Pinanggep ti Dios a Tagiragsaken ti Tao ti Biag iti Paraiso

“Ket ni Jehova a Dios innalana ti tao ket insaadna iti minuyongan idiay Eden tapno talonenna ken aywananna.”​—GENESIS 2:15.

 1. Aniat’ orihinal a panggep ti Namarsua maipapan kadagiti natulnog a tattao?

PANGGEP ti Namarsua idi pungangay, ken isu pay met laeng ti panggepna, a tagiragsaken dagiti natulnog a tattao ti biag a saanto a lumaklakay, nga agay-ayus a kanayon ti kinasalibukag ti kinaagtutubo, nga awan panagsiksikorna, a kanayon addaan ti maikari a panggep a tungpalen, maysa a biag ti panagayat ken pannakaayat iti pudpudno, awan agumna a pamay-an, a naan-anay​—iti maysa a paraiso!​—Genesis 2:8; idiligyo ti Lucas 23:42, 43.

 2. (a) Ania ngatat’ napasamak idi naaddaan puot ti immuna a tao? (b) Kaanot’ pannakaparsua ti immuna a tao, sadino, ken iti ania a tiempo iti tawen?

² Tapno mabigbig dayta, tumaliawkayo iti kaparparsua nga Adan idi damo a naaddaan ti puotna, idi sinukimatna ti mismo a bagina ken amin a nakitana ken nangngegna iti aglawlawna, idi damo a malasinna nga isut’ sibibiag! Napasamak daytoy agarup 6,000 a tawen ti napalabasen, idi tawen 4,026 kasakbayan ti Kadawyan a Panawentayo, sigun iti panagbilang ti panawen a naited iti Santa Biblia. Daytat’ napasamak idiay paset ti daga a makunkuna itattan kas Turkia, wenno iti abagatan a laud a paset iti makunkuna itan nga Asia, idiay kaparanget ti Karayan Eufrates ken Karayan Tigris, ket ngarud idiay umamianan a kagudua ti naindagaan a globotayo. Ti panawen ket agarup Oktubre 1, yantangay kaaduan a kadaanan a kalendario ti sangatauan ti nangrugi nga agbilang ti panawen nga as-asideg iti dayta a petsa.

 3. (a) Iti ania a kasasaad a naaddaan biag ti immuna a tao? (b) Aniat’ nagbalin a nagan ti immuna a tao, ken aniat’ kaipapananna?

³ Ti immuna a tao nagbiag a naan-anay a dakkelen, perpekto ti pannakapormana, nasalun-at a naan-anay, perpekto iti moral. Ti nagan a maulit-ulit a naited kenkuana idiay Biblia ti mangipalagip kadatayo iti sustansia a nagtaudanna. Ti naganna ket ’A·dhamʹ.a Ti daga, wenno soil, nga isut’ nakabuklanna ket maaw-awagan ’a·dha·mahʹ. Gapuna ti naganna mabalin maikuna a kaipapananna “Tao a Naindagaan.” Daytoy ti nagbalin a personal a nagan daytoy immuna a tao​—Adan. Ania ngatan a nakaay-ayat ken Adan idi isut’ nagbiag, naaddaan puot, nagbalin a nasaririt a persona!

 4. Ania a karkarna a panagriing iti biag ti awan iti immuna a tao, gapuna isut’ saan nga anak ti ania?

⁴ Idi daytoy immuna a tao, ni Adan, ti nagbiag, nakariing iti nasaririt a kinaaddat’ puotna, ken linuktanna dagiti matana, saanna a nakita ti bagina a nakaidda iti nakabarbarbon a saklut, nga ar-arakupen dagiti napipigsa nga atitiddog nga ima ti maysa a babai a kasla bakes a parsua, a kumkumpet kenkuana ken kumitkita kadagiti matana ken buyogen ti kinalailo nga aw-awagannat’ Nanang. Ti immuna a tao, a ni Adan, awanan ti kasta a karkarna a pannakariing iti biag. Awan nariknana a nainlasagan a pannakirelasion iti maysa a bakulaw, ni uray iti kamaudiananna idi nga isut’ makakita ti maysa. Idi aldaw ti pannakaparsuana, awan aniaman a mangisingasing nga isut’ kaputotan, adayon nga anak, ti maysa a bakulaw wenno aniaman a parsua a kaasping dayta. Kaskasdi, ti kadi immuna a tao, a ni Adan, agtalinaed a masdaawan no kasanot’ itataona? Saan.

