti bukodmo a sasao.b

18. Apay nga ababa koma ti komentom?

¹⁸ Agkomento iti ababa. Masansan a mas makaparegta ti ababa ken simple a komento. Isu nga ikagumaam ti sumungbat iti ababa. Padasem a limitaran dayta iti agarup 30 a segundo. (Prov. 10:19; 15:23) No adun a tawen a sumungsungbatka iti gimong, adda napateg nga akemmo​—mangipakitaka iti nasayaat nga ulidan babaen ti panagkomentom iti ababa. No komplikado ti komentom nga agpaut iti sumagmamano a minuto, baka mabainton ti dadduma ta panunotenda a saan a kas kenka ti kalaingda a sumungbat. Kasta met, ad-adu ti makapagkomento iti gimong no ababa dagiti komento. Nangnangruna no sika ti umuna a maawagan, simple ken direkta koma ti sungbatmo iti saludsod. Dimo dakamaten ti amin a punto iti parapo. No naalan ti kangrunaan a punto ti parapo, mabalinmo a komentuan ti dadduma pay a punto.​—Kitaen ti kahon nga “Ania ti Mabalinko a Komentuan?”

19. Kasano a matulongannaka ti konduktor, ngem ania ti masapul nga aramidem?

¹⁹ Ibagam iti konduktor no ania a parapo ti kayatmo a komentuan. No kayatmo nga aramiden daytoy, asitgam ti konduktor sakbay pay a mangrugi ti gimong. No daytan a parapo ti makomentuan, dagus nga itayagmo a naimbag ti imam tapno makita ti konduktor.

20. Kasano a ti gimong ti kongregasion ket kas iti panagpapangan dagiti aggagayyem?

²⁰ Ibilangmo dagiti gimong ti kongregasion kas panagpapangan dagiti nadekket nga aggagayyem. Ipapanmo nga implano ti dadduma a gagayyem iti kongregasion nga agpapangankayo ket pagsagsaganaendaka iti simple a makan. Ania ti aramidem? Baka medio madanaganka, ngem ikagumaam ti mangitugot iti makan a kayat ti amin. Ni Jehova, a Mangaw-awis kadatayo, ket nangisagana iti lamisaan a napno iti naimbag a bambanag para kadatayo iti gimongtayo. (Sal. 23:5; Mat. 24:45) Ket maragsakan no mangitugottayo iti simple a regalo, ti kasayaatan a maitedtayo. Isu nga agsaganaka a naimbag ken ikagumaam ti agkomento. Iti kasta, saanka laeng a mangan iti lamisaan ni Jehova no di ket adda pay awitmo a regalo para iti kongregasion.