Agbantaykayo Kayatnakayo nga Alun-onen ni Satanas!

 1. Kasano a nagbalin a Satanas ti maysa nga espiritu a parsua?

NAGSAYAAT idi ti takderna iti imatang ni Jehova. Ngem idi agangay, tinarigagayan daytoy nga espiritu a parsua nga isu ti pagdayawan dagiti tattao. Imbes nga iwaksina ti dakes a tarigagayna, tinarakenna ketdi dayta agingga a nangibunga iti basol. (Sant. 1:14, 15) Ammotayo a ni Satanas dayta. Isu ket “saan a nagtakder a di maisin [wenno, nagtalinaed] iti kinapudno.” Nagrebelde ken Jehova ket nagbalin nga “ama ti kinaulbod.”​—Juan 8:44.

2, 3. Ania ti ipalgak dagiti termino a “Satanas,” “Diablo,” “serpiente,” ken “dragon” maipapan iti kangrunaan a kabusor ni Jehova?

² Nanipud nagrebelde ni Satanas, isun ti kangrunaan a kabusor ni Jehova ken dagiti tattao. Ipakita dagiti titulo a naited ken Satanas a nakaro ti kinadakesna. “Bumusbusor” ti kayat a sawen ti Satanas. Ipakpakita dayta a busbusoren daytoy nadangkes nga espiritu ti kinasoberano ti Dios wenno ti kalinteganna a mangituray. Kagurgurana ken lablabananna dayta. Kangrunaanna, kayat ni Satanas nga agpatingga ti panangituray ni Jehova.

³ Iti Apocalipsis 12:9, naawagan ni Satanas iti Diablo, kayatna a sawen “Manangpardaya.” Ipalagip dayta ti panangpadakes ni Satanas ken Jehova idi imbagana nga isu ket agul-ulbod. Dagiti sasao a “kadaanan a serpiente” ipalagipna ti panangusar ni Satanas iti uleg a mangallilaw ken Eva idiay Eden. Dagiti sasao a “ti dakkel a dragon” ipalagipna ti langa ti nakabutbuteng nga animal a maitutop a mangiladawan iti kinarungsot ni Satanas a manglapped iti panggep ni Jehova ken mangdadael kadagiti adipenna.

 4. Ania ti mausig iti daytoy nga artikulo?

⁴ Nalawag a ni Satanas ti kangrunaan a mangdadael iti kinatarnawtayo. Gapuna, pakdaarannatayo ti Biblia: “Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.” (1 Ped. 5:8) Usigentayo ngarud ti tallo a kababalin ni Satanas a mangipaganetget no apay a masapul a salaknibantayo ti bagitayo manipud iti daytoy dakes a kabusor ni Jehova ken ti ilina.

5, 6. (a) Mangted kadagiti pagarigan a mangipakita a nakabilbileg dagiti espiritu a parsua. (b) Apay a maibagatayo a ni Satanas ket addaan iti “pannakabalin a mangyeg iti ipapatay”?

⁵ Nakabilbileg dagiti espiritu a parsua a maawagan iti anghel. (Sal. 103:20) Natantan-ok, nasirsirib, ken napigpigsada ngem dagiti tattao. Siempre, us-usaren dagiti matalek nga anghel ti pannakabalinda iti nasayaat. Kas pagarigan, pinapatay ti maysa nga anghel ni Jehova ti 185,000 a soldado ti Asiria. Nakaskasdaaw dayta a gapuanan nga imposible a maaramidan ti maysa a tao ken uray pay ti buyot dagiti soldado. (2 Ar. 19:35) Iti sabali a gundaway, inusar ti maysa nga anghel ti naisangsangayan a pannakabalin ken siribna a mangiruar kadagiti apostol ni Jesus iti pagbaludan. Nupay adda laeng dagiti guardia iti asideg, dida nadnadlaw a linuktan ti anghel dagiti nakandaduan a ruangan, pinaruarna dagiti apostol, sa inrikep ken kinandaduanna met laeng dagiti ruangan!​—Ara. 5:18-23.

⁶ Iti sabali bangir, us-usaren ni Satanas ti pannakabalinna iti dakes a pamay-an. Ket talaga a nagbileg ti pannakabalin ken impluensiana! Dakamaten ti Biblia nga isu “ti agturay iti daytoy a lubong” ken “ti dios daytoy a sistema ti bambanag.” (Juan 12:31; 2 Cor. 4:4) Addaan pay ni Satanas a Diablo iti “pannakabalin a mangyeg iti ipapatay.” (Heb. 2:14) Saan a kayat a sawen dayta a direkta a papatayenna ti amin a tattao. Nupay kasta, agraraira ti naranggas a kababalinna iti daytoy a lubong. Maysa pay, gapu ta namati ni Eva iti imbaga ni Satanas ken nagsukir ni Adan iti Dios, nagsaknap ti basol ken ipapatay iti amin a tattao. (Roma 5:12) No kasta, addaan ti Diablo iti “pannakabalin a mangyeg iti ipapatay,” isut’ gapuna nga inawagan ni Jesus iti “mammapatay.” (Juan 8:44) Talaga a nakabilbileg a kabusor ni Satanas!