 5. Aniat’ piho nga ammo ni Adam maipapan iti sinan-parke a minuyonganna ken maipapan iti bagina?

⁵ Maawatan laeng, nga isut’ nasdaawan no kasanot’ iyaadda amin dagiti napipintas a bambanag a nakitkitana. Nasarakanna ti bagina nga adda iti sinan-parke a minuyongan, maysa a paraiso a saanna a dinisdisenio, inaramid, wenno inyurnos. Kasanot’ iyaadda dagitoy? Kas perpekto nga intelihente, managrason a tao, kayatna a maammuan dayta. Isut’ awanan immuna a kapadasan. Ammona nga isut’ saan a naaramid a kabukbukodanna, tao a timmaud nga is-isuna. Isut’ saan a rimkuas iti daytoy a kasasaad iti kabukbukodanna a panagregget.​—Idiligyo ti Salmo 100:3; 139:14.

 6. Kasanot’ mabalin a panagrikna ni Adan iti panagbiagna iti maysa a perpekto a naindagaan a pagtaengan?

⁶ Ti immuna a tao, a ni Adan, nalabit maragragsakan unay idi pangrugian daytoy orihinal a naragsak a panagbiag iti maysa a perpekto a naindagaan a pagtaengan tapno mapampanunotna pay no sadinot’ naggapgapuanna ken no apay. Dina matmatngelan a di agaramid kadagiti naragsak a panagdir-i. Nasarakanna ti sasao a rummuar iti ngiwatna. Nangngegna ti bagina nga agsasao iti pagsasao ti tao, a nagsao maipapan kadagiti nakaay-ayat a bambanag a nakitana ken nangngeganna. Anian a nagsayaat ti kaaddana a sibibiag iti daytoy Paraiso a minuyongan! Ngem bayat a maay-ayo unay a mangpumpunno ti bagina kadagiti impormasion manipud kadagiti amin a makitkitana, dagiti aweng, maang-angotna, ken pannakarikna kadagiti bambanag, isut’ maallukoy itan nga agpanunot. Kadatayo, no datay koma ti naikabil iti kasasaadna, nalabit adda koma misterio maipapan iti intero a banag, maysa a misterio a ditay koma nasolbar a bukbukodtayo.

Awan Misterio Maipapan ti Kaadda ti Tao

 7. Apay a saan a nasdaawan iti nabayag ni Adan maipapan iti pannakakitana nga isut’ sibibiag ken adda iti maysa a paraiso a minuyongan?

⁷ Di nagbayag a ti immuna a tao, a ni Adan, masmasdaawan maipapan ti kasasaad a nakasarakanna iti bagina a sibibiag ken agmaymaysa, nga awan ti kaas-aspingna a makita idiay Paraiso a minuyongan. Isut’ nakangngeg ti maysa a timek, adda maysa nga agsasao. Naawatan ti tao dayta. Ngem sadino ti yan ti agsasao? Awan nakita ti tao nga agsasao. Ti timek naggapu manipud iti di makita a pagturayan, ket daytat’ agsasao kenkuana. Daytat’ timek ti Nangaramid ti tao, ti Namarsuana! Ket ti tao mabalinna ti sumungbat kenkuana iti isu met laeng a pagsasao. Nasarakanna ti bagina a makisasao iti Dios, ti Namarsua. Awan kasapulan ti tao a moderno a sientipiko a radio receiver tapno mangngeganna ti nasantuan a timek. Ti Dios nakipatang kenkuana a direkta kas ti parsuana.

