Salsaludsod Dagiti Agbasbasa
Siasino ti tuktukoyen ni Jehova a “maysa kadata” iti Genesis 3:22?
Ni Jehova a Dios nalawag a tuktukoyenna ti bagina ken ti bugbugtong nga Anakna idi kinunana: “Ti tao nagbalin a kas maysa kadata a makaammo iti naimbag ken dakes.” (Genesis 3:22) Usigentayo no apay.
Inyebkas ni Jehova dagita a sasao kalpasan a sinentensiaanna ti immuna a pagassawaan. Impapan ti dadduma a ti ebkas a “maysa kadata” ket plural ti kinatan-ok, kas iti maysa nga ari a mabalin a kunaenna “saankami a maay-ayo” no tukoyenna laeng ti bagina. Ngem no maipapan iti Genesis 1:26 ken 3:22, kuna ti eskolar ti Biblia a ni Donald E. Gowan: “Awan ti pammaneknek iti D[aan] a T[ulag] a sumuporta iti kaaduan kadagiti naisingasing a panangilawlawag: ti plural a ‘mi’ a tumukoy iti kinaari, ti ‘data’ a plural ti maysa nga agus-usig, ti plural ti kinanaan-anay, wenno indikasion ti ad-adu ngem maysa a persona iti kina-Dios. . . . Awan kadagitoy a kapanunotan ti makailawlawag iti anag ti 3:22, a mangdakdakamat iti ‘maysa kadata.’”
Mabalin kadi a ni Jehova tuktukoyenna ni Satanas a Diablo, a nangirugi a mangikeddeng a bukbukodna no ania ti “naimbag ken dakes” ken nangimpluensia kadagiti immuna a tao a mangaramid iti kasta? Saan a rasonable dayta. Ditoy, inusar ni Jehova ti ebkas a “maysa kadata.” Ni Satanas ket saan idin a paset ti bunggoy dagiti matalek nga anghel ni Jehova, isu a saan a mabalin a nairaman kadagidiay adda iti dasig ni Jehova.
Dagiti kadi matalek nga anghel ti tuktukoyen ti Dios? Saantay a masigurado. Nupay kasta, mangipaay iti pamalatpatan ti umar-arngi nga ebkas iti Genesis 1:26 ken 3:22. Iti Genesis 1:26, mabasatayo a kinuna ni Jehova: “Aramidenta ti tao iti ladawanta, sigun iti langata.” Siasino ti kasasao ni Jehova? Idi tukoyenna ti espiritu a parsua a nagbalin a ti perpekto a tao, a ni Jesus, kinuna ni apostol Pablo: “Isu ti ladawan ti di makita a Dios, ti inauna iti isuamin a parsua; agsipud ta babaen kenkuana, amin a sabsabali pay a bambanag naparsuada iti langlangit ken iti rabaw ti daga.” (Colosas 1:15, 16) Wen, lohikal nga iti Genesis 1:26, makisasao ni Jehova iti bugbugtong nga Anakna, ti “nasigo a managobra,” a kaduana bayat ti panangparsuana iti langit ken daga. (Proverbio 8:22-31) Ti umar-arngi nga ebkas iti Genesis 3:22 ipasimudaagna a ni Jehova ket makisasao manen iti daydiay kasingedan kenkuana, ti bugbugtong nga Anakna.
Ti bugbugtong nga Anak ti Dios nalawag nga adda pannakaammona iti “naimbag ken dakes.” Manipud iti naunday ken nasinged a panagkaduada ken ni Jehova, sigurado a nasursurona a naimbag ti panagpampanunot, prinsipio, ken pagalagadan ni Amana. Gapu ta kombinsido nga ammo ken nasungdo kadagita ti Anakna, mabalin a ni Jehova impaayanna ni Jesus iti wayawaya a mangtaming kadagiti bambanag a saan a kanayon a direkta nga agkonsulta Kenkuana. Kabaelan ken autorisado ngarud ti Anak a mangammo iti naimbag ken dakes. Ngem saan a kas kada Satanas, Adan, ken Eva, saan a nangipasdek ni Jesus iti pagalagadan a maikontra iti pagalagadan ni Jehova.