SALEM

[Talna].

Maysa a nagkauna a siudad a nagserbian ni Melquisedec kas ari ken padi. (Ge 14:18) Ti Hebreo nga ispeling ti “Salem,” a naitipon iti nagan a Jerusalem, ket mangipamatmat iti nagkadua a porma, ngarud madepinar a kaipapananna ti “Nagkadua a Talna.” Patalgedan ti naipaltiing a sasao iti Hebreo 7:2 a “Talna” ti kaipapanan dayta a nagan.

Iti nagkauna a patpatien dagiti Judio, ti Salem ket isu ti Jerusalem, a pasingkedan daytoy ti Nainkasuratan a pammaneknek. Nasabet ni Abraham ti ari ti Sodoma ken ni Melquisedec idiay “Nababa a Tanap ti ari.” Yantangay ni Absalom nga anak ni Ari David ket nangipatakder sadiay iti maysa a monumento sinigsiglo kalpasanna, daytoy a nababa a tanap ket asideg la ketdi iti Jerusalem, ti kabesera ti pagarian. (Ge 14:17, 18; 2Sm 18:18) Iti kinaagpaysuanna, ti sao a “Salem” ket naitipon iti nagan a “Jerusalem,” ket ti salmista inusarna dayta a kadua ti “Sion.” (Sal 76:2) Kasta met, mayanatup nga agbalin ni Melquisedec kas ari ken padi iti mismo a lugar a nagserbian idi agangay ti ar-ari iti Davidiko a linia ken dagiti Levita a papadi ken sadiay met a naidaton ni Jesu-Kristo kas sakripisio, daydiay napili nga agbalin nga ari ken padi “maitunos iti kasasaad ni Melquisedec.”​—Heb 3:1; 7:1-3, 15-17.