8, 9. (a) Ania a salsaludsod dagiti nasungbatan ken Adan, ket ania a naamaan a panangaywan ken interes ti naipakita kenkuana? (b) Ania a sungbat ti inawat ni Adan manipud nailangitan nga Amana?

⁸ Itan ammo ti tao nga isut’ di agmaymaysa, ket gapu itoy mabalin a nasaysayaat ti panagriknana. Ti isipna ket napunno ti salsaludsod. Mabalinna a maiyimtuod dagita iti Daydiay di makita a makisasao kenkuana. Asinot’ nangaramid kenkuana ken daytoy minuyongan ti ragsak? Adda aya aniaman a panggep iti panagbiag? Ti panangaywan ken interes ti maysa nga ama naipakita iti daytoy immuna a tao, a ni Adan, ta ti salsaludsodna ket nasungbatan iti kapkapnekan ti managpalutpot nga isipna. Ania ngatan a ragsak iti Nangaramid kenkuana, ti Manangted-Biagna, ti nailangitan nga Amana, a mangngegan ti tao a mangrugi nga agsao ken iyebkas dagiti umuna a sasaona! Anian a ragsak ti inted dayta iti nailangitan nga Ama a makangngeg iti anakna a makisasao kenkuana! Ti gagangay nga umuna a saludsod ket, “Kasanot’ iyaaddak?” Maragsakan a sinungbatan ti nailangitan nga Ama daytoy ket iti kasta binigbigna a daytoy immuna a tao ket anakna. Isu ti “anak ti Dios.” (Lucas 3:38) Ni Jehova impabigbigna ti bagina kas ti Ama daytoy immuna a tao, a ni Adan. Manipud nailangitan nga Amana, adtoy ti kababagas iti sungbat nga inawat ni Adan iti saludsodna ken isut’ inyallatiwna kadagiti annakna:

⁹ “Ket ni Jehova binukelna ti tao iti tapuk ti daga ket impuyotna iti agongna ti anges ti biag, ket ti tao nagbalin a kararua a sibibiag. Ket ni Jehova a Dios inkabilna iti maysa a minuyongan iti daya, idiay Eden, ket insaadna idiay ti tao a binukelna. Ket ni Jehova a Dios pinatubona iti daga amin a kayo a nakaay-ayo a makita ken naimbag a kanen, kasta met ti kayo ti biag iti tengnga ti minuyongan ken ti kayo ti pannakaammo ti imbag ken ti dakes. Ket nagayus idiay Eden ti maysa a karayan a mangsibug iti minuyongan ket nanipud idiay nagkapat ti ayusna.”​—Genesis 2:7-10.b

10, 11. (a) Ania dagiti kinapudno a nalawag a naammuan ni Adan, ngem ania pay a dadduma a salsaludsod a kasapulanna ti masungbatan? (b) Ania dagiti sungbat nga inted ti nailangitan nga Ama ken Adan?

¹⁰ Ti nasaririt, kabarbaro nga isip ni Adan ti sigagagar a nangsagepsep iti daytoy makapnek nga impormasion. Ita ammonan nga isut’ di naggapu manipud iti dayta di makita a pagturayan nga isut’ paggapgapuan ti panagsasao ti Nangaramid ken Nangbukel kenkuana. Imbes ketdi, isut’ nabukel manipud iti daga nga isut’ pagnanaedanna ket gapu itoy isut’ naindagaan. Ti Manangted-Biagna ken Amana isu ni Jehova a Dios. Isu ti maysa a “kararua a sibibiag.” Gapu ta inawatna ti biagna manipud ken Jehova a Dios, isu idi ti “anak ti Dios.” Dagiti kayo iti aglawlawna idiay minuyongan ti Eden ti nangpataud ti bungbunga a naimbag a pagtaraon, nga isut’ kanenna ken agbiag kas maysa a kararua a sibibiag. Kaskasdi, apay nga isut’ agtalinaed a sibibiag, ken apay nga isut’ naikabil iti daga, iti daytoy minuyongan ti Eden? Isut’ naan-anay ti pannakabukelna a tao nga addaan kinasaririt ken kadagiti pisikal nga abilidad, ket rebbeng a maammuanna. Kasano, ngarud, ti panangtungpalna iti panggep ti biagna ket iti kasta ay-ayuen ti Nangaramid kenkuana ken Amana babaen iti panangaramid iti nadiosan a pagayatan? Dagiti sungbat kadagitoy maiyanatup a salsaludsod ket naited kadagiti sumaganad nga impormasion:

¹¹ “Ket ni Jehova a Dios innalana ti tao ket insaadna iti minuyongan idiay Eden tapno talonenna ken aywananna. Ket ni Jehova a Dios imbilinna idi tao a kinunana: ‘Kadagiti amin a kayo iti minuyongan mangankanto a siwayawaya. Ngem ti aggapu iti kayo ti pannakaammo ti imbag ken ti dakes saanmonto a kanen, ta iti aldaw a pannanganmo iti daydiay mataykanto a di bumurong.’”​—Genesis 2:15-17.

12. Agpaay iti ania ti nagyamanan ni Adan iti Namarsuana, ken kasano a maipadayag ti tao ti Dios?

¹² Mabalin a nagyamanan ni Adan iti Namarsuana iti panangtedna kenkuana ti maysa a banag a mamagbalin kenkuana nga okupado a naimbag iti daytoy nagpintas a minuyongan ti Eden. Itan ammonan ti pagayatan ti Namarsuana, ket mabalinna ti mangaramiden ti maysa a banag ditoy daga nga agpaay Kenkuana. Isu itan ti addaan naipabaklay a responsabilidad, ti panangtalon iti minuyongan ti Eden ken panangaywan iti dayta, ngem daytat’ banag a makaparagsak nga aramiden. Babaen iti panangaramid iti daytoy, mabalinna a pagbalinen ti minuyongan ti Eden a nakapimpintas a mangyeg dayag ken dayaw iti Nangaramid iti dayta, a ni Jehova a Dios. Kaanoman a mabisin ni Adan manipud panagtartrabahona, mabalinna ti mangan a kapkapnekanna manipud kadagiti kayo iti minuyongan. Iti daytoy a pamay-an mabalinna a pabaruen ti pigsana ket maitultuloyna ti naragsak a biagna a di nakedngan​—awan inggana.​—Idiligyo ti Eclesiastes 3:10-13.

Panginanamaan ti Biag nga Agnanayon

13. Ania a panginanamaan ti adda iti immuna a tao, ken apay a kasta?

¹³ Awan inggana? Anian a di ngangngani nakapappapati a kapanunotan daytoy iti daydiay perpekto a tao! Ngem apay a saan? Ti Namarsuana ket awanan ideya wenno panggep a mangdadael iti daytoy obra maestra ti pannakadiseniona a minuyongan ti Eden. Apay ketdin a dadaelenna daytoy mismo nga aramidna, idinto a nakasaysayaat ken ebkas ti artistiko a panamarsuana? Nainkalintegan laeng, a saanna a panggep nga aramiden ti kasta. (Isaias 45:18) Ket yantangay daytoy di maartapan a minuyongan ket agtalinaedto a matalon, kasapulan dayta ti mannalon ken manangaywan kas ti perpekto a tao, a ni Adan. Ket no ti tao a manangaywan dinanto kankanen ti bunga ti naiparit a “kayo ti imbag ken ti dakes,” pulos a dinto matmatay. Ti perpekto a tao mabalinna ti agbiag nga agnanayon!

14. Kasano koma a naaddaan ti biag nga agnanayon ni Adan idiay Paraiso?

¹⁴ Ti biag nga agnanayon iti Paraiso a minuyongan ti Eden ket naipasango ken Adan! Daytat’ mabalinna a tagiragsaken iti agnanayon, la ketdi no isut’ naan-anay nga agtulnog iti Namarsuana, a di pulos mangmangan iti bunga nga imparit ti Namarsua iti tao. Tarigagay ti Dios a ti perpekto a tao agtalinaed a natulnog ken agtultuloy nga agbiag nga agnanayon. Ti panangiparit ti bunga “ti kayo ti pannakaammo ti imbag ken ti dakes” ket pulos a di makapapatay. Daytat’ maysa laeng a subok iti naan-anay a panagtulnog ti tao ken Amana. Daytat’ nangted ti gundaway para iti tao a paneknekanna ti ayatna iti Dios, ti Namarsua kenkuana.

