Mangiyeg Rag-o ti Inted-Dios a Wayawaya

“Ti rag-o ni Jehova isu ti pigsayo.”​—NEHEMIAS 8:10.

 1. Ania ti rag-o, ken apay a mapasaran dayta dagidiay dedikado iti Dios?

NI Jehova punuenna iti rag-o ti puspuso ti ilina. Daytoy a kasasaad ti dakkel a kinaragsak wenno panagdir-i agtaud manipud pannakagun-od wenno panangpadaan iti imbag. Dagiti tattao a dedikado iti Dios mapasaranda ti kasta a rikna gapu ta ti rag-o ket maysa a bunga ti nasantuan nga espirituna, wenno ti aktibo a puersana. (Galacia 5:22, 23) Gapuna nga uray no likmutendatayo dagiti makapaladingit a suot, makapagrag-otayo kas ad-adipen ni Jehova, nga iturturong ti espirituna.

 2. Apay a nagrag-oan dagiti Judio ti naisangsangayan nga okasion idi panawen ni Esdras?

² Iti maysa a naisangsangayan nga okasion idi maikalima a siglo K.K.P., inusar dagiti Judio ti inted-Dios a wayawayada tapno angayenda ti narag-o a Piesta dagiti Tabernakulo idiay Jerusalem. Kalpasan a binasa ken inlawlawag kadakuada ni Esdras ken dagiti sabsabali pay a Levita ti Linteg ti Dios, “pimmanawda tapno manganda ken uminumda ken ibaonda dagiti apag ken itultuloyda ti naindaklan a panagrag-o, ta naawatanda dagiti sasao ken dagitat’ naipakaammo kadakuada.”​—Nehemias 8:5-12.

Ti Rag-o ni Jehova Isu ti Pigsatayo

 3. Iti sidong dagiti ania a kasasaad nga agbalin a pigsatayo “ti rag-o ni Jehova”?

³ Kabayatan dayta a rambak, nabigbig dagiti Judio ti kinapudno dagiti sasao a: “Ti rag-o ni Jehova isu ti pigsayo.” (Nehemias 8:10) Daytoy a rag-o isu met ti pigsatayo no agtalinaedtayo a sititibker maipaay iti inted-Dios a wayawaya kas dedikado, nabautisaran a Saksi ni Jehova. Sumagmamano kadatayo ti nakapasar iti pannakapulot iti nasantuan nga espiritu ken pannakaibilang iti pamilia ti Dios kas nailangitan a kakadua ni Kristo nga agtawid. (Roma 8:15-23) Ti kaaduan kadatayo ita addaan namnama ti biag iti naindagaan a paraiso. (Lucas 23:43) Anian a rebbeng nga agrag-otayo!

 4. Apay a dagiti Kristiano maibturanda dagiti panagsagaba ken pannakaidadanes?

⁴ Nupay addaantayo kadagiti nakaskasdaaw a namnama, saan a nalaka ti agibtur kadagiti panagsagaba ken pannakaidadanes. Maaramidantayo dayta, nupay kasta, gapu ta ti Dios itedna kadatayo ti nasantuan nga espirituna. Gapu iti dayta addaantayo iti rag-o ken ti panamati nga awan makarabsut kadatayo iti namnamatayo wenno iti ayat ti Dios. Kasta pay met, makasiguradotayo a ni Jehova ti pigsatayo no la ketdi isut’ ayatentayo iti amin a puso, kararua, pigsa, ken panunottayo.​—Lucas 10:27.

 5. Sadinot’ mabalin a pakasarakantayo kadagiti rason tapno agrag-o?

⁵ Tagiragsaken ti ili ni Jehova dagiti nabaknang a bendision ken addanda iti adu a rason nga agrag-o. Dadduma a rason ti panagrag-o ket nadakamat idiay surat ni Pablo kadagiti taga Galacia. Dagiti sabsabali ket naipamatmat kadagiti sabali pay a paset ti Kasuratan. Pasarantaennatayo ti panangusig kadagiti kakasta a narag-o a bendision.

