Panangbigbig iti Baro a Singgalut

Ti Biblia mangipaay iti nalawag a ladawan iti Nainkasuratan nga urnos iti panagasawa. Kalpasan ti panangparsua ti Dios iti immuna a paris a tao ken pinagtiponna ida, impasdekna ti sumaganad a prinsipio: “Gapuna ti lalaki panawannanto ti amana ken ti inana, ket tumiponto iti asawana, ket agbalindanto a maymaysa a lasag.” (Genesis 2:24) Gapuna ti baro nga agasawa masapul a bigbigenda a simrekda iti baro a singgalut. Masapul nga agtiponda itan kas naisina a paris uray pay no makipagnaedda kadagiti nakaikamanganda.

Ti panangpanaw iti ama ken ina, nupay kasta, dina kaipapanan a dagiti annak no nagasawadan mabalin a tallikudandan dagiti dadakkelda ket saanen a masapul a raemen ken dayawenda ida. “Dika lalaisen ni inam intono bumaket,” ibalakad ti Biblia. (Proverbio 23:22) Kaskasdi, iti panagasawa, adda panagbalbaliw iti relasion. No ti tunggal miembro ti pamilia kanayon a pampanunotenda daytoy, ti agtutubo nga agasawa magunggonaanda manipud iti kapadasan ken kinasirib dagiti nagannak.

Kasano, ngarud, a ti asawa a lalaki aktibo a maibanagna ti pasetna a mamagkappia iti pamiliana? Kuna ni Mitsuharu a ti panangiyaplikarna kadagiti prinsipio iti Biblia ti nangtulong iti pamiliana. “Ti singgalut iti nagbaetan ti ina ken ti anakna a lalaki ket nakabilbileg uray no isut’ nataenganen,” inaminna, “gapuna ti anak a lalaki masapul nga ikagumaanna a ‘panawan ti ama ken inana ket tumipon iti asawana.’” Inyaplikarna ti prinsipio babaen ti pannakisaritana laeng iti asawana kadagiti bambanag maipapan iti panangaywan ken panangsanay iti anak, ket dina impadis ti asawana iti inana no maipapan iti panagtagibalay. “Itan,” intuloyna a kinuna, “dakami ken dagiti dadakkelko raemenmi ti maysa ken maysa. Tunggal maysa kadakami ammomi no ania a pannakibiang ti pakasakitan ti nakem ken no sadino ti pakaapresiaran ti tulong ken kooperasion.”

Mainayon iti ‘ititipon iti asawa,’ ti asawa a lalaki masapul nga agbalin a mangibabaet iti inana ken ti asawana. (Genesis 2:24) Masapul nga isut’ agbalin a naimbag a managimdeng ket palubosanna ida a mangipeksa kadagiti adda iti puspusoda. (Proverbio 20:5) Maysa nga asawa a lalaki, a nakasursuro a mangtaming kadagiti kasasaad a sitataktika, umuna a kitaenna no kasano ti panagrikna ti asawana. Kalpasanna, iti imatang ti asawana, kasaritana ti inana maipapan kadagiti isyu a nairaman. Babaen iti panangibaklayna iti pasetna kas mamagkakappia, ti anak a lalaki makatulong a mangpataud iti makaay-ayo a relasion iti pagtaengan iti nagbaetan dagiti dua a babbai nga inay-ayatna.