 7. Kasano nga impakita dagiti demonio a nakabilbilegda?

⁷ Saan laeng a ni Satanas ti masapul a busorentayo no di ket uray dagiti dimmasig kenkuana iti isyu maipapan iti kalintegan ti Dios a mangituray iti intero nga uniberso. Karaman iti dayta ti nagadu a rebelde nga espiritu wenno demonio. (Apoc. 12:3, 4) Namin-adu nga impakita dagiti demonio ti nagpaiduma a bilegda, a nangparigat kadagiti tattao. (Mat. 8:28-32; Mar. 5:1-5) Ngarud, ditay tagtagibassiten ti pannakabalin dagiti nadangkes nga anghel wenno ti “agturay kadagiti sairo.” (Mat. 9:34) No awan ti tulong ni Jehova, ditay pulos maparmek ni Satanas.

 8. (a) Ania ti kayat ni Satanas nga aramiden? (Kitaen ti ladawan iti rugi ti artikulo.) (b) Iti kapaliiwam, kasano nga iparparangarang ti lubong ti kinarungsot ni Satanas?

⁸ Inyarig ni apostol Pedro ni Satanas iti “leon a ngumerngernger.” Sigun iti maysa a reperensia, ti Griego a sao a naipatarus a “ngumerngernger” ipamatmatna ti “uni ti mabisbisin a narungsot nga animal.” Maitutop dayta a mangdeskribir iti kinarungsot ni Satanas! Uray kontroladonan ti intero a lubong, saan latta a mapnek. (1 Juan 5:19) Para kenkuana, ti lubong ket kasla “pampaganas” laeng iti pannangan. Ti “kangrunaan a putahe,” wenno kangrunaan a puntiriana, ket dagiti napulotan nga adda pay laeng ditoy daga ken ti “sabsabali a karnero” a kaduada. (Juan 10:16; Apoc. 12:17) Kayat ni Satanas nga alun-onen dagiti adipen ni Jehova. Makita ti kinarungsotna iti panangidadanesna kadagiti pasurot ni Jesus manipud idi umuna a siglo agingga ita.

9, 10. (a) Kasano a pinuntiria ni Satanas ti nasion ti Israel tapno malapdan ti panggep ni Jehova? (Mangted kadagiti pagarigan.) (b) Apay a pinuntiria ni Satanas ti nagkauna nga Israel? (c) Panagkunam, ania ti reaksion ti Diablo no makaaramid ita iti nadagsen a basol ti maysa nga adipen ni Jehova?

⁹ Iti panagregget ni Satanas a manglapped iti panggep ti Dios, ipakpakitana nga isu ket narungsot iti sabali pay a pamay-an. Saan a maasian ti mabisbisin a leon iti biktimana sakbay nga alun-onenna, ken saan nga agbabawi kalpasanna. Saan met a maasian ni Satanas kadagiti biktimana. Kas pagarigan, ania ngata ti rikna ni Satanas a Diablo no makaaramid dagiti Israelita iti basol kas iti seksual nga immoralidad ken kinaagum? No mabasam ti nakalkaldaang a nagtungpalan ni Zimri, a nakaaramid iti immoralidad, ken ti naagum a ni Gehazi, “makitkitam” kadi ni Satanas a maragragsakan iti panagballigina?​—Num. 25:6-8, 14, 15; 2 Ar. 5:20-27.

¹⁰ Adda rason ni Satanas a mangpuntiria iti nagkauna nga Israel. Dayta ngamin a nasion ti pagtaudan ti Mesias​—ti mangrumekto ken Satanas ken mangalangon iti kinasoberano ni Jehova. (Gen. 3:15) Saan a kayat ni Satanas nga anamongan ti Dios dagiti Israelita, isu nga inaramidna ti amin a kabaelanna tapno agbasolda. Saantayo koma nga ipapan a naasian ni Satanas idi nakikamalala ni David wenno nakipagrikna ken Moises idi saanen a napalubosan a sumrek iti Naikari a Daga. Kinapudnona, maragragsakan ni Satanas no makaaramid iti nadagsen a basol ti maysa nga adipen ni Jehova. Nalabit dagita pay ketdi a panagballigi ti us-usaren ti Diablo a mangrurod ken Jehova.​—Prov. 27:11.