Ipateg ti Inted-Dios a Wayawaya

 6. Apay nga ingunamgunam ni Pablo kadagiti Kristiano a taga Galacia nga agtalinaedda a sititibker?

⁶ Kas dagiti Kristiano, addaantayo iti narag-o a bendision ti maysa a makaay-ayo a takder iti Dios. Yantangay winayawayaan ni Kristo dagiti pasurotna manipud Mosaiko a Linteg, naigunamgunam kadagiti taga Galacia nga agtalinaedda a sititibker ket saanda a pabalud iti dayta a “sangol ti pannakaadipen.” Komustatayo? No nagreggetantayo ti maibilang a nalinteg babaen panangsalimetmet iti Linteg, maiyadayotayo manipud ken Kristo. Tinulongan ti espiritu ti Dios, nupay kasta, ur-urayentayo ti mainanama a kinalinteg nga agbanag manipud pammati nga agtignay baeten iti ayat, saan a manipud pisikal a pannakakugit wenno sabsabali pay nga aramid ti Linteg.​—Galacia 5:1-6.

 7. Kasano ti rebbeng a panangmatmattayo iti sagrado a serbisio ken Jehova?

⁷ Maysa a bendision ti panangusar iti inted-Dios a wayawayatayo tapno “agserbi ken Jehova buyogen panagrag-o.” (Salmo 100:2) Pudno, maysa a di marukod a pribilehio ti panangipaay iti sagrado a serbisio ken “Jehova a Dios, ti Mannakabalin-amin,” ti met laeng “Ari ti kinaagnanayon”! (Apocalipsis 15:3) No dagiti allon ti nababa a panangibilang iti bagi umaplit kadakayo, mabalin a makatulong unay a mabigbigyo a ti Dios inyasidegnakayo kenkuana baeten ken Jesu-Kristo ken impaayannakayo iti bingay iti “nasantuan a trabaho ti naimbag a damag ti Dios.” (Roma 15:16; Juan 6:44; 14:6) Aniadan a rason maipaay iti rag-o ken panagyaman iti Dios!

 8. No maipapan iti Babilonia a Dakkel, ania a pakaigapuan ti rag-o ti adda iti ili ti Dios?

⁸ Sabali pay a pakaigapuan ti rag-o ket ti inted-Dios a wayawayatayo manipud Babilonia a Dakkel, ti sangalubongan nga imperio ti ulbod a relihion. (Apocalipsis 18:2, 4, 5) Nupay daytoy a relihiuso a balangkantis sipipiguratibo nga “agtugaw kadagiti adu a dandanum,” kaipapananna “dagiti tattao ken bunggoy ken nasion ken dildila,” isut’ saan nga agtugaw, wenno dina narelihiusuan nga impluensiaan wenno tenglen, dagiti adipen ni Jehova. (Apocalipsis 17:1, 15) Pagrag-oantayo ti nakaskasdaaw a lawag ti Dios, bayat a dagiti manangsuportar ti Babilonia a Dakkel ket addada iti naespirituan a kinasipnget. (1 Pedro 2:9) Wen, mabalin a narigat a maawatan dagiti sumagmamano a “nauneg a bambanag ti Dios.” (1 Corinto 2:10) Ngem dagiti kararag maipaay iti sirib ken tulong babaen ti nasantuan nga espiritu badangannatayo tapno matarusantayo dagiti Nainkasuratan a kinapudno a mangluk-at iti naespirituan kadagiti mangikut iti dayta.​—Juan 8:31, 32; Santiago 1:5-8.

 9. No kayattayo a tagiragsaken ti bendision ti agtultuloy a wayawaya manipud narelihiusuan a biddut, aniat’ masapul nga aramidentayo?

⁹ Tagiragsakentayo ti bendision ti agtultuloy a wayawaya manipud narelihiusuan a biddut, ngem tapno masalimetmetan dayta a wayawaya, masapul nga iwaksitayo ti apostasia. Nasayaat ti panangtaray dagiti taga Galacia iti Nakristianuan a lumba, ngem dadduma ti manglaplapped kadakuada manipud panagtulnog iti kinapudno. Ti kasta a nadangkes a panangallukoy ket saan a nagtaud iti Dios ket masapul ngarud a madangadang. Kas iti bassit a lebadura banglesenna ti intero a masa, dagiti ulbod a mannursuro wenno ti idadasig iti apostasia mamulitanna ti intero a kongregasion. Tinarigagayan ni Pablo a dagiti manangitandudo ti pannakakugit a mangipampamuspusan a mangrippuog iti pammati dagiti taga Galacia saanda la koma a makugit no di ket makaponda koma. Nabileg la ketdi a panagsao! Ngem masapul a kastatayo iti panangiwaksi iti apostasia no kayattayo a taginayonen ti inted-Dios a wayawayatayo manipud narelihiusuan a biddut.​—Galacia 5:7-12.