15. Apay a mabalinan ni Adan ti kumita iti naraniag a masakbayan, nga adda kinaimbag kadagiti im-ima ti Namarsuana?

¹⁵ Buyogen ti naimpusuan a pannakapnek nga isut’ saan a basta naiparna laeng ti itataudna no di ket isut’ addaan ti nailangitan nga Ama, a ti isipna ti nalawlawagan iti pannakaawat iti panggep ti panagbiagna, a matmatmatanna ti biag nga agnanayon idiay Paraiso, ti perpekto a tao kumitkita iti naraniag a masakbayan. Isut’ nangan kadagiti kaykayo a naimbag a kanen, a linislisianna “ti kayo ti pannakaammo ti imbag ken ti dakes.” Kayatna a maammuan ti naimbag kadagiti im-ima ti Namarsuana. Ti trabaho, a saan a makadangran, no di ket ti panangtalon iti minuyongan ti Eden ket naimbag, ket ti perpekto a tao nagtrabaho.

Awan Obligasion a Narikna a Mangilawlawag kadagiti Bambanag

16-18. Ania a makunkuna a misterio ti saan a nakaobligaran ni Adan a solbaren, ken apay?

¹⁶ Ti lawag ti aldaw kimmapuy idi ti dakkel a silaw iti aldaw, a maawatanna iti panaggarawna iti tangatang, ket limneken. Nagtinnag ti kinasipnget, nga isu ti rabii, ket ti bulan malasinnan. Daytat’ di nangted ti rikna ti panagbuteng kenkuana; daytat’ basbassit a silaw a mangsaknap iti rabii. (Genesis 1:14-18) Awan duadua, nagtaytayab dagiti kulalanti iti aglawlaw ti minuyongan, ket mangisilnagda kadagiti agiddep-iddep a nalamiis a silaw kas babassit a lampara ti silaw.

¹⁷ No rumabiin ket ti sipnget ti nangringbawen kenkuana, mariknanan a makaturog a kas kadagiti animal iti aglawlawna. No mariingen mariknana a mabisin ket naimas ti pannanganna manipud kadagiti naipalubos a bunga ti kaykayo a mabalin a maawagan ti pammigat.

¹⁸ Napabaro ti pigsana ken nabang-aran unay iti panaginanana iti rabii, inturongnat’ atensionna iti trabaho iti aldaw. Bayat a palpaliiwenna amin dagiti berde iti aglawlawna, saanna a narikna a masapul a palutpotenna ti misterio nga aw-awagan dagiti tattao rinibribo a tawen iti kamaudiananna a photosynthesis, ti kasla burtia a panagandar a sadiay ti berde a kolkolor ti mulmula, daydiay chlorophyll da, tiliwenda ti enerhia ti lawag ti init tapno mangpataud kadagiti taraon a kanen iti tao ken animal, a maigiddan iti dayta ipaunegda met ti carbon dioxide nga iruruar ti tao ken animal ket sada met mangted oksihena nga isut’ angsenda. Mabalin a daytat’ awagan ti tao a misterio, ngem di kasapulan a solbaren dayta ni Adan. Daytat’ milagro ti Namarsua ti tao. Naawatanna dayta ket pinagtignayna dayta nga agpaay a pakagunggonaan ti naparsua a biag ditoy daga. Gapuna, supisienten para iti perpekto a kinasaririt ti immuna a tao a ti Dios, a Namarsua, pinatubona dagiti bambanag, ket ti inted-Dios a trabaho ti tao isut’ panangaywan kadagitoy nadumaduma a kita ti mulmula nga agtubtubo idiay minuyongan ti Eden.​—Kitaenyo ti Genesis 1:12.