11. Apay a pinuntiria ni Satanas ni Sara?

¹¹ Kagurgura ni Satanas ti kapuonan ti Mesias. Kas pagarigan, kitaentayo no ania ti napasamak kalpasan nga imbaga ni Jehova ken Abraham nga isu ket agbalin a “dakkel a nasion.” (Gen. 12:1-3) Idi adda da Abraham ken Sara idiay Egipto, pinaipan ni Faraon ni Sara iti palasiona tapno agbalin nga asawana. Ngem bimmallaet ni Jehova ket insalakanna ni Sara iti dayta a narigat a situasion. (Basaen ti Genesis 12:14-20.) Sakbay a nayanak ni Isaac, adda napasamak idiay Gerar a kaasping dayta. (Gen. 20:1-7) Plano kadi ni Satanas dagita? Ninamnama kadi ni Satanas a maallukoy ni Sara iti nagdadakkel ken nagpipintas a palasio da Faraon ken Abimelec gapu ta pinanawanna ti narang-ay a siudad ti Ur ken nagnaed kadagiti tolda? Pinanunot ngata ni Satanas a saan nga agmatalek ni Sara ken lakayna​—uray pay ken Jehova​—ket makiasawa iti sabali? Awan ti ibaga ti Biblia, ngem maragsakan la ketdi ti Diablo no mapukaw ni Sara ti pribilehiona nga agbalin a kapuonan ti Mesias. Awan aniamanna ken Satanas no madadael ti panagasawa ken reputasion dayta a nagsayaat a babai agraman ti relasionna ken Jehova. Nakaul-ulpit a talaga ni Satanas!

12, 13. (a) Kasano nga impakita ni Satanas ti kinarungsotna idi nayanak ni Jesus? (b) Panagkunam, ania ti panagrikna ni Satanas kadagiti agtutubo a mangay-ayat ken mangikagkagumaan nga agserbi ita ken Jehova?

¹² Nayanak ni Jesus ginasut a tawen kalpasan a nagbiag ni Abraham. Saanmo nga ipapan a pinanunot ni Satanas a dayta a maladaga ket makaay-ayo wenno maipatpateg. Ammona a dayta a maladaga daydiay naikari a Mesias. Kinapudnona, ni Jesus ti kangrunaan a paset ti kaputotan ni Abraham, daydiay ‘mangdadaelto kadagiti aramid ti Diablo.’ (1 Juan 3:8) Maibaga ngata ni Satanas a dina mairusok ti pumatay iti maysa a maladaga? Saan. Awan bibiangna no ania ti umiso wenno di umiso. Ket no maipapan iti ubing a ni Jesus, dagus a nagtignay tapno mapapatay. Kasano?

¹³ Idi naammuan ni Ari Herodes kadagiti astrologo a nayanaken daydiay “ari dagiti Judio,” nakapungtot ket determinado a mangpapatay iti maladaga. (Mat. 2:1-3, 13) Tapno masiguradona dayta, imbilinna a mapapatay ti amin nga ubbing a lallaki a dua ti tawenna ken nababbaba nga agnanaed iti Betlehem ken kadagiti distritona. (Basaen ti Mateo 2:13-18.) Nailisi ni Jesus iti nakaam-ames a panangpapatay. Ngem ania ti ipamatmat dayta maipapan iti kabusortayo a ni Satanas? Nalawag a saan nga ipatpateg ti Diablo ti biag ti tao. Awan pay asina kadagiti ubbing. Talaga a ni Satanas ket maysa a “leon a ngumerngernger.” Saantayo ngarud a tagtagibassiten ti kinarungsotna!

14, 15. Apay a maibagam a ni Satanas “binulsekna ti pampanunot dagiti di manamati”?

¹⁴ Al-alilawen ni Satanas dagiti tattao tapno mayadayoda iti naayat a Dios a ni Jehova. (1 Juan 4:8) Babaen iti dayta, laplapdan ni Satanas dagiti tattao nga agbalin a “sipapanunot iti naespirituan a kasapulanda.” (Mat. 5:3) No kasta, ti Diablo “binulsekna ti pampanunot dagiti di manamati, tapno ti lawag ti nadayag a naimbag a damag maipapan iti Kristo, a ladawan ti Dios, saan koma nga agsilnag.”​—2 Cor. 4:4.