Agpaadipen iti Maysa ken Maysa iti Ayat

10. Aniat’ responsabilidadtayo kas paset ti Nakristianuan a panagkakabsat?

¹⁰ Ti inted-Dios a wayawaya impagtengnatayo iti pannakilangen iti naayat a panagkakabsat, ngem masapul nga aramidentayo ti pasettayo a mangipakita iti ayat. Saan a mabalin nga usaren dagiti taga Galacia ti wayawayada kas “pakatignayan maipaay iti lasag” wenno maysa a pambar iti di nayaat a panagimbubukodan. Kasapulanda ti agpaadipen iti maysa ken maysa a ti ayat ti pakatignayanda. (Levitico 19:18; Juan 13:35) Kasapulantayo met a liklikan ti panangliput ken gura a mabalin nga agresulta iti panagiinnibustayo iti maysa ken maysa. Siempre, saan a mapasamak daytoy no ipakitatayo ti nainkabsatan nga ayattayo.​—Galacia 5:13-15.

11. Kasano nga agbalintayo a bendision kadagiti sabsabali, ken kasanodatayo a bendituen?

¹¹ Babaen panangusartayo iti inted-Dios a wayawayatayo maitunos iti panangiwanwan ti espiritu ti Dios, maipakitatayo ti ayat ken agbalintayo a bendision kadagiti sabsabali. Rebbeng a maipaugali ti panangipalubostayo kadagiti bagbagitayo a tenglen ken idalan ti nasantuan nga espiritu. Iti kasta saantayonto nga agannayas nga awanan-ayat a mangpennek iti managbasol a lasagtayo a “maibusor iti espiritu ken iti tarigagayna.” No idalannatayo ti espiritu ti Dios, aramidentayo no ania ti naayat ngem saan a gapu ta kalikaguman dagiti linteg ti panagtungpal ken ipatawda dagiti dusa kadagiti managbasol. Kas pangarigan, ti ayat​—saan a basta linteg laeng​—iyadayonatayo manipud panangpadakes kadagiti sabsabali. (Levitico 19:16) Ti ayat ti mangituggod kadatayo nga agsao ken agtignay kadagiti naanus a pamay-an. Gapu ta ipakitatayo ti bunga ti espiritu nga ayat, bendituendatayo dagiti sabsabali, wenno nasayaat panangisaritada maipapan kadatayo. (Proverbio 10:6) Kasta pay met, ti pannakilangenda kadatayo agbalinto a bendision kadakuada.​—Galacia 5:16-18.

Agsupadi a Bunga

12. Aniadat’ sumagmamano kadagiti bendision a naitimpuyog iti panangliklik kadagiti managbasol nga “aramid ti lasag”?

¹² Adu a bendision a naitimpuyog iti inted-Dios a wayawayatayo agbanag manipud panangliklik kadagiti managbasol nga “aramid ti lasag.” Kas ili ti Dios, datayo, kas pangkaaduanna maliklikantayo ti nakaro a panagdanag gapu ta ditay agar-aramid iti pannakiabig, kinarugit, ken nalulok a kababalin. Babaen panangliklik iti idolatria, addaantayo iti rag-o nga agbanag manipud panangay-ayo ken Jehova iti dayta a banag. (1 Juan 5:21) Gapu ta ditay agar-aramid iti espiritismo, nawayatayo manipud panangituray dagiti demonio. Ti Nakristianuan a panagkakabsattayo ket saan a dadaelen dagiti guranggura, ringringgor, im-imun, panagpungpungtot, panagsususik, panagsisina, panangilkillo ti pammati, ken ap-apal. Ken saan a mapukaw ti rag-otayo kadagiti panagbarbartek ken ragragsak nga aglablabes. Impakdaar ni Pablo a dagidiay mangal-alagad kadagiti aramid ti lasag didanto tawiden ti Pagarian ti Dios. Gapu ta ipangagtayo dagiti sasaona, nupay kasta, mabalintayo ti kumpet iti narag-o a namnama ti Pagarian.​—Galacia 5:19-21.

