NAIPAMAYSA A DEBOSION

Ipasimudaag daytoy a sasao a saan nga ipalubos ni Jehova ti aniaman a panangipaay iti debosion iti sabali, nga isu ti panagdaydayaw iti sabali a didios. Ti Hebreo a sao a qan·naʼʹ ket naaramat laeng mainaig iti Dios; kaipapananna ti “mangalikagum iti naipamaysa a debosion; naimon.”​—Ex 20:5, Rbi8 ftn; kitaenyo ti IMON, NAIMON.

Saan nga ited ti Dios iti sabali ti dayaw nga agpaay laeng iti Dios. (Isa 42:8) Ti saan a panangipaay iti naipamaysa a debosion iti Dios ket mamagpungtot kenkuana iti kasta unay. (De 4:24; 5:9; 6:15) Ti Israel ket naibilang nga asawa ni Jehova. Kas asawa a lalaki, kiniddaw ni Jehova iti Israel ti naipamaysa a debosion, kinasungdo ken kinamatalek. Kasta unay ti panangipategna iti Israel, a nakaregregta a mangsalaknib kenkuana. (Eze 36:5) No kasta ngarud, ti isusukir nga isu ti isusurot iti sabali a didios ket pannakikamalala, isu a maikari iti nalinteg nga unget ni Jehova ken ti panagimonna maipaay iti bukodna a nagan.​—De 32:16, 21; Eze 16:38, 42.

Ania ti naipamaysa a debosion a kalikaguman ni Jehova kadagiti adipenna?

Ti sao a naipatarus a “naipamaysa” (“exclusive” iti Ingles) ket nagtaud iti Latin nga exclusus, a kaipapananna ti “naan-anay nga agbukbukod.” Ti debosion ket kaipapananna ti kasta unay a panangipategna ken nasged nga ayat. Isu a ti naipamaysa a debosion kaipapananna ti panangtaginayon nga agbukbukod, wenno awanen ti sabali pay a naisaad iti puspuso ken tigtignaytayo no di laeng ti Dios. Ti isuamin a sabsabali pay a banag ket agtalinaed nga adda iti ruar daytoy nadayaw a saad a ti Dios laeng ti mabalin nga agikut.

Saan nga Ipalubos ni Jehova a Dios ti Panangipaay iti Debosion iti Sabali. Ti naipamaysa a debosion ket kinalikaguman ni Jehova iti maikadua iti “Sangapulo a Sasao” wenno Sangapulo a Bilin nga insurat ti ramay ti Dios: “Siak ni Jehova a Diosmo . . . Dika pulos maaddaan iti aniaman a sabali a didios maibusor iti rupak [wenno, “aniaman a sabali a didios kas panagsukir kaniak”]. . . . agsipud ta siak ni Jehova a Diosmo maysaak a Dios a mangalkalikagum iti naipamaysa a debosion.” (De 5:6-9) Iti Exodo 34:14, kuna ti Pranses a Drioux Version (1884): “Kayat ti Dios nga isu laeng ti ayaten,” kayatna a sawen, naisalsalumina, naipamaysa. Pinasingkedan ni Jesus daytoy a panangmatmat iti imbagana iti maysa a Judio a nangsubok kenkuana. (Mt 22:37) Ni Jehova ket Dios ken Ari ti Israel, Panguluen ti relihion ken ti Estado. Isu a no salungasingen ti maysa nga Israelita ti umuna ken maikadua a bilin babaen ti panagserbina iti sabali a didios, kaipapananna a nakabasol iti lèse-majesté, wenno panangliput, ti kakaruan kadagiti krimen, a maikari iti kadagsenan a dusa. Iti naminsan, nakiraman ti Israel iti panagdaydayaw iti ulbod a dios ken nakaaramid iti imoralidad ket gapu ta naan-anay a kidkiddawen ni Jehova iti naipamaysa a debosion, talipuposenna koma idan. Ngem naisalakan ti Israel gapu ta nagtignay a dagus ni Finehas nga apoko ni Aaron, a ‘saanna a pulos pinanuynoyan ti pannakirinnisiris’ ken Jehova.​—Nu 25:11.