¹⁵ Ti ulbod a relihion ti maysa kadagiti kangrunaan nga us-usaren ni Satanas a mangallilaw. Maragragsakan no makitana dagiti tattao nga agdaydayaw kadagiti inapo, nakaparsuaan, wenno animal, malaksid ken Jehova a “mangalkalikagum iti naipamaysa a debosion”! (Ex. 20:5) Adu ti mangipagarup nga umiso ti panagdaydayawda iti Dios ngem naadipenda kadagiti ulbod a sursuro ken awan mamaayna a ritual. Nakakaasida a kas kadagidiay nangibagaan ni Jehova: “Apay nga agbaybayadkayo iti kuarta maipaay iti saan a tinapay, ket apay nga agbannogkayo iti agbanag iti di pannakapnek? Umimdengkayo a sipapasnek kaniak, ket kanenyo ti naimbag, ket iti mismo a kinalukmeg maragsakan koma iti napalalo ti kararuayo.”​—Isa. 55:2.

16, 17. (a) Apay nga imbaga ni Jesus ken Pedro: “Inka iti likudak, Satanas”? (b) Kasano a mabalin a maallilawnatayo ni Satanas tapno saantayon nga agbantay?

¹⁶ Mabalin met a maallilaw ni Satanas uray dagiti naregta nga adipen ni Jehova. Kas pagarigan, panunotentayo ti napasamak idi imbaga ni Jesus kadagiti adalanna nga isu ket dandanin matay. Kinuna ni apostol Pedro ken ni Jesus: “Kaasiam ta bagim, Apo; saanto a pulos mapasamak kenka daytoy a pagtungpalan.” Nupay nasayaat ti motibona, prangka a kinuna ni Jesus: “Inka iti likudak, Satanas!” (Mat. 16:22, 23) Apay nga inawagan ni Jesus ni Pedro iti “Satanas”? Ammo ngamin ni Jesus ti sumaruno a mapasamak. Dandani idin mapapatay kas subbot a sakripisio ket paneknekanna nga ulbod ti Diablo. Iti dayta a nakapatpateg a tiempo iti pakasaritaan ti tao, saan a dayta ti panawen tapno ‘kaasian’ ni Jesus ti bagina. Naragsakan la ketdi ni Satanas no saan a nagtultuloy a nagbantay ni Jesus.

¹⁷ Asidegen nga agpatingga daytoy a sistema ti bambanag ken agbibiagtayon iti napeggad a tiempo. Kayat ni Satanas a ‘kaasiantayo’ ti bagitayo babaen ti panagbalin a naballigi iti daytoy a lubong. Kayatna a malipatantayo nga agbibiagtayon iti napeggad nga al-aldaw ket saantayon nga agbantay. Dimo ipalubos a mapasamak dayta! Imbes ketdi, ‘agtultuloyka nga agbantay.’ (Mat. 24:42) Saanka nga agpaallilaw iti propaganda ni Satanas a mabayag pay ti panungpalan wenno saanen a dumteng dayta.

18, 19. (a) Ania ti kayat ni Satanas a panunotentayo tapno maallilawnatayo? (b) Kasano a tultulongannatayo ni Jehova nga agtalinaed a siririing ken agtultuloy nga agbantay?

¹⁸ Adda pay sabali a pamay-an ni Satanas a mangallilaw kadatayo. Kayatna a patientayo a saannatayo nga ay-ayaten ti Dios ken saanna a pakawanen dagiti basoltayo. Amin dagita ket karaman iti makaallilaw a propaganda ni Satanas. Ngem siasino a talaga ti saan nga ay-ayaten ni Jehova? Ni Satanas. Ken siasino a talaga ti saan a pakawanen ti Dios? Ni met laeng Satanas. Ngem ipasigurado ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Heb. 6:10) Apresiaren ni Jehova ti panagreggettayo a mangparagsak kenkuana, ken saan nga ubbaw ti panagserbitayo kenkuana. (Basaen ti 1 Corinto 15:58.) Ditay ngarud paallilaw iti propaganda ni Satanas.

¹⁹ Kas naadaltayon, ni Satanas ket nakabilbileg, narungsot, ken manangallilaw. Kasanotayo a maparmek dayta a nakaam-amak a kabusor? Tulongannatayo ni Jehova. Babaen iti Saona, ipakaammona kadatayo dagiti taktika ni Satanas tapno “saantayo nga ignorante kadagiti gakatna.” (2 Cor. 2:11) No ammotayo dagita, ad-adda a makapagtalinaedtayo a siririing ken makapagtultuloytayo nga agbantay. Ngem saan nga umdas a basta ammotayo dagiti taktika ni Satanas. Kuna ti Biblia: “Busorenyo ti Diablo, ket isu agtalawto kadakayo.” (Sant. 4:7) Iti sumaruno nga artikulo, usigentayo ti tallo a pamay-an tapno maparmektayo ni Satanas.