13. Ti nasantuan nga espiritu ni Jehova mamataud kadagiti ania a bunga?

¹³ Ti inted-Dios a wayawayatayo ipaayannatayo ti rag-o gapu ta ipakita dagiti Kristiano dagiti bunga ti espiritu ni Jehova. Manipud sasao ni Pablo kadagiti taga Galacia, nalaka a makita a dagiti aramid ti lasag ket kas sisiit no maisuppiat kadagiti nangayed a bunga ti espiritu nga ayat, rag-o, talna, mabayag a panagitured, kinaanus, kinaimbag, pammati, kinaemma, ken panagteppel a naiyukuok kadagiti nadiosan a pusotayo. Determinado nga agbiag maisupadi kadagiti tarigagay ti managbasol a lasag, tarigagayantayo ti paidalan iti espiritu ti Dios ken agbiag maitunos iti dayta. Ti espiritu pagbalinennatayo a napakumbaba ken mannakikappia, saan a “nakuspag, agsisisinnalisal iti maysa ken maysa, agiinnapal iti maysa ken maysa.” Awan duadua a maysa a rag-o ti makitimpuyog kadagidiay mangipakita kadagiti bunga ti espiritu!​—Galacia 5:22-26.

Sabsabali Pay a Rason Maipaay iti Rag-o

14. Ania nga igam ti kasapulantayo iti pannakidangadangtayo maibusor kadagiti dakes nga espiritu a puersa?

¹⁴ Naitimpuyog iti inted-Dios a naespirituan a wayawayatayo ket ti bendision a pannakasalaknib ken Satanas ken kadagiti demonio. Tapno agballigitayo iti pannakirupaktayo maibusor kadagiti espiritu a puersa, masapul nga ikawestayo ti “kumpleto a kabal manipud iti Dios.” Kasapulantayo ti barikes ti kinapudno ken ti kabal ti kinalinteg. Masapul a nasapatosan dagiti sakatayo iti alikamen ti naimbag a damag ti talna. Kasapulan, met, ti dakkel a kalasag ti pammati, a pangsarapa kadagiti dumardarang a gayang ti sairo. Masapul nga ikawestayo ti pannakakabal ti ulo ken iggamantayo “ti kampilan ti espiritu,” ti Sao ti Dios. “Agtultuloytayo met iti kararag babaen iti espiritu.” (Efeso 6:11-18) No ikawestayo ti naespirituan a kabal ken iwaksitayo ti demonismo, awan butengtayo ken narag-otayo.​—Idiligyo ti Aramid 19:18-20.

15. Ania a narag-o a bendision ti kukuatayo gapu ta agbiagtayo maitunos iti Sao ti Dios?

¹⁵ Kukuatayo ti rag-o gapu ta ti kababalintayo ket maitunos iti Sao ti Dios, ken nawayatayo manipud basol a mangsapsaplit iti adu a managsalungasing. ‘Watwatentayo a kankanayon dagiti bagbagitayo tapno siaammotayo nga awan maaramidantayo maibusor iti Dios ken kadagiti tao.’ (Aramid 24:16) No kasta, saantayo a kasapulan a pagbutngan ti nadiosan a panangdusa nga asidegen a mangduprak kadagiti situtulok, di managbabawi a managbasol. (Mateo 12:22-32; Hebreo 10:26-31) Babaen panangiyaplikar iti balakad ti Proverbio 3:21-26, mabigbigtayo ti kaitungpalan dagidiay a sasao: “Saluadam ti praktikal a kinasirib ken panagpanunot, iti kasta isudanto ti biag ita kararuam ken saniata ita tengngedmo. Iti kasta magnakanto iti dalanmo a sitatalged, ket uray ti sakam dinto maitibkol. Intono agiddaka awanto ti pagbutngam; ket agiddakanto, ket ti turogmo nargaanto. Dikanto agbuteng iti kellaat a pagbutngan, kasta met iti pannakarbek dagiti nadangkes, gapu ta dumteng. Ta ni Jehova isunto ti katalekmo, ket saluadannanto ta sakam iti pannakatiliwna.”