Maigapu iti naganna ti rason no apay nga insubli ni Jehova ti ilina kalpasan ti pannakaidestieroda idiay Babilonia. (Eze 39:25-28) Iti Exodo 34:14, kastoy ti mabasa iti patarus ni Fenton: “Daydiay AGNANAYON A SIBIBIAG ket naimon maipaay iti NAGANNA.” Yantangay naimon maipaay iti naganna wenno naipamaysa ti debosionna iti dayta, saanna nga ipalubos nga adda aniaman a nagan ti asinoman a sabali a dios iti tengnga ti ilina.

Relasion ti Apo ken Adipen. Ipakpakita met ti naipamaysa a debosion ti relasion iti nagbaetan ti apo ken adipen. Kas Namarsua, ni Jehova ti Makinkukua ken Apo. Isu ket Dios maigapu iti kina-Namarsuana; kalinteganna ti umawat iti naipamaysa a debosion manipud kadagiti iturayanna a parsua, ken masapul nga aramidenda ti pagayatanna. Apaman a ti tao nga umiso ti panagpampanunotna masursurona ti maipapan ken Jehova ken maapresiarna ti relasionna iti Dios, boluntario nga ipaayna ti naipamaysa a debosion manipud iti puso, nga isu met dayta ti tarigagayan ni Jehova. Kagurana ti pammarang laeng a debosion wenno panagdaydayaw. (Mt 15:8, 9) Daytoy a relasion ken ti naimpusuan a debosion a tartarigagayan ni Jehova ket nailadawan iti Mosaiko a Linteg. Ti maysa a Hebreo nga adipen ket mawayawayaan idi iti maikapito a tawen ti panagserbina. “Ngem no ipilit a kunaen ti adipen, ‘Pudno nga ay-ayatek ni apok, ni asawak ken ti annakko; diak kayat ti pumanaw a kas maysa a nawayawayaan,’ ngarud masapul nga iyadani ni apona iti pudno a Dios ket masapul nga ipidegna iti ridaw wenno iti bautek; ket masapul a tebbengan ni apona ti lapayagna babaen ti maysa a kulukol, ket adipennanto agingga iti tiempo a di nakedngan.” (Ex 21:2, 5, 6) Nagsao ni Pablo kadagiti saan a Judio iti kongregasion idiay Tesalonica maipapan iti naimpusuan a panangibaw-ing iti debosionda idi nagbalinda a Kristiano. Insardengdan ti nagpaadipen kadagiti idolo ket rinugiandan ti ‘agpaadipen iti sibibiag ken pudno a Dios.’​—1Te 1:9.

Naipamaysa a Debosion ni Jesus iti Dios. Kas naipakita iti Filipos 2:5-8, agpadpada nga idi adda idiay langit ken idi adda ditoy daga, binigbig ni Jesus ti saad nga ik-ikutan laeng ni Amana ket impaayanna iti naipamaysa a debosion. Impatuldo ni Jesus a ti kapatgan a bilin iti Linteg ket kalikagumanna ti panagayat iti Dios iti intero a puso. (Mt 22:37) Mainayon pay, nangipakita ni Jesus iti naipamaysa a debosion iti nagan ni Jehova ken impaganetgetna a rebbeng a maaddaan dagiti adalanna iti kasta met laeng a kababalin. Iti kararag nga insurona kadagiti adalanna, rinugianna babaen iti sasao nga, “Amami nga adda iti langlangit, masantipikar koma ti naganmo.” (Mt 6:9) Daytoy a debosion ni Jesus ket nabuyogan iti nasged a regta, kas iti imparangarangna idi dinalusanna ti templo, a tinungpalna ti padto a, “Ti regta maipaay iti balaymo ibusennakto.” (Jn 2:17; Sal 69:9) Awanen ti ad-adda pay a pamay-an a panangipakita ni Jesus iti naipamaysa a debosion iti Amana no di ti naisurat maipapan kenkuana iti 1 Corinto 15:24-28, a sadiay naikuna nga inton nalpasen a pinarmek ti nailangitan a Pagarianna ti amin a sabsabali pay nga autoridad ken ti amin a kabusor, iyawaten ni Jesus ti Pagarian iti Ama ket agpasakup Kenkuana tapno “ti Dios agbalinto nga amin a bambanag iti tunggal maysa.”