Agmaymaysa​—Ngem Saan a Di Naragsak

19. Nupay nalasinna nga isut’ agmaymaysa, nga awan kaas-aspingna ditoy daga, aniat’ di inaramid ni Adan?

¹⁹ Ti edukasion ti tao kadagiti im-ima ti nailangitan nga Amana ket saan pay a nalpas. Inaywanan ti tao ti minuyongan ti Eden nga awanen sabali a kas kenkuana ditoy daga a kimmuyog kenkuana wenno timmulong kenkuana. No maipapan iti kakikitana, ti natauan a kita, isut’ agmaymaysa. Isut’ di napan nagsapsapul tapno agbiruk ti kaas-aspingna nga isut’ pakikadkaduaanna ditoy daga. Saanna a kinalikaguman ti Dios, ti nailangitan nga Amana, a mangted ti kabsatna a lalaki wenno babai. Ti panagmaymaysana kas tao ti saan a nangabug kenkuana nga agmauyong iti kamaudianan nga isut’ nangikkat ti rag-o ti panagbibiag ken panagtartrabahona. Isut’ addaan ti pannakikadua iti Dios.​—Idiligyo ti Salmo 27:1.

20. (a) Aniat’ tampok ti rag-o ken ragsak ni Adan? (b) Apay a ti panagtultuloy iti daytoy a wagas ti panagbiag ket saan koma a makapapatay a rigat ken Adan? (c) Aniat’ salaysayen ti sumaganad nga artikulo?

²⁰ Ammo ni Adan nga isu ken ti trabahona ket suksukimaten ti nailangitan nga Amana. Ti tampok ti ragsakna ket adda iti panangay-ayona iti Dios ken Namarsuana, a ti kinanakaskasdaawna ti naipanayag babaen kadagiti amin a napipintas nga ar-aramid ti panamarsua nga adda amin iti aglawlaw ti tao. (Idiligyo ti Apocalipsis 15:3.) Ti panagtultuloy iti daytoy a wagas ti panagbiag saan koma a makapapatay ti rigatna wenno makapasikor nga oras para iti daytoy perpekto ti kinatimbengna a tao a mabalinna a kapatpatang ti Diosna. Ket inkeddeng ti Dios iti sanguanan ni Adan ti makapainteres a trabaho, makakayaw a trabaho, a mangyeg dakkel a pannakapnek ken ragsak kenkuana. Ti sumaganad nga artikulo ti mangibaga ti ad-adda pay maipapan kadagiti bendision ken panginanamaan iti Paraiso a tinagiragsak ni Adan manipud im-ima ti naayat a Namarsuana.

[Dagiti Footnote]

“Ti nagan ti umuna Pishon; daytoy isu ti manglawlaw iti amin a daga ti Havila, isu a yan ti balitok. Ket ti balitok iti daydiay a daga nasayaat. Adda idiay dagiti batbato a bedelio ken onix. Ti nagan ti maikadua a karayan Gijon; daytoy ti manglawlaw iti amin a daga ti Cus. Ket ti nagan ti maikatlo a karayan Hiddekel; daytoy ti agturong iti sanguanan ti daga nga Asiria. Ket ti maikapat a karayan isu ti Eufrates.”​—Genesis 2:11-14.

Ania dagiti Sungbatyo?

◻ Apay a di nasdaawan iti nabayag ni Adan maipapan iti kaaddana?

◻ Ania a trabaho ti inted ti Dios ken Adan, ken kasano ngata ti panagtignayna?

◻ Ania a panginanamaan ti tinagiragsak ti perpekto a tao, ken apay?

◻ Apay a di pinagbalin ni Adan a trabaho iti panagbiagna ti panangsolbar kadagiti misterio?

◻ Apay a ti panagmaymaysa ni Adan kas tao ti di nangikkat ti ragsak iti panagbiagna?

[Gubuayan ti ladawan iti panid 10]

Ladawan ti NASA