16. Kasano a ti kararag ket maysa a pagrag-oan, ken ania ti akem ti espiritu ni Jehova iti daytoy a banag?

¹⁶ Ti sabali pay a pakaigapuan ti rag-o ket ti inted-Dios a wayawayatayo nga umadani ken Jehova iti kararag buyogen pammasiguro a datayot’ maimdengan. Wen, dagiti kararagtayo ket masungbatan gapu ta addaantayo iti nadayaw “a panagbuteng ken Jehova.” (Proverbio 1:7) Kasta pay met, matulongantayo a mangsalimetmet kadagiti bagbagitayo iti ayat ti Dios babaen “panagkararag buyogen nasantuan nga espiritu.” (Judas 20, 21) Aramidentayo daytoy babaen panangiparangarang iti kasasaad ti puso a makaay-ayo ken Jehova ken babaen panagkararag iti sidong ti impluensia ti espiritu maipaay kadagiti bambanag a maitunos iti pagayatanna ken ti Saona, a mangipakpakita kadatayo no kasano ti agkararag ken no ania ti kiddawentayo iti kararag. (1 Juan 5:13-15) No masuottayo unay ket ditay ammo no ania ti ikararagtayo, ‘danggayannatayo ti espiritu buyogen tulong iti pagkapuyantayo, nga idawatannatayo kadagiti un-unnoy a di maiyebkas.’ Sungbatan ti Dios dagiti kakasta a kararag. (Roma 8:26, 27) Agkararagtayo maipaay iti nasantuan nga espiritu ket palubosantayo a patauden dayta kadatayo dagiti bungana a kangrunaan a kasapulan tapno sanguen ti maysa a suot. (Lucas 11:13) Maparang-aytayo met ti rag-otayo no sikakararagtayo ken sigagagettayo a mangadal iti impaltiing-espiritu a Sao ti Dios ken dagiti Nakristianuan a publikasion a naisagana iti sidong ti panangiwanwan ti espiritu.

Nabendisionan iti Kankanayon a Magun-odan a Tulong

17. Kasano a dagiti kapadasan ni Moises ken dagiti sasao ni David ipakitada a ni Jehova ket makikadua iti ilina?

¹⁷ Babaen siuumiso a panangusar iti inted-Dios a wayawayatayo, addaantayo iti rag-o iti pannakaammo a ni Jehova ket adda kadatayo. Idi dagiti nakaro a kasasaaad ti nangiduron ken Moises tapno panawanna ti Egipto, babaen pammati “isut’ nagtultuloy a natibker a kas makitkitana Daydiay saan a makita.” (Hebreo 11:27) Saan a nagna ni Moises nga is-isuna; ammona nga adda kenkuana ni Jehova. Umasping unay, inkanta dagiti annak ni Core: “Ti Dios ti kamang ken bilegtayo, sisisibay unay a saranay iti panawen ti dukot. Aniansa ta ditayo agbuteng, agpapan pay agbaliw ti daga ken uray dagiti bantay aggabsuonda iti tukok dagiti baybay; uray pay dagiti danumda agungor, ken makiborda, uray pay dagiti bambantay agpigergerda gapu iti idadakkelda.” (Salmo 46:1-3) No addaankayo iti kasta a pammati iti Dios, dinakayto pulos panawan. Kuna ni David: “No da amak ken ni inak panawandak, ni ngad Jehova pidutennakto.” (Salmo 27:10) Anian ti adda a rag-o iti pannakaammo a maseknan unay ni Jehova kadagiti adipenna!​—1 Pedro 5:6, 7.

18. Apay a dagidiay addaan rag-o ni Jehova ikutanda ti inted-Dios a wayawaya manipud manglapunos a panagdanag?

¹⁸ Iti panangikut iti rag-o ni Jehova, tagtagikuaentayo ti inted-Dios a wayawaya manipud manglapunos a panagdandanag. “Dikay madanagan iti aniaman,” kuna ni Pablo, “no di ket iti isuamin maipakaammo koma dagiti dawdawatyo iti Dios babaen iti kararag ken araraw a napakuyogan iti panagyaman; ket ti talna ti Dios a mangdaeg iti amin a pannakaawat aywanannanto dagiti puspusoyo ken dagiti panunotyo baeten ken Kristo Jesus.” (Filipos 4:6, 7) Ti talna ti Dios ket awan pakaidiliganna a kinatalinaay uray kadagiti makakarit unay a kasasaad. Buyogen dayta agtalinaed a natalinaay ti pusotayo​—makapasayaat kadatayo iti naespirituan, emosional, ken pisikal. (Proverbio 14:30) Tulongannatayo met dayta a mangtaginayon iti mental a kinatimbeng, ta ammotayo nga awan ipalubos ti Dios a mangdangran kadatayo nga agnanayon. (Mateo 10:28) Kukuatayo daytoy a talna nga agresulta manipud nasinged a relasion iti Dios baeten ken Kristo gapu ta dedikadotayo ken Jehova ken agpasakoptayo iti panangiwanwan ti espirituna, a mangpataud kadagiti kakasta a bunga kas iti rag-o ken talna.

