NACOR

1. Ama ni Tare ken apong ni Abraham. Ni Nacor ket anak ni Serug ken kaputotan ni Sem. Nagbiag iti 148 a tawen (2177 agingga iti 2029 K.K.P.).​—Ge 11:22-26; 1Cr 1:24-27; Lu 3:34-36.

2. Anak ni Tare; apoko ni Nacor (Num. 1); ken kabsat ni Abraham. (Ge 11:26; Jos 24:2) Nagbalin nga asawa ni Nacor ni Milca, a kabsat ni Lot ken anak ti sabali pay a kabsat ni Nacor, a ni Haran, isu a kaanakan ni Nacor. Ni Nacor ket naaddaan iti 8 nga annak ken Milca, ken naaddaan iti 4 pay nga annak iti kamalalana a ni Reuma, nga agdagup iti 12, a ti dadduma kadakuada ket nagbalin a panguluen dagiti tribu. (Ge 11:27, 29; 22:20-24) Babaen iti anakna a ni Betuel, ni Nacor ket nagbalin nga apong da Laban ken Rebecca, ken apong-iti-tumeng da Lea, Raquel, Jacob (Israel), ken Esau.​—Ge 24:15, 24, 47; 29:5, 16; 1Cr 1:34.

Iti salaysay ti Genesis maipapan iti ipapanaw da Tare ken Abraham iti Ur dagiti Caldeo, saan a nairaman ti nagan ni Nacor iti listaan dagidi nagdaliasat. (Ge 11:31) Nupay kasta, agparang a simmurot idi agangay, ta nagdaliasat a nagpa-Haran ti adipen ni Abraham idi nagsapul iti agbalin nga asawa ni Isaac, ti lugar a nagnaedan ken nakatayan ni Tare, ken ti nagnaedan ti apoko ni Nacor a ni Laban idi napan kenkuana ni Jacob. (Ge 11:31, 32; 12:4; 27:43) Nakadanon ti adipen ni Abraham “iti siudad ni Nacor,” mabalin nga iti mismo a Haran wenno iti maysa a lugar iti asidegna, a nalabit isu ti Nahur a masansan a madakamat iti nadumaduma a tapi ti Mari idi maikadua a milenio K.K.P. (Ge 24:10; 29:4; The Biblical Archaeologist, 1948, p. 16) Ket idi simmina ni Jacob ken Laban, immawag ni Laban iti “dios ni Abraham ken ti dios ni Nacor” a mangukom iti nagbaetanda.​—Ge 31:53; kitaenyo ti HARAN Num. 4.