LEKSION 24

Ania ti Agpayso Maipapan Kadagiti Anghel?

Nayimprenta nga Edision

Kayat ni Jehova a maam-ammotayo ti pamiliana idiay langit. Karaman iti dayta a pamiliana dagiti anghel, a maawagan iti “annak ti Dios.” (Job 38:7) Ania ti ibagbaga ti Biblia maipapan kadagiti anghel? Kasanoda nga im-impluensiaan dagiti tattao? Ken amin kadi nga anghel ket paset ti pamilia ti Dios?

1. Siasino dagiti anghel?

Pinarsua ni Jehova dagiti anghel sakbay nga inaramidna ti daga. Kas kenkuana, isuda ket saan a makita nga espiritu idiay langit. (Hebreo 1:14) Minilion dagiti anghel, ken agduduma ti kualidadda. (Apocalipsis 5:11) ‘Tungtungpalenda ti sao [ni Jehova] ken agtultulnogda iti timekna.’ (Salmo 103:20) Idi un-unana, inusar ni Jehova dagiti anghel a mangidanon iti mensahena ken mangtulong ken mangisalakan kadagiti agdaydayaw kenkuana. Ita, iturturong dagiti anghel dagiti Kristiano kadagiti tattao a mayat nga agsursuro maipapan iti Dios.

2. Asino ni Satanas ken dagiti demoniona?

Adda dagiti anghel a saan a nagtultuloy a matalek ken Jehova. Ti kaunaan nga anghel a nagrebelde ket daydiay “naawagan iti Diablo ken Satanas, a mangal-allilaw iti intero a mapagnaedan a daga.” (Apocalipsis 12:9) Kayat ni Satanas nga iturayan ti dadduma isu nga inimpluensiaanna da Adan ken Eva ken ti dadduma nga anghel a makikadua kenkuana nga agsukir ken Jehova. Dagita a nagrebelde nga anghel ket naawagan iti demonio. Intapuak ida ni Jehova ditoy daga ket madadaeldanto iti masanguanan.—Basaen ti Apocalipsis 12:9, 12.

3. Kasano nga al-allilawen ni Satanas ken dagiti demonio dagiti tattao?

Tapno maallilaw dagiti tattao, us-usaren ni Satanas ken dagiti demonio ti demonismo, wenno espiritismo—ti dakes nga aramid a pannakikomunikar kadagiti espiritu. Kas pagarigan, dadduma ti agkonsulta kadagiti astrologo, mammadles, psychic, ken albolario. Adda met dagiti agpaagas wenno agpatulong kadagiti adda koneksionna iti espiritismo. Naallilaw met ti dadduma ta patienda a mabalinda ti makisarita kadagiti natay. Ngem pakpakdaarannatayo ni Jehova: “Dikay mapan kadagiti espiritista, ket dikay agkonsulta kadagiti mammadles.” (Levitico 19:31) Intedna dayta a pakdaar tapno protektarannatayo iti impluensia ni Satanas ken dagiti demoniona. Kabusor ida ti Dios ket kayatdatayo a saktan.

AMMUEM TI AD-ADU PAY

Ammuem dagiti nasayaat nga ar-aramiden dagiti anghel, ti pagdaksan ti espiritismo, ken no kasanotayo a maprotektaran ti bagitayo iti impluensia ni Satanas ken dagiti demonio.

Anghel a mangiturturong iti dua a Saksi bayat a mangaskasabada iti binalaybalay.

4. Tultulongan dagiti anghel dagiti tattao a mangam-ammo ken Jehova

Saan a direkta a kaskasabaan dagiti anghel dagiti tattao. Iturturongda ketdi dagiti adipen ti Dios kadagiti tattao a mayat a mangam-ammo kenkuana. Basaen ti Apocalipsis 14:6, 7, sa pagsaritaan dagitoy a saludsod:

Apay a kasapulantayo ti tulong dagiti anghel iti panangasabatayo?
Napabilegka kadi a makaammo a maiturongnaka dagiti anghel kadagiti tattao a masapul a makangngeg iti mensahe ti Biblia? Apay?

Agduduma a banag a konektado iti okulto ken espiritismo, a kas iti maysa a board a maus-usar a mangammo iti mensahe dagiti espiritu, kristal a bola, tarot card, voodoo doll, insienso, anting-anting, ken pangpasuerte.

5. Adaywam ti espiritismo

Kabusor ni Jehova ni Satanas ken dagiti demoniona. Kabusortayo met ida. Basaen ti Lucas 9:38-42, sa pagsaritaan daytoy a saludsod:

Ania ti ar-aramiden dagiti demonio kadagiti tattao?

Ditay kayat a maimpluensiaandatayo dagiti demonio. Basaen ti Deuteronomio 18:10-12, sa pagsaritaan dagitoy a saludsod:

Kasano a padpadasen dagiti demonio a kasarita ken impluensiaan dagiti tattao? Ania dagiti ar-aramid a konektado iti espiritismo a gagangay iti lugaryo?
Panagkunam, husto laeng kadi nga iparit ni Jehova dagiti ar-aramid a konektado iti espiritismo? Apay?

I-play ti VIDEO, sa pagsaritaan dagiti sumaruno a saludsod.

VIDEO: “Busorenyo ti Diablo” (5:02)

Panagkunam, adda kadi pagdaksan ti anting-anting a nakasuot iti anak ni Palesa? Apay?
Ania idi ti masapul nga aramiden ni Palesa tapno maprotektaranda iti impluensia dagiti demonio?

Kanayon a lablabanan dagiti pudno a Kristiano ti impluensia dagiti demonio. Basaen ti Aramid 19:19 ken 1 Corinto 10:21, sa pagsaritaan daytoy a saludsod:

Apay nga importante a perdiem ti aniaman a banag nga adda koneksionna iti espiritismo?

Babai a mangipupuor kadagiti banag a konektado iti espiritismo.

6. Kayam nga abaken ni Satanas ken dagiti demoniona

Ni Satanas ti lider dagiti demonio. Ngem dagiti matalek nga anghel ket idadauluan ti arkanghel a ni Miguel, a sabali pay a nagan ni Jesus. Kasano kabileg ni Miguel? Basaen ti Apocalipsis 12:7-9, sa pagsaritaan dagitoy a saludsod:

Asino ti nabilbileg? Ni Miguel ken dagiti anghelna wenno ni Satanas ken dagiti demoniona?
Panagkunam, masapul kadi nga agbuteng dagiti pasurot ni Jesus ken Satanas ken kadagiti demoniona?

Kayam nga abaken ni Satanas ken dagiti demoniona. Basaen ti Santiago 4:7, sa pagsaritaan daytoy a saludsod:

Kasanom a maprotektaran ti bagim iti impluensia ni Satanas ken dagiti demoniona?

KUNA TI DADDUMA: “Saan met a dakes ti agay-ayam wenno agbuya kadagiti pelikula nga adda espiritismona. Ay-ayam ken pabuya lang met dagita.”

Apay a delikado dayta a kapanunotan?

SUMARIO

Tultulongandatayo dagiti matalek nga anghel. Kabusor ni Jehova ni Satanas ken dagiti demoniona, ket us-usarenda ti espiritismo a mangallilaw kadagiti tattao.