19. Ti panangsalimetmet kadagiti pusotayo a naipamaysa iti ania ti tumulong kadatayo a narag-o?

¹⁹ Ti panangsalimetmettayo iti pusotayo a naipamaysa iti inted-Dios a wayawayatayo ken ti namnama ti Pagarian tulongannatayo nga agbalin a narag-o. Kas pangarigan, no dadduma bassit ti maaramidan maipapan iti nakapuy a salun-at, ngem makapagkararagtayo maipaay iti sirib ken bileg tapno sanguentayo dayta ken mabalin a makasaraktayo iti liwliwa iti panangpanunot iti naespirituan a salun-at a tagtagiragsakentayo ken dagiti pisikal nga agas a maaddaanto iti sidong ti panagturay ti Pagarian. (Salmo 41:1-3; Isaias 33:24) Nupay mabalin a kasapulantayo nga ibturan dagiti panangipaidam ita, awanto ti kinakurang dagiti kasapulan ti biag idiay Paraiso a daga a nakaas-asidegen. (Salmo 72:14, 16; Isaias 65:21-23) Wen, ti nailangitan nga Amatayo taginayonennatayo ita ken inton agangay aramidenna a naan-anay ti rag-otayo.​—Salmo 145:14-21.

Tagipatgenyo ti Inted-Dios a Wayawayayo

20. Sigun iti Salmo 100:1-5, kasanot’ rebbeng a panangidatagtayo iti bagbagitayo iti saklang ni Jehova?

²⁰ Kas ili ni Jehova, sigurado a rebbeng a tagipatgentayo ti inted-Dios a wayawayatayo a nangipaay kadatayo iti rag-o ken nakaad-adu a bendision. Isu met laeng nga igunamgunam kadatayo ti Salmo 100:1-5 nga umadanitayo iti saklang ni Jehova “buyogen narag-o nga ikkis.” Kukuanatayo ni Jehova ket isut’ maseknan kadatayo kas ti naayat a Pastor. Wen, “datayo ti ilina ken dagiti karnero iti pagpaarabanna.” Ti Kinanamarsuana ken dagiti naindaklan a galadna ipaayandatayo iti pangay-ayo a sumrek iti paraangan ti santuariona buyogen panagdayaw ken panagyaman. Matignaytayo a “mangbendito iti naganna,” agsao iti naimbag maipapan ken Jehova a Dios. Ad-adda pay, makapagtalektayo iti naayat a kinamanangaasina, wenno nadungngo a panangibilangna, kadatayo. “Kadagiti kaputotan” ni Jehova ket matalek, di agbaliw iti panangipakita iti ayat kadagidiay agar-aramid ti pagayatanna.

21. Ania a pammaregta ti naitukon iti umuna a ruar daytoy a magasin, ken aniat’ rebbeng nga aramidentayo maipapan iti inted-Dios a wayawaya?

²¹ Kas imperpekto a tattao, ditay ita maliklikan amin a suot. Baeten nadiosan a tulong, nupay kasta, kabaelantayo ti agbalin a natured ken narag-o a Saksi ni Jehova. Nakadidillaw iti daytoy a banag dagitoy a sasao a masarakan iti umuna a ruar daytoy a babasaen (Hulio 1879): “Tumured . . . kabsatko a lalaki wenno babai, nga agsapsapul buyogen nabannog nga addang nga agtaray iti akikid a dalan. Dika ikaskaso ti narigat a dalan; daytat’ impadayaw ken sinantipikar dagiti bendito a saka ti Apo. Ibilangmo a sabong ti tunggal siit; tunggal natadem a bato kas napateg a naglasatan, a mangipagteng kenka a sipapartak agturong iti kalat. . . . Matmatam ti gunggona.” Dagiti minilion nga agserserbi itan ken Jehova matmatanda ti gunggona ken addaanda iti adu a rason maipaay iti tured ken rag-o. Kadakuada, agtalinaedda a sititibker maipaay iti inted-Dios a wayawaya. Dikay sayangen ti panggepna, ket sapay koma ta ti rag-o ni Jehova ti kankanayon a pigsayo.

Kasanot’ Panangsungbatmo?

◻ Kasano nga agbalin a pigsatayo “ti rag-o ni Jehova”?

◻ Iti relihiuso a panagsao, aniada a bendision ti impagteng ti inted-Dios a wayawaya iti ili ni Jehova?

◻ Apay nga agpaadipen ti maysa ken maysa iti ayat?

◻ Ania dagiti dadduma a sabsabali pay a bendision a naitimpuyog iti inted-Dios a wayawaya?

◻ Kasano a makapagtalinaed a narag-o ti ili ti Dios?

[Ladawan iti panid 23]

“Ibilangyo a sabong ti tunggal siit; tunggal natadem a bato kas napateg a naglasatan, a mangipagteng kenka a sipapartak agturong iti kalat”