Agnanayon a Tagiragsakem Dagiti Bendision ti Namarsua

Inkari ti Dios ken propeta Abraham a “mabendisionanto ti amin a nasion iti daga” babaen ti maysa kadagiti kaputotanna. (Genesis 22:18) Asino dayta?

Agarup 2,000 a tawenen ti napalabas, inikkan ti Dios ni Jesus a kaputotan ni Abraham iti pannakabalin nga agaramid kadagiti nakaskasdaaw a milagro. Ipakita dagita a milagro a masagrap dagiti nasion ti inkari ti Dios ken Abraham babaen ken Jesus.​—Galacia 3:14.

Dagiti milagro nga inaramid ni Jesus ipakitana nga isu ti pinili ti Dios nga usarenna a mangbendision iti sangatauan. Ipakita pay dagita no kasano nga usaren ti Dios ni Jesus a mangbendision kadagiti tattao iti agnanayon. Ipakita dagiti milagro ni Jesus ti dadduma a makaay-ayo a kualidadna.

Nadungngo​—Inagasan ni Jesus dagiti masakit.

Naminsan impakaasi ti maysa nga agkukutel ken ni Jesus nga agasanna. Sinagid ni Jesus sa kinunana: “Kayatko!” Dagus a napukaw ti kukutelna.​—Marcos 1:40-42.

Naparabur​—Pinakan ni Jesus dagiti mabisin.

Saan a kayat ni Jesus a mabisinan dagiti tattao. Saan la a naminsan a simimilagro a pinakanna ti rinibu a tattao babaen ti panangpaaduna iti sumagmamano a tinapay ken babassit nga ikan. (Mateo 14:17-21; 15:32-38) Napnekda a nangan ken adu pay ti nabati a makan.

Naasi​—Pinagungar ni Jesus dagiti natay.

“Naasian” ni Jesus iti agladladingit a balo isu a pinagungarna ti kakaisuna nga anakna gapu ta awanen ti mangaywan kenkuana.​—Lucas 7:12-15.